Jises Kraist ii ewe Pochokunen Sam me Iin

Seni Elter Dieter F. Uchtdorf

Seni ewe Mwichen Engon me Ruemon Aposel

Anisi noumi kewe semirit repwe euweta ar nuku non Jises Kraist, ar repwe tongei An kapas allim me An mwichefen, me amwonata ngeni eu manauan murinon ar pungun finata.

Papasono, emon semenap ita epwene no seni imwan ewe fan iten an mwichen pisop non ewe pwinin. Noun ewe nengin a ruwanu ierin a uta mwan, mi ufeuf ufeufen meur me a komwoch noun ewe kapin ekkewe Tutunapen ewe Puken Mormon.

A eis “pwata kopwe no ngeni ewe mwich?”

“Pokiten ngang emon neuwis non ewe mwichen pisop,” a ponuweni.

“Nge en semei!” noun ewe nengin a apasa.

A fotopukutiw memwen noun ewe. “Nei achengicheng” a apasa, “ngang mi sinei pwe ka mochen upwe anea ngonuk me anisuk omw kopwe tongeni meur, nge non ei pwinin upwe no anisi pisop.”

Noun ewe nengin a ponuweni, “Ese pwan wor semen ewe pisop epwe pwan anisi an epwe meur?”

Kich sa fokun ennetin kinisou fan iten chon ei mwichefen ra fokun angang weires ren ar anisi ewe mwichefenin Jesus Christ iteiten ran. Omw fangono mi fokkun piin.

Nge usun ei nengin a fen weweiti, mi wor och mettoch mi nonofengen pinin—och mettoch esap tongeni wor siwinin—usun sam me iin ar tumunu nour semirit. A pwarano usun tettenin nang.¹ Samach won Nang, Samach mi Pin, a ennetin pwapwa nupwen Noun kewe semirit ra kaeo me tumun seni iner me semer kewe won ei fonufan.²

Sam me in, kinisou chapur ren mettoch meinisin owa fori ne amarata noumi kewe semirit. Me semirit, kinisou ngenikemi ren mettoch meinisin oua fori ne tumunu sememi me inemi kewe, pun usun sam me iin meinisin mi fen sinei, sia kaeo ukukun seni nouch kewe semerit usun nuku, apinukunuk, me tong ennet mi nonno ren met ra kaeo senikich.³

Sam me Iin Mi Wor Wiser Mi Fokun Piin

Ouse mwo ekieki usun ewe waten fangono Samach won Nang a fori iteiten fansoun a tinatiw emon semirit won ei fonufan? Ikei ir noun ekkewe aat me nengin non ngun. Ese fokkun eukuk ar tongeni. Ir ra fen finita pwe repwe winiti emon mi amwarar, chen, me ennet. Nge ir ra eto won ei fonufan non ar rese unusen sinei fichi mettoch, rese tongeni fori och mettoch me nukun ar kechiw fan iten chon repwe anisir. Ar chechemeni ewe fansoun ar nomw ren Kot a epetino, pwan fiti ar sinei ion ir me ion repwe tongeni winiti. Ra fori ar weiweiti usun manaw, tong, Kot me An kokkot anongonong won ar kakaton ekkewe aramas unukur—akaewin iner me semer, ekkewe, ra ennetin, pwan kaeo mettoch fan iter pwisin.

Kot a ngeni sam me iin ewe “auchean wis ar repwe amarata nour semirit non tong me pungeoch, ar repwe awora ren pekin inisir me ngunur, me aitir ne … oponuweta ekkewe annukun Kot.”⁴

Ei memef a efisi ekkewe murinon sam me iin repwe neneno nepwin.

Ai porous epwe ngeni meinisin sam me iin iei:

Ewe Samon amen fokkun tongei kemi.

Ii mii nomw remi.

Ii mii uta unukumi.

Ii ami pochokun a emweni noumi kewe semirit ar repwe fini mii pung.

Etiwa ei tufich me wiis ren pechekunen ngun me pwapwa. Kosap ngeni emon ei popunapen ekkewe feioch seni nang. Non ei kinikinin angangen ewe kapas allim me nongonong, ami ekkewe oupwe chon emweni noumi semirit ngeni tichikin pungun finata iteiten ran. Anisi noumi kewe semirit repwe euweta ar nuku non Jises Kraist, ar repwe tongei An kapas allim me An mwichefen, me amwonata ngeni eu manauan murinon ar pungun finata. Ai nuku, ina met an Kot kokot ngeni sam me iin.

