Pagaen’ ngak Somol
Rib t’uf ni ngad pagaen’daed ngak Somol nge fare t’ufeg Rok ngak pifak.
Babyor kug thapeg kafram ni’ir e pi’ e n’en ni ngu weliy mornga’agen. Cha’en nike yoloy e biney e babyor e be marwar nag e mabgol u tempel ngak ba mo’on ni figirngin e kam’. Ir era mang e bin l’agruw figirngin. Ke fith e biney e duwer: ra par rok ulan e tabinaew rok ko bin migid e yafos, fa ra par rok figirngin nge bin somm’on e ppin rok? Ku gog ngak ni nge pagaen’ ngak Somol.
Ngug ul’ul’ nggu weliy mornga’agen ban’en nike buch rok be’ ni gumnang, ngu weliy ya ke pi’ motwon ngog. Nap’an ni yim’ figirngin ni chitinngin pifak, fare mo’on e mobgol bayay. Boech pifak ni kar ilal’gaed e dabunraed fare mabgol ere ranod ngak e fagar rok tabinaw ni’ir reb e tiyugang’ ko Galasia ngar weliyed salpenraed. Tomren nike motoyil ngoraed nge tin ndabunraed, nib ga’ ni mornga’gen e tha’ ko tofen e ya’al nge fare gil’ilungun ku Got ko fare Pufthin Ntomur, biney e tiyugang’ e ga’ar: “Be l’em e laem ko tin nde ga’fan ban’en. N’en ni ngam sapngay e ngam fith ko rayag ni gur ni ngam yib ngram fa dangay. Mu tafney nag ko biney. Fa’an kam taw ngram, gubin riy ab mangil nib pag rogon ni kam tafneynag.”
Rib puluw e biney e fanow! Pagaen’ ngak Somol!
Bo’or e babyor ni kug thapeg, gumnang ni bo’or e gidii’ bay pi duwer ko fare tofen e ya’al ntomren ni kad m’ad nge um’on ni ngad fosgaed ko yam’. Boech e ma lamnag ni fare tofen e ya’al era ul’ul ni woed rogon e tin nu fayleng ban’en nge pi gafgow nibe buchbuch ko biney e yafos. Mang e gadaed manang ni mornga’agen fare tofen e ya’al? Mich u wun’ug ngay ni be’ nima sensey u BYU e weliy e biney ni rib puluw rogon: “Nap’an ni gadaed ra fithed i gadaed ko mang e gadaed manang ni mornga’an fare tofen e ya’al, fulweg ney ni ’gathi rogon ni gadaed manang.’”1
Arragon, gadaed manang ko thin nib thothup ni tomren nike yim’ e dogur rodaed gadaed ra ul’ul ngad pared ni bugi ya’al nibe par u tofen e ya’al. Thin nib thothup e fil ni fare tofen e ya’al e kan ki’yeg ni l’agruw raba’ tin nib “mat’aw” fa tin “nde” mat’aw ko nap’an e yafos nge tin nib togon. Ma ki weliy mornga’agen e ya’al nib thothup ni ma machib gad ngak fapi kan ni ka ni kalbus nag (mu guy ko 1 Peter 3:19; Doctrine nge Covenants 138:19–20, 29, 32, 37). Bin th’abi ga’fan, yi’iy nchiney e ke dag ni murwel ko thapeg era ul’ul ulan fare tofen e ya’al (mu guy ko Doctrine nge Covenants 138:30–34, 58), ma dab ku mun’ed yaran e kalngaen’ romed (mu guy ko Alma 13:27), kan fil ngodaed ni boech e kalngaen’ e rayag ni ngan rrin’ u rom (see Doctrine nge Covenants 138:58).
Fare muruwl ko thapeg u tofen e ya’al ab mu’un e murwel ni ngan pag fapi ya’al ni kan “kalbus” nag. Gubin nbay u tofen e ya’al e woed ni kan kalbus nag. Yi’iy nib ga’ rok President Joseph F. Smith’s, ran pir’eg ulan e section 138 ko fare Doctrine nge Covenants, gidii’ nib mat’aw make yim’, ni yaed ba “gapas” (Doctrine nge Covenants 138:22) nap’an nra bad ko fare fos ko yam’ (mu guy ko Doctrine nge Covenants 138:16), “nap’an nra sapgaed ko fare dogur nike chuw fare ya’al riy ni woed ya’en ni kan kalbusnag” (Doctrine nge Covenants 138:50).
