Ewe Melkisetek Pristut me ekkewe Kii
Non ewe Mwichefel ewe mumuta ren ewe pristut a fis angangan fan nemenien emwen seni emon pristut a omochu ekkewe kii seni ena pristut.
Uwa finata upwe sopweno ne fos usun ewe pristut an Kot, ewe itenap minne a fen fos usun me ren ekkewe unugat chon afanafan ekkewe ra aitikich ifa usun ewe pristut a efeiochu manauan ekkewe fefin, fopun, me anuon.
Ewe pristut a ew manaman seni nang me mwumwuta a ngeni ekkewe chon a apinukunukur fan iten an Kot angang ne efeiochu meinisin Noun kewe semerit. Pristut esap ekkewe aramas minne ra fen seikita ngeni eu wis non ewe pristut are ekkewe ra anganga ei mwumwuta. Ekkewe mwan minne ra kamoch ewe pristut esap ir ewe pristut. Iwe iei ururun sisap aita ekkewe mwan mi seiketa ngeni ewe pristut ewe pristut, nge mi och sipwe kokkorir chon kamoch ewe pristut.
Manamanen ewe pristut a nom non ewe Mwichefen me non tettenin ewe famini. Nge manamanen pristut me mwumwutan pristut a sokkono napanapen angangan non ewe Mwichefen me angangen non ewe famini. Meinisin ekkei a fis fanasengesin ren ekkewe nongonong ewe Samon a fen awesi. Ewe popun non an Kot ewe akkot pwe epwe emweni Noun kewe semerit ngeni manau esemuch. Faminin fonufan mi namwot ngeni ei kokkot. Ewe Mwichefen a nom pwe epwe awora ekkewe annuk, ewe mwumwuta, me ekkewe pwon mi pin mi namwot pwe famini epwe tongeni soposopono ngeni ewe feinfeinnochok. Iwe, ewe ettetenin famini me ewe Mwichefenin Jises Kraist a aninis fengen pwe epwe apochokuna. Ekkewe feiochun pristut—awewe ren ewe unusen ewe kapas allim me ekkewe pwon mi pin usun papaptais, apungano, me angei ewe niffangen ewe Ngun mi Fel, ewe temple endowment, me opwupwuno ese muuch—ra kawor ngeni mwan me fefin ese or sakofesenin.1
Ewe pristut sia fos usun iei ewe Melkisetik Pristut, minne a aniwinato nepoputan ewe Aniwinsefaniton ewe kapas allim. Joseph Smith me Oliver Cowdery ra seikita me ren Peter, James, me John, minne ra pwisin apasa “pwe ra kamoch ekkewe kiien ewe muun, me ewe kinikinin unusochun fansoun” (Doctrine and Covenants 128:20). Ekkei Aposen napanap ra angei ena mwumwuta seni ewe Chon Amanau Pwisin. Meinisin pwan ekkoch mwumwuta me wis non ewe pristut ra chok kapacheta ngeni ewe Melkisetek Pristut (nengeni Doctrine and Covenants 107:5), pwe a “kamoch ewe mwumwutan presetensi, me awor ewe manaman me mwumwutan ekkewe wis non ewe Mwichefen meinisin non fansoun ewe fonufan unus” (Doctrine and Covenants 107:8).
Non ewe Mwichefen ewe mwumwutan pristut mi nap, ewe Melkisetik Pristut, me ewe kukkun ika Pristut seni Aaron a angang fan nemenien emon chon emwenin ewe pristut, usun emon pishop ika preseten, minne a kamoch ekkewe kiien ewe pristut. Pwe sipwe weweiti ewe angangen ewe mwumwutan pristut non ewe Mwichefen, mi namwot sipwe weweiti ekkewe nongonongen ekkewe pristut kii.
Ekkewe Melkisetik Pristut kiien ewe muun ra ngeni Peter, James, me John, nge ena ese awesano ewe aniwinaton ekkewe pristut kii. Ekkoch ekkewe kiien ewe pristut ra feitto mwirin. Mwirin epinipininon ewe aewin temple non ei kinikinin fansoun non Kirtland, Ohio, unumon soufos—Moses, Elias, me Elijah—ra aniwinato “ekkewe kiien ei kinikinin fansoun,” fiti pwan ekkewe kiien ewe ionfengenin Israel me ewe angangen an ewe Samon kewe temple (nengeni Doctrine and Covenants 110, usun met President Eyring a fen awanawanau.
Ewe awewe mi mecheres ne weweiti ren angangen ekkewe kiien ewe pristut a nom non ewe angang seni ewe pristut ne fori pwonepin. Eu angangan annuk a eu foffor mi auchea minne a esisineta ewe fofforun pwon mi pin me ekkewe pwonun feioch. Non ewe Mwichefen meinisin ekkewe angangen annuk ra fiis fan mwumwutan ewe chon emwenin ewe pristut minne a kamoch ekkewe kiien ena ponepin.
