Wok Wan Wetem Lod
Gospel blong Jisas Kraes we i kambak i tokbaot prinsipol ia blong wok wan bitwin woman mo man, tugeta long laef ia mo long laef we i no save finis.
Long ol fasfala manis afta long mared blong mitufala, dia waef blong mi i talemaot se hem i wantem tumas blong stadi miusik. Wetem hop ia blong mekem waef i hapi, mi bin plan blong mekem wan bigfala sapraes blong swit hat blong mi. Mi bin go long stoa we oli salem ol tul blong miusik mo pem wan piano blong hem olsem wan presen. Mi bin fulumap risit blong piano ia wetem bigfala glad i go insaed long wan bokis, mi flasem gud mo givim long hem wetem tingting ia se bae hem i talem bigfala tangkyu long hasban blong hem we i lavem hem mo lisin long hem.
Be taem hem i bin openem smol bokis ia mo luk wanem we i stap insaed, hem i lukluk mi wetem lav mo talem, “!O dia, yu gud tumas! Be bae mi askem yu wan kwestin: Hemia i wan presen o wan kaon?” Afta we mitufala i kaonsel tugeta abaot sapraes ia, mitufala i disaed blong nomo pem. Mitufala i stap laef long smol mane olsem hemia blong wan studen, semmak long plante man we oli jes mared. Eksperiens ia i helpem mi blong luksave hamas prinsipol blong wok wan i impoten insaed long wan mared rilesensip, mo olsem i helpem waef blong mi mo mi blong gat wan hat mo maen taem mitufala i folem.1
Gospel blong Jisas Kraes we i kambak i tokbaot prinsipol ia blong wok wan bitwin woman mo man, tugeta long laef ia mo long laef we i no save finis. Nomata woman mo man i gat ol spesel fasin mo tabu responsabiliti, woman mo man i gat ol impoten wok we i semmak insaed long plan blong God blong stap glad, we i blong evri pikinini blong Hem.2 Hemia i klia finis long stat taem we Lod i talemaot se “i nogud blong man ia bae i stap hemwan; taswe, [bae] mi mekem wan fren blong givhan, long hem.”3
Long plan blong Lod, wan “patna” i wan kompanion we bae i wok wan wetem Adam .4 I tru, Iv i wan blesing blong heven long laef blong Adam. Tru long tabu fasin blong hem mo ol fasin blong spirit, hem i leftemap Adam blong wok wan wetem hem blong kasem plan blong God blong stap glad, we i blong evri man.5
Bae yumi lukluk long tu stamba prinsipol we i mekem patnasip bitwin man mo woman i kam moa strong. Fasfala prinsipol hem i evriwan i semmak long God.6 Folem gospel doktrin,wanem we i defren bitwin woman o man, i no win ova long ol promes blong God we i no save finis we oli blong evri pikinini boe mo gel blong Hem. I nogat wan long tufala i gat bigfala janis blong kasem selestial glori bitim narawan long ol taem we i no save finis.7 Sevya Hemwan i invaetem evriwan long yumi, ol pikinini blong God, blong kam long Hem mo tekpat long gud fasin blong Hem; mo Hem i no tanem baksaed blong Hem long eniwan we i kam long Hem.”8 From hemia, yumi evriwan i semmak long fored blong hem.
Taem hasban mo waef i andastanem mo yusum prinsipol ia, tufala bae i no putum tufala long posisen olsem presiden o vaes presiden long famli blong tufala. TI nogat wan i bos long narawan o narawan i blong folem tingting blong narawan long wan mared rilesensip, mo i nogat wan i go fastaem long o biaen long narawan. Tufala i wokbaot tugeta, semmak nomo olsem ol tabu pikinini blong God. Tufala i kam wan long tingting, long nid, mo long stamba tingting wetem Papa long Heven mo Jisas Kraes,9 we i stap lidim mo gaedem famli tugeta.