Pi ya’al ni tagan e kibay reb e mitney e kalbus roraed. Bachan e dan kalngaen’ ko denen, yaed bay ni woed rogon ni yog Apostle Peter ngay ni fare ya’al ko “kalbus” (1 Peter 3:19kum guy ko Doctrine and Covenants 138:42 Thin nib thothup e karogned e biney ngay ni “dodow” fa “kalbus” (Doctrine nge Covenants 138:31, 42fa woed “ta’ ni lira yin’raed nga fithik e lomor” ma yaed be “yoer, gel’gel;, ma yaed be wa’achriy nguwelraed” ma yaed be son nag fare foskoyam’ (Alma 40:13–14
Gubin e girdi’ ni bay ni faseg ko yam’ ni bochan e kar ta’ab girdi’gad ngak Yesus Kristus (mu guy ko 1 Corinthians 15:22), kemus nike buch nib thil ngayal’ nge gidii’ riy. Bay fani mada’ ko ngayal’ ney, n’en nibe yog e thin nib thothup ngodaed ni mornga’agen e tofen e ya’al e mornga’agen e murwel ko thap. Rib buch’uw e n’en nike dag. Fare gospel e yibe fil ko gubin mit e gidii’, tin ndawri kalangean’, nge tin nib balyang ni ngayag nra chuwgaed ko fare kalbus miyad yan ko fapi tawa’ath nike tay e Chitamangdaed nfan ngoraed.
Fare tofen-e ya’al nib ta’ab rogon ko tin nib mangil e gidii’ e woed ni ngar songaed—nge sana athapeg ni ngar pii’ e ayuw—fan fare yalen e murwel nu fayleng ni ngayag ni ngar tawfe gaed mayag ngorad fare tawa’ath ko Kan ni Thothup.(mu guy Doctrine and Covenants 138:30–37, 57–58).2 Tiney e pi gam’ing u fayleng e kube pi’ gelngin e pumo’on ni ngar ordain niged miyed tay e gidii’ ni nge muruwel ko office ko priesthood ni ngar ranod nga m’on ni ngar ayuwegned ngar filed mornga’agen fare gospel u tofen e kalbus ko ya’al.
Kemus ni irraray, e n’en nib achig nibe yog fare thin nib thothup ni mornga’agen tofen e ya’al u tomren ni kan m’ad nge fare bin Tomur e Rran ko Pufthin.3 Ere mang e kbay ni gadaed manang ni mornga’agen tofen e ya’al? Bo’or gidii’en e Galasia nike guy ko lik’ay rog ko n’en nima buch fa rogon ni yima aylin tofen e ya’al, machane tiney e thamtham nike buch rodaed e dabyag ni ngan nangfan fan michibnag ulan fare Galasia. Ma, arragon, bo’or babyoren e tiney nike yoloy e gidii’ nikan publishnag ni woed fare babyor ni mornga’agen nike chuchgur ni-ngam’.4
Gubin e pin’ey, ma n’en ni yog D. Todd Christofferson nge Neil L. Andersen ko general conference kafram e rib ga’fan ni ngan tay u wun’uy. Elder Christofferson ke fil: “Thingar ntay u wun’uy ni gathi gubin ban’en nike yog reb e tiyugang’ ko Galasia, tomur fa chiney, e t’ab rogon ko yalen e Galasia. Gadaed manangfan ulan e Galasia ni n’en nike yog reb e tiyugang’ e baga’ nibe yipfan e n’en nike buch rok’ tafney rok, ma dar dugliy fa be yipfan ni fan ngak fare Galasia ni ga’ngin.”5
Ulan reb conference tomur nem, Elder Andersen e fil rogon e biney e yalen: “Fare machib e yibe fil rok gubin fapi 15 gathon fare Bin Somm’on e Presidency nge fare Ragag nge L’agruw. Gathi be mith u yang ko ta’areb e non.”6 Fare family proclamation, e ke sygn nag gubin fapi 15 profets, yi’iy, nge tathogthog, irraray e pow riy ko rogon e biney e yalen.
Woed ban’en ni rib ga’fan ni woed fare family proclamation, fapi machib rok gubin fapi Presidents ko Galasia, ngki chagil ngak boech e profet nge apostles, irraray rogon wo’en e biney. Ku woed tofen fare ya’el, Profet Joseph Smith e pi’ l’agruw i machib u m’on ni ke ma’ e machib rok ni’ir e baga’ nima machibnag e gidii’. Reb e pi machib ney e ran pir’eg ko King Fallett ni gidii’en fare tabinaew nib mangil e yadra pared u t’abang ko fare fayleng ni tofen e ya’al.7 Ma reb e n’en ni yog ko ba game’yag u m’un ni yim’ ulan ere duw nem: “Fapi ya’al nib mangil e kan pi’rad ko muruwel ni th’abi mangil … [ulan] fare fayleng ni tofen e ya’al. … [D]danra palogaed rodaed, ma yaed manang e tafney, thamtham, nge ngongol rodaed, ma yaed ma thamiy e amith rodaed.”8
Ere, fare duwer ni kug fith somm’on ni ngan e ma par e ya’al riy? Fa’an nra ba thil lingan e biney ngom, tafneynag urngin e tirom e duwer, fa tin ni kam rung’ag kafram nike yog be’ nike thumur ni mornga’agen ban’en ni arragon. Ko gubin e duwer ni mornga’agen tofen e ya’al, bay l’agruw e fulweg riy. Somm’on, tay u wun’um ni Got ab t’uf pifak Rok ma ra rrin’ gubin nrayag rok ni fan ngodaed ni gubin. L’agruw, gamnang fare machib u Bible, ni’ir e baga’ nima ayuwegned ko duwer nib bo’or ni dangunang e fulweg riy:
“Mu pagan’um ngak Somol u polo’ i lanin’um, ma ri dab mu toer ko tin ga be finey ni ga manang.
