Fare Gelngin e Mithmith nib Thothup
Gu ba’adag ni nggog laal ban’en nrayag ni ngad rrin’ed nra ayuwegdad ngad ul’ul’gad ko tin ni mat’aw e mithmith nib thothup.
Brothers nge sisters, gamed btu’uf rog. Ri gub falfalaen’ ngay ni nggu non ngomed e daba’. Guma meybil ni gubin e rran ni ngan ayuwegnem ko fapi lumel ni be yib rok’ mo’oniyan’ min pii’ gelngim ngam ul’ul’ nga mm’on ndemuturug e n’en nibe buch rom.
Boch e gafgow e karimus ni yigo gur e rayag ni ngan thamiy ma dariy bee’ nrayag ni nge guy. Ma boch e rayag ni ngan guy ni be buch u daken e fayleng. Ni wod e n’en ni be buch u Europe. Gathi ta’ab biyay ni kug un nga Ukraine nge Russia. Gube’adag e gali nam ney, gidii’ riy, nge rogon e thin rorow. Gube yor ma gube meybil nag e gidii’ ni kar gafgowgad ko binem e mael. Galasia e be pii’ e ayuw u gelngin nrayag rodad ni ngan ayuweg e pi’in ni be gafgow ni be gay rogon ni nge par nib fos. Gamad be pining e gidii’ ni gubin ni ngan meybil min blay nag e abich ni fan ngak gubin gidii’ nike gafgow ko biney e mael. Gubin mit e mael e rib kireb ko tin nike michib nag Somoel Yesus Kristus nge tin nike michib nag.
Dariy bagdad nrayag ni nge thilyeg reb e nam fa rogon ngonglan bee’ ni ku wod ndabiyag ni ngad thilyegned bee’ ulan e tabinaew rodad. Machane gadad e rayag ni ngad gagiyeg niged gadad. Mulwol rog e daba’, pi brothers nge sisters, e ngad talagned e kireb ni be sug ulan gum’richa’em ko tabinaew rom nge lan e yafos rom. Mu k’iyag gubin e amith nike rrin’ bee’ ngom—demuturug ko amith ko damomuw, thin ku bee’nib kireb ngom, fa fananikan ngak bee’ nike amith nigem. Fare Tathapeg ke gaʼar ngomed, dab mu togopluw niged e kireb,1 mu tʼufeged e pi toʼogor romed, ma ngam falʼeged waʼathan e piʼin ni yaed be ger nagmed.2
Rib gel e amith mab momaw’ rogon ni ngan pii’ keru’uy ko damomuw ni fa’anra dawrin fal’eg e tin ndani fel’ u wun’dad. Wod ni momaw’ rogon ni ngan n’agfan ko gidii’ ni yad be gafgow nag e gidii’ ndariy ban’en ni kar rrin’ed nib kireb. Machane demuturug rogon, ke dugliy fare Tathapeg ngodad ni ngad “n’agfan e kireb ko gidii’ ni gubin.”3
Gadad e pi gachalpen fare Pilung ko Gapas. Chiney e kari gel e tu’uf riy, nib tu’uf rodad ere gapas ney nikemus ni’ir e rayag ni nge pii’. Uw rogon nrayag ni nge yib e gapas nga fayleng ko napan, nra bee’ ma dar gay e gapas nge tin nib munguy? Brothers nge sisters, gu manang ni n’en ni gube yog e dani mom. Machane gachalpen Yesus Kristus e susun ni ngar daged e kanawo’ nib fel’ ngak e fayleng ni ngar laked. Gube wenig nag ngom ni ngam rrin’ ni gubin nrayag rom ni ngam taleg e tin ni gabe thamiy ulan gum’ircha’em ndani fel’ nga tin dani fel’ ulan e yafos rom.
Son nggu weliy e biney ni ku gog ni ngan rrin’ ni nggu weliy ni wod rogon ba gosgos ko basketball ni ku guy ya’an ndawri n’uw napan.
Ko binem e gosgos, luk’ungun ere gosgos nem ma fagli team, e be thilthil rorow ko en nibe gel. Ma, napan nike gaman laal e second ni kabay, ma bee’ ko reb fagli team e yon’ fare bat’ ngayag ngorad e dalip e point. Ma napan ni kemus ni ta’areb e second e ke magay, me iring bee’ fare bat’ ma yon’ ngalan fare dug riy me non lingan fare buzzer. Ere yan fare team ngalan e singgil ko locker ni yad mm’on ni aningeg e point ni biney e mithmith e pii’ e athamgil ngorad. Ere yag nra ul’ul’gad ko biney e mithmith ni pii’ gelnginrad ngar gelgad ko fare gosgos.