Setan epwe ungeni kemi, osukosuka kemi, me sotuni ne onuwokusu kemi.

Nge meinisin semirit a wor rer ewe Saraman Kraist pwe ew aan mi wenengeni nang. Me ewe Chon Amanau epwene anisi kemi, me emweni kemi, me pesei kemi. Tingor An Aninis. Tingor aninis seni ewe Samon!

Jises Kraist ii pwan ewe pochokunen sarafo, Jises Kraist pwan ii pwan pochokunen sam me iin.

Ii a Pwarano usun Tong

Fan ekkoch sipwe ekieki ika meni epwe fen eoch ika emon epwe emweni ika aiti nouch kewe semirit. Nge inamo ika ka mefi nipwakingaw, mi wor remi och mettoch a asokano ami fich ngeni: ami tong fan iten noumi semirit.

An emon sam me iin tong ngeni nour ina ew pochokunen eppet won ei fonufan. Ina ii ew me nein ekkewe ekkoch mettoch won ei fonufan mi tongeni epwe ennetin fochofoch.

Iwe, iei meni oupwe mefi pwe nefinemi me noumi we semirit mi saro sokono. Ikena me ia a tongeni tonong an ewe chon Amanau ewe manaman. A echikara ekkewe mii semwen, me a pwan tongeni echikara nefinen aramas. A ochomongano ekkewe pinawa me iik, me a pwan tongeni awatenoi ewe tong me pwapwa non imwemi we.

Ami tong ngeni noumi kewe semirit a fori ew waten nenien kaeon ewe ennet me opochokuna nuku. Fori imwemi we epwe ew nenien iotek, kaeo, me nuku; ew imwen pwapwa ren met oua kaeo; ew nenien nonnom; ew imwen Kot.⁵ Me “iotek ngeni ewe sam fiti ennetin netipemi, pwe [ami] oupwe mefi usun [An] ewe tong, a [wata] won … ekkewe chon tapwono murin Noun we, Jises Kraist.”⁶

A Anapano Angang Achocho mi Kukun me Mecheres

Pwan ew pochokun a wor reom, pokiten en emon semenap ika inenap, ewe fansoun ren iteiten ran, seni omw kaeo seni ekkoch iteitan. Chiechiomw, sense, me met ka kaeo online ra eto pwan no. Nge en kopwe emon chon nomwono, pochokun aninis fansoun meinisin non manawen noum semirit.

Om achocho meni kopwe ekieki pwe mi kukkun nap seni ekkewe ekurang noum kewe semirit ra rong won ei fonufan. Fan ekkoch meni kopwe saro mefi pwe kose awesano chommong mettoch. Nge chechemeni pwe “seni kukununun mettoch a wewen pwe ewe Samon epwe wato murinon metoch.”⁷ Ew pwinin famini, ew porous usun kapas allim, ika ew nenien opuru meni esap chok mwitir ekesiwini manawen noum ewe semirit non na fansoun, epwe napeseni eu punguun raan a fori an ewe ira epwene mutir maar. Nge seni kukunun me eukukun mettoch, ran me ran, amarata noum kewe semirit nap seni ew chok fansoun waten pwuu.⁸

Iei anen ewe Samon. A fos ngonuk me noum ewe semirit fiti nouwan mi chok mosonoson, neukukun, nge esap usun en chopwunap.⁹ A echikara Naaman esap seni “ekkoch mwurinon mettoch” nge seni ewe foffor mi chok mecheres, eniwinin fofforun enimenim.¹⁰ Ekkewe aramasen Israel ra fokkun pwapwaiti ewe kametip won machang nein ewe petewen, nge met a fori ar repwe manaw wewen pwe ew kukunun me keukochun manamanen maana—ener pinawa iteitan.¹¹

Pwii me fefinei, pinawa iteitan a foroch me fis non imw. Nuku me kapasen pwarata a murino maritar non met mi pwisin fifis, non ew me ew tetten, non ew kukunun keukochun fansoun ren iteiten fansoun manawom.¹²

