Strong Paoa long Tingting blong Talemaot Trutok

I Kam long Elda Denelson Silva

Blong Olgeta Seventi

Taem yumi lanem trutok, Lod i givim janis long yumi blong mekem wanem we Hem bae i mekem sapos Hem i stap ia tedei.

Long 1982, mi stap finisim tu yia digri blong mi long stadi blong ol eria long wan teknikol skul.

Long en blong yia, wan klasmet i invaetem mi blong mitufala storian. Mi tingbaot se mitufala i lego ol narafala memba blong klas mo go long wan eria long saed blong wan fil blong spot. Taem mitufala kasem ples ia, hem i tokbaot ol bilif blong relijin blong hem, mo hem i no soem wan buk nomo long mi be hem i givim buk ia long mi. Blong ones, mi no tingbaot evri toktok we hem i talem, be mi tingbaot wanem filing we mi bin filim taem hem i se, “Mi wantem blong serem testemoni blong mi long yu se buk ia i tru mo we gospel blong Jisas Kraes i bin kambak.”

Afta long storian blong mitufala, mi go hom, mo tanem sam pej insaed long buk, mo putum long wan sef. From se mifala stap long en blong yia mo hem i las yia blong digri stadi blong mi, mi no intres tumas long go tru long buk ia, o long klasmet we i bin givim long mi. Nem blong buk ia, yu save finis. Yes, hem i Buk blong Momon.

Faef manis i pas, ol misinari oli kam insaed long haos blong mi; oli stap aot semtaem we mi stap kam hom afta long wok. Mi invaetem olgeta blong kambak insaed. Mifala i sidaon aotsaed long fored blong haos blong mi, mo oli tijim mi.

Taem we mi stap lukaotem trutok, mi askem long olgeta wijwan jos i tru mo olsem wanem mi save faenem. Ol misinari oli tijim mi se bae mi save kasem ansa blong miwan. Wetem Baebol strong tingting mo filing blong wantem save, mi akseptem jalenj blong olgeta blong ridim samfala japta blong Buk blong Momon. Mi prea wetem wan tru hat mo wetem tru tingting blong wantem save (luk long Moronae 10:4–5). Ansa blong kwestin blong mi i klia, sam dei i pas—blong talem moa stret, long 1 Mei, 1983—mi kasem baptaes mo konfem i kam wan memba blong Jos Ia blong Jos blong Jisas Kraes blong Ol Lata-dei Sent.

Tedei taem mi tingbaot namba blong ol samting we i oli hapen, mi luk klia hamas hem i impoten klasmet blong mi i bin gat strong paoa long tingting blong serem testemoni blong hem abaot trutok we i bin kambak mo i soem pruf we mi save holem abaot Restoresen blong gospel blong Jisas Kraes, iven Buk blong Momon. Simpol aksen ia, i tajem hat mo i spesel tumas long mi, i bin krietem wan koneksen bitwin mi mo ol misinari taem mi mitim olgeta.

Oli bin talemaot trutok long mi, mo afta we mi baptaes, mi kam wan disaepol blong Jisas Kraes. Taem ol yia i stap pas, mo wetem help blong ol spesel pipol olsem ol lida, tija, fren, mo tu, tru long stadi blong miwan, mi lanem se taem mi disaed blong kam wan disaepol blong Jisas Kraes, mi akseptem wok blong no protektem trutok nomo be blong talemaot.

Taem yumi agri blong biliv long trutok mo blong folem, mo taem yumi traehad blong kam ol tru disaepol blong Jisas Kraes, yumi no kasem wan setifiket wetem wan karenti se bae yumi no mekem ol mistek, se bae yumi no kasem temtesen blong wokaot long trutok mo se bae oli no talem nogud yumi, o iven se bae yumi no eksperiensem ol hadtaem. Be save ia abaot trutok i tijim se taem yumi kam insaed long stret mo smol rod we bae i tekem yumi gobak long ples blong Papa long Heven, oltaem bae i gat wei blong kamaot long ol problem ia (luk long(luk long 1 Korin 10:13); oltaem bae i posibol blong tingting i fasfas from ol tu tingting blong yumi bifo yumi stap gat tingting long bilif blong yumi (luk long Dieter F. Uchtdorf, “Come, Join with Us,” LiahonaNovemba 2013, 21); mo long en, yumi gat wan karenti ia se bae yumi neva stap yumiwan taem yumi go tru ol hadtaem, from God i visitim ol pipol blong Hem long medel blong olgeta hadtaem blong olgeta (luk long Mosaea 24:14).

Taem yumi lanem trutok, Lod i givim janis long yumi blong mekem wanem we Hem bae i mekem sapos Hem i stap ia tedei. I tru, Hem i soem long yumi tru ol tijing blong Hem long wanem yumi mas mekem: “Mo bambae yufala i mas go aot wetem paoa blong Spirit blong mi, mo stap prijim gospel blong mi, mo wokbaot tutu, long nem blong mi, mo stap leftemap voes blong yufala semmak olsem saon blong wan pupu, blong talemaot toktok blong mi semmak olsem ol enjel blong God” (Doktrin mo Ol Kavenan 42:6). !Janis blong mekem misinari wok long taem yumi yut, i spesel!

Plis ol yang man, yufala no muvum taem blong yufala blong stap rere blong givim seves long Lod olsem ol misinari. Taem yu fesem ol situesen we i save mekem desisen blong go long misin i wan had wan—olsem blong stopem ol stadi blong yu smoltaem, talem tata long gelfren mo no mekem promes se bae yu eva deitem hem bakegen o no, o iven blong mas lego wan gudfala wok—tingbaot eksampol blong Sevya. Long seves blong Hem, Hem i fesem ol semmak hadtaem, we i tekem tu, fasin blong no agri, fasin blong givim hadtaem mo long en, konkon kap ia we i blong atonmen mo sakrifaes blong Hem. Nomata ol situesen ia, Hem i lukaotem blong mekem tingting blong Papa blong Hem mo givim glori long Hem. (Luk long Jon 5:30; 6:38–39; 3 Nifae 11:11; Doktrin mo Ol Kavenan 19:18–19.)

