Tufichin Angei An Kot Manaman seni ekkewe Pwon mi Pin
Nupwen oupwe fetanei ewe aanen pwon mi pin, seni papatais ngeni ewe tempel me non unusen manau, ua pwon ngenikemi manaman ne ungeni mwokutun fonufan.
Ewe November a no, a wor ai ewe tufichin epini ewe Belém Brazil Tempel. A ew pwapwa ai nom ren ekkewe chon ewe Mwichefen mi epinipin non enefenin Brazil. Ren ena fansoun, ua kaeo pwe Belém a ewe annen ngeni ewe neni mi pachenong ewe chonupupu mi amwarar non fonufan, ewe chonupupu Amazon.
Nge inamo ren pochokunen ewe chonupupu, fan ruu non ew ier a wor mettoch esap ururun epwe fis nge a fis. Nupwen ewe akkar, maram, me fonufan ra chok wenefengen, ew pochokunen nono a fis me a mokututa me puputa non ewe chonupupu, a fiu ngeni pusin fetanin ewe konik. Nono ra 6 meter tekian1 fetanin a sa ussun 50 kilometers2 ne puta pupun a fen makketiw. Ei mettoch mi wesewesen fis, a fen sinino pwe ew watten no, chon ewe neni ra eita ngeni pororoca, ika “waten puchor” pokiten ren ewe osomongun okurang a forata. Sia tongeni osopono ennetin pungun pwe pwan mo ewe pochokunen Amazon epwe fang ngeni ekkewe manamanen nang.
Ussun ewe Amazon, a wor ew nikinikin fetan non manauach; sia mochen fori met ekkewe mi pwisin ekketo ngenikich. Ussun ewe Amazon, fiti aninis seni nang sia tongeni fori mettoch ururun wesetan. Pun wesewesen, ese chok fisito ach sipwe tekisoson, mosonoson, ika mochen sipwe ne fangeta ach kewe mochen ngeni Kot. Nge seni chok ach sipwe fori sia tongeni ekesiwinino, niwiniti ach sipwe nom ren Kot, me angei neniach esemuch.
Sakofesen seni ewe Amazon, sia tongeni fini ika sipwe kouno ngeni manamanen nang ika “fiti fetanin.”3 Ach sipwe fiu ngeni fetanin meni epwe weires. Nge nupwen sia fangeta “ngeni ekkewe etiwetiw an ewe Ngun mi Fel” me oturano ekkewe maichan fofor seni apwangapwangan inis ren mwan ika fefin,4 sia tongeni angei an ewe Chon Amanau ewe manamanen ekesiwin non manauach, ewe manaman ach sipwe fori ekkewe mettoch mi aweires.
Preseten Russell M. Nelson a aiti kich ifa ussun sipwe fori ei. I a fen pwonei, “Emon me emon ion a fori ekkewe pwon mi pin non nenien papatais me non tempel—me aponuetar—a napeno tufichin tonong ngeni ewe manamanen Jises Kraist … [ne seikata] kich asan seni ewe turutiwen ei fonufan.”5 Non ekkoch kapas, Sia tongeni tufichin tonong non ewe manamanen Kot, nge nupwen chok sipwe akoko ngeni I ren ekkewe pwon mi pin.
Me mwen an ewe fonufan a foruta, Kot a forata ekkewe pwon mi pin ussun ewe napanapen foforun ren minne kich, Noun, sipwe ochu fengeni inisich ngeni I. Anongonong won feinfeino chok, annuk ese siwin, I a affata ekkewe napanap ese tongeni siwin ren minne sia winino, manau, me manau fefeita. Non ei manau, sia fori ekkei pwon mi pin ren ach pachenong non an pristut ekkewe angangepin me pwon pwe sipwe fori met Kot a ureni kich pwe sipwe fori, me nupwen sia fori , Kot a pwon ngeni kich ekkewe feioch.6
Ew pwon mi pin a ew pochokunen pwon ewe sipwe amonata ren, weweochuti, me wesewesen afona.7 Ach fori eu pwon mi pin ngeni Kot a sokono seni ach fori ew pwon non ew napanap mi chok mecheres. Aewin, a auchea epwe wor mumuta meren ewe pristut. Oruwan, pwon mi apwangapwang ese wor an ewe chufengenin pochokun an epwe seikikicheta asan seni weitian pusin mokutun fetanin. Sia fori ew pwon nupwen chok sia ota ne fangeta inisich nap seni met ururun ach sipwe menemenochu. Sia winiti semiritin pwon noun Kot me chon muni An ewe muu, akaewin nupwen sia affata pwe sia unusen fiti ewe pwon mi pin.