Iteitan Fansoun ina ew fansoun kaeo. Kapas meinisin me fofor a tongeni eu emwen ren om finata.¹³

Meni kosap mwitir ne kuna uwan om foffor. Nge kosap fangeta. “Mettoch meinisin repwe eto pwan no non pusin ar fansoun,” anon ewe Samon. “Ina mine, sisap pekus non fofforuch, pun [kich] sia isetiw ewe nongonongen amwararen angang.”¹⁴ Meni angang a watte seni ach anisi noun Kot kewe auchean semirit kaeo usun pusin ir me ar euweta ar nuku non Jises Kraist, an kapas allim, me an Mwichefen? Jises Kraist epwe efeiochu me pwarano usun omw foffor.

Ii a Awora Pwarata

Pwan ew waten aanen an ewe Samon a anisi sam me in ina seni ewe niffangen pwisin pwarata. Kot a mochen an epwe wau Ngunun an epwe emweni sam me iin.

Ika pwe ka iotek me ausening ngeni ewe Ngun, I epwe esinei ngonuk usun ekoch feiengaw mi mwonono.¹⁵ Ii epwe pwar ngonuk usun nifangen noum kewe semirit, ar pochokun, me ar osukosukuk rese fofosun.¹⁶ Kot epwe anisuk omw kopwe kuna noum kewe semirit usun a kuner—nap seni nikinikir nukun no ngeni non netiper.¹⁷

Fiti an Kot aninis, kopwe tongeni kaeo ifa usun omw kopwe sinei noum kewe semirit non nimenimochun me aan murinon. Uwa tingoreok kopwe etiwa an Kot epwe ngonuk me emweni omw ewe famini seni omw pusin pwarata. Kuta An emwen non omw iotek.¹⁸

A Watten Ekkesiwin

Naman ewe waten auchean aninis Jises Kraist epwe ngeni sam me iin ina ewe “waten ekkesiwin” non netip.¹⁹ Ina ew manaman emon me emon kich sipwe angei.

Ren ew fansoun, ekieki ei sokun, ka nomw non fan, eusening ngeni ekkewe afanafan usun famini. Ewe chon afanafan a foos usun eu imw mi unusoch me pwan watte unusuchon ewe famini. Ewe Mwan me fefin rese tongeni akanini. Ekkewe semirit repwe kouno ne aneani ekkewe pukefel nupwen chok repwene fori ar homework. Me ewe kon ren “Tong Fengen”²⁰ a chok titik non ewe imw. Me mwen ewe chon afanafan epwe tikeri ewe otun meinisin ra pwapwa ne chufengen ne nimeti ewe imwen pincho, meni ka fen ekieki, “Ai we famini ese wor epinukunuk.”

Pwii me Fefinei achengicheng, asosono! Meinisin chon non ewe mwicheich ra pwan ekieki ena! Ennetin, sam me iin meinisin ra ekieki pwe rese naf ngeni.

Eochun chok, pwe mi wor monomonen aninis ngeni sam me iin: I Jises Kraist. I ewe popunapen watten akkasiwinin netip.

Nupwen kopwe suki netipom ngeni ewe Chon Amanau me An afanafan, I epwe pwar ngonuk omw apwangapwang. Ika ka nukunuk non Jises Kraist ren eu netip mi tipetekison, Ii epwe apecheckuna ekkewe mettoch mi apwangapwang.²¹ I ewe Koten manaman.

Ren na wewe en me omw famini epwe fokun unuseoch? Apw. Nge kopwe angei ochunon. Seni chenin ewe Chon Amanau, ekis me ekis, en kopwene angei watenon an sam me iin nikinik a namot ngenir: ar tongei Kot me Noun kewe semirit, songemang, esap ekieki chok pusin ii, nuku non Jises Kraist, me epinukunuk ne fori ekkewe mettoch mi pung.

