“Mutngeni Koutan Ei Im Epwe won Itei”
Nengeni Doctrine and Covenants 93:24
Ekkewe pwon mi pin me ekkewe angang mi pin non ekkewe tempel mi namwot ngeni nimenimochun netipach pwe noun Kot kewe at me nengin repwe tufichin weri manau ese much.
Non ewe petewen mi pin non 200 ier a no, emon anuan Joseph Smith a kuna me a fos ngeni Kot, Ewe Sam ese Much, me Noun We, Jises Kraist. Senir, Joseph a kaeo usun ewe ennetin nikinikin ekkewe unumon non Kot me usun pwarata mi soposopono ren ei nemasepwi mi nap a etiwato ewe fansoun soponon “ewe kinikinin fansoun mi unus.”1
Mwirin unungat ier, ren penuan an retin achocho ne iotek non ewe pwinin September 21, 1823, rumwen Joseph we a ur ren saram tori a “saramaram nap seni saramen neanowas.”2 Emon mi auchea a pwa nepekin an we pet, a kokori ewe at ren itan, o apasata pwe “ i emon chon akkuno afeito seni nenien Kot o itan Moroni.”3 A aiti Joseph usun ewe feiton ewe Puken Mormon.
Me iwe Moroni a apasata ewe kapas seni puken Malachi non ewe Testamenin Noom, fiti ekkoch kapas seni ewe King James Bible:
“Nengeni, upwe pwar ngonuk ewe Pristut, seni ewe poun Elijah ewe soufos, me mwen feiton ewe auchean me anoninenin ranin ewe Samon. …
“Me i epwe fotuki non netipan ekkewe semirit ekkewe pwon a fori ngeni ekkewe sam, me netipen ekkewe semerit repwe kun ngeni semer. O ika esap iei usun, unusan ewe fonufan epwe tatakis nupwen a war.“4
Auchean pwan, Moronai a ereni Joseph Smith usun an Elijah we sekining mi efisata angangen tempel me uruon famini non ewe fansoun soponon me a fis pwe efou foun nongonongun ewe sofo sefaniton “mettoch meinisin …, usun Kot a arongafetanei me non mongungun noun kewe soufos mi pin me nom.”
Ua tingor pwe ewe Ngun mi Fel epwe anisikich ren ach sia kaeofengen usun ekkewe pwon mi pin, angang mi pin, me feioch mi kawor ngenikich me non ekkewe tempel non Ewe Mwichefenin Jises Kraist ren Aramas mi Pin non Fansoun Soponon.
Ewe Niwinsefaniton Elijah
Ua poputa ai ei afanafan ren ei kapaseis mi auchea: pwata ewe niwinsifaniton Elijah mi auchea?
“Sia kaeo me ren pwaratan ei fansoun soponon pwe a wor ren Elijah ewe manamanen riri seni ewe Pristut seni Melkisetek”6 me “ewe saingonon soufos mi kamwoch akkomwan an Jises Kraist we fansoun.”7
Ewe Soufos Joseph Smith a awewe: “Ewe ngun, manaman, me sekining an Elijah mi, ewe epwe wor an manamanen kamwoch ewe kiien ewe … Pristut seni Melkisetek mi unus … ;me pwan … angei …unusan ekkewe angang mi pin an ewe muun Kot, wenengeni ewe kunun netipan ekkewe sam ngeni ekkewe semirit, me netipan ekkewe semerit ngeni ekkewe sam, kapachenong pwan ekkewe mi nom nang.”7
Ewe mwumwutan riri mi pin mi namwot pwe “met kopwe fotekini won fonufan: epwe fotek me won nang o met kopwe epichano won fonufan epwe pichino me won nang.“8
Joseph a pwan afata : “Ifa usun Kot epwe eto me cheri ei tapin aramas? I epwe tinato Elijah ewe soufos. … Elijah epwe pwan pwari ekkewe pwon mi pin ne rifengeni netipen ekkewe sam ngeni ekkewe semirit, me ekkewe semirit ngeni ekkewe sam.”10
Elijah mi fiti Moses ne pwa won ewe chukuchukutan ekkesiwin mi pin me a epini ei mwumwuta won Peter, James, me John.11 Elijah a pwan pwa fiti Moses me Elias won April 3, 1836, non ewe Kirtland Tempel me a pwan epini ekkei pwan kiien pristut won Joseph Smith me Oliver Cowdery.12
Ewe niwinsefaniton ewe mwumwutan riri seni Elijah non 1836 mi namwot epwe amwonata ewe fonufan ngeni an ewe Chon Amanau ewe Aruan Waroto me a efisata ew watten annapanon an unusan ewe fonufan tipeeu ngeni uruon famini kaeo.