Blong wok wan, “lav i no wan samting we yu kipim be yu yusum … blong pat blong krietem man we i koling blong yumi evriwan.”10 “Wetem tru fasin blong help, hasban mo waef i wok wan, ‘bae hem i fren blong yu we i folem yu oltaem’ ‘we i nogat man i fosem hem from’ bae i fulap long laef long saed blong spirit i go long olgeta mo oli pikinini blong olgeta ‘blong oltaem mo oltaem.’”11
Nambatu prinsipol we i impoten i Golden Rul ia we Sevya i bin tijim long Hil: “Yufala i mas mekem i gud long ol narafala man, olsem we yufala i wantem blong olgeta oli mekem long yufala.”12 Prinsipol ia i soem wan fasin blong wok tugeta, serem wok, wok wan, mo fasin blong dipen long narawan mo hemia i folem nambatu bigfala komanmen, “Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.”13 Hem i go tugeta wetem ol narafala Kristin fasin olsem fasin blong gat longfala tingting, fasin blong no stap flas, mo fasin blong stap kaen.
Blong save andastanem olsem wanem blong wok folem ol prinsipol ia, yu save luk long tabu rilesensip we i no save finis we God i bin putum bitwin tufala fas papa mo mama blong yumi, Adam mo Iv. Tufala i kam olsem wan bodi nomo,14 we i krietem wan spes blong yuniti we i letem tufala blong wokbaot tugeta wetem respek, tangkyu, mo lav, mo fogetem wanem wanwan long tufala i wantem mo lukluk long nid blong wanwan long tufala long rod blong tufala i go long taem we i no save finis.
Ol semmak fasin ia oli wanem we yumi stap traehad from long wan mared we i gat yuniti long hem tedei. Tru long tempol siling, wan man mo wan woman i joen long tabu oda blong mared insaed long kavenan ia we i niu mo i no gat en. Tru long oda ia blong prishud, tufala i kasem wan blesing blong mared we i no save finis mo tabu paoa blong lidim ol samting blong famli taem oli laef folem ol kavenan we oli mekem. Stat long taem ia i go, tufala i muv fored mo stap dipen long tufala mo wok wan wetem Lod, speseli long ol tabu responsabiliti we oli kasem, blong kea mo protektem, mo prisaed long famli blong tufala.15 Stap kea mo protektem, mo stap prisaed oli konek mo ol wok blong hem i joen, we i minim se ol mama mo papa “oli gat diuti ia blong helpem wanwan long tufala olsem ol patna we oli semmak”16 mo serem wan lidasip long hom we i balens.
“Blong kea mo protektem i minim blong fidim, tijim, mo sapotem” ol famli memba, we i hapen taem yumi helpem olgeta blong “lanem ol trutok blong gospel mo gro long fet long Papa long Heven mo Jisas Kraes” long wan ples we i gat lav. Blong prisaed i minim blong “help lidim ol memba blong famli blong gobak stap long ples we God i stap long hem. Oli mekem hemia taem oli givim seves mo tij wetem fasin we i kaen, fasin we i no flas, mo wetem lav we i klin evriwan.” Hemia i tekem tu blong stap “lidim ol memba blong famli blong stap prea oltaem, gat gospel stadi, mo ol nara eria blong wosip. Ol papa mo mama oli wok long yuniti,” blong folem eksampol blong Jisas Kraes, “blong fulfilim [tu bigfala] responsabiliti.”17
Hem i impoten blong lukluk taem se gavman insaed long famli i folem paten blong petriak, we i defren smol long sam eria blong prishud lidasip insaed long Jos.18 Petriak paten ia we i talem se ol waef mo hasban oli akaontebol daerek long God long ol wok blong olgeta blong mekem ol tabu responsabiliti blong olgeta insaed long famli. I nidim blong wok wan—blong wantem folem evri prinsipol blong stret mo gud fasin, mo fasin blong stap akaontebol—mo givim ol janis blong gro insaed long wan ples we i gat lav mo evriwan i help.19 Ol spesel responsabiliti ia i nogat wan i hae bitim narawan mo i nogat fasin blong eni kaen abius o yusum atoriti long rong wei.
