Epwe Fik Fan Fisu
Non eu manau mi uren apwangapwang me nipwakingaw, sia unusen kinisou ren ekkewe oruen fansoun.
Muan iei och mettoch akan fis non manau meinisin. Kaeon ach sipwe angangoch ne etiki ewe piano esap tufich ika sise fori ngoroun muan—eni fen minion. Ach kaeo ew kapasen ekis, mi auchea emon epwe weri sawen an fori ngorowun muan—eni fen minion. Pwan mwo ekkewe chon rensu mi nap rese wes ne fori muan.
“Fetanoch,” a fen affateno, pwe “ese fis pokiten ach tur, nge seni ach tur me tur me nukun peutunon mwasangasang.”
Mwirin an forata foun tama, Thomas Edison ita a apasa, “Use muan fan 1,000. Ewe foun tama a ew mettoch a fis ren 1,000 tettenin.” Charles F. Kettering a eita ach tur “ekkewe mettoch ra fis pwe repwe anisikich ne kaeo met mi pung.” Amwo, ew me ew muan sia fori epwe winiti ew nesenin mirit, epwe siwini foun chepetek negni mettoch aninis.
An Nifai nuku mi nukuchar a anisi i seni an tur tori an angei ekkewe seleichen brass. Moses a sossot fan 10 me mwen an kuna fetanoch non an suseni Egypt fiti ekkewe Chon Israel.
Eni sipwe aureki—ika Nifai me Moses ir mi nom won an ewe Samon ekkune, pwata ewe Samon ese angenong me anisir ne apwonueta ar fetanoch non are aewin sossot? Pwata A mut ngenir—me pwata A mut ngeni kich—sipwe osukosuk me tur non ach achocho ne fetanoch? Nein chommong auchean ponuwen ena kapaseis, ikkei ekkoch me neir:
-
Aewin, ewe Samon mi sinei pwe ekkei mettoch repwe ngeni kich tufich, me repwe och ngeni kich.
-
Aruwan, epwe mut ngeni kich sipwe neni ewe kipwin, pwe sipwe tongeni sinei auchean ewe mi och.
-
Aunungatin, epwe pwari pwe “ewe maun an ewe Samon,” me seni chok An chen sia tongeni apwonueta An angang me winiti usun I.
-
Aruwanun, epwe anisikich ne awora me angei chommong napanapen Kraist ekkewe sise tongeni angei tiwenon chok ungeni me “non ewe ekkein riaffou.”
Iwe, nukanapen ew manau mi uren chepetek me ese unusoch, kich meinisin sia kinisou ren aruwen tufich.
Non 1970, nupwen ngang emon atiuwan non BYU, ua fiti klasin ekkewe auchean physics Jae Ballif a asukuna, i emon sense mi echipwer. Mwirin an awesi kinikinin ena klas, a kan awora ew tes. Ika emon chon sukun a angei C me a mochen aochueno ena kreit, Professor Ballif a kan mut ngeni ekkewe chon sukun ne angei ew tes mi mwoch usun chok ekkewe mettoch. Ika ewe chon sukun a angei B aruwen an sossot nge ese pwan menemen, atena ika nemina mi tongeni angei ewe tes aunungatin fansoun me pwan aruwanun, me soposopono. Ren an mutata fan chommong aruwen tufich, a anisiei ne murino no tori ai angei A non an we klas.
I emon sense mi fokkun mirit ewe a amwasanga noun chon sukun ne achocho—me ne ekieki pwe tur och mettoch sipwe kaeo seni, nge esap ew mettoch mi ngaw, me sisap nuokusiti tur nge sipwe kaeo seni.
Ua keran chok kokkori ei mwan mi nap 47 ier mwirin ai angei an klasin physics. A apwapwa am porous fengen. Ua eisini pwata a mochen mut ngeni chon sukun ne sossot fan chommong ne aochueno ar kreit. Ponuwan me ren: “Ua mochen nom won pekinin ekkewe chon sukun.”
Nupwen sia kinisou ren aruwen tufich mwirin ach fori muan, ika turun ekiek, sia mwar ren an ewe Chon Amanau chen ren an mut ngeni kich aruwen tufich ne affufu tipis minne ir turun netipach.
Ese wor emon mi nap seni ewe Chon Amanau a mochen sipwe fetanoch. A mut ngeni kich sipwe angei me angei sefan an kewe tes. Ach sipwe winiti usun I mi namot chommong aruwen tufich non ach weires iteiten ran ren ewe inisin aramas, usun ach auku mochenin inis, kaeo tipepos me omusomus, akkufu chipwang, me sisap fori ekkewe tipisin ach amonungaw, ach sipwe chok eita ekkoch. Aramas meinisin mi fori muan, epwe fan fite sipwe tur tori nonnomun inisich esap chiwen aramas nge epwene pin? Ngerou? Menin epwe fen minion.
Sipwe sinei pwe ewe aan mi aukukkun me chokisikis mi uren sossot me ungeni won meinisin kinikin, ewe Chon Amanau a moni ew niiwin ese much an epwe ngenikich chommong tufich ach sipwe pasini ochu ach ei ranin sossot. Ewe chon oputu kich A mut ngeni kich ekkewe mettoch mi enieput me aweires sise kofich ngeni, nge Ii Jises Kraist ese nikiti kicheno ren epinukunuk.
