Afanafan fiti ewe Pochokun me Mumuta seni Kot
Sipwe angang non Itan, ren An pochokun me mumuta, me ren An kirekiroch me tong.
Pwii achengicheng kana, kinisou ngeni kemi ren ami nukuchar ngeni ewe Samon me An angang mi Fel. Ua ennetin pwapwa ai nonnom remi. Non wisem uwe minafon Aewin Presetensi, aua kinisou ren ami iotek me ami etiwa kem. Aua kinisou ren manauemi me ami angang ngeni ewe Samon. Ami nikitu ngeni wisemi me ami mochen angang mi auchea me non wisemi kewe usun am non wisem. Non unusen ai angang non ei Mwichefen, ua kaeo pwe ese auchea ian emon a angang ia. Ifa usun an emon angang ina met ewe Samon a kon aucheani.
Upwe apasa ai ennetin kinisou ren Preseten Thomas S. Monson, i ewe ai nenien appiru mi nap seni non 50 ier. Me ren noun chon aninis, Preseten Henry B. Eyring me Preseten Dieter F. Uchtdorf, Ua apasa ai ennetin sufon. Ua ingeitir ren ar angang ngeni ewe Samon me Noun soufos. Ir me ruemon ekkei chon angang ir mi nikitu ra fen angei minafon wis. Ra soposopono ne angang ren pochokun me nukuchar. Ua sufonitir me tonger me ruemon.
Eu feioch mi amwarar ach angang non an ewe Samon Mwichefen mi ennet me mokutukut fiti An mumuta me pochokun. Ewe niwinsefaniton ewe pristut an Kot, pachenong ekkewe kien pristut, a atufichi ngeni Aramas mi Pin non Fansoun Soponon mi nimenimoch ekkewe feiochun ngun. Sia kuna ekkewe feioch a kawor ngeni fefin, mwan, me semirit non unusen fonufan.
Sia kuna fefin mi nikitu ekkewe ra weweiti ewe pochokun mi nom non wiser kewe me ar kewe endowment me ekkoch angang non tempel. Ekkei fefin ir mi sinei ifa usun ar repwe kokori ekkewe manamanen nang ar repwe eppeti me apochokuna punuwer, nour kewe semirit, me ekkoch ir mi tonger. Mi wor fefin mi pochokun non pekin ngun ekkewe ra emwen, asukun, me angang non an ese wor nuokus rer non wiser kewe fiti ewe pochokun me mumuta an Kot.! Ua men fokkun kinisou ngenir!
Usun chok, sia pwan kuna mwan mi nikitu ekkewe ir mi manauoch ngeni ar tufich non wiser ewe pristut. Ra emwen me angang ren ar fangeno ar fansoun me tufich non an ewe Samon we kokkot ren tong, kirekiroch, me tipepos. Ra efeiochu, emweni, tumunu, me apochokuna ekkoch ren ewe pochokunen pristut mi nom rer. Ra awora manaman ngeni ekkewe ra angang ngenir nupwen ra tumunuochu ar pupunu me famini. Ra amonungaw seni ngau me ir elter mi nap non Israel. Ua fokkun ennetin kinisou ngenir!
Iei, ngang mi tongeni kapas usun ew aurek? Iei ewe aurek: Chommong me nein pwich me fefinach kewe rese weweiti weweochun pochokun me mumutan ewe pristut. Ra pwomeni usun ita refen mochen amenemenochu pwisin ar mochen me tipe eu nap seni ewe pochokunen Kot ar repwe afeiochu Noun kewe.
Ua nuokus pwe chommong me nein pwich me fefinach kewe rese weweiti ekkewe tufich ita epwe fen ar. Ekkoch pwich kewe, ren awewe, ra pwomeni usun ita rese weweiti met ewe pristut me met mi tongeni anisir ar repwe fori. Upwe ngeni kemi ekkoch awewe.
Ese tam fansoun a no, ua fiti ew mwichen sakrament non minne emon minafo monukon epwe angei ew itan me ewe feiochun sam. Ewe sam anuon a kamwoch noun ewe monukon mi auchea non poun, a ngeni itan, me mwirin a apasa ew iotek mi murino. Nge ese ngeni ena semirit ew feioch. Ena niochun monukon nengin a angei itan nge ese wor feioch! Ewe achengicheng elter ese sinei sokofesenin ew iotek me ew afeiochun pristut. Ren an mumutan pristut me pochokun, mi fen ita tongeni efeiochu noun we monukon, nge ese. Ua ekieki, “A ew tufich a poutuno!”
