Wok blong Yumi blong Lukaotem Gud Wol ia
I gat promes we i stap go long olgeta we oli lavem mo kea long wol ia mo ol man mo woman we oli laef wetem olgeta, bae oli kasem ol bigfala blesing long saed blong spirit.
Taem mifala i visitim kantri blong mifala long Franis i no longtaem, waef mo mi i bin gat wan gudfala taem wetem ol smol apu blong mifala blong visitim naesfala garen we i stap long wan smol taon blong Jiveni. Mifala i glad blong wokbaot long ol fut pat blong garen ia mo stap glad long ol naesfala flaoa bed we i stap, ol naesfala wota lili, mo laet we i saenem pul blong wota ia.
Naesfala ples ia hem i kriesen mo lav blong wok blong wan man: gudfala artis ia Claude Monet, we, blong 40 yia, i stap sepem gud mo mekem gud garen blong hem ia i kam wan ples blong wok blong hem blong peint. Monet i spendem plante taem aotsaed long neja; mo wetem peintbras blong hem, hem i putum kala mo laet blong wanem hem i filim mo tingting long hem long peinting blong hem. Blong plante yia, hem i bin krietem handred blong ol koleksen blong ol naes peinting, we i kamaot stret long garen blong hem.
Ol wota lili mo Japanis Brij, 1899, i kam long Claude Monet
Ol brata mo sista, rilesensip blong yumi wetem neja we i raonem yumi i save givim long yumi sam eksperiens long laef we i gat insperesen long hem. Ol filing we yumi filim i givim long yumi wan tingting blong talem tangkyu blong Papa blong yumi long Heven mo Pikinini blong Hem, Jisas Kraes, we i krietem naesfala wol ia—wetem ol hil mo ol wota blong hem, ol tri mo ol animol—mo ol fas paren blong yumi, Adam mo Iv.1
Wok blong Kriesen i no gat en long hemwan. Hem i wan impoten pat blong plan blong God mo ol pikinini blong Hem. Stamba tingting blong kriesen i blong testem man mo woman, eksasaesem fridom blong tufala, fanem glad, mo lan mo stap gro, blong mekem se long wan dei go bak long ples we krieta blong olgeta i stap mo kasem laef we i no save finis.
Ful kriesen ia oli rere long hem blong yus blong yumi mo i wan pruf blong lav blong Krieta we i gat long ol pikinini blong Hem. Lod i talemaot, “Yes, evri samting we oli kamaot long graon … oli stap blong helpem man mo blong man i yusum, tugeta blong i luk naes long ae mo blong mekem hat i glad.”2
Be, tabu presen blong Kriesen i kam wetem diuti mo responsabiliti. Wei blong tokbaot gud ol diuti ia hem i tru long fasin blong lukaot gud long wok Long gospel, toktok ia fasin blong lukaot gud long wok i stap minim wan responsabiliti we i tabu long saed blong spirit o blong bodi we God i givim long yumi, blong save givim wan ripot from.3
Olsem we oli tijim insaed long ol tabu skripja, fasin blong yumi blong lukaotemgud samting i holem ol prinsipol ia:
Fas prinsipol: Ful wol ia, wetem evri laef we i stap long hem, i blong God.
Krieta i putum ol risos blong wol ia mo evri fom blong laef long kea blong yumi, be Hem i kontrolem ful wol ia. Hem i talem, “Mi, Lod, mi stretem ol heven, mo bildim wol, ol stret wok blong han blong mi; mo evri samting we oli stap insaed, oli blong mi.”4 Evri samting we oli stap long wol oli blong God, i tekem ol famli blong yumi, ol bodi blong yumi, mo laef blong yumi.5
Seken prinsipol: Olsem ol man blong lukaot gud long ol kriesen blong God, yumi gat wan diuti blong onarem mo kea long olgeta.
