Apwonuetan ren Osini
Ekkewe osini minne ra fen apwonueta me ren ewe Aniwinsefaniton ewe kapas allimen Jises Kraist mi unus mi chommong.
Pwi me fefinei mi achengicheng, uwa kinisou ne fos ngenikemi non ei mwichenapen mwichefen mi auchea fan achechemenien an Joseph Smith Aewin Nemasepwin ren Kot ewe Sam me Noun we At, Jises Kraist, non met, ese wor tipemwaramwar, a eu nenien Ira mi Pin. A eu nemasepwi mi amwarar me a poputa ewe Aniwinsefaniton ewe kapas allim me meinisin met a pwan fisi, seni ewe Puken Mormon ngeni ewe aniwinaton ewe mumutan me kiien ewe pristut, ewe efisitan an ewe Samon Mwichefen mi ennet, ekkewe templenun Kot, me ekkewe soufos me aposen minne ra emweni ewe angang ikenai.
Me ren emwenin nang, ekkewe soufosun Kot me nom, nupwen ewe Ngun mi Fel a amemmef ngenir, repwe osini usun ewe Aniwinsefanito me met epwe fiis non ach ran ikenai, ewe saigon kinikinin fansoun mi unus. Ewe angang iei “a amwasanga ngunun” ekkewe akkaewin chon kuna.1 Me non ekkewe tappin fansoun, ra fos, tana, kuna, me osini usun ewe fansoun mwach ren an Kot muun won fonufan, minne Isaiah a iteni “eu angang mi echupwer me amwarar.”2
Ekkewe osini minne ra fen apwonueta me ren ewe Aniwinsefaniton ewe kapas allimen Jises Kraist mi unus, fiti Ewe Mwichefenin Jises Kraist ren Aramas mi Pin non Fansoun Soponon, ir mi chommong. Nge, ikenai, upwe fos usun ekkoch chok minne uwa men sani. Uwa kaeo ekkei seni nei kewe sensen Kinter mi achengicheng me ren pechen inei minne a usun emon chon nang.
Daniel, minne a epeti ekkewe lion ren an nuku non ewe Samon Jises Kraist fiti pwan ewe aninisin noun Kot chon nang, i emon a kuna ranich ikenai non eu nemasepwi. Ren an afatta wewen an ewe Kingen Babylon Nebuchadnezzar nemasepwi, Daniel a osini pwe an ewe Samon Mwichefen epwe aueta non ekkewe saigon ran usun efou kukkun fau “pokuu seni ewe chuk nge esap ren pau.”3 “Esap ren pau,” wewen pwe me ren aninis seni nang, an ewe Samon Mwichefen ewe awatteno tori epwe ureno unusen ewe fonufan, “esap [tongeni] epwe tano … [nge epwe] nom fenfeinno.”4
A eu auchea esisin pwe an Daniel kewe kapas ra pwonueta ren chon ewe Mwichefen, seni neni meinisin won fonufan, ra katon me ausening ngeni ei mwich ikenai.
Ewe Aposen Peter mi akachocho a awewe “mettoch meinisin repwe sofo sefan … seni nepoputan ewe fonufan.”5 Ewe Aposen Peter a mak pwe non ewe fansoun unusoch, Kot epwene “ochufengeni … meinisin epwe eu chok fan nemenien Kraist,”6 “ewe foun nongonong pwisin Jises Kraist.”7 Uwa mefi ekkana osini ren memmef mi pochokun atun uwa fiti ewe epinipinin ewe Rome Italy Temple. Meinisin ekkewe soufos me aposen ra fiti me apasa ar kapasen pwarata usun Jises Kraist, ewe Chon Angasenon ewe fonufan, usun chok Peter me Paul ra fen fori. Ewe Mwichefen a eu awewe mi manau usun ena sofo sefani, pwii me fefinei, me nouch kewe memper ir chon pwarata usun ekkewe osinin nang seni nom me nom.
