Angang mi Fiti Pwarata
Sia mefi waten ewe Ngun mi Fel nupwen sia ekipwichi ach angang ngeni ekkch. Ina popun a auchea wisach ei ach sipwe anisi ewe Chon Amanau.
Pwi mi achengicheng, ua kinisou ren ai tufich ai upwe afanafan ngeni kemi non ei mwichenapen mwichefen mi kon auchea. Sia fen etiwa Preseten Russell M. Nelson pwe i ewe 17 Presetenin ewe Mwichefenin Jises Kraist ren Aramas mi Pin non Fansoun Soponon. Nupwen ua fori ei, me non ai tufich ne angang ren iteiten ran, ua mefi pwarata seni ewe Ngun pwe Preseten Nelson a kokko seni Kot an epwe emweni An ewe Samon we Mwichefen mi ennet.
Ua pwan pwarata pwe ewe Samon a kokkori Elter Gerrit W. Gong and Elter Ulisses Soares ar repwe choni ewe Mwichen Engon me Ruemon Apostel. Ua tongeir me etiwer. Ren ar angang, repwe efeiochu manauen aramas won unusen fonufan.
Mi pwan wor eu popun ei mwichenap mi kon auchea. Preseten Nelson a fen pwarata och siwin non An ewe Samon kokkotun teten fan iten An Mwichefen. Non ena kokkot mi wor eu minafo tetenin mwichen pristut non wart me steik pwe sipwe anapano ach tufichin aponueta wisach non ewe pristut. Ekkei wis meinisin mi anongonong won ach tumunu noun Semach kewe semirit me ren ewe pristut.
An ewe Samon kokkot fan iten Noun kewe Souneng ar repwe aninis fiti tong mi fis non chommong napanap. Nepoputan non Nauvoo, ewe Soufos Joseph Smith a forata eu kokkot ar repwe tumunu ekkewe ra keran fiti ewe mwichefen minne mi feito ngeni ewe neni, napengeni ir mi osupwang. Femon ai kewe newov ra fitir—ekkewe Eyring, Bennion, Romney, me Smith. Ewe Soufos a forata eu kokkot ne tumunu ekkewe Souneng anongonong won en mi ian ra nom ia. Non Illinois ekkewe kinikinen ewe neni mi iteni “wart.”
Nupwen ekkewe Souneng ra sai won ewe fonu pon, ar kewe mwichen tumunu fengenir a iteni “kompani.” Seman semen semei a niwin seni an misin non ewe neni a iteni Oklahoma iei nupwen a churi eu kompani won ewe aan. A fokkun apwangapwang ren an semwen iwe i me chienan ra chok kokkon won war kukun wakon.
Emon souemwenin ar kompani a ereni ruemon fopun ar repwe feino anisi ion a nom non ewe wakon. Emon me neir, emon fopun a fiti ewe mwichefen non Switzerland, a kuna emon nein ekkewe misineri me a mefi chen. Ekkewe Sounengen ena kompani ra amanaua i. A chikar iwe a tufichin sopweno ne fetan ngeni ewe Salt Lake Valley ren chienan ewe chon amanaua i. Ra poputa ne mefi tong fengen nefiner me ra pupunu. Inai mine seman semen semei Henry Eyring, me neminewe a inan semen semei Maria Bommeli Eyring.
Fitu ier mwirin, nupwen aramas ra apasa pwe mi fokkun weires ar fetan seni epekin ewe fonu ngeni pwan eu, neminewe a apasa, “Apwi, ese weires. Nupwen aua fetan, aua kapas usun ewe manaman pwe am me ruemon aua kuna ewe ennetin kapas allimen Jises Kraist. Mi eu fansoun pwapwa nap seni meinisin.”
Seni ena fansoun, ewe Samon a aea chommong napanapen aan an epwe anisi Noun kewe Souneng ar repwe tumunu fengenir. Iei A efeiochukich ren mwichen pristut mi pochokun me angang fengen non ach kewe wart me steik—mwich repwe angang fengen ren ekkewe kinikin meinisin non ewe wart.