Mithmith a ban’an ni rib gel fan. Gadad gubin nike buch rodad ni wod rogon e biney—wod e, ba karo ni ke papay fa wod ban’en nde fel’ u wun’um min tuwthin nag.
Ere nggu fith, mang e rayag ni nge tabab nag e mithmith nib thothup? Kad guyed boch ban’en nima tabab nag e mithmith nib mat’aw nge tin nde mat’aw. Gadad manang bee’ nima leak Yesus Kristus ni ul’ul’ nge gaa’ e mich rok’. Wod ni ka gadad manang bee’ ni somm’on riy e ba gel e mich rok’ machane chiney e ke mul. Mithmith e rayag nra thil e gin nra fekdad ngay.
Chiney e kari gel e tu’uf ko tin nib mat’aw e mithmith nib thothup, ni nge wod payngin fare mo’oniyan’ nge fapi pow nibe yib i m’ug nib alamrin. Mithin nib mat’aw nib thothup ere ayuwegdad ngad ul’ul’gad nga mm’on ndemuturug e tin ni yibe rus ngay nge tin nibe garar u daken e fayleng, n’ew nibe yib nga daken e binaew, volkanu nibe po’ e nifiy riy, nge salthaw nibe gafgow nag e gidii’. Mithmith nib thothup e ba gel ko, tin ba’aray e cham nima yib rok’ mo’oniyan’ ma ku ma taleg e muruwel rok’ nibe gay rogon ni nge gathay e def rodad nib thothup.
Bo’or e ngongol nrayag ni nge tabab nag e mithmith nib thothup. Fol, tu’ufeg, gumaen’, pigpig, nge pining e magar4 e inn kanawo’en nib achig.
Daba’ e gu ba’adag ni nggog laal ban’en nrayag ni ngad rrin’ed nra ayuwegdad ngad ul’ul’gad ko tin ni mat’aw e mithmith nib thothup.
Bin somm’on: Mu sul ko fare pi’ i kanawo’en e m’ag mag par u rom.
De n’ew napan ni, kug lik’ay ni kug mada’ nag ba ulung nib ga’ nib sug e gidii’ riy. Kar fithed ngog e duwer nib bo’or, tin ni yo’or ko fare duwer e gidii’ nibe fith mornga’agen e kanawo’ ko micheg nge mang fan ni rib ga’fan.
Ulan e lik’aey rog, kug weliy ni ngad dared ulan e kanawo’ ko micheg ufithik’ e tawfe nge fal’eged e bin somm’on e micheg ngak Got.5 Urngin yay ni gadadra fek fare sakrament, gadad be micheg biyay ni ngad feked fithingan fare Tathapag nga dakeandad, ma nge gubin e ngiyalʼ me yib uran ngoraed, min fol ko pi motochiyel rokʼ.6 Ma arram, ni Got ere micheg ngodad ni gubin ngiyal’ ma ra par fare Thothup rok’ Somoel rodad.
Boch nga mm’on ma gadadra ul’ul’ ngad ngongliyed boch e m’ag u temple, ni irreram e gin ni bay ku thapegned boch nikan micheg nag. Gam’ing nge m’ag e ma pii’ ngodad bugi gelngiy ni wod e got. Fare kanawo’en e m’ag e karimus kanawo’en array nra fekey ko yafos ni gubinfen nge n’uf nigey ngalang ko falfalaen’.
Ulan e lik’aey rog, fith be’ nib bpin ko urogon be’ nike kireb nag e motochiyel rok’ e rayog ni nge sul ko fare pi’i kanawo’. Fulweg rog ko duwer rok’ e bay ko bin l’agruw e thin ni ban ni nggog:
Mu gay e falfalaen’ ko kalngan’uy ni gubin e rran.
Uw fani gaa’fan e kalngan’uy? Alma e michib nag ni thingarda “dabra machib niged banʼen ma kemus ni kalngaenʼ nge mich ngakʼ Somoel.”7 Kalngaen’uy e rib tu’uf ni facha’ e ba’adag e falfalaen’ ni gubinfen.8 Dariy reb ngay makemus rogon array. Reb e yi’iy nthogthog nag ngak Profet Joseph Smith, e Somoel e puwan’ ngak e tiyugang’ ko Galasia ni bachan e danra michib niged fare gospel ngak pi fakrad.9 Kalngaen’uy e ir fare kiy ko mo’onog. Mich nib polo’ e ir e ma ul’ul’ nagdad u daken fare pi’ i kanawo’en e m’ag.