Joseph seni Egypt a pwarata pwe non ekkewe ranin soponon “emon chon osini ewe Samon ai Kot epwe seikata, ewe epwe emon chon osini mi kefinita ngeni uwan neikewe.”8 “Pun I epwe fori [an ewe Samon] angang.”9 Joseph Smith, ewe soufosun ewe Aniwinsefanito, iwe I ena chon osini.
John ewe Chon Pwarata a pwarata usun emon chon nangin ewe Emon mi Napanap minne a ochufengeni auchean mettochun ewe Aniwinsefanito ren ekkei kapas: “Iwe ua kuna pwan emon chon nang a akkas fan nang, a wor ren ewe Kapas Allim ese much pwe epwe aronga ngeni chon fonufan, ngeni sokkun aramas meinisin, ngeni ekkewe einang, ekkewe muu me ekkewe sokkopaten kapas meinisin.”10 Moronai iwe i ena chon nang. I a kuna ranich ikenai usun a mak non ewe Puken Mormon. Non fitu fansoun chufengen, a amonneta Joseph Smith ngeni an angang, tori pwan ewe chiakun ewe Puken Mormon: Pwan Eu Kapasen Pwarata Usun Jises Kraist.
Pwan ekkoch soufos ra pwarata usun ranich ikenai. Malachi a fos usun Elijah epwe “atewe epwe eniwini fengeni ekkewe sam me ekkewe semirit, me ekkewe semirit ngeni semer kewe.”11 Elijah a fen feitto, me pokiten, ikenai a wor 168 temple a fetan won ewe fonufan. Eu me eu ekkewe temple an nom faniten chon ewe mwichefen mi nimenimoch minne ra fori pwon mi pin me angei pwon pwisin mi feioch fan iten ir pwisin me aramaser mi fen mano. Ei angang mi pin minne Malachi a fos usun a “nom nukunapen an ewe Chon Affor kokkot fan iten ewe manau esemuch ren Noun kewe semerit.”12
Sia manau non ena fansoun mi fen pwarata usun; kich ekkewe aramas minne a wor wisach ne amonneta fan iten ewe Aruwen Wareton Jises Kraist; wisach sipwe iofengeni noun Kot semerit, ion ekkewe repwe ausening me etiwa ewe ennet, pwon mi pin, me pwonin ewe kapas allim ese muuch. Preseten Nelson a iteni “ewe napenapenfoffor weires, ewe napanapenpopun, me ewe napanapenangang won fonufan ikenai.”13 Usun ena manaman uwa apasa ai kapasen pwarata.
Ren eu wis seni Preseten Russell M. Nelson, non February ren ei ier uwa wisen epinipini ewe Durban South Africa Temple. A eu ran minne upwe chechemeni ren unusen manauei. Uwa nom ren ekkewe memper minne ra feitto ngeni ewe kapas allim usun Jeremiah a osini me nom—“emon seni ewe teninimw, me ruemon seni eu famini.”14 Ewe nongonongen Jises Kraist a achufengenikcih—won unusen ewe fonufan—noun Kot at me nengin, pwipwi non ewe kapas allim. Ese nifinifin napanapach are met sia ufouf, kich eu chok aramas ren emon Sam non Nang minne an kokkot seni ewe nepoputan pwe An famini epwe achusefan ren ar repwe fori me apwonueta pwon mi pinin ewe temple.
Ngeni eu kukkun mwichen chon Pristut non eu imwen sukkun non Kirtland, Ohio, non ewe ier 1834, ewe Soufos Joseph a pwarata, “A chok cho kukkun chon ewe Pristut ka kuna nepwinei, nge ei Mwichefen epwe aurano North me South America—epwe ureno unusen ewe fonufan.”15
Non ekkewe ier a karan no uwa sai fetan won ewe fonufan ne churi ekkewe memperin ewe Mwichefen. Pwii non ewe Mwichen Engon me Ruemon ra pwan fori usun chok ei sekinin. Nge inamo, ion a tongeni fori usun ewe angangen nouch soufos mi achengicheng, Preseten Nelson, minne non an kewe sai fetan non ekkewe aruwen ieren an a wisen Presetenin ewe Mwichefen a churi ekkewe Souneng non 32 muun fonu me terretorien America 16ne pwararta usun ewe Kraist mi manau.
