Iamwir
Sipwe anisi me tumunu usun ach Chon Amanau, akkaewin ngeni ir ekkewe sia tufichin ren tong me wiseni ach sipwe iamwirir.
Achengicheng pwi me fefinei, chiechiei, sia etiwok ngeni ei mwichenap!
Mwirin mwichenap non ewe October a no, Ngang me sister Gong aua fetan non ewe Nenien Mwichenap ren am aupwe kapong me rongorong ami memefin kapas allim.
Nouch kewe memper seni Mexico ra apasa, “Hoy es el tiempo de Mexico (Iei ewe fansoun ren Mexico).”
Aua kaeo pwe Gilly me Mary ir chiechi seni England. Nupwen Mary a choni ewe Mwichefen, ese chiwen wor nenian ne nonnom. Gilly a fangafangoch ne etiwa Mary an epwe eto nom ren. Uren nuku, Gilly a apasa, “Use tipemwaramar pwe ewe Samon mi nom rei.” Atun mwichenap, Gilly a pwan pwapwa ne chusefan ngeni ewe sister misineri e papataisei 47 ier a no.
Jeff me punuwan we, Melissa, ra fiti mwichenap ren an aewin fansoun. Jeff akkom emon chon iakiu mi angoch (i chon supuri pwor) iwe iei a emon tokterun ekisi metek. A ureniei, “Ren ai mairu, Ua fein ngeni ai upwene papatais pokiten usun ina ewe aan mi kon ennet me wenechar ach sipwe manaueni.”
Akkom, Melissa a omusomus ngeni noun Jeff chon iamwir, “Jeff ese mochen ‘seech mi pwech’ non imwem we.” Ewe mwan chon iamwir a apasa, “Upwe kutta ew aan.” Iei i me Jeff ra chiechioch. Atun an Jeff papatais, Ua churi ew mwicheichen Aramas mi Pin ekkewe Jeff, Melissa, me nour we nengin, Charlotte, ra tonger.
Ussun chon tapweno mwirin Jises Kraist, sia kutta ne iamwir ngeni ekkoch usun i a fori pokiten I mi witiwit an epwe siwini manau.
Nupwen Peggy a ureniei pwe punuwan we, John, mwirin 31 ierin pupunu, epwene papatais, Ua eis met e siwin.
Peggy a apasa, “am me John aua kaeo ewe Testamen Sofo Feito, Tapweto Mwiri, me John a kapaseis usun nongonongen Mwichefen.
Peggy a apasa, “Sipwene korato ekkewe misineri.”
John a apasa, “Esap wor misineri—tiwenon chok ika chienei we epwe etto.” A fen mwirin 10 ier, noun John we mwan chon iamwir a winiti chiechian a epinukunuku. (Ua ekieki, met ika noun John we mwan chon iamwir e kouno ne wareto mwirin ew, ru, ika tiu ier?)
John a ausening. A anneani ewe Puken Mormon ren ennetin netip. Nupwen ekkewe misineri ra eisini John an epwene papatais, a apasa ewer. Peggy a apasa, “Ua turutiw seni ai we sea me poputa ne kechiw.”
John a apasa, “Ua siwin nupwen ua arap ngeni ewe Samon.” Mwirin, John me Peggy ra riri fengen non ewe tempel mi pin. Non ewe December, John a mano non an 92 ierin. Peggy a apasa, “John a emon aramas mi och fansoun meinisin, nge a winitin emon a sokono non ew napanap mi ning mwirin an we papatais.”
Sister Gong me ngang aua churi Meb me Jenny me won video fansoun ewe COVID pandemic. (Aua churi chommong pupunu mi amwarar me aramas me won video fansoun COVID, emon me emon ir nour presetenin steik a iotekir me erenikem.)
Meb me Jenny ra tekison ne apasa ekkewe aurek non manauer a efisi ar ekieki ika ar apupunun tempel epwe tongeni manau, ika epwe, iwe ifa usun. Ra nuku an Jises Kraist Achasefan me ar pwonen pwon mi pin epwe anisir.
Anchangei ai pwapwa nupwen Meb me Jenny ra angei minafon toropwen mumuta ne tonong non tempel me niwin fengen ngeni imwen ewe Samon. Mwirin Meb a arapakan epwene mano. A ew feioch Meb me Jenny a niwinsefan ar pwonen nefin ngeni ewe Samon me nefiner pwisin me mefi ewe tongen iamwir an chommong mi nom unukur.
Ekis meinisin ua no ie, ua kinisou ne kaeo seni ekkewe ra iamwir me tumun usun ach Chon Amanau.