Olsem ol pikinini blong God, yumi kasem responsabiliti ia blong stap olsem ol man blong lukaot gud long wok, blong tekem gud kea long samting, mo blong stap sekiuriti long ol tabu kriesen blong Hem. Lod i talem se Hem i mekem “evri man i ansa from ol samting we hem i mekem, olsem wan man blong lukaot long ol blesing we mi givim long wol ia, we mi bin mekem mo mi bin rere blong olgeta man we mi krietem.”6
Papa blong yumi long Heven i letem yumi blong yusum ol risos blong wol ia long tingting blong yumiwan nomo. Hemia i no minim se oli givim raet long yumi blong yusum ol risos ia olbaot nomo. be yumi mas yusum wetem waes mo kontrol. Lod i bin givim advaes ia: “Mo hemia i mekem God i glad, se hem i givim evri ting ia long man; from stamba tingting ia nao, God i bin mekem olgeta samting ia blong man i yusum; wetem gud jajmen; i no blong man i yusum i ova, mo i no wetem fos.”7
Presiden Russell M. Nelson i bin tijim long wan taem, “Yumi, olsem ol pipol we yumi benefit long tabu Kriesen ia, ?wanem nao bae yumi mas mekem? Yumi mas kea long wol ia, yumi mas waes long fasin we yumi lukaot gud long hem, mo yumi mas holemtaet i stap gud blong ol fiuja jeneresen oli yusum.”8
Nomata i gat nid i stap long saed blong saens mo politik, be wan tabu responsabiliti we God i trastem yumi long hem i blong kea long wol mo envaeromen blong yumi, i mas fulumap yumi wetem dip save ia blong diuti mo blong gat tingting i stap daon. Hemia i wan impoten pat tu long fasin blong yumi blong kam olsem disaepol. ?Olsem wanem nao yumi save givim ona mo lav long Papa long Heven mo Jisas Kraes taem yumi no givim ona mo lav long ol kriesen blong Tufala?
I gat plante samting we yumi save mekem—tugeta mo wanwan—blong stap olsem ol man blong lukaot gud long wok. Tingting long situesen blong yumi wanwan, wanwan long yumi i save yusum ol risos blong wol ia we i fulap tumas, wetem moa respek mo kea. Yumi save sapotem wok blong komuniti blong kea long wol ia. Yumi save adoptem wan laefstael mo fasin we i respektem ol kriesen blong God blong mekem spes we yumi laef long hem i kam moa klin, moa naes, mo i save givim insperesen long yumi.9
Wok blong yumi blong lukaotemgud ol kriesen blong God, i tekem tabu diuti ia tu blong lav, respek, mo kea long evri man , woman we yumi serem wol ia wetem olgeta. Oli ol boe mo gel blong God, ol sista mo brata blong yumi, mo stamba tingting blong wok blong Kriesen hem i blong mekem olgeta i hapi.
Man blong raetem buk Antoine de Saint-Exupéry i bin talem toktok ia: Wan dei, taem hem i stap travel long tren, hem i luk hemwan i stap long medel blong wan grup blong ol rifuji. I kasem wan strong filing taem i luk fes blong wan pikinini we i no gat hop long hem, hem i talem, “Tru long wok blong garen, wan niu ros i bon, evri wokman blong garen oli glad. Oli seperetem ros ia, lukaotemgud, mekem i kam strong. Be i no gat wokman blong lukaotemgud ol man.”10
Ol brata mo sista blong mi, bae yumi no stap olsem ol man mo woman blong wok long garen, blong lukaot gud long ol man mo woman? ?Yumi no man blong lukaot long brata blong yumi? Jisas i komandem yumi blong lavem neba blong yumi olsem we yumi lavem yumiwan.11 Aot long maot blong Hem, toktok ia man raonabaot i no minim ol ples kolosap; be i minim blong stap kolosap long hat blong wan. Hemia i tekem evriwan we oli stap laef long wol ia—nomata oli stap kolosap long yumi o long kantri we i stap longwe, i no mata se olgeta i blong wea, oli gat wanem bakgraon, o wanem situesen blong olgeta.
Olsem ol disaepol blong Kraes, yumi gat wan strong diuti blong no stop blong wok blong gat pis mo gud fasin long medel blong evri nesen blong wol. Yumi mas mekem evri bes blong yumi blong protektem mo putum pis mo helpem olgeta we oli slak, oli stap long nid, mo olgeta we oli safa o olgeta we oli fesem fasin blong agens. Antap long evriwan ia, bigfala presen blong lav we i moa hae we yumi save givim long ol nara man i blong serem wetem olgeta glad blong gospel mo invaetem olgeta i kam long Sevya blong olgeta tru long ol tabu kavenan mo odinens.
Namba tri: Oli invaetem yumi blong tekem pat long wok blong kriesen.
Tabu wok blong kriesen i no finis yet. Evri dei, wok blong God blong ol kriesen i stap gohed blong gro, i kam moa bigwan, mo i kam moa plante. wan gudfala samting i we Papa long Heven i invaetem yumi blong tekem pat long wok long Kriesen blong Hem.