Mi wor ru mettoch mi auchea pwe wart non kinikinen neni, kompani, me mwichen pristut mi pochokun ar repwe nipwakoch non an ewe Samon mochen Noun kewe Souneng repwe tumunufengenir ifa usun ar repwe pwisin tununur. Repwe nipwakoch nupwen Souneng ra mefi ewe tongen Kraist nefiner nap seni met ra pwisin mochen fori. Ekkewe pukfen ra iteni “tong ennet … ewe nimenimochun tong an Kraist” (Moronai 7:47). Me repwe nipwakoch nupwen ewe Ngun mi Fel a emweni ewe chon tumun an epwe sinei met ewe Samon a sinei pwe mi och fan iten ewe emon ra achocho ne anisi.
Fan chommong non ekkewe wik, ua kuna chon ewe Mwichefen nupwen ra fori mettoch ita ra fen sinei met ewe Samon epwap fori. Ua mochen poraus usun ru mettochun esisin a fis. Aewin, eu afanafan non mwichen sakramen seni emon sense non ewe Pristut seni Aaron mi 14 ierin minne a weweiti met chon komoch ewe pristut mi tongeni fori non ar angang fan iten ewe Samon. Oruan, emon chon ewe Pristut seni Melkisetek, ren ewe tongen Kraist, a angei pwarata an epwe angang ngeni eu famini.
Akomwan, upwe aniwini kapasen ewe anuen mi afanafan non ewe mwichen sakramen non an wart minne ua fiti. Oupwe achocho oupwe chechemeni met napanapemi nupwen oua 14 ierimi me ausening ngeni met a apasa minne ita emon anuen esap tufichin sinei:
“Ua men sani ai fiti ewe mwichen sense non am wart seni ewe ier nupwen ua 14 ieri. Emon sense mi chuwen fori ekkewe wisen tiken nge mi pwan wor ekkoch minafo.
“Pokten ekkoch me neich mi sense me ekkoch repwap angei ei wis, me chon Mwichefen meinisin mi feioch me ren ewe pristut, mi auchea ach sipwe weweiti wisen emon sense.
“Akaewin, non Doctrine and Covenants 20:53 a apasa, Pwe wisen ekkewe sense ar repwe tumunu ewe mwichefen fansoun meinisin, me nonnom rer me apochokuner.
“Oruan, Doctrine and Covenants 20:54–55 a apasa:
‘Wisen ekkewe sense ar repwe pi pwe esap wor tipis non ewe mwichefen, esap pwan wor song fengen, are kapas chofona, esit, are kapas mi ngau;
‘Me repwe pi pwe ewe mwichefen a chufengen fan chommong, me pwe chon ewe mwichefen ra fori wiser kewe.”
Ewe anuen a sopweno:
“Ewe Samon a erenikich pwe wisach sisap chok tumunu ewe Mwichefen nge sipwe pwan tunumu ekkewe aramas non ewe Mwichefen usun met mine Kraist afen fori pokiten iei An Mwichefen. Ika sia achocho ach sipwe aponueta ekkewe annuk, kirekiroch fengen, kapas wenechar, chiechioch, me nonnom fengen non pwapwa, iwe ewe Ngun mi Fel epwe tongeni nom rech me sipwe sinei met Semach won Nang A mochen sipwe fori. Ika sise fori, iwe sisap tufichin aponueta wisach.”
A sopweno ne apasa:
“Nupwen emon sense a finata an epwe eu nenien appiru ren an fori angangen sensen famini, etiwa chon mwichefen non fan, ammonata ewe sakramen, aninis non imwan, me esenipato kinamwei, a finata an epwe sufeniti an pristut me a aponueta wisan.
“Ika sipwe emon sense mi och esap chok wewen sipwe fori wisach nupwen sia fiti fan are non mokutokuten ewe Mwichefen. Ewe Aposel Paul a aitikich, “Kopwe ew nenien appiru ren ekkewe chon nuku ren om afanafan, om foffor, om tong, om nuku me nimenimoch’ (1 Timothy 4:12).”