Non Peru, am me Sister Gong aua churi Salvador me pwin me fefinan.1 Salvador me pwin me fefinan kewe ese wor semer me iner. Atun uputiwen Salvador. Ekkewe sou emwenin Mwichefen me memper ekkewe mi nikitu ne iamwir ngeni ei famini ra asarama ei. “Ennetin me nimenimochun manaman … iei wewen, Repwe churi ekkewe ese wor semer me ekkewe mi mano punuwer,”3 “anisi ekkewe mi apwangapwang, efietai ekkewe pau mi ititiw, … apochokuna ekkewe puku mi ewumama.3
Non Hong Kong, emon presetenin mwichen elter a tekison ne aporausa ifa usun ar mwich a soun fori 100 persen interfiun iamwir. “Aua iotek ne etetteni wisen chiechi pwe meinisin repwe tumunu emon me repwe pwan angei tumun,” a apasa. “Aua soun eisi ew me ew chiechi usun ekkewe ra iamwir ngeni. Aise kan checheki pwor; aua iamwir ngeni ekkewe chon iamwir ra tumunu noum kewe aramas.”
Non Kinshasa, Democratic Republic of the Congo, Preseten Bokolo a oporousa ifa usun i me an famini ra choni ewe Mwichefen non France. Non ew ran, nupwen a anneani noun we taropwen efeiochun petriark, ewe Ngun a asarama Brother Bokolo an epwe niwin fiti an famini ngeni ewe DR Congo. Brother Bokolo a sinei pwe repwe weri chommong weires ika repwe niwin. Me ar Mwichefen, Ewe Mwichefenin Jises Kraist ren Aramas mi Pin non Fansoun Soponon, ese mwo foruta non Kinshasa.
Nge, non nuku, usun met mi fifis ren fansoun chommong, ekkewe Bokolos ra fiti Ngunun ewe Samon. Non Kinshasa, ra iamwir ngeni me efeiochu ekkewe mi nom unukur, atawei osukosuk, angei feioch non pekin ngun me inis. Ikenai, ra pwapwa an wor imwen ewe Samon non fonuer.4
Emon chon ekkesiwin a iamwir me ren an emon nenien appiru. Atun neanuonun, a era i a chok ounusa ranin an nonnom won ewe pii. Non ew ran, a apasa, “Ua kuna emon nengin mi nioch non ufoufen tuken mi ufoufoch.” Ingeno, a feino an epwe eis pwata emon sokkun nengin mi nioch a ufouf ena sokkun ufoufen tuken mi ufoufoch. Neminewe emon chon Ewe Mwichefenin Jises Kraist ren Aramas mi Pin non Fansoun Soponon me a eis fiti emenimen,“Kopwe mochen feito fan non Raninfel?” A apasa ewer.
Non ekkewe ier a no, fansoun am nonom fengen ren am ewe asaimen, Elter L. Tom Perry a aporousa ifa usun i me an companion ra soun iamwir ngeni emon sister a nanom i chok non ew manangawen neni non Boston. Nupwen Elter Perry me an companion ra wareti ewe neni, ewe sister non tumunoch a wau ourourer, “Sikanong noumi kana taropwen mumuta ne tonong non tempel fan ena asam.” Mwirin chok an kuna ekkewe toropwen mumutan tonong non tempel a tongeni epichi chommong nok me suki ewe asam.5 Ewer, use apasa pwe chiechi ren iamwir mi namot epwe wor nour toropwen mumuta ne tonong non tempel. Nge ua sani ewe ekiek pwe nupwen ekkewe ir mi asufonu pwonen iamwir, imw mi kesip a suk me netip repwe suk.
Elter Perry a pwan awora ekkoch ourour. A apasa “Awora ngeni wisen companion ew ukukochun nampan wiser, ioteki ne finata, ewiser non ew neni ikewe mi fich pwe fansoun sai epwe nounouoch,” i a ouroura. A pesei “Poputa ren ekkewe a kon namot ngeni ami oupwe churir. Kauuta seni ekkena repwe fen etiwa me ponuwoch ngeni ami churir.” A osopwano, “Nikitun soposopono a wato manaman.”
Iamwir mi nap me pin6 a fis nupwen sia iotek fan iten “ewe nimenimochun tong an Kraist”7 me atapwa ewe Ngun. A pwan fis nupwen presetensin mwichen elter me Relief Society, fan emwenien ewe pisop, ra emweni angangen iamwir, mi pachenong ewisa chiechien chon iamwir. Ouse mochen sipwe ngeni nouch anuon me fopun ewe tufich mi namot ar repwe fiti me kaeo seni mwan me fefin chon iamwir mi angangoch. Me ouse mochen mut ngeni nouch kewe maritan tappin serafo chiechier chon iamwir mwan me fefin ir mi uren ourour.
Non ekkoch neni non ewe Mwichefen, mi wor ew keimufesenin iamwir. Ekkoch ra apasa ra iamwir nap seni an emon iamwirir. Sise mochen tettenin ourek sipwe fori. Nge napengeni a namot ngeni kich nap seni ew chok ennetin kapong non ewe kengkang ika ew chok “Ngang mi tongeni anisuk?” me non ewe nenien taraku. Non chommong neni, sia tongeni aninis, weweiti nonnomun ekkoch, me amari nefin nupwen sia soun churi memper non imwer kewe. Etiwetiw mi ourour mi siwini manau. Nupwen etiwetiw a anisi kich ne fori me apwonueta pwon mi pin, sia arap ngeni ewe Samon me emon me emon.
