Winim Wol ia mo Faenem Pis
Mi plis long yufala long moning ia blong faenem pis aot long wol ia we i bisi tumas, ol tingting i fasfas, mo harem nogud i stap. Yu save winim wol ia tru long ol kavenan blong yu wetem God.
Ol brata mo sista blong mi, hat blong i talem bigfala tangkyu blong gritim yufala long naesfala Sabat moning ia. Yufala i stap oltaem long maen blong mi. Mi stap laekem tumas wei we yufala i kwik blong help taem yufala i luk ol narawan oli stap long nid. Mi sapraes long fet mo testemoni we yufala i stap soem bakegen mo bakegen. Mi krae wetem yufala long ol harem nogud blong yufala, ol samting we yufala i no save mekem, mo ol wari. Mi lavem yufala. Mi talem tru se Papa blong yumi long Heven mo Pikinini blong Hem Jisas Kraes i lavem yufala. Tufala i save gud ol situesen blong yufala, gud fasin blong yufala, ol nid blong yufala, mo ol prea blong yufala from help. Evri taem, mi prea, blong yufala i filim lav blong Tufala from yufala.
Hem i impoten blong stap eksperiensem lav blong Tufala, from se evri dei ol strong nius i stap atakem yumi. Maet bae yu fesem ol dei we yu wantem werem klos blong slip mo taetem gud blangket, mo askem wan blong wekemap yu taem hadtaem i finis.
Be, ol brata mo sista blong mi, plante gudfala samting oli stap kam. Long ol dei we i stap kam, bae yumi luk Sevya bae i soemaot bigfala paoa blong Hem we wol i neva luk. Bitwin naoia mo long taem we bae Hem i kambak “wetem paoa mo glori,”1 bae Hem i givim plante janis, blesing, mo merikel long olgeta we oli fetful.
Nomata long hemia, yumi stap laef naoia long wan taem we i moa fasfas long histri blong wol ia. Laef i fulap wetem tumas samting mo ol jalenj we i mekem pipol oli filim se i tumas mo oli taet gud. Nomata long hemia, lukluk long wan eksperiens we i jes hapen we i maet save mekem yu andastanem olsem wanem yu mo mi i save faenem pis.
Long taem blong open haos blong Washington D.C. Tempol we i jes pas i no longtaem, wan memba blong open haos komiti i witnesem wan samting i hapen bitwin ol pipol taem hem i stap lidim sam junalis blong wokbaot insaed long tempol. Samples long wokbaot blong olgeta, wan yang famli i joen wetem tua blong ol junalis ia. Wan long ol ripota ia i stap wokem askem long tempol petron abaot “wokbaot” blong hem taem hem i stap wokbaot raon insaed long tempol. Hem i wantem blong save sapos wokbaot insaed long tempol i saen blong ol jalenj long wokbaot blong wan man tru long laef ia.
Wan yang boe long famli i stap lisin long ol storian blong olgeta. Taem we tua grup i go insaed long rum blong endaomen, boe ia i poen i go long olta, long ples we pipol oli nildaon blong mekem kavenan wetem God, mo talem, “O, hemia i naes. Ples ia i ples blong pipol i spel long wokbaot blong olgeta long tempol.”
Mi no ting se boe ia i save hamas lukluk blong hem i gat wan tru mining. Hem i no save abaot stret koneksen ia bitwin mekem kavenan wetem God long tempol mo gudfala promes ia blong Sevya:
“Yufala evriwan we yufala i stap hadwok tumas, mo we yufala i stap karem ol hevi samting, yufala i kam long mi, nao mi bambae mi tekemaot ol hevi samting ya, mi mekem we yufala i spel gud.
“Putum yok blong mi long solda blong yufala, mo wok wetem mi; … nao bae yufala i faenem pis long laef blong yufala.
“From we yok blong mi i isi nomo, mo oli no hevi.”2
Ol dia brata mo sista, mi sore bigwan long olgeta we oli stap lego Jos from oli filim se membasip i nidim olgeta blong mekem tumas samting. !Oli no faenemaot yet se taem yumi mekem mo kipim ol kavenan, hem i mekem laef i moa isi! Wanwan man mo woman we i mekem kavenan long ples blong baptaes mo insaed long ol tempol—mo i kipim olgeta—i kasem moa paoa blong Jisas Kraes. !Plis tinghevi long gudfala trutok ia!
Presen blong kipim kavenan wetem God hem i paoa blong heven—paoa we i mekem yumi strong blong winim ol hadtaem blong yumi, ol temtesen, mo mekem harem nogud i kam moa gud. Paoa ia i mekem rod blong yumi i kam isi. Olgeta we oli laef folem ol hae loa blong Jisas Kraes, oli save kasem ol hae paoa blong Hem. Hemia nao, olgeta we oli kipim kavenan oli gat raet ia long wan spesel spel we i kam long olgeta tru long kavenan rilesensip blong olgeta wetem God.