Ekkesiwin, Okkunu, me Nimeti Netip
Ewe kapas netip mi nom nuseni fan 1,000 non ekkewe pukfel. Ei kapas mi kukkun nge auchea mi apworaus usun an emon pwisin memmef. Netipach—ewe pachafengenin ach mochen, sani, ekiek, popun, me namanam—mi afata ion chok kich pwisin me mi esenipato met sipwe tongeni winiti. Me popunapen an ewe Samon we angang mi ekkeswini, okkunu, me nimeti netip ren pwan mi pin an ew kapas allim me angang mi pin an ewe pristut.
Sise kauta are tonong non tempel mi pin pwe sipwe chok fori pwisin achecheman are non ach famini och mettoch mi auchea. Nge, ekkewe pwon mi pin me ekkewe angang mi pin non ekkewe tempel mi namwot ngeni nimenimochun netipach pwe noun Kot kewe at me nengin repwe tufichin weri manau ese much.
Fotuki non netipan ekkewe semirit ekkewe pwon ngeni ekkewe sam—ngeni Abraham, Isaac, and Jacob pwan—okunnu netipan ekkewe semerit ngeni semer kewe, fori kaeon uruon famini, me fori angangen tempel mi pin fanasengesin ekkewe mi mano ir och sokkun angang mi efeiochu aramas won ruwepek ewe mangak. Nupwen kich sia tinikeni ne fori ei angang mi pin, sia anneasochisi ekkewe annuk sipwe tongei me angang ngeni Kot me chon oruch.13 Me ei sokkun angangen umoumoch mi anisikich ne wesewesen “Ausening ngeni I!“14me feito ren ewe Chon Amanau.15
Ekkewe pwon mi pin me angangen pristut mi wesen pin sia chok tongeni angei non ew tempel—imwan ewe Samon. Meinisin met sia kaeo me meinisin sia fori non ewe tempel mi ennetata ewe pin an Jises Kraist me wisan non an Samach won Nang we kokotun pwapwa.
Seni Non ngeni Nuku
Preseten Ezra Taft Benson a awewe usun ew tetenin kaeo ewe Chon Angasano a aea “ne awora ewe manau fochofoch me manau ese much an aramas.”16 A apasa: “Ewe Samon a angang seni non tori nukun. Ewe fonufan a angang seni nukun ngeni non. Ewe fonufan epwe wau aramas seni ekkewe nenian torongau. Kraist a wau ekkewe nenian torongau seni aramas, me repwe pwisin wareu seni ekkewe nenian torongau. Ewe fonufan epwe ekkesiwini aramas ren an epwe ekesiwini nenier. Kraist a ekkesiwini aramas, o ir ra wisan ekeswini nenier. Ewe fonufan epwe wisen siwini mokutukutun aramas, nge Kraist mi tongeni ekkesiwini netipen aramas.”17
Pwon mi pin me angangen pristut mi pin ra popunapen ewe soposoponon upsefan me ekkesiwin; ir ifa usun ewe Samon mi angang ngenikich pwisin seni non ngeni nukun. Pwon mi pin minne sia nikitu ne apwonueta, chechemeni fansoun meinisin, me mi mak, “ren ewe Ngunun Kot mi manau … non netipen aramas”18mi awora ngeni kich ach popun me ewe afatan feioch non ei manau pwan non manau esemuch. Angang mi pin minne sia etiwer non nimenimoch me chechemenir fansoun meinisin mi suki ekkewe tawanapen nang minne ewe manamanen ewe namanamen kot mi tongeni pupunong non manauach.