A fen affat pwe ekkewe ir mi weweiti ewe ennetin ngunun iamwir ra fori nap seni akkom, nupwen ekkewe rese weweiti ra fori ekis. Sipwe fori wisach, usun ach we Chon Amanau. Usun nouch we kon mi fel a apasa a “ew feiochun angang me tong.”8
An wart mwichen opungupung, mwichen elter, me Relief Society, ouse mochen ausening ngeni ewe Chon Masen Siip mi Murino me anisi I ne “kutta ekkewe ra mwanecheno, … uweisefanireto ekkewe ra susu fetan, … finitano kinasen ekkewe ra feiengaw, … apochokunata ekkewe mi semwen.”9 Sipwe omokutu “chon nang resap tumunu”10 sia awora neni non An neni fan iten meinisin.11
Iamwir mi ourour me ren Ngun mi Fel a efeiochu famini me emon me emon; a pwan apochokuna wart me pranch. Ekieki usun om wart me pranch pwe ir nenien mettoch meinisin non pekin ngun. Non ewe ngunun ewe Puken Mormon tutunapen ewe ira olif, ewe Samonun ewe atake me noun chon angang ra wato foun ira me apochokuna ew me ew ira ren ar foti fengeni pochokunen me apwangapwangen ekkewe ira meinisin.12 Ewe Samonun ewe Atake me Noun chon angang ra eniwini ne eis, “Met ita upwe pwan fori?”13 Ar chufengen, ra efeiochu netip me imw, wart me pranch, seni iamwir mi ourour, me fifis.14
Iamwir—masa—a fori ach atake epwe “ew chok”15—ew nenien ira mi pin. Efoch me efoch ira non ach ataken ira a wor efoch iran newon famini mi manau. Waran me panan ra pit fengen. Iamwir a efeiochu tappin aramas. Nupwen aninis a namot, pisop, presetenisin mwichen elter me Relief Society repwe eis, “Ion kewe chiechi chon iamwir?” An wart mwichen opungupung me interfiun iamwir rese chok eis usun weires me osukosuk nge kutta ne weweiti me pwapwa non an ewe Samon chommong umoumoch non manauach nupwen sia iamwir usun I.
Ach Chon Amanau iei ach nenien appiru mi unusoch.16 Pokiten I amen murino, A tongeni fori mine mi murino. A efeiochu ewe emon me ekkewe 99. I a ounusa napanapen iamwir. Sia winiti usun Jises Kraist nupwen sia fori “ngenir…ei napanap mi kisifochofoch” usun ach fori ngeni I,18 nupwen sia tongei chon oruch usun tongach,19 nupwen sia “tong fengen; usun chok ngang ua tongei kemi,”20 me nupwen ion chok epwe nap neimi, mut ngeni epwe noumi chon iamwir.21
Jises Kraist a iamwir. Chon nang ra iamwir.22 Chon tapweno mwirin Jises Kraist ra iamwir fengen23 “fiti ekkewe mi pwapwa non ar pwapwa, fiti ekkewe mi kechiw non ar kechiw,”24 “nenengeniochu [me] … tumunu [ekkewe aramas] ren pekin wenechar,”25 “chechemeni … mi woungaw me mi osupwang, ewe mi semwen me ewe mi riaffou,”26 mut ngeni Itan epwe fateno non ach iamwir.27 Nupwen sia iamwir usun I, sia kuna An manaman, An kewe feioch.28 Sia angei “eu iamwir mi kon murinno.”29
Meni epwe pekus inisich. Nge non An angang sisap “chipwang ne fofforoch.”30 Sia achocho ne fori ren ach tongeni, sisap sa mwitir nap seni ach pochokun,31 nge nuku, usun ewe Aposel Paul a aiti kich, pwe “Kot a tongei ewe emon mi kisasew.”32 Pun Kot a “awora foun ira ngeni ewe chon amora me pinewa pwe epwe mongo, me epwe pwan awora ngeni kemi ukukun foun ira meinisin.”33 Non ekkoch kapas, Kot a episekimi “pwe oupwe kisasew fansoun meinisin.”34 Ir ekkewe repwe amoratiw foun ira chommong repwe pwan kini chommong.35
Ian chok sipwe nom ia non ei fansoun Paska, sipwe aninis me tumun usun ach Chon Amanau, akkaewin ngeni ir ekkewe ra feioch ren tong me wis ne iamwirir. Non ach fori, amwo sipwe arap ngeni Jises Kraist me emon me emon kich, winiti usun I me ekkewe chon tapweno mwirin Jises Kraist I a mochen sipwe winiti. Non Itan we mi pin, Jises Kraist, amen.