Ewe kapas aanen pwon mi pin a wewe ngeni ew tetenin pwon mi pin ren minne sia tongeni feitto ren Kraist me chu ngeni I. Seni ei pwonen riri mi pin, a wor ach tufichin angei An ewe manaman ese much. Ewe aan a poputa ren nuku non Jises Kraist me aier, mwirin papatais me angei ewe Ngun mi Fel.9 Jises Kraist a pwar ngeni kich ifa ussun ach sipwe tonong non ewe aan nupwen I a papatais.10 Non porousen ewe Kapas Allim non ewe Testamen Sofo non Mark me Luke, Samach won Nang a pusin kapas ngeni Jises atun An ewe papatais, a apasa, “En nei mi achengicheng, ua unusen pwapwa reom.” Nupwen sia nom won ewe aanen pwon mi pin ren papatais, ua tongeni anchangei Samach won Nang a pwan apasa ngeni emon me emon kich: “En nei mi achengicheng, uwa unusen pwapwa reom. Kopwe soposopono.”11
Atun papatais me nupwen sia angei ewe sakrament,12 sia pwarata pwe sia mochen sipwe wata woch iten Jises Kraist.13 Non ei napanap sipwe ekipwichi ussun ewe annukun ewe Testamen Noom, “Ousap panmuani iten ewe Samon ami Kot ren och popun mi ngaw.”14 Ngeni rongeien seningach non ei fansoun, ei a ussun ngingin ew mettoch ra fori ese mumuta meren annuk a u ngeni aiann iten ewe Samon. Ewe annuk a pachenong ena, nge annukun a fen kon anonon. Ewe fosun Hebrew a awewei ussun “angei” wewen “seikata” ika “mwarei” ussun emon epwe mwarei echo mangak ewe mi esisinata ewe mine an fengen me emon ika ew mwich.15 Ewe fos a awewei ussun “vain” wewen “pon” ika “emweningaw.”16 Ewe annuk ousap panmuani iten ewe Samon a pwan wewen, “Kosap apasa pwe en emon noun Jises Kraist chon kuno me nukun chok ika ka wesewesen mochen kopwe tupunu I non ennetin .”
Sia winiti Noun chon kuno me tupuni I ren ennetin nupwen sia wesewesen me anapano ach wata woch ewe iten Jises Kraist seni ekkewe annuk mi pin. Ach pwon mi pin a ngenikich pochokunon manaman ach sipwe nom won ewe an mi pin pokiten nefinach me Jises Kraist me Samach won Nang a siwin. Sia akoko Ngenir seni ew pwonen riri fengen.
Ewe anen pwon mi pin a emwen ngeni ekkewe angangepinin ewe tempel, ussun ren ewe tempel endowment.17 Ewe endowment ina an Kot niffangen pwon mi pin a unusen ochufengenikich ngeni I. Non ewe endowment, sia pwon, akkom, ach sipwe achocho ne apwonueta an Kot annuk; oruwan, aier fiti netipechou me netip niemam, ounungatin, manaueni ewe kapas allimen Jises Kraist. Sia fori ei ren ach anganga nuku non I, fori pwon mi pin ren Kot nupwen sia angei ekkewe angangepinen amanau me manau mi tekia, apwonueta ekkena pwon mi pin non unusen manauach, me achocho ne manaueni ekkewe ru annuk mi nap ne tongei Kot me chon oruch. Aruwanun, sia pwon, ne apwonueta ewe annukun nimenimoch me, enimuwan, asora inisich me mettoch meinisin ewe Samon a efeiochu ngeni kich ne aueta An Mwichefen.18
Ren ach fori me aponueta ekkewe pwon mi pin non tempel, sia kaeo chommong ussun an ewe Samon popun me angei ew unusen ewe Ngun mi Fel.19 Sia angei emwenin manauach. Sia miritino non wisach chon kuno pwe sisap chok ekkewe semirit ese naf ar wewe.20 Nge, sia manau fiti ew napanapen ach nenengeni mettoch feinfeino me ra kon pwapwaiti ar repwe angang ngeni Kot me ekkoch. Sia angei napenon tufichin ach sipwe aponueta ach kewe popun non ei manau. Sia tumun seni met mi ngaw,21 me sia anapano watten manaman ne fiu ngeni sosot me ach sipwe aier nupwen sia nikotutum.22 Nupwen sia tipemwaramwar, ekiekin ach kewe pwon mi pin ngeni Kot a anisi kich ach sipwe niwinngeni ewe an. Ren ach chu ngeni an Kot manaman, sia winiti pusin ach pororoca, sia tongeni fiu ngeni fetanin ewe fonufan, non unusen manauach me tonong non ewe fansoun ese much. Nesoponon, fetanin pusin kokotun manauach ra siwin pokiten ewe anen pwon mi pin a emweni kich ngeni manau mi tekia me manau ese much.23
Aponueta ekkewe pwon mi pin ra fis non ewe nenien papatais me non ekkewe tempel ra pwan awora ngenikich pochokun ach sipwe pochokun ngeni sosotun non ei manau me metekin netip.24 Ewe nongonong ra angang fengen me ekkei pwon mi pin a ekinamwei anach me awora epinukunuk, ourur, me kinamwe.