Bifo Sevya i givim Hemwan long safaring blong Getsemane mo Kalvari, Hem i talemaot long ol Aposol blong Hem, “long wol ia, bambae yufala i harem nogud tumas. Be yufala i no fraet. Mi mi winim paoa blong olgeta samting blong wol ia finis.”3 Long semmak fasin, Hem i talem long long wanwan long yumi blong mekem semmak samting taem i talem, “Mi wantem se yufala i mas winim wol ia.”4
Ol dia brata mo sista, mesej blong mi long yufala tedei hem i from se Jisas Kraes i winim wol ia mo we Hem i pem praes blong wanwan long yumi, yufala tu i save winim wol ia we i fulap long sin, i selfis, mo i taet bigwan.
From atonmen blong Hem we i no save finis, Sevya i pemaot yumi wanwan aot long ol wiknes, mistek, mo sin, mo from se Hem i eksperiensem evri soa, wari, mo ol harem nogud we bae yufala i gat,5 afta, taem yufala i sakem sin long wan tru fasin mo lukaotem help blong Hem, yufala i save winim ol jalenj blong tedei long wol ia.
Yufala i save winim sin long saed blong spirit mo filing blong wol ia, we i tekem strong fasin, fasin blong gat hae tingting, kros, toti tingting, no laekem nara man, selfis, jalus, mo fraet. Nomata long plante giaman toktok mo storian we i stap raonem yumi, yufala i save fanem tru spel—we i minim blong pulum win mo pis—iven long medel blong ol problem blong yufala.
Impoten trutok ia i givim tri impoten kwestin:
Faswan, ?i minim wanem blong winim wol?
Nambatu, ?olsem wanem yumi winim wol?
Mo namba tri, taem yumi wol, ?olsem wanem i blesem laef blong yumi?
?Wanem i minim blong winim wol? I minim blong winim temtesen ia blong kea moa abaot ol samting blong wol ia bitim ol samting blong God. I minim blong trastem doktrin blong Kraes moa bitim save blong man. I minim blong stap glad long trutok, tok agensem fasin blong giaman, mo kam “ol man we oli no stap flas we oli folem Kraes.”6 I minim blong jusum blong stap longwe o no tajem ol samting we i ronemaot Spirit. I minim blong wantem “lego” iven ol sin we yumi laekem blong stap mekem.7
Nao, blong winim wol i no minim blong kam stret evriwan long laef, o se ol problem blong yu bae oli lus nomo olsem—from se bae oli no save. Mo i no minim se bae yu nomo mekem ol mistek. Be blong winim wol i minim se paoa blong yu blong faet agensem sin bae i kam antap. Hat blong yu bae i sopsop taem fet blong yu long Jisas Kraes i stap kam antap.8 Blong winim wol i minim blong stap gro blong lavem God mo Pikinini blong hem moa bitim we yu lavem eniwan o eni samting.
?Olsem wanem nao, yumi winim wol? King Benjamin i talem long yumi olsem wanem blong mekem. Hem i bin tijim se “man we i folem fasin blong wol i wan enemi blong God” mo bae i stap olsem, blong oltaem “be sapos nomo hem i mekem folem ol gudfala toktok blong Tabu Spirit, mo i tekemaot man we i folem fasin blong wol, mo kam wan sent tru long atonmen blong Kraes we i Lod.”9 Evri taem yu lukaotem blong mo folem smol voes blong Spirit, evri taem yu mekem wan samting we i gud—ol samting we “man we i folem fasin blong wol” i no save mekem, yu stap winim wol.
Blong winim wol i no wan taem o samting we i tekem ples long wan dei o tu(2). Hemia i hapen truaot long laef taem yumi stap ripitim blong laef folem doktrin blong Kraes. Yumi mekem fet blong yumi long Jisas Kraes i gro taem yumi sakem sin evri dei mo kipim ol kavenan we i kavremap yumi wetem paoa. Yumi stap long rod blong kavenan mo yumi kasem blesing blong paoa long saed blong spirit, revelesen blong yumiwan, fet we i gro i kam antap, mo givhan blong ol enjel. Blong stap laef folem doktrin blong Kraes i save givim yumi wan wei blong laef we i gat mo klin wei krietem paoa blong faea blong spirit long laef blong yumi.10
Taem yumi traehad blong laef folem ol hae loa blong Jisas Kraes, ol hat blong yumi mo stret fasin blong yumi i stat blong jenis. Sevya i leftemap yumi i go ova long paoa blong wol ia we i foldaon i stap mo i blesem yumi wetem jareti, fasin blong gat tingting i stap daon, givim wetem glad, stap kaen, kontrolem yumiwan, pis, mo spel.