Jises Kraist a Awora Aninis ngeni Unusen An ewe Mwichefen

Ach achocho ngeni ne euweta ach nuku non Jises Kraist epwe fis non imwach, epwe fot won emon me emon. Me ina an Mwichefen aninis. Me nukun awora ekewe pukefel mi pin me kapas seni soufos, an ewe Chon Amanau ewe Mwichefen epwe awora ekoch pekin aninis ngeni sam me iin me semirit ar repwe fini mi pung:

• Ren ewe Pochokunen Sarafo: Ew Emwen ren omw kopwe fini Mochenum ese chok aitikich mettoch sipwe fori me mettoch sisap fori. A aiti kich usun ennet ese much an epwe anisuk ne fini finiom epwe nomw ren Jises kraist. Aneani fiti noum kewe semirit. Mut ngenir repwe tongeni fos fengen fan itan. Anisir pwe ekkei ennet mi pin me ese much epwe emweni met ra finata.²²

• Mwichen FSY ina pwan ew eochun aninis. Uwa anean pwe meinisin sarafo repwe fiti. Upwe pwan tingorei ekewe rese mwo pupunu ar repwe fiti ekei mwicheich seni ekewe chon emwen me chon aninis. Upwe tingorei sam me iin ar repwe euweta pekin ngunur seni met nour kewe sarafo ra uweato non imwer seni ar ewe mwichen FSY.

• Semirit me sarafo non Ewe Mwichefenin Jises Kraist ren Aramas mi Pin non Fansoun Soponon a wor nour sense, nouwis, me chon emwen. Fan ekoch ka mefi manawen ekewe sarafo ren omw kopwe euweta me anisi omw nuku me kapasen pwarata. Ekkoch meneimi ose mwo pupunu. Ekkoch ese mwo wor pusin noumi semirit. Omw pwapwaiti ne anisi noun Kot kewe semirit amen fokun pin non an Kot nenengeni.²³

Kosap Fangetani Ekkewe Manaman

Chiechiei achengicheng, achengicheng pwii me fefinei, euweta nuku non noum ewe semirit ina och mettoch epwe anisi ewe ponira epwe marino. Kose tongeni weitau ewe pwopwun an epwe tameta. Kose tongeni kopwe chok kupi feseni ewe minen ira an epwe uwa kai. Me kose tongeni kopwe poutano ewe ponira me ekieki pwe epwe maar ika uwa eoch.

Met kopwe fori me kopwe tongeni fori ren ei tapin aramas a uwa ochuno pwuunun, fiti murinon chonun konik seni nang. Uti ekkewe fetin me metoch epwe tongeni epeti seni ewe tinen akar seni nang. Awora ewe ochun neni an epwe tongeni maar. Tipepos ne mut ngeni ewe maritan tappin aramas ar repwe fini finier mi murino, me mut ngeni Kot epwe fori An manaman. Mwirimwirin epwe fen kon ningeoch me fen amwarar me apwapwa nap seni met kopwe fen pusin mina.

Non an samach Kot won Nang ewe kokkot, nefinen famini wewen pwe ese mcuh. Ina pwata, sam me iin, kosap fangeta, ika mwo kose sani met a fis me akkomwan.

Fiti Jises Kraist, ewe Mastan Echikara me Chon Amanau, mii wor minafon nepoputan; fansoun meinisin A awora epinukunuk.

Jises Kraist ii ewe pochokunen famini.

Jises Kraist ii ewe pochokunen sarafo.

Jises Kraist ii ewe pochokunen sam me iin.

Usun ei uwa pwarata non iten Jises Kraist, amen.

Esinesin

1. “An sam me iin anean pwe repwe aiti nour kewe semirit kewe murinon manaw. Iei pwan kinikinin an Samach Kot won Nang ewe kokotun manaman. A mochen pwe Noun kewe semirit repwe eto won ei fonufan, fiti ekewe pwan tapin famini ra fen nomw non nang. Famini ra foruta non ew kinikinin mwun nang, me ii a mochen pwe epwe wor ekewe kinikin won ei fonufan. Ina mwo ika famini won ei fonufan resap unuseoch, nge ra ngeni noun Kot kewe semirit eochun fansoun ar repwe eto ngeni ei fonufan fiti ar tong won ei fonufan usun met ra mefi me nang—an sam me iin tong. Pwan famini ina ew pwan ochun anen an epwe onomu pwan wano ekewe foforochun me ennetin nongonong a tongeni emweni kich sefan ngeni Kot” (Henry B. Eyring, “Gathering the Family of God,” Liahona, May 2017, 20).

