Bujen ko ippān Anij Rekajoorļo̧k, Kōjparok, im Kōpooj Kōj n̄an Aiboojoj eo Indeeo
Ilo ad kāālet n̄an kōm̧m̧ani bujen ko im kōjparoki, jenaaj jeraam̧m̧an kōn eļap m̧ōņōņō ilo mour in im mour aiboojoj indeeo eo ej itok.
Kōrā ro Jeiū im jatū, ej juon menin mōņōņō ilo ad aiintok doon ilo aolepān lal in ilo jem̧doon an kōrā ro! Āinwot jet kōrā ro rej kōm̧m̧an im kōjparok wōt bujen ko ippān Anij, jej ippān doon ilo ad kajedeede jetōb eo me ej jipan̄ kōj ilo ad ioon lōkapokpok ko ilo raan ko ad im kōpooj kōj n̄an Itok eo an Jisōs Kraist Kein Karuo. Im dāpij wōt bujen ko enaaj kōm̧m̧an ad erom jet kōrā ro renaaj jet waan jon̄ak ro remaron̄ kepaaktok ro jet n̄an Rilo̧mo̧o̧r.
Ro emōj aer peptaij bujen eo me jej jamin meļo̧kļo̧k raan eo n̄an bōk ioon etan Jisōs Kraist, n̄an keememej E iien otemejej, n̄an kōjparok kien ko An, im n̄an jerbal n̄an E n̄an jemļo̧kin. N̄e jej kōm̧m̧ani men kein, Jemedwoj Ilan̄ ej kallim̧ur n̄an joļo̧k bōd ko ad im letok n̄an kōj kampānien an Jetōb Kwojarjar. Kōjeraam̧m̧an kein rej likūt kōj ilo ial eo bwe, eļan̄n̄e jenaaj būn m̧aanlo̧k im niknik n̄an jemļo̧kin, enaaj kōtļo̧k kōj n̄an mour Ippān im eo Nejin ilo aelōn̄ eo an celestial. Aolep ro emōj aer kar peptaij kar leļo̧k kallim̧ur in kōjeraam̧m̧an kein im maron̄ eļan̄n̄e enaaj kōjparok wōt bujen ko kar kōm̧m̧ani ilo raan eo aorōk.
Ro rej kōm̧m̧an bujen ko ilo tampeļ naaj bōk kajoor in kallim̧ur ilo tōmak eo an make. Jej kallim̧ur n̄an pokake kien ko an Anij, mour kōn gospel eo an Jisōs Kraist, mour kwojarjar, im lelok iien ko im tōļan ko ilo jerbal eo an Irooj. N̄an ukōt tok, Anij ej kallim̧ur kōn kōjeraam̧m̧an ko ilo mour in im letok iien n̄an ro̧o̧lļo̧k n̄an Ippān.1 Ilo ad wōnm̧aanļo̧k, ej letok, ak menin letok kwojarjar, kajoor eo n̄an jeļā ikōtaan m̧ool im jirilo̧k, ikōtaan jim̧we im bōd, io̧ļap in pok im anikien ko renana rej nitbwil kōj. Ej juon menin letok eaiboojoj!
Ilo m̧aanjabpopo n̄an tūreep eo aō jinoin tata n̄an tampeļ, jinō im Doulul eo an Kōrā ro ewōr aer imminene rekar jipan̄ n̄an kāālet men ko inaaj aikuji, ekoba nuknuk eo aiboojoj n̄an iien eo. Ak kōpopo eo eļap an aorōk ekar itok m̧okta jān jeļā ta eo n̄an kanōke. Ālikin kōnono ippa n̄an lale ij ke weppān, bisop eo ekar kōmeļeļe kōn bujen ko inaaj kōm̧m̧ani. Tiljek in kōmeļeļe ko an rekar letok iien n̄an aō ļōmņak kōn im m̧aanjabpopo n̄an kōm̧m̧ani bujen ko.
Ke raan eo ej itok, ikar bōk koņaaō kōn juon en̄jake in kam̧oolol im aenōm̧m̧an. Mekarta ikar jab lukkuun meļeļe kōn aolepān aorōk in bujen ko ikar kōm̧m̧ani, ikar jeļā bwe ikar etetal ippān Anij ilo bujen ko im kar kallim̧ur kōjeraam̧m̧an ko imaron̄ meļeļe kaki rekwojarjar eļan̄n̄e inaaj kōjparoki. Jān wōt en̄jake eo jinoin, imaron̄ wōnm̧aanļo̧k n̄an ba bwe kōjparok bujen ko jekar kōm̧m̧ani ippān Anij ej kōtlo̧k kōj n̄an etal ilo kajoor eo an Rilo̧mo̧o̧r eo, eo ej kōkajoor kōj ilo mellijon̄ ko ad renaaj baj wōt waļo̧k, letok kōjparok jān im̧we eo an rikapo eo, im kōpooj kōj n̄an aiboojoj indeeo.