Uwa chechemeni nupwen uwa angei ai kokko ren missionari neanueni we. Na atun uwa mochen angang non Germany, usun semei, pwii, me punuwan fefinei. Nge use witi won ekkoch ar repwe tikeri im, uwa chok mwitir feinno ngeni ewe nenien angei taropwe me suki ai kokko. Uwa anneani pwe uwa fen kokko ngeni ewe Easter States Mission, minne a utta non New York City. Uwa netipengaw, iwe uwa tonong non imwei we me suki nei kewe pukefel pwe upwe kinamwe. Uwa poputa ne anneani non ewe Doctine me Covenants: “Nengeni, me iwe, a wor chommong ai kewe aramas non ei neni, non ekkewe neni mi kan ngeni; me epwe usun eu asam epwe suk non ekkewe neni mi kan ngeni ewe fonu otiw.”17 Ena osini, minne a ngeni ewe Soufos Joseph Smith non 1833, a eu pwarata ngeniei. Iwe non na fansoun uwa sinei pwe uwa kokko ngeni ewe osen mission minne ewe Samon a mochen upwe angang non. Uwa aiti usun ewe Aniwinsefanito me an kewe mettoch mi auchea seni nepoputan ren ewe atun Semach won Nang a fos ngeni Joseph Smith me apasa, “Iwe iei nei we At mi Achengicheng. Rongorong ngeni I!”9
Ren watten auchea ngeni unusen ewe Mwichefen mi wor ewe osinin Isaiah, minne a pwarata nap seni 700 ier me mwen ewe uputiwin Jises Kraist: “Non ekkewe fansoun mwach, ewe chuk ikewe ewe Imwenipin a uta ie epwe ne tekia seni ekkewe chuk, … aramasen chommong muu repwe ne feito ren.”19
Non ai ekieki ikenai, uwa kuna fite million chon ewe mwichefen me chienach kewe ra fiti ekkei mwich ren tufich fiti kachito, internet, me pwan ekkoch tufich. Sia mwomot fengen usun “non tekian ekkewe chuk.”20 Brigham Young i ewe emon minne a apasa ekkei kapasen osini “Iwe iei ewe neni mi och.”21 Ekkewe Souneng, ekkoch me neir mwirimwiri chon pioneer, ra angang ne aueta Zion non ekkewe Rocky Mountain “me ren ewe mochenin me kirikirochun i ewe emon a wisen emweni ekkewe muun ewe fonufan.”22
Uwa uta ikenai won ewe puun mi pin minne fite million aramas ra fen feitto ne kuna. Non 2002, Salt Lake City a wisen annomu ewe Winter Olymic Games. Ewe Tabernacle Choir ra kon non ekkewe mwichen nepoputan, me ewe Mwichefen a fori mwichen kon me ekkoch mwich fan iten ekkewe chon fiti me katon seni chommong, chommong fonu. Uwa chechemeni fansoun meinsin pwe ka tongeni kuna ewe temple non ewe kachiton poraus minne a tinano ngeni unusen ewe fonufan iteitan pwin.