Upwe pwan apasa ekkoch awewe. Kich mi sinei usun pwich kewe ra ewisa ngeni fefinach kewe ar repwe souemwen me sensen Kinter, Ekkewe Fopun, ika Fin Anisi nge rese efeiochur—ar repwe efeiochur ren ewe pochokun ar repwe apwonueta wiser kewe. Ra chok ngenir kapasen fon me aurour. Sia kuna emon sam mi nimenimoch ese ngeni punuwan me noun kewe ekkewe feiochun pristut nge ina met mi namot ngenir. Manamanen ewe pristut a fen niwin sefan ngeni ei fonufan, nge chommong pwich me fefinach ra weri watten sossot non manau nge rese angei ew ennetin feiochun pristut. A ew feiengaw! Ena ew feiengaw kich mi tongeni aturano.
Pwii kana, mi wor rech ewe pristut mi pin an Kot! Mi wor rech An mumuta ach sipwe efeiochu Noun aramas. Oupwe ekieki ekkewe ennet mi amwarar ewe Samon a ngeni kich nupwen a apasa pwe ion chok sipwe afeiochu I epwe afeiochu. Ina ach tufich ne foffor non iten Jises Kraist ach sipwe afeiochu noun Kot anongonong won An mochen fan iter. Presetenin Steik me pisop, ouse mochen oupwe tumunu pwe meinisin chon ekkewe mwich fan emweniemi repwe weweiti ifa usun ar repwe ngeni emon ewe feiochun pristut—mi pachenong an emon pwisin nimenimoch me amonetan ngun mi auchea ngenir ar repwe ennetin kokkori ewe manamanen Kot.
Ngeni pwii meinisin mi wor rer ewe pristut, ua tingor ngeni kemi oupwe pesei memper ar repwe aneasochisi ar pwon mi pin, echikifen me iotek, kaeo ekkewe pukefel, no non tempel, me angang ren nuku pwe ir mwan me fefin noun Kot. Sia tongeni anisi meinisin ar repwe kuna ren efou mesen nuku pwe aneasochis me wenechar epwe uweireno ar repwe arap ngeni Jises Kraist, epwe mut ngenir repwe pwapwaiti chiechien ewe Ngun mi Fel, me mefi pwapwa non manauer!
Ew sokonon an ewe Samon we Mwichefen mi ennet mi mokutukut pwe mi tettenoch, emwen an epwe angang ngeni emon me emon noun Kot me ar famini. Pokiten ina An Mwichefen, kich ren ach Noun chon angang sipwe angang ngeni ewe emon, usun chok I a fori. Sipwe angang non Itan, ren An pochokun me mumuta, me ren An kirekiroch me tong.
Ew mettoch a fis ngeni ei nap seni 60 ier a no non Boston a aitiei ifa usun pochokunen ewe tufichin angang ngeni emon me emon. Non na fansoun ngang mi mi chiwen kaeo ai upwe emon chon reirei me non ewe pioing Massachusetts—ngang mi angang iteiten ran, fan ekkoch nepwin, me fan ekkoch non wiken. A chok aukuk ai fansoun ren punuwei we, noum kewe fomon semirit, me mokutukutun Mwichefen. Nge, noum we presetenin pranch a ewisa ngeniei ai upwe churi imwen Wilbur me Leonora Cox ren anean pwe Brother Cox epwe fifiti mwichen Mwichefen. I me Leonora ra fen riri fengen non ewe tempel. Nge Wilbur ese fiti fan non chommong ier.
Ngang me chienei we aua feino ngeni imwer uwe. Nupwen aua tonong, Sister Cox a pwapwa ne etiwa keminong, nge Brother Cox a mwitir fetanong non pwan ew rum me apungano ewe asam.
Ua feino ren ewe asam mi kesip me ua fichifich. Mwirin och fansoun, ua rong ew mongungu “Tonong.” Ua suki ewe asam me ua kuna Brother Cox a momot nepekin ew sokkun reitio mi ning. Non ena kukkun rum, a keni efoch supwa. Mi fatoch, pwe ai we churi ese ketiw.