Eksperiens blong Adam mo Iv, afta we tufala i lego Garen blong Iden, i soem naesfala fasin ia blong dipen long narawan bitwin wan mama mo papa blong kea mo protek, mo prisaed ova long famli blong tufala. Olsem we oli tijim insaed long buk blong Moses, tufala i wok tugeta long graon mo tru long swet blong fes blong tufala oli kakae bred;20 tufala i gat ol pikinini;21 tufala i singaot long nem blong Lod tugeta mo tufala i ; “harem voes blong Lod we i kam long rod we i go long Garen blong Iden”;22 tufala i akseptem ol komanmen blong Lod we Hem i givim long tufala mo wokhad tugeta blong obei olgeta.23 Tufala i “mekem [evri] samting ia long ol boe mo ol gel blong tufala”24 mo “ tufala i no bin stop blong prea long God.25
Ol dia brata mo sista blong mi, stap kea mo protektem, mo prisaed hem i oli janis, be i no ol samting yu nomo yu save mekem. Wan man i save gat wan responsabiliti long wan samting be maet i no hem nomo i stap mekem samting ia. Taem ol papa mo mama we oli gat lav oli andastanem gud tufala bigfala prinsipol ia, bae tufala i traehad tugeta blong protektem mo kea long ol nid blong ol pikinini blong long saed blong bodi mo filing. Tufala i helpem olgeta tu blong fesem ol denja long saed blong spirit long dei blong yumi tedei tru long ol gudfala kakae long toktok blong God olsem we Hem i soem long ol profet.
Nomata hasban mo waef i sapotem wanwan long tufala long ol tabu responsabiliti we oli kasem, “Handikap, ded o ol narafala samting, i save mekem se i gat jenis long wanem we wan papa o mama i mekem blong lukaotem famli.”26 Samtaem papa o mama bae i mas tekem responsabiliti blong mekem wok blong mama mo papa semtaem, maet blong sot taem o longtaem.
I no longtaem i pas mi mitim wan sista mo wan brata we oli laef olsem. Olsem ol singgel paren, wanwan long tufala, insaed long famli blong tufala mo stap wok wan wetem Lod, oli bin agri blong givim laef blong tufala blong lukluk long nid blong ol pikinini blong olgeta long saed blong bodi mo spirit. Tufala i no fogetem ol tempol kavenan blong tufala we tufala bin mekem wetem Lod mo ol promes blong Hem we i no save finis nomata long ol divos blong olgeta. Tugeta i bin lukaotem help blong Lod long evri samting taem tufala i stap gohed blong traehad blong stap strong truaot ol jalenj blong tufala mo wokbaot long kavenan rod ia. Tufala i trastem Lod se bae Hem i lukluk long ol nid blong tufala, i no long laef ia nomo be blong taem we i no save finis. Tufala i kea mo protektem ol pikinini blong tufala taem tufala i tijim olgeta wetem fasin blong stap kaen, fasin blong no stap flas, mo klin lav iven long taem we oli stap eksperiensem ol had situesen long laef. Long wanem mi save, tufala singgel paren ia tufala i no blemem God from ol hadtaem blong tufala. Be, tufala i lukluk fored wetem wan stret mo klin hop mo tras long ol blesing we Lod i gat i stap blong olgeta.27
Ol brata mo sista, Sevya i soem stret eksampol blong yuniti mo agrimen long stamba tingting mo doktrin wetem Papa we I Stap long Heven. Hem i prea long bihaf blong ol disaepol blong Hem, Hem i se, “Mi mi prea, blong olgeta evriwan oli save stap wan nomo. Papa. Laef blong yu i joen gud long laef blong mi, mo laef blong mi i joen gud long laef blong yu. Mo long sem fasin, mi mi prea blong laef blong olgeta ya i save joen gud long laef blong yumitufala: … blong oli save stap wan nomo, olsem we yumitufala i wan nomo.”28
Mi testifae long yufala se taem yumi—ol woman mo ol man—i wok tugeta long fasin we i tru mo semmak, bae yumi enjoem yuniti ia we Sevya i bin tijim taem yumi mekem ol tabu responsabiliti blong yumi long ol rilesensip blong yumi long mared. Mi promesem yu, long nem blong Kraes se ol “hat bae oli joen tugeta blong kam wan long lav, lav we wan i gat long narawan,”29 bae yumi faenem plante glad long rod ia blong laef we i no save finis, mo paoa blong yumi blong givim seves long yumi wanwan bae i gro bigwan.30 Mi talem witnes blong mi long ol trutok ia, long tabu nem blong Jisas Kraes, amen.