Ol Paten blong Fasin blong Stap Wan Disaepol
Stap lanem abaot Kraes mo ol wei blong Hem i lidim yumi blong save mo lavem Hem.
Paten blong Fet
Long moning ia, tu pikinini mo tri apupikinini blong mitufala long Not Amerika mo abaot haf blong wol i luk naesfala laet blong san we i stap kamaot long Is. Ol nara tri pikinini mo seven apupikinini long Afrika mo nara haf blong wol i luk tudak we sloslo i kavremap olgeta taem san i stap draon ova long laen we wol mo san i mit long wes.
Stret taem blong statem dei mo naet i wan evri dei rimaenda long ol samting we i tru we i stap tek ova long laef blong yumi we yumi no save jenisim. Taem yumi respektem mo stretem wanem we yumi mekem wetem ol tru samting ia we i no save finis, yumi eksperiensem naes mo pis we kam insaed long ol hat blong yumi. Taem yumi no mekem, yumi no filim gud, mo ol samting i no wok long wei we yumi tingting long hem.
Dei mo naet i wan eksampol blong ol paten we God i givim long evriwan we oli bin laef long wol ia, blong ol samting olsem we oli rili stap. Hem i wan trutok long saed blong fasin blong yumi we i stap laef,yumi no save jenisim folem ol tingting blong yumiwan mo ronwe aot long hem. Evri taem mi stap tingbaot hemia taem mi tekem wan flaet blong Afrika i kam long jeneral konfrens, mi stap setem bodi klok i go bak biaen blong 10 aoa long wan dei.
Eni taem we yumi kea blong luksave, yumi luk se Papa long Heven i bin givim inaf witnes long yumi abaot ol trutok blong gaedem ol laef blong yumi mekem se bae yumi save Hem mo gat ol blesing blong pis mo glad.
Tru long Profet Josef Smit, Spirit blong Lod i konfemem, “Mo bakegen, bambae mi givim yufala wan rod blong folem long saed blong evri samting, blong mekem se Setan i no trikim yufala; from Setan i stap olbaot long graon, mo hem i stap go, i stap trikim ol nesen.”1
Koriho man ia we i agensem Kraes i foldaon long giaman trik ia, i nomo biliv se God i laef mo se Kraes bae i kambak. Profet Alma i testifae long hem, “Evri samting we oli stap long fes blong wol, yes, mo olsem wanem i muv, yes mo tu, evri planet we oli muv, long stret rod blong olgeta, oli witnes se i gat wan Krieta we Paoa blong hem i Hae Tumas.”2
Taem Koriho i askem strong blong hem i kasem wan saen bifo hem i save biliv, Alma i mekem hem i kam nambut. Hadtaem blong hem i mekem hem i putum tingting i stap daon, nao Koriho i talemaot se devel i bin giaman long hem.
Yumi no nid blong stap giaman. Merikel i gohed blong plei long wan laef we i waes long fored blong yumi. Mo wan sot lukluk mo tingtingbak blong sapraes blong ol heven i kam tugeta wetem plante sta mo galaksi we i no save kaontem i mekem hat blong sol we i biliv blong singsing long naesfala hym ia “God blong Mi, !Hamas nao Yu Yu gud tumas!”3
Yes, God Papa blong yumi long Heven i laef, mo oltaem Hem i soem Hemwan long yumi evriwan long ol defdefren wei.
Paten blong Fasin blong Putum Tingting I Stap Daon
Be blong luksave, bilivim, mo gohed long God, ol hat blong yumi i nid blong open long Spirit blong trutok. Alma i tijim se fet i stat wetem fasin blong putum tingting i stap daon.4 Momon i talem tu se i no posibol blong eni wan we “i no stap flas mo tingting blong hat blong hem i daon” blong gat fet mo hop mo blong kasem Spirit blong God.5 King Benjamin i talemaot se eniwan we i putum glori blong wol i kam faswan i “wan enemi blong God.”6
Blong givim Hem fulwan blong baptaes blong fulfilim evri stret fasin iven we Hem i stret evriwan mo tabu, Jisas Kraes i soem se fasin blong putum tingting i stap daon bifo long God i wan fandesen blong fasin blong ol disaepol blong Hem.7
Ol niu disaepol oli mas soem fasin blong gat tingting i stap daon long fored blong God tru long odinens blong baptaes. From hemia olgeta we oli putum tingting i stap daon long fored blong God, mo oli wantem blong kasem baptaes, mo kam fored wetem ol hat we oli fulap wetem sore mo ol spirit we i wantem sakem sin … bae oli akseptem olgeta insaed long jos blong hem tru long baptaes.”8
Fasin blong putum tingting i stap daon i mekem rere hat blong ol disaepol from fasin blong sakem sin mo fasin blong stap obei. Nao Spirit blong God i save karem trutok i go long hat, mo bae i save faenem rod blong hem blong go insaed.9
Hem i from i no gat wan fasin blong putum tingting i stap daon we i kontribiut bigwan long profesi blong Aposol Pol we i stap hapen long ol las dei ia.
