Euchean Niffang meren Kot
Manawach mei tongeni unus ren nuku, memef, pwapwa, mwochen, me tong nupwe sia fori ekewe kukun nikinikin unusechun nuku non Kraist.
Pwii me fefinei kana, sia chok keran fiti ewe mwich mi ennet, ew fofor kich mei tongeni kuna ne nenesefan ngeni non Paipen nupwen kewe chon Israel ra mwichifengen ar repwe mefi nonomwun ewe Samon me apwapwai an kewe feiech. Sia kinisow ach nomw non ei fansoun nupwen ei minenomwun eruni Joseph Smith a eniwisefanieto. Uwa mwochen oupwe maketiw non noumi puken mak met oua mefi usun ren ei fansoun mi pin oua fen fiti.
Esamwo tam, sia kapwong ngeni atongeach me soufos, Preseten Thomas S. Monson. Ina mwo kich meinisin sia pwositi, sia unusen kinisow ewe Samon a kekeri ewe minafon soufos, Preseten Russell M. Nelson, an epwe emweni an ewe Mwichefel. Non ew kinikin mi euchea sia pwoputani ew minafen kinikin non uruwon ach Mwichefel. Iei ew euchean nifang meren Kot.
Nupwen kich sia etiwa Preseten Nelson ren ach eitata peuch, sia fori ren ach pwarata me mwen mesen Kot me sia tipew ngeni pwe i a siwinin Preseten Monson. Ren ach eitata peuch, sia pwon pwe sipwe rongorong ngeni nupwen a angei kokot seni ewe Samon.
Ewe Samon a apasa:
Sipwe aneasochis ngeni an ewe Presetenin ewe Mwichefel kewe kapas me annuk minne epwe ngenikich usun chok an angei … ;
Ren an kapas sipwe tongeni angei, usun chok seni non awan, non tipetekison me nukunuk meinisin.
Ngang uwa fen sinei neuch ewe minafon soufos-preseten nap seni 60 ier. Ua fen angang ren i non ewe Mwichen Engon me Ruemon ukkukun 33 ier, me ngang chon pwarata pwe peun ewe Samon a fen amonata ii an epwe aposel me soufos epwe fori meinisin kewe kien ewe pristut mei pin won fonufan. Amwo ita emon me emon kich sipwe unusen etiwa me neun kewe chon aninis me fori ar eurour. Sia pwan pwapwa me wenkomuni Elter Gong me Elter Soares ar repwe chon ewe Mwichen Engon me Ruemen Aposel.
Mwurin an Jises manausefan, ew mettoch a fis kich sia apwapwai non ei ningochun Easter wiikent, A pwa ngeni neun kewe chon kaeo iwe a apasa, “Kinamwe ngeni kemi: usun semei a tinieito, iwe upwe pwan tinikemino.” Katong ruu angang—Kot a tinato Neunwe Aat. Ewe Nau a tinato neun kewe chon angang—kewe mwan me fefin—mei manaw—ar repwe awesi Ar angang.
Sisapw urungaw ach sinei pwe kewe ra keke ar repwe fori an ewe Samon angang rese unusech. Pworousen non kewe pukefel ra tichikietiw met mei fis ren kewe mwan me fefin kewe ra keke ngeni ar repwe awesano an Kot kewe angang mei echiper—neun Samach won Nang kewe aat me nengin mei eech ra keke ar repwe fori ar angang non ewe Mwichefel, achocho ar repwe fori unusen ar tongeni, nge esapw emon me neir mi unusech. Ina mei pwan enet usun kich.
Usun mi fen fat ren ach kewe apwangapwang me nipwakingaw, ifa usun ach sipwe achocho me anisi me etiwa emon me emon kich? A pwopwuta ren nuku—enetin, unusechun nuku non ewe Samon Jises Krait. Nuku non ewe Chon Amanau ina aewin nongonongen ewe annuk me ese kapas allimen Kraist.
Ekkoch ier a no, uwa tori ewe Fonu mi Pin. Nupwen auwa tori efoch ira mustard, ewe chon emwenin ewe BYU Jerusalem Center a kapas eis ika ngang mi kukuna kewe foun mustard. Use mwo iwe a keuno. A aitingeniei kewe foun seni ewe iran mustard. Rammen unusen kukun.