Sise feito ngeni ewe tempel pwe sipwe op are su seni ekkewe tipisin fonufan. Nge, sia feito ngeni ewe tempel pwe sipwe pworacho ngeni ewe fonufan nenien tipis. Nupwen sia etiwanong non manauach ewe “manamanen ewe namanamen kot“19seni ach angei ekkewe angangen pristut mi pin me fori o apwonueta ach pwon mi pin, kich sia feioch ren pochokun nuseni ach pwisin20pwe sipwe pworacho ngeni ekkewe sosot me weiresin ei manau me fori o winiti murinno.
Itefounon ei Imw Epwe Choufetan
Ewe aewin tempel non ei kinikinin fansoun a for non Kirtland, Ohio, me epinipin non March 27, 1836.
Non ew pwarata ngeni ewe Soufos Joseph Smith ew wiik mwirin ewe epinipin, ewe Samon a apasa:
“Etiwa netip meinisin pwe repwe pwapwa, ekkewe ir, ren ar pochokun, ra oueta ei imw won itei. …
“Ewer ekkewe netip a ngerou me engon ngerou aramas repwe kan pwapwa chapur ren niwinin ekkewe feioch repwap puputiw seni, me pwan ewe nifang mi fen minne nei chon angang ra fen angei non ei imw.
“Me ewe itefounon ei imw epwe choufetan won fonu touau; me iei ewe nepoputan ewe effeioch epwe puputiw won mokuran nei aramas.“21
Nengeniochu ngeni ekkei kapas netipan ekkewe ngerou me engon ngerou aramas repwe kan pwapwa chapur me ewe itefounon ei imw epwe choufetan won fonu touau. Ekkei esinesin mi kan amairu non April 1836, nupwen mei chok wor fitemon chon fan non ewe Mwichefen me ew chok tempel.
Ikenai non 2020, mei wor 168 tempel mi suk. Sia fen esinesin me angangen oueta pwan faik me tiu tempel iei. Imwan ewe Samon mi kauta won ekkewe “fonuen won saat“22 me pwan non muu me neni ita me ren napengeni meinisin resap tufichin etiwa ew tempel.
Ewe mwichen nifang mi pin mi chiaku non 88 fosun fonu me epwe kawor non tepetep fosun fonu nupwen pwan eu tempel mi kauta ne efeiochu pwan chommong noun Kot. Non ekkei 15 ier mwirich, ekkewe nampan sokun fosun fonu mi kawor ngeni angang mi pin non tempel epwe annea fan ru.
Non ei ier aupwe tu pwunun me poputani kautan 18 tempel. Penuan na, non ukukun 150 ier mi no ne kauta ekkewe akkaewin 18 tempel, seni ewe atetenin ewe Mwichefen non 1830 ngeni ewe epinipinin ewe Tokyo Japan Tempel seni Preseten Spencer W. Kimball non 1980.
Ekkieki usun ewe emwitirin ewe angangen tempel mi fis non chok manauan Preseten Russell M. Nelson. Nupwen Preseten Nelson a uputiw won September 9, 1924, mei chok wor onu tempel an ewe Mwichefen mi suk.
Nupwen i a epinepin ngeni wisan Apostel won April 7, 1984, 60 ier mwirin, mei wor 26 tempel mi suk, a kapach 20 tempel non 60 ier.
Nupwen Preseten Nelson a epinipin pwe i ewe Presetenin ewe Mwichefen, mei wor 159 tempel mi suk, wewen pwe a kapach 133 tempel non ekkewe 34 ier minne i emon chon ewe Mwichen Engon me Ruemon.