Ol yang woman yufala i welkam long wok insaed long yad blong Lod, mo taem yufala i rere long yuwan blong givim seves olsem ol fultaem misinari, bae yu no fri long ol semmak jalenj ia.

Long evri wan we oli jusum blong givim seves long Hem, mi promesem yufala se 24 o 18 manis blong seves bae oli pas olsem we sapos yu bin stap hom, be ol janis we oli stap wet from ol yang man mo yang woman blong Jos Ia long misin fil oli spesel. Spesel janis ia blong ripresentem Sevya, Jisas Kraes, mo Jos blong Hem bae oli luksave. Blong stap tekpat long plante prea, developem mo serem testemoni blong yu plante taem long wan dei, blong stap stadi ol skripja blong plante aoa mo mitim ol pipol we bae yu neva mitim sapos yu bin stap long hom, oli ol eksperiens we yu no save tokbaot. Semmak level blong eksperiens ia oli sevem i stap blong ol yut we Lod i singaotem blong oli givim seves long seves misin. Oli welkamem yufala bigwan mo yu impoten. Plis no putum daon hamas seves long misin i impoten, from ol seves long misin oli givim ol bigbigfala eksperiens. “Praes blong wan sol i bigwan long ae blong God” (Doktrin mo Ol Kavenan 18:10), we i tekem tu, praes blong yu.

Long taem yu stap kambak hom afta long seves blong yu, ating gelfren o boefren blong yu bae i nomo wet long yu, be bae yu save gud finis olsem wanem blong gat ol gudfala storian. Ol akademik stadi blong yu bae oli kam moa klia mo wetem hamas skil yu bin kasem abaot fasin blong stap rere inaf from wan wok, mo long en, bae yu save stret hamas yu bin gat strong paoa long tingting blong talemaot gospel blong pis, mo stap testifae abaot trutok we i bin kambak.

Long yufala we yufala mared mo stap long ol defren step blong laef blong yu, yu yu impoten tumas long wok blong Lod. Rere long yuwan. Laef long wan helti laef, lukaotem blong stap dipen long yuwan long tugeta laef long wol mo long saed blong spirit, from ol janis blong mekem wanem Lod bae save mekem blong ol pikinini blong Hem i nogat limit long hamas yia we yu gat. Wan naesfala eksperiens we waef blong mi mo mi i bin gat long ol yia we i jes pas, oli bin kam taem mitufala stap givim seves long saed blong ol spesel kapol, givim seves long ol spesel ples mo givim seves long ol spesel pipol.

Eksperiens we mi gat long en blong digri stadi blong mi we oltaem mifala stap protektem trutok taem mifala talemaot mo blong protektem trutok, i wan wei blong tekem responsabiliti. Blong protektem trutok ia, oli no mas mekem long wan strong fasin be wetem tru intres blong lavem, serem, mo invaetem ol pipol we yumi stap testifae long olgeta abaot trutok, tingting nomo abaot gudfala laef blong ol pikinini blong Papa long Heven, long saed blong ol samting blong wol mo long saed blong spirit (luk long Mosaea 2:41

Long Oktoba jeneral konfrens, 2021, Presiden Russell M. Nelson, profet we yumi lavem, i tijim i defren long wanem we sam oli tingting, i tru se yumi gat wanem we oli singaotem raet mo rong. I tru i gat wan trutok we i tru evriwan—wan trutok we i no save finis. (Luk long “Trutok we I Stret Gud, Doktrin we I Stret Gud, mo Revelesen we I Stret Gud,” Liahona, Nov. 2021, 6.)

Ol tabu skripja oli tijim yumi “Trutok i save long ol samting olsem we oli stap, mo olsem we oli bin stap, mo olsem we bambae oli kam blong stap” (Doktrin mo Ol Kavenan 93:24).

Save we yumi gat abaot trutok, i no mekem se yumi moa gud bitim ol narafala pipol, be i tijim yumi wanem yumi mas mekem blong gobak long ples we God i stap long hem.

Taem go fored strong wetem Kraes, mo wetem strong paoa long tingting blong no talemaot trutok nomo be blong laef folem trutok, bae yu faenem kamfot mo pis long taem blong ol raorao long ol dei ia.

Jalenj blong laef i save putum yumi daon, be tingbaot se taem yumi praktisim fet long Jisas Kraes, “ol hadtaem blong [yumi] bae oli blong smol taem nomo (Doktrin mo Ol Kavenan 121:7) we i stamba lukluk ia blong kasem laef we i no save finis. Plis yufala i no krietem wan dedlaen blong en blong ol hadtaem blong yufala mo ol jalenj. Trastem Papa long Heven mo no givap from sapos yumi givap, bae yumi no save en blong rod blong yumi bae i olsem wanem long kingdom blong God.

Holemtaet trutok, stap lan long ol ples we i gat trutok:

• Ol skripja (luk long 2 Nifae 32:3).

• Ol toktok blong ol profet (luk long Amos 3:7).

• Tabu Spirit (luk long Jon 16:13).

Mi serem testemoni blong mi abaot Jisas Kraes mo se hemia i Jos blong Hem. Yumi gat wan profet we i stap laef, mo oltaem bae yumi filim fri taem yumi talemaot trutok wetem strong paoa long tingting. Long nem blong Jisas Kraes, amen.