Non ekkewe ier ano, ekkoch presetenin ewe United States, king, souapung, prime minister, ambassador, me chon nowis seni chommong fonu ra feitto ngeni Salt Lake City me churi nouch chon emwen kewe. Preseten Nelson a anommu chon emwenin ewe National Association fan iten ewe Advancement en Colored People, eu mwich non ewe United States minne a angang fan iten annuk mi nonno fan iten aramas meinisin ese nifinifin ir chon ia ika unuon inisir. Uwa chemeni uta afar me afar ngeni ekkei chon chiechie me chon emwen atun President Nelson a fitir ne koko ren tipeew me tipechuu non ewe fonufan.23
Pwan ekkoch chommong ra feitto ngeni Temple Square me chufengen ren chon emwenin ewe Mwichefen. Ren awewe, non ei ier, sipwe eiteita ekkoch, sia fen etiwa ewe United Nations 68th Civil Society Mwich, eu mwich a emwicha fonufan unus me ewe aewin usun mi fiis me nukun New York City. Sia fen chufengen ren an Vietnam Committee fan iten Religious Affairs, me ambassadors seni Cuba, seni Philippine, Argentina, Romania, Sudan, Qatar, me Saudi Arabia. Sia pwan etiwa ewe chon aninis mi nap seni ewe Muslim World League.
Met uwa kapas usun a ewe apwonueta met Isaiah a osini usun pwe non ekkewe ranin soponon, muun fonufan repwe feinno ren “ewe chuk ikewe ewe Imwenipin a uta ie.”24 Ewe Salt Lake Temple mi napanap a uta nukanapen ena mwaramwar me ning.
Esap napanapen ewe ningen nukun minne aramas ra feitto ren, ina mwo ei neni a ningoch; iwe a ewe napanapen namanam mi ennet minne a pwa non ewe ngunun, awattenon, ochun, me kirekirochun Ewe Mwichefenin Jises Krait ren Aramas mi Pin non Fansoun Soponon me ekkewe aramas non; ach tong usun Kot a tong me ach achocho ngeni eu popun mi napanap, minne Joseph Smith a iteni, “ewe popun an Kraist.”25
Sise sinei inet ewe Chon Amanau epwe niwinsefanito, nge ei sia sinei. Mi namwot sipwe monneta non netipach me ach ekiek, nimenimoch ne etiwa I, me kinisou pwe sia nom non ei atun minne a osini usun me nom me nom.
Uwa pwarata pwe Preseten Russell M. Nelson i an ewe Samon soufos won ewe fonufan, me nepekin mi wor ekkewe Aposen minne ra kokko me ren Kot, me ra efeioch non wiser soufos, chon kuna, me chon pwarata. Iwe pwan, pwii me fefinei kewe achengicheng, ewe Aniwinsefanito a soposopono.
Uwa osupwano ren ewe osini an Joseph Smith, kapas minne uwa pwarata mi ennet: “Eseor emon mi nimengaw a tongeni akouno ei angang; esit mi tongeni esita kich, mwichen chon koum repwe ionifengen, sounfiu repwe ionfengen, chofona epwe enefina ekkoch, nge ewe ennetin Kot epwe chou fetan non pochokun, tori a tonong non fonu meinisin, neni meinisin, o a fetan nein einang meinisin, me aramas meinisin ra pwisin rong non seninger, tori ekkewe popun Kot mi unusen fisioch, me ewe Jehovah mi napanap a apasa pwe ewe angang a wes”26 Uwa pwarata ei pwe ekkewe osini an Joseph Smith ra soposopono ne pwonueta.
Uwa pwon pwe ika oupwe ausening ngeni ewe auraur nouch soufos mi achengicheng, Preseten Russell M. Nelson, noun kewe chon aninis, ekkewe Aposen, me pwan ekkoch chon emwenin Mwichefen, me ren ami oupwe aucheani ekkewe soufosun noom minne ra fos usun ranich ikenai, oupwe ureno, anonon non netipemi me ngunumi, ren ngunun me angangen ewe Aniwinisefanito. Uwa pwon ngenikemi pwe oupwe kuna poun Kot non manauemi, rongorong An fosun aninis ngenikemi, me mefi An tong. Non iten Jises Kraist, ren kinisou fan iten ewe Aniwinsefaniton An kapas allim me An Mwichefen, non pisekin pwarata An tong esor nonnon, Amen.