Iwe uwa chechemeni an Jises kewe afanafan: “Nge upwe apasa ngenikemi pwe ika ami nuku epwe chok usun nonnon efou foun ira mi fakkun kukkun ami oupwe tongeni ereni ei chuk, Kopwe mwokut seni ikei o mwokutuno ikenan; iwe ewe mwokut; iwe epwe chok mwokut. Ami oupwe tongeni fori mettoch meinisin.”
Ika mei wor ach nuku usun kukunun ewe foun mustard, ewe Samon epwe anisikich ne atowawano ach kewe osukosuken ekichou me nukunumang non kewe angang epwe fis nupwen sia angang fengen me neun Kot aramas, kapachenong chon famini, chon Mwichefel, me kewe rese mwo choni ewe Mwichefel.
Pwii me fefinei kana, manawach mei tongeni unus ren nuku, memef, pwapwa, mwochen, me tong nupwe sia fori ekewe kukun nikinikin unusechun nuku non Kraist—ikamwo ew nuku mi kukun.
Elter George A. Smith a chechemeni ekoch eureur seni ewe Soufos Joseph Smith a ngeni: “A ureniei pwe usapw netipengaw mwo fan ew, ren met sokkun weires upwe tonong non. Ika mwo uwa kokotiw non ew anononun pwaangen Nova Scotia me meinisin kewe Chuk ra turutiw woi, usapw tongeni ai upwe netipengaw nge upwe achocho ngeni ne nuku, me fori netipech me upwe unusech saingonon.”
Sipwe chok chechemeni me Paul a fen afata: “Upwe tongeni fori mettoch meinisin non Krait ewe a epechekunaei.” Ren ach sinei pwe iei pwan ew euchean nifang seni Kot.
Pwan kapach ngeni kewe nifang uwa fen kapas usun, mei pwan wor tepetep. Uwa kapas iei ren chok ekkoch— ewe nifangen ewe Raninfel, ewe sakramen, angang ngeni ekkoch, me kewe nifang ese wor met a nono ngeni seni Koten ach Chon Amanau.
Ewe pechekunen ewe Raninfel sipwe kaeo non mwichefel me non imwach ren ach ingeiti, me ewe euchean Ngunun ewe Samon sia mefi nge ese wor met epwe atai.
A chommong ra mwut ngeni manawer repwe nomw won internet won neur kewe mettoch mei tipachem—kewe ra tongeni ekesiwini won meser neran me nepwin me ra aa kewe epetin sening ne epeti, kewe kukun mengungun ewe Ngun mi Fel. Ika sise kuna fansoun ach sipwe watiw neuch kewe mettoch mei tipachem, sipwe tongeni misini kewe otun ach sipwe rongorong ewe mengungun ewe A apasa, “Kosapw mwekutukut, me sinei pwe ngang Kot.” Iwe iei ese wor ngawen ach angei feiechun kewe mettoch mei tipachem a kawor seni ewe Samon, nge sipwe neuneuw non mirit. Chechemeni, ewe nifangen ewe Raninfel.
Ewe feiechun ach angei ewe sakramen esapw tongeni winiti chok ew fofor ika ew chok mettoch sia fori non mwichen sakramen. Fokkun 70 minich chok non unusen ew wiik nupwen sia tongeni asoso me kutta watten kinamwe, memef, me pwapwa non manawach.
Ach angei ewe sakramen me fori sefani ach kewe pwon a ew wewe seni kich ngeni ewe Samon pwe sipwe chok chechemeni ii fansoun meinisin. An Achasefan a ew euchean nifang seni Kot.
Ewe angangen anisi neun Samach won nang kewe semirit a ew fofor ach sipwe apiru an Noun we Achengicheng kewe nikinik ren ach anisi emon me emon kich.
Ekkoch angangen aninis ra kawor ngenikich—non ach famini, wisach non Mwichefel, me ach fiti kewe mwichen angangen aninis non neniach kewe.
Chon ewe Mwichefel—ren mwan me fefin—resapw tiperueru, ika ra mwochen, repwe sa ngeni neuwisin mwuu non ese pwan nifinifin kinikinin ewe mwuu ian ra nomw ia. Pwarano met sia ekieki ra namwot ikanai me euchea non ach sukun, non neniach kewe, me non fonuach. Ian democracy a nomw ia, ina wisach ren wisen memper sipwe uuti kewe mwan me fefin kewe ra mwochen angang.