Mwirin ewe anuen a apasa:
“Ese nifinifin ian sia nom ia are met sia fori, sia tongeni eu minen appiru ren tupwen fansoun meinisin me neni meinisin.
“Ngang me semei aua sensen famini ngeni ekkewe Brown. Iteiten fansoun aua churiir, ua men sani ai churiir me kaeo usur. Eu mettoch ua men sani usun ewe faminien Brown pwe nupwen aua churiir, ra mochen ausening me ar kewe poraus a kon och.
“Nupwen sia sinei ekkewe aramas non ewe wart pokiten ach fori angangen sensen famini, a fen mecheres ach sipwe aponueta pwan eu wisen sense, ach kapong etiwa ekkewe chon mwichefen ren ar eto fan. Ach anisi aramas ar repwe mefi pwe sia etiwer a anisi ekkewe chon wart mefi tong me ammonata ar repwe angei ewe sakramen.
“Mwirin ar ra kapong etiwa ekkewe chon mwichefen mi fiti fan, iteiten Raninfen ra aninis ren ar ammonata ewe sakramen. Ua men sani ai pasini me ammonata ewe sakramen non ei wart pokiten kich meinisin mi mosonoson. Ua mefi ewe Nugn mi Fel iteiten nupwen ua ammonata me passini ewe sakramen. Ua feioch ren ai tufichin fori iteiten Raninfel.
“Och angang usun ach passini ewe sakramen aramas mi kuna me ra apasa ar kinisou, nge pwan och angang usun ach ammonata ewe sakramen a fis me ese wor chon kuna. Ese auchea pwe aramas repwe kuna ach angnag; met mi auchea pwe ewe Samon a sinei pwe sia angang ngeni I.
“Kich sense, fansoun meinisin sipwe achocho ach sipwe apochokua ewe Mwichefen, chienach, me ach famini ren ach aponueta wisach non ewe pristut. Ese mecheres, nge ewe Samon esap ngenikich annuk “tiwenon chok ika a amonnata ew aan [ngenikichach sipwe] apwonueta ewe mettoch minne i a annuku [ngenikich]’ (1 Nifai 3:7).”
Nupwen ewe anuon a osopwano, ua mwar ren an tipen mwan me mirit. A osopwano ren an apasa, “Ua sinei sipwe ochuno ika sipwe finata ach sipwe tapweno mwirin [Jises Kraist].”
Pwan eu porausen angangen pristut ua rong non ewe maram non mwichen sakramen non eu wart. Ua fiti ewe mwich sefan. Ei mwan mi kommoch ewe pristut ese sinei nge nupwen a kapas a awewe met ewe Samon a mochen epwe fis ren mwichen pristut mi pochokun. Iei met a apasa:
I me chienan ne feino sensen famini ra wisen tumunu fisu famini. Napengeni ir meinisin rese mochen ar repwe churiir. Nupwen ekkei sensen famini ra feino ngeni imwer, rese suk ngenir ewe asam. Nupwen ra kokko, rese ponueni. Me nupwen ra ngeniir eu message, rese aniwini ar kokko. Ekkei ruemon ra poputa ar repwe angang ngeni ekkei famini ren ar mak tarpowe ngeniir. A pwan poputa an epwe mak non taropwe mi on ren an apinukunuk ar repwe ponueni noun kewe tarpowe.
Eu me nein ekkewe fisu famini emon fefin mi patapatano mi feito seni Europe. Mi wor ruemon noun semirit.
Mwirn ra achocho fan chomong ar repwe churi, a angei eu text. A ereni pwe a men osukosuk iwe ese tawe an epwe churi ekkewe sensen famini. A wor ru an angang me a pwan emon sounfiu. An angang a emon ponis, me a mochen winiti emon detective me pwan niwin ngeni nenian me sopweno an angang ikewe.
Ewe sensen famini ese tongeni churi non imwan. Fan ekkoch a text ngeni i. Iteiten maram a makei echo taropwe ngeni, pwan taropwen kirisimas fan iten noun kewe ruemon semirit.
Ese angei ponuen an mak. Nge a sinei ian noun kewe sensen famini ra nom ia, ifa usun epwe kokkorir, me pwe repwe sopweno non ei angangen pristut.