Naoia, bae yufala i tingting se, i luk olsem bae yumi wokhad moa long saed blong spirit bitim we bae yumi spel Be hemia bigfala trutok long ples ia: Taem wol i fos se blong gat paoa, gat samting, blong stap popula, mo ol harem gud blong bodi oli givim hapines, !ol samting ia oli no givim hapines! !Oli no save givim hapines! Wanem oli givim hem i nating, be wan emti samting nomo blong tekem ples blong “gudfala mo hapi ples” blong olgeta we “oli obei ol komanmen blong God.”11
!Trutok hem i we bae yu kam moa taet blong lukaotem hapines long ples we bae yu neva save faenem long hem! Be, taem yu putum yok blong yuwan long Jisas Kraes mo mekem wok we i nid blong mekem long saed blong spirit blong winim wol, Hem, mo Hemwan nomo, i gat paoa blong leftemap yu ova long wol ia.
Nao, taem yumi winim wol, ?olsem wanem nao i blesem laef blong yumi? Ansa hem i klia: Blong go insaed long wan kavenan rilesensip wetem God i fasemtaet yumi wetem Hem long wan wei we i mekem evri samting abaot laef i kam moa isi. Plis yu no andastanem mi rong: Mi no talem se taem yumi mekem kavenan i mekem laef i kam moa isi. Be, save se i gat oposisen oltaem, from se enemi i no wantem yu blong faenemaot paoa blong Jisas Kraes. Be blong putum yok blong yu long Sevya i minim yu gat raet long paoa blong Hem mo paoa we i pem praes.
Mi konfemem bakegen tijing blong Presiden Ezra Taft Benson: “Ol man mo ol woman we oli tanem laef blong olgeta i go long God, bambae oli faenemaot se Hem i save mekem plante moa samting wetem laef blong olgeta, bitim we olgetawan oli save mekem. Hem bae i mekem glad blong olgeta i kam fulwan, mekem oli lukluk i go longwe, openem maen blong olgeta, … leftemap spirit blong olgeta, mekem blesing blong olgeta i kam plante, bae oli gat fulap janis, kamfotem sol blong olgeta, leftemap ol fren, mo putum pis long olgeta.”12
Ol janis ia we yu no save komperem i stap folem olgeta we oli stap lukaotem sapot blong heven blong helpem olgeta blong winim wol ia. From hemia, mi stap givim i go long ol memba blong ful Jos ia, wanem we mi givim long ol yang adalt blong yumi las Mei. Mi bin askem strong olgeta long taem ia—mo stap plis wetem yufala naoia—blong tekem responsabiliti long testemoni blong yufalawan long Jisas Kraes mo gospel blong Hem. Wok from. Fidim blong bae i gro. Fidim wetem trutok. Yu no mekem i toti wetem ol tijing blong man mo woman we oli no gat biliv. Taem yu stap gohed blong mekem testemoni blong yu i kam strong long Jisas Kraes i nambawan samting, lukluk long ol merikel we bae i hapen long laef blong yu.13
Mi plis long yufala long moning ia blong faenem pis aot long wol ia we i bisi tumas, ol tingting i fasfas, mo harem nogud i stap. Yu save winim wol ia tru long ol kavenan blong yu wetem God. Letem Hem i save tru long ol prea blong yu mo ol aksen blong yu se yu series blong winim wol ia. Askem Hem blong mekem maen blong yu i andastan mo sendem help we yu nidim. Evri dei, rekodem ol tingting we oli kam long yu taem yu prea; afta folem wetem strong tingting. Spendem moa taem long tempol mo lukaotem blong andastanem olsem wanem tempol i tijim yu blong kam moa antap aot long wol ia we i stap foldaon.14
Olsem we mi bin talem bifo, wok blong tekem Isrel i kam tugeta i wok we i moa impoten wok we i stap tekem ples naoia long wol tedei. Wan impoten pat blong wok ia blong karem i kam tugeta (haos blong Isrel)hem i blong mekem rere ol pipol we oli save mekem samting, oli rere, mo klin inaf blong welkamem Lod taem hem i kam bakegen; wan pipol we oli jusum Jisas Kraes finis ova long wol ia we i stap foldaon; wan pipol we i glad long ejensi blong olgeta blong laef folem ol loa blong Jisas Kraes we oli moa hae mo tabu.
Mi singaotem yufala ol dia brata mo sista blong mi, blong kam ol pipol ia we oli stret mo gud. Lavem gud mo onarem ol kavenan blong yu bitim evri nara komitmen. Taem yu letem God i win long Laef blong yu, mi promes long yu bae yu kasem bigfala pis, tras, glad, mo yes, spel.
Wetem paoa blong tabu aposolsip we mi holem wetem mi, mi blesem yufala long wokbaot blong yufala blong winim wol ia. Mi blesem yufala blong mekem fet blong yufala long Jisas Kraes i kam antap mo lanem moa gud olsem wanem blong save kasem paoa blong Hem. Mi blesem yufala blong save luksave trutok aot long giaman. Mi blesem yufala blong kea moa abaot ol samting blong God bitim ol samting blong wol ia. Mi blesem yufala blong luksave nid blong olgeta we oli stap raon long yu, mo mekem olgeta we yumi lavem oli kam strong. From se Jisas Kraes i winim wol ia, yu tu yu save mekem. Mi testifae olsem long tabu nem blong Jisas Kraes, amen.