Yumi tekem pat long wok blong Kriesen taem yumi wok long graon o bildimap ol haos blong yumiwan blong wol ia—evri samting i oraet taem yumi soem respek long kriesen blong God. Yumi save soem kontribusen blong yumi tru long kriesen wok blong art, akitek, miusik, fasin blong raet, mo kalja, we i mekem wol ia blong yumi i kam naes, i givim save long yumi, mo mekem laef blong yumi i kam moa gud. Yumi kontribiut tu tru long ol stadi blong faenemaot ol samting tru long saens mo medikol we i kipim wol mo ol laef we oli stap long hem oli sef i stap. Presiden Thomas S. Monson i talem long sot toktok ol naes toktok ia: “God i lego haf wok blong wol ia i stap blong man i traem ol skil blong hem long hem … blong mekem se man i save filim glad mo glori ia long wok blong kriesen.”12
Long parabol blong Jisas abaot ol wokman wetem mane, taem masta i kambak, hem i talem tangkyu mo presem tufala we i gro map mane blong tufala. Long narawan, we hem i haedem mane blong hem long graon Hem i singaotem hem “les man,” mo hem i tekemaot mane we hem i kasem.13
Long Semmak wei, rol blong yumi olsem man blong lukaot gud long ol kriesen blong wol ia i no blong kipim i sef o manejem olgeta nomo. Lod i nidim yumi blong wok had, folem wanem Tabu Spirit blong Hem i lidim yumi blong mekem i gro, mekem i gat moa, mo developem ol risos we Hem i putum long tras blong yumi—i no blong benefitim yumi nomo be tu blong blesem ol nara man.
Long evri samting we man i stap mekem, i no gat wan eksperiens we bae i save tekem ples blong stap olsem ol krieta wetem God blong givim laef o blong helpem wan pikinini i lanem samting, i gro, mo gat sakses—i nomata sapos yu olsem ol paren, ol tija, ol lida, o long eni nara rol. I no gat wan fasin blong lukaot gud long wok we i moa tabu, i moa komplit, mo tu i gat moa nid, bitim hemia blong stap olsem patna wetem Krieta blong givim ol bodi blong ol spirit pikinini blong Hem mo helpem olgeta blong kasem tabu gol blong olgeta.
Responsabiliti blong kriesen i stap olsem wan rimaenda oltaem se laef mo bodi blong wanwan man o woman i tabu, mo oli no blong eni man no woman be oli blong God, mo we Hem i mekem yumi blong lukaot long olgeta, blong respektem, protektem, mo kea long olgeta. Ol komanmen blong God, we i protektem ol tabu paoa blong mekem pikinini mo stanemap ol famli we i no save finis, i lidim yumi i go long tabu fasin ia blong lukaot gud long wok, we hem i impoten tumas long plan blong Hem.
Ol brata mo sista blong mi yumi mas luksave se wetem Lod, evri samting oli long saed blong spirit—hemia i tekem tu evri samting long laef, we yumi stap mekem long saed blong bodi. Mi testifae se bigfala blesing long saed blong spirit i promes we stap long olgeta we oli lavem mo kea long wol ia mo ol man mo woman we oli laef wetem olgeta. Taem yu stap tru long tabu fasin ia blong lukaot gud long wok mo givim ona long ol kavenan blong yu bae yu gro long save blong God mo Pikinini blong Hem, Jisas Kraes, mo bae yu filim lav mo paoa blong Tufala moa long laef blong yu. Evri samting bae oli mekem yu rere blong save laef wetem Tufala mo kasem nara paoa blong krietem samting14 long laef we bae i kam.
Long en blong laef long wol ia, Masta bae i askem long yumi blong givim wan ripot blong yumi long tabu fasin ia blong lukaot gud long wok, mo tu olsem wanem yu tekem kea long ol Kriesen blong Hem. Mi prea se bae yumi harem ol toktok blong hem we i gat lav i tajem ol hat blong yumi: “‘!Ei, yu yu mekem wan gudfala wok! Yu yu wan gudfala man we yu lukaot gud long ol wok blong mi. From we yu bin lukaot gud long smol bisnis ya we mi putum long han blong yu, bambae mi putumap yu blong yu lukaot long plante bisnis. Yu kam joen long lafet blong mi.”15 Long nem blong Jisas Kraes, amen.