Men ko jej iooni rej āinwōt in jen mōņōņō n̄an būromōj, jān boktak n̄an aiboojoj. Men kein rej jipan̄ kōj kōļapļok meļeļe eo kōn iakwe eo an jemed ejjeļo̧k jemļo̧kin im jon̄an n̄an oktak kōn menin letok an Rilo̧mo̧o̧r ej aenōm̧m̧an. Kōjparok bujen ko ad ej kōtļo̧k bwe kajoor eo an Rilo̧mo̧o̧r eo en karreo kōj ilo ad ekkatak ilo imminene—men̄e enej juon ekājet edik ak juon likjab eļap. Ad Ripinmuur epād ijōn n̄an baur kōj n̄e jej wōtļo̧k eļan̄n̄e jej reilo̧k n̄an E.
Kwonan̄in ke kar jutak ilo juon jikin eutiej im neem ej pād ilo torerein im likūm ej pād ilo ron̄ eo ilal? Tallōn̄, jekdoon n̄e kwojeļā ke kwoj koneek n̄an juon kein jerbal in to epen ak juon kien jerbal emaron̄ bokļo̧k kwe n̄an kōjparok, jutak ilo tōrerein emaron̄ lukkuun kakumkum. Kaliktak ilo jikin in uteij im pidodo n̄an mejatoto ebōk lōke ilo juon an̄kō eo emōj kapen n̄an juon kein jerbal ejjab m̧akūtkūt. Ebok lōke ilo juon armej eo enaaj likūt kein dāpdāp eo ilo am wanlaltak. Im men̄e kein jerbal ko rej lewaj n̄an eok jejjo maron̄ ko n̄an dādep, ej aikuj lōn̄ am lōke bwe eo m̧ōttam eban kōtļo̧k bwe kwon wōtļo̧k.
Ij keememejļo̧k aō tallōn̄ ippān jet kurup in jiron̄ ro. N̄a eo jinoin tata ilo kurup n̄an etal. Ke ij wanlikļo̧k ilo ijo uteij, ikar kaju wōtļo̧k ilo ejjeļo̧k kantōro̧o̧ļ. Kam̧oolol, to eo ekar rōlļo̧k im jon̄an iim in aō kar wōtļo̧k im kar bōjrak. Ke ij etoto laļļo̧k lukoļapen dōka ko rekkan̄, ikar kanooj jar kōn jabdewōt eo ak jabdewōt ta eo ej dāpij eō jān wōtļo̧k n̄an dōka ko ilaļ.
Tokālik, ikar ekkatak aeen in dāpdep eo ekar jab lukkuun pen, im ke ij wanlaļlo̧k ilo torerein, armej eo ej kōjparok e n̄an jān aō wōtļo̧k ekar okjak n̄an likin im kar kanōke n̄an torerein ijo euteij. Jejab lukkuun jeļā, ekar keeņe neen ņae jet dōka. Dāpdep ilo jōkjōk eo ej pād ie, ekar maron̄ jidik kōn jidik lelaļļo̧k n̄a, pā ioon pā, ilo to eo. Mekarta iaar jab loe, ikar jeļā bwe ekar jerbal kōn aolepān kajoor eo an n̄an lo̧mo̧o̧ren eō. Bar juon mōtta ej pād ilaļ tata in ijo euteij, pojak n̄an baur n̄a eļan̄n̄e to eo enaaj jako jān an dāpdep. Ke ikar itok ijo emaron̄ jibwe eō, ekar baur kein jerbal ko ippa im lelaļļo̧k n̄a n̄an laļ.