Ua nenefetan non ewe rum non ai osukosuk me ua apasa, “Brother Cox, Ua men kan mochen kaeo ifa usun ai upwe amokutu ena sokkun reitio. En mi mochen kopwe aitiei ifa usun? Omusano use chiwen tongeni upwe nomotam nepwinei, nge ngang mi pwan tongeni niwinto pwan fan ew?”
A ekis tipemwaramar me mwirin a apasa ewer. Ina poputan met a winiti ew chiechioch mi murino. Ua niwin me a aitiei. Ua poputa ne tongei me asamonu. Seni am chuchuri, murinon ei mwan a pwano. Aua winiti mi ne chiechioch, me pwan punuwem kewe fochofoch mi achengicheng.Mwirin, ekkoch fansoun, am we famini a no seni ewe neni. Souemwen non ewe neni ra soposopono ne tumunu ewe faminien Cox.
Ina epwe wanu ier mwirin ena aewin amwa, ewe Boston Steik a foruta. Ami mi tongeni esina ika ion ewe aewin presetenin steik? Ewer! Brother Cox! Non ekkewe ier mwirin, a pwan angangen emon presetenin misin me emon presetenin tempel.
Ekkoch ier mwirin, ngang, ua chon ewe Mwichen Engon me Ruemon, ua finita ai upwe forata ew minafon steik non ewe Sanpete County, Utah. Fansoun ekkewe interfiu, ua fokkun mairu ai churi sefan chiechiei achengicheng Brother Cox! Ua mefi me ren ewe Ngun pwe upwe ewisa ngeni ewe minafon steik petriark. Mwirin ai seikata, aua turufengen me kechiw. Aramas non ewe rum ra aureki pwata ekkei ruemon mwan ra kechiw. Nge am mi sinei. Me Sister Cox mi sinei. Am kechiw a kechiwen pwapwa! Nupwen aua chechemeni ewe fetanin tong mi amwarar me aier a poputa nap seni 30 ier a no, non ew pwin non imwer we.
Ewe porous ese much me ikewe. An Brother me Sister Cox famini a marita mi pachenong 3 nour, 20 noun nour, me 54 noun noun nour. Apachata ngeni ena ar ku netipen fite puku misineri, me fite ngerou pwan ekkoch non ewe tempel, me fite puku pwan ekkewe ra angei ar feiochun petriark me ren poun Wilbur Cox. An me Leonora mwokutukut epwe soposopono ne anisi chommong tappin aramas non unusen fonufan.
Ei sokkun mwokutukut ren Wilbur me Leonora Cox mi kan fis iteiten wik—anean pwe, iteiten ran—me non ei Mwichefen. Chon angang mi nikitu noun ewe Samon Jises Kraist ra apwonueta An angang, fiti An pochokun me mumuta.
Pwii kana, mi wor asam sia tongeni suki, feiochun pristut sia tongeni awora, netip mi tongeni chikar, chou mi tongeni paneno, kapasen pwarata mi tongeni pochokununo, manau kich mi tongeni angasa, me pwapwa sia tongeni wanong non imwen Aramas mi Pin non Fansoun Soponon—meinisin mi tufich pokiten mi wor rech ewe pristut an Kot. Kich ekkewe mwan ekkewe ra “kokko me monneta seni nepoputan ewe fonufan anongonong won ewe mirit an Kot, pokiten ar fokkun nuku” ne fori ei angang.
Nepwinei upwe tingorei kemi oupwe wesen fitiei ne uta non wisen pwipwi ese much. Nupwen upwe apasa wisom non ewe pristut, ouse mochen uta me oupwe witi. Sounkowa, ouse mochen uta! Sense, uta! Pris! Pisop! Elter! Pris mi Nap! Patriarchs! Ekkewe Fik! Aposel!
Iei, pwii kana, ouse mochen oupwe chok uta me fiti nouch kewe chon kon ne konu ir me unungat ekkewe uwokisin “Rise Up, O Men of God.” Nupwen oua kon, oupwe ekieki usun wisemi usun noun Kot sounfiu mi napanap oupwe anisi amwonetan ewe fonufan ngeni ewe Aruwen Wareto an ewe Samon. Iei wisach. Iei ach tufich. Ua ennetin pwarata non iten Jises Kraist, amen.