Eu angangen annuk a napengeni epwe fiis me ren emon a seiketa ngeni eu wiis non ewe pristut me a angang fan emwenien emon a kamoch ekkewe pristut kii. Ren awewe, ekkewe ir non ekkewe wisen ewe Pristut seni Aaron ra wisen fori ekkewe angangen annuk ren ewe sakrament fan nemenien ekkewe kiien me emwenien ewe pishop, minne a kamoch ekkewe kiien ewe Pristut seni Aaron. Ei napanap a pwan fiis ren ekkewe angangen annuk seni ewe pristut minne ekkewe fefin ra emweni angangan non ewe temple. Ina mwo esor an emon fefin wis non ewe pristut, ra anganga ekkewe angangan annuk mi pin non ewe temple fan mwumwutan ewe presetenin ewe temple, minne a kamoch ekkewe kiien ekkewe angangepiin ren ewe temple.
Pwan eu awewen mwumwutan pristut fan emwenien emon a kamoch ekkewe kii ren ekkewe mwan me fefin minne ra kokko ren repwe aiti ewe kapas allim, ese nefinifin ia ika non eu mwicheichen kaeo non pwisin non ar kewe wart ika non nenien angangen missionari. Pwan ekkoch awewe ir ekkewe ra wiseni wisen emwen non ekkewe wart me fori ar angang non ewe mwumwutan pristut fan asengesin ar sekinin non wiser me fan emwenien ewe chon mi nap non ewe pristut minne a kamoch ekkewe kii non ewe wart ika steik. Iei usun ewe mwumwuta me pochokunen ewe pristut a fiis me aean non pwapwa non Ewe Mwichefenin Jises Kraist ren Aramas mi Pin non Fansoun Soponon.2
Mwumwutan Pristut mi fis me feiochun mi esinesinoch me ren ewe faminien Aramas mi Pin non Fansoun Soponon. Ren famini uwa fos usun emon mwan a kamoch ewe pristut me emon fefin minne ra opwupwunu me nour kewe. Uwa pwan fos usun ekkewe ekkoch napanapen famini mi fiis pokiten mano ika wesin pupunu.
Ewe nongonong pwe mwumwutan pristut a tongeni angang chok fan emwenien ewe emon a kamoch ekkewe kiien ena angang mi namwot non ewe Mwichefen, nge ei nongonong ese pwan kuu non ewe famini. Ren awewe, emon sam a nemeni me anganga ewe pristut non an famini me ren ewe mwumwutan pristut a kamoch. Ese namwot epwe angei mwumwutan are emwenien emon chon kamoch prisut kii pwe epwe fori an angangen famini. Ekkei angang mi tongeni epwe aurour ngeni chon an famini, fori mwichen famini, fori feiochun ewe pristut ngeni punuwan me noun, are efeiochun chikar ngeni an famini me ekkoch.3 Chon emwenien ewe Mwichefen ra aiti ekkewe famini nge rese wisen nemeni ewe angangen mwumwutan prisut non ewe famini.
Ei nongonong a pwan ennet nupwen emon sam ese nom me emon iin a wisen emweni ewe famini. A wisen nemeni an famini non imwan me a auchea pwe epwe awora ewe manaman me feiochun ewe pristut ngeni an famini me ren ewe endowment me riri fengen non ewe temple. Inamo eseor an mwumwuta ne fori ekkewe feiochun ewe pristut minne a tongeni chok fis me ren emon a kamoch eu kinikinin wiis non ewe pristut, a tongeni fori meinisin ekkewe ekkoch angangen emwenien ewe famini. Ren an fori ekkei, a anganga ewe manamanen ewe pristut ren efeiochun noun kewe semirit minne a wisen emweni non wisan non ewe famini.4
Ika sam repwe apwonueta ar wisen pristut non ar famini pwisin, epwe anisi ewe popun ren ewe Mwichefen nap seni mettoch meinisin ir mi fori me nukun. Sam minne ra kamoch ewe Melkisetek Pristut repwe anganga ar mwumwuta “ren fosun aweweoch, ren enginon ngeni, ren non pwetete me tipetekison, me ren tong mi fokun ennet” (Doctrine and Covenants 121:41). Ena angangen pristut mi napanap ren meinisin mwumwutan pristut a osen auchea non ewe famini. Chon kamoch ewe pristut repwe apwonueta ekkewe annuk pwe epwe wor ar pochokunen ewe pristut ne fori ekkewe feioch ngeni chon ar famini. Repwe fokun efisi chiechien tong ese muuch nefiner me ar famini pwe chon ar famini epwe mochen tingorer ren efeioch. Me sam me in repwe fori met epwe napono ewe fofforun efeiochun pristut non ewe famini. 5
Non ekkei mwichenapen mwichefen, ren ach kutta ekkis asoso seni ach osukosukun manau ren ei semwen watte mi ngaweno, sia fen kaeo auchean nongonongen esemuch. Uwa tingoreikich emon me emon pwe mesach kewe epwe “wenechar” ne etiwa ekkei mettochun fenfeinno mi ennet pwe inisich repwe tongeni “uren saram” (3 Nephi 13:22).