Seni ewe fansoun i a winiti ewe Presetenin ewe Mwichefen won January 14, 2018, Preseten Nelson a esinesin usun 35 tempel minafo.
Tiwe me onu persen ukukun ekkewe tempel mi epinipin a fis non manauan Preseten Nelson; 84 persen mi epinipin seni ewe fansoun i a epinipinino ngeni wisan Aposel.
Fansoun Meinisin Nennengeni ekkewe Mettoch Mi Aucheanap
Pwe kich chon an ewe Samon we Mwichefen mi niwinsefanito, sia ingeiti mwitirin An angang non ei fansoun soponon. Me chommong tempel epwe kawor non fansoun mwach.
Brigham Young a osini, “Pwe epwe unus ei angang esap chok wor ew tempel nge epwe fen wor fitu ngeru, me fitu ngeru me fitu engon ngeru mwan me fefin repwe tonong non ekkan tempel o tupuni ekkewe aramas ion ra fen manau seni nom tori inetichok ewe Samon epwe pwari.“23
Ewer, ewe esinesin faniten ekkewe tempel minafo mi esenipato pwapwa mi nap me ew popun sipwe kinisou ngeni ewe Samon. Nge, amwo sipwe tiniken ne nennengeni ekkewe pwon mi pin me angang mi pin mi tufichin ekkesiwini netip me anapano ach pin ngeni ewe Samon me esap chok nenian are ningochun ewe imw.
Nongonongun ekkewe etipeew mi nom rech pun kich chon an ewe Samon we Mwichefen mi niwinsefanito ir (1) pwe sipwe “Ausenging ngeni I!”24me ekkesiwini netipach pwisin ren ekkewe pwon mi pin me angang mi pin, me (2)) pwapwaiti ach sekining mi pin ne awora feiochun tempel ngeni unusan ewe faminien aramas meinisin won me ruepekin ewe mangak. Ren An emwen me aninis, ewer sipwe apwonueta ekkei sekinin mi pin.
Ewe Kautan Saion
Ewe Soufos Joseph Smith a apasau:
“Ewe kouta an Zion a ew popun minne a efisi ewe mwasang an ekkewe aramasen Kot ese nifinifin ierir; a ew itenap minne soufos, priests, me king ra fen nonomuni ren och sokkun pwapwa; ra fen nengeni mwer fiti pwapwan feiton ngeni ewe ran minne kich mi manau non; me mwareiti fiti nang me pwapwan tipepos ir ra kon me makketiw me pwarata ren ei ach fansoun ran; ngo ir ra fen mano rese chiwen kuna; … a nonom rech ach sipwe kuna, fitinon me aninis ne efisi mwach ewe ningen fansoun-saponon.”25
“Ewe nangin Pristut epwe ochu fiti ewe fonufan, epwe wato ekkenan waten popun; … ew angang ena Kot me chon nang ra fen nenengeniochu fiti pwapwa non ekkewe fansoun afen wes; enna a fen amwasanga netipwan ekkewe petriark me soufosun noom; ew angang enna a afatata epwe wato ren ewe attaen ren ekkewe pochokunen rochopwak, ewe forusefanin fonufan, ewe ningen Kot, me ewe angasano ren faminien aramas unus.”26
Ua fokun pwarata pwe ewe Sam me ewe Nau ra pwa ngeni Joseph Smith, me Elijah a eniwinato ewe mwumwutan riri. Pwon mi pin me angang mi pin non ewe tempel mi tufichin apochokunakicheta me nimeti netipach ren ach sia ”Ausening ngeni I!”27me angei ewe manamanen ewe namanamen kot non manauach. Me ua pwarata pwe ei angangen fansoun soponon epwe okufu ekkewe manamanen kiroch me awora ewe ngasanon ewe faminien aramas meinisin. Usun ekkei nongonong ua pwapwa pwarata non iten ewe mi pin Jises Kraist, amen.