2. Ewer, sa sinei pwe an kot mochen esap chok poponuta “won ei fonufan, usun chok won nang” (Matthew 6:10). Wisen sam me iin won ei fonufan mi nono ngeni an Kot ewe mochen. Mi fokun kuna. A kechiw fan iten meinisin ekewe mi netipeta me osukosuken nefinen non famini. Nge Ii ese mwo fangetani an ewe famini. Me I esap, pokiten a wor an Kot amwararen kokkoten esemuch ren fetanin manauan Noun semirit. Me ewe famini ina nukanapan ena kokkot.

3. Nengeni Matthew 18:1-5; Mosaia 3:19.

4. An ewe Famini: Esinesin ngeni Unusen Fonufan,” ChurchofJesusChrist.org; nengeni pwan Doctrine and Covenants 68:25–28.

5. Nengeni “Learning at Home Is Founded on Relationships,” Teaching in the Savior’s Way: For All Who Teach in the Home and in the Church (2022), 30–31; see also Doctrine and Covenants 109:8.

6. Moronai 7:48.

7. 1 Nifai 16:29; pwan nengeni Alma 37:6–7.

8. Nengeni “Learning at Home Consists of Small, Simple, Consistent Efforts,” Teaching in the Savior’s Way, 31. President David O. McKay a apasa: “Sisap ekieki pwe, pokiten chok ekoch [metoch] … ra kukun me rese namwot, me [rese] auchea. Kukunun metoch a efisato, manau. Manawach, ach nonomw, inisich a for seni kukunun pichipichin ngasangasach. Nengeni ena kukunun ngasangas esap kouno ne pichipich, me manawom won ei fonufan epwene kouno. Ewe ochun akar epwe opochokunano unusen fonufan, nge sipwe angei ekewe feieoch seni [tinan] kewe pokiten ra eto ngeni kich usun chok en kukunun saram, a, uwato ounusano unusen fonufan seni tinen akar. Ewe kirochun pwin a eto seni saramen ekewe feukukunun fuu; me usun chok chon tapono murin kraist ra eto seni ach fori usun met Kraist a fori non ei awa, minich, ei minich—non imwach” (Teachings of Presidents of the Church: David O. McKay [2003], 219).

9. Nengeni Ilaman 5:30.

10. Nengeni 2 Kings 5:9–14.

11. Nengeni Exodus 16.

12. Nengeni “Preparing Your Children for a Lifetime on God’s Covenant Path,” Come, Follow Me—For Individuals and Families: New Testament 2023, appendix (digital only).

13. Nengeni “Learning at Home Can Be Planned but Also Spontaneous,” Teaching in the Savior’s Way, 31; 1 Peter 3:15.

14. Doctrine and Covenants64:32–33.

15. Nengeni Matthew 2:13.

16. Nengeni Alma 40:1; 41:1; 42:1.

17. Nengeni 1 Samuel 16:7.

18. Nengeni 1 Nephi 15:8.

19. Alma 5:13.

20. Nengeni “Tong Fengen,” Hymns, no. 308.

21. Nengeni Ether 12:27.

22. “Ren semirit, wiser ar repwe angei ekewe pekin asoson emwen seni sam me iin. Ra sinei an emon me emon nour kewe fofor, ar weweoch, me ar sine. Sam me iin ra awora ar anein manawer ar repwe fori me awora ar fansoun ne poporous ngeni emon me emon nour kewe semirit. Sia nom non ewe nenioch ach sipwe pochokunen finata nonnomochun nouch me manauochun kewe semerit” (James E. Faust, “The Weightier Matters of the Law: Judgment, Mercy, and Faith,” Ensign, Nov. 1997, 54).

23. Ruu pwan ekoch pekin aninis mi fokun namot sipwe fosun: ewe a nomw online non ei ier Feito, Tapwono Mwir ekewe aninis a pwan pachonong ewe minafon kinikin itenapan “Preparing Your Children for a Lifetime on God’s Covenant Path.” A aiti ew, imw mi onomwu ekiekin ar repwe anisi nour kewe semirit ar repwe moneta ngeni papatais me pwan ekoch annuk me pwon. Me ewe minafon Afanafan Usun ewe Chon Amanaw a fori a wor kinikinin itenap “Imw me Famini” a awewei ifa usun an ekewe nongonongen afanafanen Kraist epwe wor nomw imwach (Nengeni peich 30–31).