Ippān Jisōs Kraist ej ad an̄kō im mōttad eo ejejjōt, jej inem̧m̧an kōn iakwe eo An ekajoor ilo mālijjon̄ im bōk lo̧mo̧o̧r ilo ie. Būreejtōn M. Russell Ballard ej katakin: “Tōmak ilo Anij im ilo Nejin, Irooj Jisōs Kraist, ej … an̄kō eo ej aikuj pād lo mour ko ad n̄an dāpij kōj mōkaj ilo iien ko reppen im marok. … Ad tōmak … ej aikuj pād io̧lap ippān Jisōs Kraist, an mour im pinmuur eo an, im ilo jeplaaktok eo gospel eo an.”2
Kein jerbal ko an jetōb me rej dāpij kōj jān ad rub jān dōka ko an rikapo eo ej naan in kam̧ool eo ad kōn Jisōs Kraist im bujen ko jej kōm̧m̧ani. Jemaron̄ kōjatdikdik kōn men ko rej tōl im bōk kōj n̄an jikin jokane. Āinwōt juon mōttad, Irooj ejjab kōtļo̧k kōj bwe jen wōtļak jān e. Jekdoon ilo iien en̄taan im būromōj, E ej pād n̄an kotak im rōjan̄. Kajoor eo An ej jipan̄ kōj mour jān kāālet ko ekka aer kabūromōjmōj jān ro jet. Kōn menin, jej aikuj likūt ion aeran im kōm̧m̧an bwe to eo en lukkuun pen loklok eo ie. Jej aikuj kāālet bwe jen an̄kō ippān Rilo̧mo̧o̧r, n̄an ad epaake kōn bujen ko ad.3
Ekōjkan ad kajoor kōn an̄kō eo? Jej jar kōn būro ettā, ekkatak im linūri jeje ko rekwojarjar, bōke kwojkwoj ippān jetōb in ukweļo̧k im kauteij, niknik n̄an kōjparok kien ko, im ļoore ko̧o̧njeļ ko an rikanaan. Im ilo ad kakūrm̧ool jerbal ko ad aolep raan ilo wāween “utiejļok im erreoļok”4 jej erōm eļapļo̧k ad koneek ippān Rilo̧mo̧o̧r eo, ilo ejja iien wōt, jipan̄ ro jet itok n̄an E.
Ewi jōkjōk in “utiejļok im erreoļok” ilo wāween lale? Jej kajjieon̄ n̄an mour kōn gospel eo ilo aolepān leiaia ko ad. Jej ke kea kōn ro rej aikuj ilo ad lukkuun jerbal in karejar, kwaļo̧k iakwe ilo jerbal in jipan̄. Jej kwaļo̧k nuuj eo em̧m̧an kōn gospel in ippān ro rej aikuj aenōm̧m̧an im kajoor im “jan jeļā ia n̄an pukōte.”5 Jej jerbal n̄an kobaiki baam̧le ko n̄an indeeo eo an jait ko an rōn̄ōl. Im ro emōj aer kōm̧m̧an bujen ko ilo m̧weo im̧ōn Irooj, āinwōt Bureejtōn Russell M. Nelson ej kōmeļeļe, “Kajjojo tampeļ patron ro rerūtto renaaj kōņake kaarmen ko rekwojarjar an priesthood eo, [eo] … ej kakeememej kōj … n̄an etetal ilo iaļ in bujen eo kajjojo raan ilo juon wāween eutiejļo̧k im ekwojarjarļo̧k.”6 Makūtkūt kein rejjab m̧akūtkūt aorōk wōt ak rej m̧akutkut ko jej kōm̧m̧ane kajjojo raan n̄an ad mōņōņō—im lan̄lon̄ n̄an indeeo.
Ejjeļo̧k men eaorōk ļok n̄an eddōkļok eo n̄an indeeo jān kōjparoki wōt bujen ko ippān Anij. Eļan̄n̄e bujen in tampeļ ko rej pen, jemaron̄ lōke m̧ōņōņō n̄an ippān doon ippān ro jej iakwe ilo ijo turājet. Ajri eo ak mama im baba ak eo pālele eo emōj an etal jān mour in ej kōjatdikdik kōn aolepān būruōn bwe e naaj juon eo em̧ool n̄an bujen ko me ej dāpij eok ippān doon. Eļan̄n̄e jej joļo̧k ak jidik wot bujen ko ippān Anij, jej likūti liape indeeo eo ilo kauwōtata. Kiiō ej iien n̄an ukweļo̧k, kajim̧we im bar kajjieon̄.