“Bambae ol man oli save tingbaot olgeta nomo, mo bambae oli wantem mane tumas, oli tok flas, gat hae tingting, mo oli save tok nogud, oli no save ona long papa mo mama, oli no [save talem] tangkyu, mo oli no tabu,
“Taem filing blong lav i no gat, bambae ol man oli spolem nem blong narafala man, oli mekem i strong tumas … long ol narafala man, oli lusum hed, oli wael, oli no wantem ol [gud fasin].”10
Invitesen blong Sevya blong lanem abaot Hem i wan invitesen blong tanem yu i go we long ol temtesen blong wol mo blong kam olsem Hem—kwaet man mo tingting blong Hem i stap daon. Nao bae yumi save putum yok blong Hem mo faenemaot se i isi—we fasin blong disaepol i no wan hevi samting be wan glad olsem Presiden Russell M.Nelson i tijim yumi wetem evri filing blong hat mo plante taem.
Paten blong Lav
Stap lanem abaot Kraes mo ol wei blong Hem we i lidim yumi blong save mo lavem Hem.
Eksampol blong Hem i soem se wetem fasin blong putum tingting i stap daon, i tru se i posibol blong save mo lavem God Papa wetem ful bodi blong yumi mo blong lavem ol nara man olsem we yumi lavem yumiwan, no gat samting blong holem bak yumi. Ministri blong Hem long wol ia, long taem we Hem i putum bodi mo wil blong Hem tugeta long olta, i wan paten blong soem ol prinsipol ia, we gospel blong hem i stanap long hem. Tugeta prinsipol ia i stap aotsaed we yumi save luk mo i abaot olsem wanem yumi joen long ol nara man, i no blong stap lukaotem glad o glori blong yumiwan.
Merikel blong taem we yumi mekem ol bes efot blong yumi blong stap lavem God mo ol nara man, i we bae yumi save faenemaot tabu fasin blong yumiwan olsem ol pikinini boe mo gel blong God wetem pis we i fulwan mo glad we eksperiens ia i givim.
Yumi kam wan wetem God mo wetem wanwan long yumi tru long lav mo seves. Afta yumi save kasem witnes blong Tabu Spirit blong klin lav ia, frut we Lihae i tokbaot olsem we “i moa swit bitim evri frut we [hem i] bin testem bifo.”11
Hat blong king we Kraes i kasem taem Hem i stap givim mo mekem evri samting long paoa blong Hem blong setem wan paten blong stap lavem Papa mo lavem yumi i blong kasem evri paoa, iven evriwan we Papa i gat we i blong kam olsem god.12
Janis blong yumi blong fidim ol sol blong yumi, wan lav blong God we i no save finis mo blong neba blong yumi i stat long hom wetem ol tabu fasin blong stap joen evri dei wetem Papa long prea blong yuwan mo famli long nem blong Pikinini blong Hem Ia Nomo, stap lan tugeta abaot Tufala tru long skripja stadi blong yuwan mo famli, kipim Sabat dei tugeta, mo holem wan tempol rekomen we i laef, stap yusum oltaem olsem we yu save mekem.
Taem yumi wanwan i gro long save mo lav blong Papa mo Pikinini, yumi gro long fasin blong talem tangkyu mo gat lav long wanwan long yumi. Paoa blong yumi blong lavem mo givim seves long ol nara man aotsaed long hom bae i kam moa bigwan.
Wanem we yumi mekem long hom i soem tru tes blong stap strong mo glad long fasin blong disaepol. Blesing we i moa swit blong gospel ia we i kambak we mi mo waef blong mi, Gladys, i enjoem long hom blong mitufala i kam blong stap lanem blong save mo ona long God long hom mo blong serem lav blong Hem wetem famli blong mitufala.
Paten blong givim Seves
Lav blong God mo givim seves long wanwan long yumi i stat insaed long hom mo givim seves long ol nara man aotsaed long hom long taem blong gro insaed long fasin blong bigfala lav.
Hemia i semmak wetem paten blong givim seves fulwan insaed long kingdom blong God we ol profet mo ol aposol blong Lod we i stap laef i stap soem long yumi. Yumi kam wan wetem olgeta.
Nao yumi save lukluk long olgeta, long Lod “long evri tingting,” blong mekem se yumi “no gat tu tingting” mo “no fraet.”13
Olsem ol profet mo aposol blong Lod we i stap laef, yumi save go fored wetem “ol insaed i fulap long bigfala lav i go long ol man,mo long haos blong fet, [wetem] klin fasin i flasem ol tingting blong [yumi] oltaem; [mo] tras blong yumi [bae i gro] i kam strong long fored blong God; mo doktrin blong prishud bae i go insaed long sol blong [yumi] olsem smolsmol ren blong moning i foldaon long heven i kamdaon.”
Wetem ol profet mo aposol blong Lod we i stap laef, yumitu i save joenem wan sekol blong klin fasin blong fet i kam strong taem yumi givim seves fulwan long wanem we “tabu Spirit bae i oltaem fren blong [yumi], mo stik blong king blong [yumi] bae i wan stik blong king we i no save jenis, blong fasin we i stret mo gud mo trutok; mo rul blong [yumi], bae i wan rul we i no gat en, mo bae i kam long [yumi] we i no gat man i fosem hem, blong oltaem mo oltaem.”14 From hemia i promes blong plan blong Papa. Long nem blong Jisas Kraes, amen.