Semei me inei kewe chinap Lena Sofia me Matts Leander Renlund ra angei an Kot manaman seni ar pwonen papatais nupwen ra choni ewe Mwichefen non 1912 non Finland. Ra pwapwa ar ra choni ewe aewin pranchin ewe Mwichefen non Finland.
Leander a mano seni ew semwenin ammat nimu ier a mwirin nupwen Lena a pwopwo ren nour ewe angonun semirit. Ena semirit, semei ewe, a uputiw ruu maram mwirin manon Leander. Lena ese chok peiaseni punuwan ewe nge pwan fumon me nein noun kewe engon semirit. Ren an woungaw emon fefin mi mano punuwan, a otures. Non 20 ier i ese tawen mour kinamwe nepin. Fansoun neran, a osukosuk ne awora mwongo fan iten an famini. Nepwin, a tumunu chochon an famini ekkewe repwene mano. A weires sipwe ekieki ifa ussun an neminewe tongeni.
Lena a chok soposopono pokiten mi sinei pwe punuwan ewe me noun kewe semirit ra mano repwe noun me punuwan non fansoun ese much. Ewe puken feiochun tempel, fiti feiochun famini fochofoch, a awora an kinamwe pokiten an nuku non ewe riri fochofoch. Non fansoun ei manau, neminewe ese angei an endowment ika riri ngeni Leander, nge Leander mi chok auchea non manauen neminewe me kinikinin an wachemuken epinukunuk ren fansoun mwach.
Non 1938, Lena a wanong ekkewe rekot pwe ekkewe angangepin non tempel repwe for fan iten chon an ewe famini ra mano, ekkoch ekkewe a akkom wanong seni Finland. Mwirin an neminewe a mano, ekkewe angangepin non tempel ra for meren ekkoch fan itan, Leander, me noun kewe semirit mi mano. Seni ekkewe ra wisen fori ekkewe angangepin fan iten ekkewe mi mano, neminewe a efeiochuno, Lena me Leander ra riri fengen, me nour kewe semirit mi mano me semei we a riri ngenir. Ussun ekkoch, Lena “a mano non nuku, ese angei ekkewe pwon, nge a kuner me towaw, … [a] nukur, me a foropachereno.”25
Lena a nom ussun nge a fen fori ekkei pwon mi pin non manauan. A sinei pwe an kewe pwonen papatais me sakramen mi pin ra ochu fengenir me ewe Chon Amanau. Neminewe “a mut ngeni ewe apwapwan mochenin [an ewe Chon Angasano] neni mi pin epwe wato epinukunuk ngeni [neminewe] mi netipeta.”26 Lena a ekieki pwe ew an Kot kewe wachemuken umoumoch ren a kaeo ussun famini fochofoch me mwen a mefi ewe watten osukosuk non manauan. Seni pwon mi pin, neminewe a angei ewe manamanen Kot an epwe achocho ngeni me pwata seni kokotongawen wietien an kewe osukosuk me weires.
Nupwen kopwe fetan won ewe aanen pwon mi pin, seni papatais ngeni ewe tempel me non unusen manauom, Ua pwon ngonuk manaman epwe no u ngeni ewe mokutun ewe fonufan—manaman ne kaeo, manaman ne aier, me manaman ne pinino, me ewe manaman ne kuna epinukunuk, kinamwe, me pwan pwapwa nupwen kopwe churi osukosuk. Ua pwon ngonuk me om famini seni angangen ewe chon koum, akkaewin nupwen ewe tempel epwe ew om watten anongo om ekiek won non manauom.
Nupwen ka feitto ren Kriast me chu ngeni I me Samach won Nang ren pwon mi pin, ussun och mettoch ese fifis a fis. Ka ekesiwin me winiti mi unusoch non Jises Kraist.27 Ka winiti semiritin pwon mi pin noun Kot me emon chon non An ewe muu.28 Uwa chok fen anchangei I an uronuk, “En nei semirit ewe ua pwapwa non. Ua etiwokonong.” Non iten Jises Kraist, amen.