“Ngu’um leamnang SOMOL u fithik’ urngin ban’en ni ga be rin’, me dag ngom e bin mat’aw e kanawo’” (Proverbs 3:5–6).
Boed rogon, Ke mu’ e milwol rok Nephi ko thin ney: “O Somoel, kug pagan’ug ngom, ma nggu pagan’ug ngom ni gubinfen. Dab gu tay e pagaen’ rog nga pa’ e dowef” (2 Nephi 4:34).
Rayag ni ngaed laemniged e n’en nibe buchbuch ko tofen e ya’al, fan weliy mornga’agen e tiney e duwer ngak be’ ulan e tabinaew fa ngak be’ nibe nangfan. Machane dabda machib nigead e tiney ni woed ni ni’ir fare michib ko fare galasia. Ya ran rrin’ e biney ma ra tharbiy fare muruwel rok Somol ma rayag nra kirebnag e tafbey rok boech e gidii’ nibe sapnag mornga’agen fare yi’iy rok ni bayi pi’ Somol ngodaed ni gubin. Taga’ ko tin ni gadaed manang ban’en e rayag ni nge palog nagdaed ko tin ni gadaed be fil ma ra polog nagdaed ko n’en nra ayuwegdaed ngad darod nga m’on.
Pagaen’ ngak Somol ab michib nib riyul ko Fare Galasia ku Yesus Kristus nifan ko Gidii’ Rok ko Tin Tomur e Rran. Irraray e machib rok Joseph Smith nap’an fapi gidii’en Kristus ni somm’on nib gel e gafgow nra ted.9 K’irraray e bin th’abi mangil e machib nrayag ni ngad rin’ed nap’an ni gadaed be yan u fithik e gafgow ndawrin dag ngodaed fan dugliy ni ke bang fare machib ko Galasia.
Biney e machib ab t’ab rogon ko duwer ndan ninged e fulweg riy ni woed e m’ag ko bin migid e yafos ni bachan e tin nibe buchbuch u roy u fayleng. Bo’or ban’en ndar nanged ere rib t’uf ni ngad pagaen’daed ngak Somol nge fare t’ufeg Rok ngak pifak.
Ko gubin ban’en ni kug weliy, n’en ni gadaed manang ko mornga’en tofen e ya’al e fare muruwel Rorow e Chitamangiy nge Fak be ul’ul’ u rom. Tathapag rodaed e rrin’ e biney e muruwel ni fan ngak e gidii’ ni yaed ba kalbus (mu guy ko 1 Peter 3:18–19; 4:6; Doctrine and Covenants 138:6–11, 18–21, 28–37), ma re muruwel ney e kabe ul’ul i yan ma gidii’ ni kan per’eg nib mat’aw e be fil fare gospel, nib mu’un mornga’gen e kalaen’ngay, ngak e pi gidii’ ni kab t’uf ni ngan be’ech nagraed (mu guy Doctrine nge Covenants 138:57). Ta’ e ban’en ni be weliy ulan babyoren e Galasia, e yi’iy ni pii’ ngodad u ningyal’ daba’.
“Gidii’ nike yim’ nike kalngaen’ e ran thapeg nag, ni fa’an yaed ra fol ko fapi yalen ko nu’un rok Got,
Nge tomren ni kar pi’ed pilwon fapi magawon rorad ni kar rrin’ed, ma kan be’ech nagarend, ma ran tawa’ath nagraed ko rogon fare muruwel roraed, ya yaed pi gidii’en e thap” (Doctrine nge Covenants 138:58–59).
Muruwel rodaed e ngad filed fare gospel nikan fulweg bayay, fol ko fapi motochiyel, t’ufeg min ayuweg e gidii’, nge rrin’ e muruwel ko thap ulan fapi temple nib thothup.
Gube micheg e pin’en ni kug weliy mornga’gen nib riyul’ nge tin nira fil ko re conference ney. Rayag e tiney ngodad ni bachan fare Bayul ku Yesus Kristus. Woed rogon ni gadaed manang ko fare yi’iy ni kan pi’ ngodaed, Ke “tayfan e Chitamangin, ma ayuweg gubin fapi muruwel rok nike rrin’ ngapa’” (Doctrine nge Covenants 76:43; kan uneg ngay). U dakean fithngan Yesus Kristus, amen.