Non An afanafan ngeni ekkewe chommong minne a mak non ewe Paipen me non ewe Puken Mormon, ewe Chon Amanau a aiti pwe inisin aramas mi manau ra tongeni uren saram are rochopwak. Kich, sia ennetin mochen, pwe sipwe uren saram, me ach Chon Amanau a aitikich ifa usun sia tongeni fori ei. Sipwe ausening ngeni poraus usun ekkewe mettochun ennetin fenfeinno. A ani ewe awewen mesach, minne me ren sia tongeni angei saram non inisich. Ika mesach “a wenechar”—awewe non pwan ekkoch kapas, ika sia ennetin angang pwe sipwe angei saram ese muuch me weweiti—A afata, “unusen inisimi epwe uren saram” (Matthew 6:22; 3 Nephi 13:22). Nge ika “mesemi epwe ngaw”—iwe, ika sia kutta ekkewe mettoch mi ngaw me angei ena non inisich—A esineta, “unusen inisimi epwe uren rochopwak” (verse 23). Iwe non pwan ekkoch kapas, ewe saram are ewe rochopwak non inisich a nongonong won ifa usun sia weweiti—ika angei—ekkewe mettochun fenfeinno mi ennet minne sia kaeo.
Sipwe tapweno mwirin an ewe Chon Amanau tingor pwe sipwe kutta me tingor ne weweiti ekkewe ennetin fenfeinno. A pwon pwe Semach won Nang a mochen aiti ngeni meinisin ewe ennet ra kutta (nengeni 3 Nifai 14:8). Ika sia mochen ei me mesach a wenechar ne angei, ewe Chon Amanau a pwon pwe ekkewe ennet ese muuch “epwe suk” ngenikich (nengeni 3 Nephi 14:7–8).
Nge won ewe epek, Setan a mochen osukosuka ach ekiek me emwenimwankicheno won mettoch mi auchea usun ewe angangen ewe pristut an Kot. Ewe Chon Amanau a esinesin usun ei sokkun “soufos mi chofona, ekkewe repwe feito remi non napanapen siip, nge non nenuker ir wonif mi echik” (3 Nephi 14:15). A ngenikich ei pisekin aninis ne anisikich ne fini met mi ennet me nein ekkewe sokopatun assukun minne a tongeni osukosuka kich: “Oupwe siner ren uwar,” A aiti (3 Nephi 14:16). “Efoch ira mi öch ese tongeni uwani foun ira mi ngaw, pwan efoch ira mi ngaw ese tongeni uwani foun ira mi öch” (verse 18). Iwe, sipwe nengeni met a fis nesoponon—“uwar”—pokiten ekkewe nongonong minne ra kaeo me ekkewe aramas minne ra aitir. Ina ewe ochunon ponu ren ekkewe mettochun ungeni sia rongorong usun ewe Mwichefen me an kewe annuk me napanapen foffor me emwen. Ani ewe pisekin aninis minne ewe Chon Amanau a aitikich. Nengeni ekkewe uwa—met a fis nesoponon.
Nupwen sia ekieki usun ekkewe uwan ewe kapas allim me ewe Aniwinsefaniton ewe Mwichefenin Jises Kraist, sia pwapwaiti ren ifa usun ewe Mwichefen, non ierin manaun chon ewe mwichefen mi chiwen manau, a watteno seni nenien mwich non ewe Intermountain West tori napengeni ekkewe 16 million memper ra nom non fonu nukun Merika. Ren ena watteno, sia mefi ewe tufichin feifeitan ren ewe Mwichefen ne anisi an kewe memper. Sia aninis ren anneasochisin ekkewe annuk, apwonuetan wisach ne afanafana ewe kapas allim mi niwinsefanito, iofengeni Israel, me kaueta temple non unusen ewe fonufan.
Sia emwen me ren emon soufos, Preseten Russell M. Nelson, minne an emwen ewe Samon a ani ne fori ekkewe fefeita sia kuna non unusen ekkewe ier nap seni ruu ierin an emwen. Iwe sipwe feioch ne ausening ngeni Preseten Nelson, minne epwe aitikich ifa usun sipwe sopweno non ach fefeita non ewe Mwichefenin Jises Kraist mi niwinsefanito non ekkei fansoun mi weires.
Uwa pwarata usun ekkei mettoch mi ennet me fitikemi non iotek fan iten nouch soufos ion sipwe rongorong seni mwirin iei, non iten Jises Kraist, amen.