Wenig damrus ma dam mu saga’alnag e kalngaen’ rom. Satan e ri ba’adag e kirbaen’ rom. Mu tal’eg. Mu chuweg fapi gagiyeg rok’ ulan e yafos rom! Mu tabab e daba’ ni ngeyag ni ngam thamiy fare falfalaen’ ni ngam pag e gidiiʼ nib fekyath.10 Gubin ngiyal’ ma gadad btu’uf rok’ fare Tathapeg machane rib ga’ ni ngiyal’ ni kad kalngaen’gad. Ke micheg ni demuturug rogon “pi burey e bayi mʼay nge pi yungi ted e bay ni chuweg … machane wurengaenʼ rog e dabi chuw romed.”11
Faʼanra kam thamiy ni kam palog ko fare piʼi kanawoʼen e mʼag fa ke nʼuw napan ma dariy kanawoʼen ni ngam sul, biney e dani riyilʼ.12 Wenig mu non ngak e bishof rom fa branch president. I ir e ma muruwel u tan paaʼ Somoel mara ayuwegnem ngam thapeg e falfalaenʼ nge gapas ko kalngaenʼuy.
Chiney, chiyliy ko ba kal ayuw: Sul ko fare piʼi kanawoʼen e mʼag e dar yipʼ fan ni ra mom e yafos rom. Biney e kanawoʼ e rib gel e momawʼ riy mara taw nga bingyalʼ ma wod ni gabe yean ni gabe sor ngalang.13 Biney nra buch, e bay, ni kan tay ni nge sikeng me fil ngodad, me ayuwegdad, ni ngad manged gidiiʼen Got. Ireray ni karimus wo’en nra fekey ko nin thʼabi nʼuf ngalang e falfalaenʼ. Ta’arreb e profet14 nike weliy e “tawaʼath nge falfalaenʼ rokʼ e piʼin ni yaed mafol ko fapi motochiyel rokʼ Got. Ya muguyed, kan tawaʼath nagraed u fithikʼ gubin banʼen, ni lʼagruw mit, ni tinu fayleng nge tinu tharmiy; ma faʼan yaedra athamgil nge madaʼ ko tomur ma yaedra thap nga tharmiy … [e] yaedra paer riy rokʼ Got u fithikʼ e falfalaenʼ ni dariy nʼumngin i napʼan.”15
Yan u kanawoʼen e mʼag, nib muʼun e kalngaenʼuy ngay ni gubin e rran, era suguy e tin nib matʼaw e mithmith nib thothup.
Bin dalip e nʼen ni ngog: Mu fil morngaʼagen Got nge rogon ni ma muruwel.
Reb e banʼen ni danur nangfan e dabay e rogon Got nib thil e tirokʼ banʼen ku Moʼoniyanʼ. Arram fan ni chiyliy nagdad Somoel ni ngad “ngan meybil ni gubin ngiyal’, … ni ngeyag ni da gel [gad] ngak Moʼoniyanʼ, min … chuw u tan paʼ e ta pigpig rokʼ Moʼoniyanʼ ni yad be rrinʼ e muruwel rokʼ.”16
Moses nike pii’ kanawoʼen e biney ni fil e tin nib thil u thilin Got nge Moʼoniyanʼ. Napan ni yib Moʼoniyanʼ ni nge yib i lumel nag Moses, me nang ni beʼ nib sasalapʼlugun ni bachan e fan gi muʼ i non ngak Got. Me nang Moses Moʼoniyanʼ me motochiyel nag ngak ni nge chuw.17 Napan nibe gel nag Moʼoniyanʼ ir ni dabi chuw, manang Moses rogon ni nge pining Got ni nge piiʼ e ayuw ngak. Yib gelngin Moses nib thothup me yag ni chuweg fare moʼoniyanʼ biyay, ni gaʼar, “Mu chuw rog, o Moʼoniyanʼ, ya karimus ni bay taʼareb e Got niʼir e gura liyor ngak.”18
Gadad gubin ni thingarda laked e biney e woʼen. Mu chuweg e gagiyeg rokʼ Moʼoniyanʼ nge chuw ulan e yafos rom! Wenig ri dam mu un ngak nge fekem ko “fare dodow ko gafgow ni dariy nʼumngin i napʼan.”19
Tamdag payngin nib papay, mich ni danir ayuweg nge gaaʼ ni gubin e rran “fare thin nib mangil rokʼ Got”20 era yib i aw nga buttʼ nge wear. Arrogon, fare falay nra gel ngak Moʼoniyanʼ e ba tamilang yaʼan: gadad ba tuʼuf ni ngan liyor ngak Somoel ni gubin e rran min fil fare gospel rokʼ. Gube wenig nag ngomed ni ngam piged Got ni nge gagiyeg nag e yafos romed. Mu piiʼ boch e taym rom ngak. Ya napʼan ni gara rrinʼ, mu guy ko mang era buch ko tin ni matʼaw e mithmith rom nib thothup.