Mōņōņō ej juon men eo ejjeļo̧k kobban n̄e jenaaj jenij i kōjeraam̧m̧an eo an lan̄lon̄ indeeo n̄an jidik wōt ien. Jekdoon iiō ko ad, en̄in ej lukkun m̧ool eo: kii eo n̄an m̧ōņōņō ejjeļo̧k jemļo̧kin ej mour kōn gospel eo an Jisōs Kraist im kōjparok bujen ko ad. Rikanaan eo ad, Būreejtōn Nelson, ekar kwaļo̧k bwe “kwōn eo āliktata im ad make niknik mōņōņō eo ad indeeo ej ilo jibwe aen in dāpdep eo n̄an kōjepļaaktok gospel eo an Jisōs Kraist, kadedeļok ippān bujen ko im kain̄i ko. N̄e jej kōm̧m̧ane āindein, jemaron̄ jerakrōk ilo ine em̧m̧an ilo dān ko ren̄n̄at kōnke ewōr ad maron̄ n̄an kajoor eo an Anij.”7
Elōn̄ iaad rej ioon limaajņōņō. Ilo am̧ em̧akūtkūt kōn ņo̧ in kapo ko im jet iien pilo jān kajoor in dānin mejād eo ej itok ilo iien ko repen, jej jab maron̄ jeļā ia eo n̄an tōl kein anōōn eo ad ilo ļoon in mour eo ad. Jemaron̄ jab ļōmņak ewōr ad kajoor n̄an tōpar ļo̧k āne. Keememej wōn kwe—juon nejin Anij ejitōn bōro—etke kwoj pād lal in, im kōttōbar eo am n̄an mour ippān Anij im ro kwoj iakwe er emaron̄ kalikkar visōn eo am im jiton̄ļo̧k kwe ilo ial eo ejim̧we. Ilo būlon kōto ko reļļap, ewōr juon meram emeram ej kwaļo̧k ial eo. “N̄a meram eo ej romaak ilo marok,” Jisōs ekar ba8 Eļap ad jeļā kōn kōjparok n̄e jej kalimjōk meram eo an im likūt lo bujen ko ad.
Ej juon menin uteij n̄an ioon aolep kōrā ko ilo aolep iiō ko ilo kajjojo men ko iooni reļļap ro rej kōjparok bujen ko aer. Kajjojo raan, rej reiļo̧k n̄an Irooj im rikanaan ro An n̄an tōl, ijjeļo̧kin n̄an media ko rebun̄bun̄. Merkarta kajjojo apan̄ ko aer im jorāān in katak ko an laļ in rej kajjieon̄ n̄an kabōjrak er n̄an kōjparok bujen ko aer, relukkuun kajoor n̄an aer pād wōt ilo ial in bujen in. Rej pedped wōt ioon kallim̧ur eo an “aolep men [ko] an Jema.”9 Jekdoon iiō eo am, kajjojo kom̧ kōrā ro emōj aer kōm̧m̧an bujen ippān Anij ewōr an maron̄ n̄an kotak meram eo an Irooj im tōl ro jet n̄an E.10 Ilo am kōjparok bujen ko am, Enaaj kōjeraam̧m̧an eok kōn kajoor eo an priesthood im lewaj n̄an eok m̧wilal in men ko ioon aolep ro kwoj kōm̧m̧ao ippāer. Būreejtōn Nelson ar kwaļok, kom̧ kōra ro renaaj kwaļo̧k naan in kanaan ko emōj kar kwaļok!11
Ro jeiu im jatu, ilōn̄ in men otemjej, pād wōt ilo iaļan bujen ippān Jisōs Kraist! Jejeraam̧m̧an kōn itok eo ad n̄an lal in ilo iien eo tampeļ ekar pādjake lal. Kōm̧m̧an im kōjparok bujen ko an tempaļ epeļļo̧k n̄an aolep membōr ro rerreo ilo Kabun̄ in. Rum̧m̧an ded ro, kwojjab aikuj in kōtar n̄an m̧are ak juon mijen n̄an kōm̧m̧ane bujen ko rekwojarjar. Komaron̄ kōpopo āinwōt juon jiron̄ n̄an bōke kōjparok im bujen kajoor tampeļ ej letok ālikin wōt am 18 iiō ilo am pojak im en̄jake ikdeelel n̄an kauteij bujen ko ilo tampeļ.12 Kwe eo eōj bōke kōjeram̧m̧an ko an tampeļ, jab kōtļo̧k bwe ro rej kapo ak kein mad ko ren kanōke kwe jān m̧ool kein n̄an indeeo. Katak im kajjitōk ippān kein jipan̄ lōke n̄an eļapļo̧k meļeļe kōn bujen ko reaorōk rekwojarjar emōj am kōm̧m̧ani. Kōmmakijkij in etal n̄an tampeļ jon̄an wōt am maron̄ im ron̄jake Jetōb. Kwonaaj en̄jake lukkuun m̧ool eo em̧m̧an bwe kwoj pād ilo ial eo an Irooj. Kwonaaj loe peran eo n̄an wōnm̧aanļo̧k barāinwōt n̄an bōktok ro jet ippem.
Ij kam̧ool ilo ad kāālet n̄an kōm̧m̧ane bujen ko ippān Jemedwōj Ilan̄ im bōke kajoor eo an Rilo̧mo̧o̧r eo n̄an kōm̧m̧ani, kwonaaj jeram̧am̧an kōn eļapļo̧k m̧ōņōņō ilo mour in jān jon̄an eo jemaron̄ pijaikļo̧k im aiboojoj eo an mour indeeo ej itok.13 Ilo etan Jisōs Kraist, amen.