Mi chommong tufich ren ach sipwe angang rese kawor ngenikich—esapw met sipwe fori—nge ra kawor nupwen sia anisi ekkoch sia churiir non fansoun manawach. Chechemeni an Jises afanafana ewe sou apung pwe sipwe tongei Kot me chon oruch usun chok pwusin kich sipwe apiru ewe re Samaria ren an fofor.
Angang ngeni ngenikich tufich ren ach weweiti ewe manaw me angang an Kraist. A waroto pwe epwe angang, usun chok ewe pukefel a aitikich, “usun chok pwe ren ewe Noun Aramas, ese feito pwe aramas repwe angang ngeni, nge a feito pe epwe angang ngenir o epwe fangeno manauan pwe epwe amanaua chommong aramas.”
Peter afen awewei usun an ewe Chon Amanau angang won fonufan non nimu kapas nupwen a kapas usun Jises, “ewe a fori met mei eech.”
Ewe Samon Jises Kraist ii ach ewe nifang mi euchea seni Kot. Jises a apasa, “Ngang ewe aan, ewe ennet o ewe manau: ese wor emon epwe nomw ren ewe Sam ika esap punun ngang”
Nephi a awewei euchean ach Chon Amanau nupwen a apasa, “Aua kapas usun Kraist, aua pwapwa non Kraist, aua afanafan usun Kraist, aua osini usun Kraist, me aua mak anongonong won am kewe osini, pwe nöum kewe repwe sinei ngeni ian repwe apinukunuk won ren omusomusen ar kewe tipis.” Sipwe anomu Christ non nukanapen manauach fansoun meinisin me non neni meinisin.
Sipwe chechemeni pwe non Itan ewe a pwano non ach kewe nenien fel ngeni; sia paptais non Itan; me sia apwungano, efeiech, epinipin, me rifir fengen non ach apwupwunu non Itan. Sia angei ewe sakramen me pwon ach sipwe uwei Itan-me winiti chon fen ngeni mi enet. Saingon, a eisinikich non ewe iotekin sakramen pwe sipwe chechemeni ii fansoun meinisin.
Nupwen sia enukunuk ren Raninfelin Easter nesor, sipwe chechemeni pwe Kraist mi nap. Ii ewe soukapwung mi tekia, Chon peni kich mi nukuchar, Chon Angasano mei feiech, Eechun Chon Masen sip, Messiah mi pwon enet, chiechiach mi enet, me pwan watte, watte napanap. Ii fokkun ewe enetin euchean nifang ngenikich seni Samach.
Non ach kaeofengen, mei chomong wisach, noninen, me asaimen. Ina mwo, ekkoch urumot repwe anongonong won memperun ach Mwichefel fansoun meinisin. Ren ena popun, ewe Samon a urenikich, sipwe nukuchar; nomw non ewe wis uwa fen ewisa ngonuk; anisi kewe mi apwangapwang, chunata kewe paw mei turutiw, me apechekuna kewe pwosuk mi apwangapwang.
Iei foforun ei Mwichefel! Iei ew eneting namanam! Iei ewe kapas allim non eneting wewen nupwen sia aninis, ekieta, me epechekuna kewe non pekin ngun me inis ra mwochen! Ach fori epwe fiti ach sipwe toriir me anisir, pwe ar pwarata non ar nuku non Samach won Nang me Jises Kraist me an Achasefan epwe nonomw non manawer.
Amwo ita ewe Samon epwe anisi me efeiechu ach choni An Mwichefel mei niwinsefanito. Uwa iotek pwe epwe wor ach tong ngeni meinisin neun Samach won Nang kewe me sipwe tongeni kuna ar weungaw me sipwe tongeni penuweni ar kapas eis me eureki usun ewe kapas allim non fatan me ekkoch sokkun sipwe awateno ach weweiti me kinisow ran iten emon me emon kich.
Uwa pwarata pwe Jises Kraist ii ach Chon amanau. Me sipwe kaeo me non ei mwichenap epwe torikich meren kewe aposel me soufos, seni kewe Meinap Unus, me fefinach kewe chon emwen kewe Chon Emwenin ewe Mwichefel. Amwo ewe memef me kinamwen ewe Samon epwe nonomw ren emon me emon ina ai iotek non iten Jises Kraist, amen.