Ach sipwe fori ach apinukunuk epwe pochokun nupwen sia weri sossot, an ewe Chon Amanau chen mi chok mwoneta me nonnnom. An chen mi ew “popun aninis ika apochokun, … ew manaman epwe mut ngeni mwan me fefin ar repwe ani manau esemuch me manau fefeita mwirin ar amuchu ar pwisin tongeni.”An chen me tong mi chok nom woch non unusen ach sai nupwen a pesei, appana chou, apochokun, angasa, tumunu, echikara, me “anisi noun aramas,” nupwen mwo ra turuno won ewe aan mi aukukun me chokisikis.
Aier ina an Kot niffang mi chok wor me a mut ngeni kich me atufichi kich seni tur me tur me nukun peutunon mwasangasang. Aier esap An pwan ew kokkot ika pwe sipwe tur. Aier ina An kokkot, pwe mi sinei sipwe fori muan. Iei ewe kapas allimen aier, me usun Preseten Russell M. Nelson a kuna, “Epwe ew sukun non unusen manauach.”
Non ei sukunen aier non unusen manauach, ewe sakrament ina an ewe Samon aanen awora soposoponon mumuta ngeni An omusomus. Ika sia angei fiti netipechou me ew netip niemam, I a awora omusomus iteiten wik nupwen sia murino seni ach tur won ewe aanen pwon. Pun me nukun ach tipis, nenukan a uren kirekiroch ngeni kich.
Nge epwe fan fitu epwe omusakicheno? Ifa taman an tipepos? Non ew fansoun Peter a eisini ewe Chon Amanau, “Samol, ika pwe pwii mi chok fori tipis ngeni ei, fan fitu upwe omusano? Fan fisu?”
Menin, Peter a ekieki pwe fisu a ew nampa mi naf watten an epwe affataochu ewe muanin omusomus fan chommong pwe kirekiroch epwe wor aukukun. Ren ponuwan, ewe Chon Amanau a ennetin ureni Peter pwe esap pwan anneani—esap forata aukukun omusomus.
“Jises a ponuweni, Apw, esap fan fisu chok pwe fik fan fisu.”
Mi fatoch, ewe Chon Amanau ese forata amuchunon ren 490. Ina epwe nonno ngeni ach apasa pwe ach angei ewe sakrament a chok aukuk ngeni 490, iwe won ewe aewin 491, emon chon uruon nang a feito me apasa, “Omusano nge noum we toropwen aier a much—seni ei fansoun feino, ka chok en won om.”
Ewe Samon a aea ewe nampan fik fan fisu pwe ew esisinen An Achasefan esemuch, An tong ese aukuk, me An chen esemuch. “Ewer, iwe fan chommongun an nei kewe aramas repwe aier upwe omusano ar kewe atai annuk ngeniei.”
Ena esap wewen pwe ewe sakrament a winiti ew pekin mumuta ne tipis. Ina ew popun ei kapas mi pachenong non ewe puken Moronai: “Nge fan chommong ar aier me kutta omusomusen tipis, ren ennetin mochen, ra musono.”
Ennetin netip a wewen fiti ennetin achocho me ennetin siwin. “Siwin” ina ewe akkaewin kapas ewe Pisekin emwen ngeni ekkewe Pukefel a nounou ne awewei aier: “Ew siwinin ekiek me netip ewe a awora minafon napanap ngeni Kot, pwisin en, me manau.” Ena sokkun siwin a awora maritan ngun. Ach fetanoch, mwirin, esap seni ach tur me tur, nge marita seni tur ngeni tur me nukun ekkoch morukonon mwasangasang.
Ren siwin, ekieki ei ennet: “Mettoch rese siwin ra chok nom ususur ewe chok.” Ena porous mi ennet ese fori om kopwe mefi pwe en mi puch nge ina ewe mirit mi unusoch an Preseten Boyd K. Packer, ewe a apachata, “Iwe nupwen sia wes me siwin—sipwe mano.”
Pokiten sise mochen sipwe mano tori ach sipwe usun ach we Chon Amanau, mi auchea ach sipwe achochota iteitan sia turutiw, ren mwasangasen netipach ren ach mamarita me feifeita seni ach kewe nipwakingaw. Non ach nipwakingaw, A apochokuna kich, “Ai umoumoch a angasakemita: ren ai pochokun a aunusochuono ekkewe nipwakingaw.”
Ren chok ew fansoun nangatam ika chartun ach mamarita sia tongeni kuna maritan inisich. Usun chok, maritan ngunuch ese kon kan pwano tiwenon chok nupwen sia ekieki usun met a fis akkom. Epwe murino ach sipwe ekekiek usun nom non ena napanap ach sipwe esinna ach fefeita me pesei kich ach sipwe “achocho ne feino mwach ren ach nikitu non Kraist, me ani eu unusochun epinukunuk.”
Ese much ai ennetin kinisou ren ewe kirekirochun tong, tipepos, me nikitu an Samach me Inach non Nang me ewe Chon Amanau, ekkewe ra mut ngeni kich chommongun tufich non ach sai sefan ngeni Mwer. Non iten Jises Kraist, amen.