Bin ni aningeg: Mu gay maga son nag e maʼangʼang.
Moroni e micheg nag ngodad ni “Got e dawori tal imang ba Got ko maʼangʼang.”21 Gubin babyoren e chep nib thothup e be dag ni Somoel e ma yib ngak e piʼin ni michan’ e rayag e yafos riy ngomed u fithingan.22 Kʼiyeg farengi Day nib Rowrow ni fan ngak Moses, ayuweg Nephi nge fek fare brass plates, nge Galasia rokʼ ni fulweg u daken fare Profet Joseph Smith. Ra reb e pi maʼangʼang ney ma bay e ngiyalʼ riy ma bay ni gathi ri arram rogon ni ke fith e pi chanʼey ngak Somoel ni nge rrinʼ.
Ku taʼab rogon, Somoel era tawaʼath nigem ko maʼangʼang ni faʼanra michuwunʼum ngak, “ni dar maerwaer u waenʼ.”23 Mu rrinʼ e muruwel nib thothup ni ngam thapeg e maʼangʼang. Meybil ngak Got ni nge ayuwegnem ngam mithmith nag e mit ney e mich. Gube micheg nrayg ni nge buch rom ni ngam nang ni Yesus Kristus e “ma pi’ gelngin e pi’in ndakuriy gelngirad ma ka ra magaergad.”24 Riʼin i nʼen nra papay nag fare mithmith rom nib thothup ni gara nang ni Somoel e be ayuwegnem ngam rrinʼ e tin nib gel e momawʼ riy ulan e yafos rom.
Bin laal: Mu taleg e kireb ulan e yafos rom.
Nggu sul biyay u daken ni gube yog ni ngam talag e kireb ulan e yafos rom . Mu gay rogon e sobutʼaenʼ, athamgil, nge gelngin nib tuʼuf ni ngan nʼagfan min gay rogon e minʼagfan. Fare Tathapeg e ke micheg ni “Ya fa’anra mu n’iged fan u [wun’med] e kireb nike rin’ boch e girdi’ ngomed, ma ku errogon e Chitamangi[med] nu tharmiy nra n’ag fan u wan’ e kireb ni kam [rin’ed].”25
Lʼagruw e wik ngay ko dabaʼ e madnom ko Easter. Thilin e chiney nge madaʼ ko ngiyalʼ nem, gube piningem ni ngam gay rogon ngam taleg e tin nib kireb ni be diliʼiyem nga butʼ. Bay sana krayag ni ngan pining e magar ngak Yesus Kristus nge fare Bayul rokʼ? Faʼanra nʼagfan e rib momawʼ rogon, wenig nag fare gelngin ko fare bayul ko rachaʼ rokʼ Yesus Kristus ni nge ayuwegnem. Napan ni gara rrinʼ, gube micheg nag ngom e gapas nra yib ngom mara gel nag e mitmith rom ko tin nib thothup.
Napan ni bayul nag fare Tathapeg fan e gidiiʼ ni gubin, ke bing kanawoʼen ni gidiiʼ ni be leak e rayag ni nge gol nag, me piiʼ gelnginrad, me bayul nag rad u gelngin. Pi nʼey nib thothup e bay nrayag ngak e gidiiʼ ni baʼadag ni nge motoyil ngak me leak.
Brothers nge sisters, gube wenig nag u gelngin gumʼirchaʼeg, gube piningem ni ngam mub ko fare piʼi kanawoʼen e mʼag mag par u rom. Mag thamiy fare falfalaenʼ ko kalngaenʼuy ni gubin e rran. Mu fil morngaʼagen Got nge rogon e muruwel rokʼ. Mu gay maga son nag e maʼangʼang. Mu gay rogon ngam taleg e kireb ulan e yafos rom.
Napan ni bay mu rrinʼ e pinʼey, gube micheg nag ngom ni gara ulʼulʼ nga mmʼon u daken fare piʼi kanawoʼen e mʼag nra gel nag e mithmith rom ko nib thothup, ndemuturug e nʼen nra yib ngom. Gube micheg nag ngom ba gelngin nib gel nra yib nga dakenem nra palog nigem ko lumel, mara yib e gapas ngalaninʼum, mag par ndariy e murus rom, nge tabinaew rom nra par nib gel u taʼabang.
Got ab fos! Yesus e ir fare Kristus! Bay nib fos! Gadad btuʼuf rokʼ mara piiʼ e ayuw ngodad. Ko pin’ey ni gube micheg u dakan fithingan fare Tabayul i Yesus Kristus, amen.