Afanafanen Nepoputan
Sipwe kutta ach sipwe ausening ngeni Jises Kraist, non iteiten napanap mi tufich, ewe a kapas ngenikich ren manamanen me iamwirin ewe Ngun mi Fel.
Pwi me fefinei mi achengicheng, ren ach etiwakemi ngeni ei April 2020 michenapen mwichefen mi aucheanap an Ewe Mwichefenin Jises Kraist ren Aramas mi Pin non Fansoun Soponon, ami mi sinei pwata, ua uta mwemi non eu nenien afanafan ese masow!
Use fen sinei, pwe nupwen ai we pwon ngeni kemi non ewe October 2019 mwichenapen mwichefen pwe ei mwichenap non April “oupwe chechemeni” me ousap tongeni “monukano,” pwe ai kapas ngeni ew mwich kukkun mi kis seni 10 aramas epwe efisi pwe ei mwichenap epwe chechemoch me esap monnukuno me rei! Nge ai sinei pwe ami mi fiti ei mwich ren fichin tv, me an ekkewe chon kon konu “It Is Well with My Soul,” a ekinamwei nguni.
Usun oua fen sinei, chon fiti ei mwichenapen mwichefen mi aukuk pokiten sipwe fori met sipwe tongeni ren ach sipwe akouno watenon COVID-19. A watte osukosukan ei semwen won unusan fonufan. A pwan ekisiwini felin Mwichefen, angangen misineri, me pwan angangen tempel ren ekkis fansoun.
Ina mwo pwe ach osukosuk ikenai a feito seni ei semwen mi pochokun, osukosuken manauach a pwan nap seni ei semwen. Osukosuken fansoun mwach mi tongeni feito seni akseten, pukutan osukosuk, are pwan metekin netipach.
Ifa usun ach sipwe nikitu non ekkei osukosuk? Ewe Samon a fen erenikich “Ika oua fen ammonata kesap nuokus.”1 Ennet, sia tongeni isoni mongo, konik, me moni. Nge mi nonno auchean ach sipwe oura ach pwisin nenien isois ren pekin ngun ren nuku, ennet, me kapasen pwarata.
Ach unusechun pwopwun non ei manau ach sipwe ammonata ach sipwe churi nouch Chon Forikich. Sia fori ei ren ach achocho iteiten ran ach sipwe appiru ach Chon Amanau, Jises Kraist.2 Iwe sia fori enanupwen sia aier iteiten ran me angei An manaman minne a nimeti, echikara me apochokuna kich. Iwe sipwe tongeni mefi ewe kinamwe me pwapwa mi nikitu, pwan mwo non fansoun osukosuk. Ina popun ewe Samon a tingor ngenikich ach sipwe nom non neni mi pin me sisap mokutfetan.3
Non ei ier, sia pwapwaiti ewe 200 ierin eu mettoch mi fis mi unusan auchea non uruon fonufan—ren, pwaton Kot ewe Sam me Noun we mi Achengicheng, Jises Kraist, ngeni Joseph Smith. Non ei nemwasepwi, Kot ewe Sam a initi ngeni Jises Kraist me a apasa: Iei Nei At mi Acheingicheing. Kopwe ausening ngeni I!4
Ekkei kapasen pesepes ngeni Joseph a pwan nonno ngeni kich. Sipwe kuta ach sipwe ausening ngeni Jises Kraist, non iteiten napanap mi tufich, ewe a kapas ngenikich ren manamanen me iamwirin ewe Ngun mi Fel.
Iei popunen ei mwichenapen mwichefen me mwichenapen mwichefen meinisin an epwe anisikich ach sipwe ausening ngeni I. Aua fen iotek, me aua tingoreikemi oupwe pwan iotek, pwe Ngunun ewe Samon epwe ennetin nonnom rech pwe oupwe tongeni rong ekkewe afanafan minne ewe Chon Amanau a ammonata fanitemi pwisin—afanafan repwe akinamwei ngunumi. Afanafan repwe echikara netipemi mi netipingau. Afanafan repwe asarama ami ekiek. Afanafan epwe anisikemi oupwe sinei met oupwe fori ren ami soposopweno non fansoun osukosuk me sosot.
Sia iotek pwe oupwe chechemeni ei mwichenap me ousap monuki pokiten ekkewe afanafan oua rong, ekkewe mettoch repwe pwarata, me ekkewe mokutokut oupwe tufichin fiti.
Ren awewe, nesoponon ewe mwichen nesesorun Raninfel, sipwe poputani ei mwichen epinepin ren unusan fonufan minnei upwe emwenikemi non ewe Hosanna Shout mi pin. Sia iotek pwe ei epwe eu mettoch mi watte auchean ren pekin ngun ren ach sipwe chufengen ren ach ennetin kinisou ngeni Kot ewe Sam me Noun we mi Achengicheng ren ach mwareitiir non ei napanap mi sokofesen.
Ren ei mettoch mi pin, sia aea angkisif mi nimoch. Nge ika ese wor ami, oupwe chok omokutu poumi. Nesoponon ewe ewe Puchourun Hosanna, ekkewe chon fiti mwich repwe fiti ekkewe chon kon ren ach konu “Ewe Ngunun Kot mi Usun Ekkei.”5
Pwi me fefinei mi acheingicheing, ei mwichenap epwe amwarar. Ei ier epwe amwarar ren ach sipwe ekieki usun ewe Chon Amanau me An kapas allim mi niwinsefan. Ewe mettoch mi nap auchean ei mwichenap epwe esenipato ren ewe ekkisiwin non netipach me ach poputa ach sai non manauach ach sipwe rong ngeni I.
Sia etiwakemi ngeni ei April 2020 mwichenapen mwichefen! Ua sinei pwe Kot Semach won Nang, me Noun we, Jises Kraist, ir mi sinei usuch. Repwe nonnomrech non ekkei mwich non ekkei ru ran mi ning nupwen sia achocho ach sipwe karap ngeniir me sufenitir. Non iten Jises Kraist mi pin, amen.