Iwe eu ran a angei eu text seni ewe fefin. A men osukosuk. Ese sinei ewe pisop nge a sinei noun kewe sensen famini.
Non fitu ran, epwe feino ngeni pwan eu state ren eu mwichen sounfiu. Ese tongeni an epwe uwei noun kewe semirit. Inan, ita epwe fen tumunu noun kewe, a chok keran feino ngeni Europe an epwe tumunu punuwan, minne a semwen.
Ei fefin ese fifiti fan a chok naf ngeni an epwe moni echo tikit ngeni Eurpoe fan iten noun we kukkun nge ese naf ngeni noun we at a 12 ierin, itan Eric. A tingorei noun we sensen famini an epwe kuta eu famini chon ewe mwichefen pwe Eric epwe nonnom rer non ukkun 30 ran!
Ewe sensen famini a ponueni pwe epwe achocho ngeni. A kokkori noun ekkewe souemwenin pristut. Ewe pisop a mutata an epwe tingorei chon ekkewe souemwenin ewe wart, pwan ewe presetenin ekkewe Fin Anisi.
Ewe presetenin ekkewe Fin Anisi a kuta ruanu famini chon ewe mwichefen, ren semirit mi taitap ngeni ierin Eric, minne repwe mut ngeni Eric epwe nonnom rer eu wik. Non ewe maram mwirin, ekkei famini ra amongoni Eric, awora nenian non imwer mi kukkun, me uwei i won ar kewe kokkotun kukunou non ewe fansoun pwichikar, ra uwei ngeni fan, a fitir non ar pwinin famini, me pwan chommong mettoch.
Ekkei famini mi wor nour at mi nonno ierir ngeni Eric a fitir non ar kewe mwich me mokutokutun ewe mwichen tiken. Non ekkei 30 ran, Eric a fiti fan iteiten Raninfel.
Mwirin inan a niwin seni an mwichen sounfiu, Eric a sopweno ne fiti fan, napengeni a fiti eu nein ekkei famini chon ewe mwichefen are pwan ekkoch minne ra chiechi ngeni, pwan noun inan kewe fefin chon amaw. Mwirin ekkis fansoun, a sekita ngeni emon tiken me a poputa an epwe passini ewe sakramen.
Iei sipwe ekiki usun met epwe fis ngeni Eric. Sisap mairu ika a winiti emon souemwen non ewe Mwichefen non fonuen inan nupwen ar famini a niwin—pokiten Souneng mi angang fengen ne angang fan emwenin ewe Ngun mi Fel me ren tong ennet non netiper.
Sia sinei pwe tong ennet mi namwot ach sipwe kuna manau non ewe muun Kot. Moronai a makei, “tiwenon chok ika epwe wor ami tong ennet ouse tongeni manau non ewe muun Kot” (Moronai 10:21; pwan nengeni Ether 12:34).
Sia sinei pwe tong ennet mi eu niffang minne sia angei mwirin sia fori mettoch meinisin sia tongeni fori. Mi namwot sipwe “iotek ngeni ewe Sam ren unusen pochokunen netip, pwe [sipwe] ureno ren ei tong, minne a fen wata won ir meinisin chon ennetin tapweno mwirin Noun we, Jises Kraist” (Moronai 7:48).
Me rei ua ekieki pwe sia angei ewe Ngun mi Fel nupwen sia ekieki usun ach angang ngeni ekkoch. Iei popun mi wor wisach non ewe pristut ach sipwe angang fan iten ewe Samon. Nupwen sia angang ngeni ekkoch, sise ekieki usun pwisin kich, me ewe Ngun mi Fel a tongeni nom rech me anisikich non ach achocho ach sipwe angei ewe niffangen tong ennet.
Ua pwarata pwe ewe Samon a fen poputani An kokkot fan itach ach sipwe anapano ach angei pwarata me tong ennet non ach angangen pristut. Ua kinisou ren An tong, minne A kirekiroch ne ngenikich. Ua pwarata ekkei non ewe it mi pin iten Jises Kraist, amen.