2010–2019
Met Ekkewe Aaronic Pristut a auchea ngenir ar repwe weweiti
April 2018
2:3

Met Ekkewe Aaronic Pristut a auchea ngenir ar repwe weweiti

Seni Douglas D. Holmes

Aemonun Chon Aninis ren Ekkewe Anuon Unus Presetensi

Om we Aaronik Pristut amen unusen auchea ne anisi noun Kot kewe semirit ren ar repwe angei manamanen ewe fangono manau an Kraist.

Pwii, ua men kinisou ren ei fansoun ua nonom remi non ei mwich. Nupwen ai we ua emon minefon missin preseten, ua men chengen ai ua angei amuwe akaewin mwichen minefon misineri. Ekkoch me nein noum kewe misineri minen nom ra amonata eu mwich fan iten ekkewe minefo, ua eteneki pwe ra eteteni ne okukumosano ekkoch an semirit sea.

“Pwata oua aea ekkena kukun sea? Ua eis.

Ekkewe misineri, ra ponueni non ekkoch napanapen ar ra sau, ra apasa, “An ekkewe minafo misineri.”

Ua nuku pwe iei usun met sia kuna ren manauen ekkoch me met ra foffori non manauer ren met repwe tongeni winiti. noum kewe minefon misineri ra momot won an ekkewe watte sea non na fansoun.

Fan ekkoch, ua nuokus, ach sia ekiekin ngeni nouch kewe anuon Aaronik Pristut an ekkewe kukun semirit sea ar repwe momot won, nap seni ach sipwe fen anisir ar repwe kuna pwe Kot a ngenir eu wis mi pin me auchea ar repwe fori.

Preseten Thomas S. Monson a aiti ngeni kich pwe a auchea an ekkewe anuon repwe weweiti “met wewen… ar repwe komoch ewe pristut ika pochokun me mumuta an Kot. A auchea ar repwe emwen ren ewe ngun pwe repwe sinei pinin wiser we.”

Ikenai ua iotek ewe Ngun mi Fel epwe emweni kich ren ach sipwe weweochuti ewe pochokun me pinin ewe Aaronik Pristut me anisi kich ach sipwe achocho ne ekipwichi angangen ach ewe pristut. Ai ei afanafan epwe ngeni ami meinisin ekkewe Aaronik Pristut, pachenong ami ekkena Melkisetek Pristut.

Elter Dale G. Renlund a aiti ngeni kich pwe popun me wewen ewe pristut epwe amonata noun Kot semirit ar repwe angei manamanen ewe fangono manau an Jises Kraist. Ren ach sipwe angei manamanen ewe fangono manau an Jises Kraist non manauach, sipwe nuku non Ii, aier seni ach kewe tipis, fori me aponueta ach kewe pwon ren ekkewe annuk, me angei ewe Ngun mi Fel. Esapw ekkei nongonong sia angei fan eu chok; pwe, ra angang fengen, forun me koutan ren emon me emon kich ach sipwe sopweno ach angangen achifouwa ne “feito ngeni Kraist, pwe kopwe unusoch non ii.”

Iwe, met wisen ewe Aaronik Pristut? Ifa usun a anisi kich ach sipwe tonong non manamen an Kraist we fangono manau? Ua nuku pwe ponuan we sia tongeni kuna me non ekkewe kien Aaronik Pristut ra komoch—ekkewe kien afanafan an ekekwe chon nang me ewe amonetan ewe kapas allim.

Ewe Afanafan an ekkewe Chon Nang

Sipwe poputa ren ew kinikinin ewe afanafan an ekkewe chon nang. Me mwen noun Kot kewe semirit repwe nuku non Kraist, mi auchea ar repwe sinei Ii me kaeo An we kapas allim. Usun met ewe Aposel Paul a apasa:

“Ifa usun ar repwe nuku ewe rese rong me sisinei? Ifa usun ar repwe sinei me rong ika ese wor chon afanafan?

“Me ifa usun ar repwe afanafan, ika pun ese wor chon tinireto? …

“Iwe a wor nuku seni rongorong, me rongorong ewe kapasen Kot.”

Seni nepoputan, Kot a “tinato ekkewe chon nang ar repwe afanafan ngeni noun aramas, repwe aronga usun ewe wareton Kraist.” Ekkewe chon nang ra feito seni nang ra uwei ewe kapasen Kot. Non ekkewe ruu Hebrew me Greek, ewe popun kapas an ekkewe chon nang “chon uwei kapas.”

Non eu chok wewe Kot a tinato ekkewe chon nang pwe ir chon angang mi kamwoch ar mwumwuta ar repwe afanafana An we kapas me iwe repwe forata nuku, kich ekkewe sia komoch ewe Aaronik Pristut sia fen efeioch ngeni ach sipwe osukun, me uweiato meinisin aramas ngeni Kraist. Sipwe afanafana ewe kapas allim iei an pristut angang. Pwe manamanen ei angang esapw chok ngeni ekkewe soufos me ekkewe misineri. Pwe pwan en!

Ifa usun ach sipwe angei ei manaman? Ifa usun an ewe tiken 12 ierin—ika emon neich—epwe wanong ewe nuku non Kraist non netipen noun Kot kewe semirit? Epwe poputa seni ach kaeo An we kapas pwe epwe pochokun non kich. A pwon ngeni kich pwe ika sia fori, sipwe sinei met sipwe apasa nupwen ewe fansoun mi pung. Eu fansoun tufichin afanafan non mwich ika nupwen ka churi ekkewe souneng non imwer. Fan ekkoch epwe ekis sokono, usun om aporous ngeni chiechiom ika chochon non famini. Non eu me eu ekkei napanap, ika pwe sia moneta ngeni, sia tongeni osukuna ewe kapas allim usun chok met ekkewe chon nang ra fori: seni manamanen ewe Ngun mi Fel.

Jacob me Brother Holmes

Ua keran chok rongorong Jacob, emon Aaronik pristut non Papua New Guinea, a pwarata usun manamanen ewe Puken Mormon me usun an a anisi an epwe ungeni ewe tefin me a tapweno mwirin ewe Ngun. An we kapas a awateno ai nuku me an ekkoch. Ai nuku apwan napono nupwen ua rong an ekkewe Aaronik Pristut ra osukun me pwarata me non ar mwichen quorum.

Ekkewe anuon, ami noun chon esinesin ren mwumwuta. Ren ami kapas me foffor, oua uwei nuku non Kraist ngeni netipan noun Kot kewe. Usun met Preseten Russell M.. Nelson a apasa, “Ngenir ami nour we chon nang chon afanafan.”

Ewe Amonetan ewe Kapas Allim

Watenon nuku non Kraist a awora chengenin ekesiwin me aier. Iwe a fokkun namot me auchea pwe ewe kien afanafan an ekkewe chon nang epwe chufengen me ekkewe kien amonetan ewe kapas allim, ewe kapas allimen aier me paptais, me ewe omusomusen tipis.

Nupwen kopwe kaeo angangen wisom we Aaronik Pristut, kopwe kuna fatafatochun anen om kopwe uweato ekkoch ar repwe aier me mamarita. Esapw ren ach sipwe uta non pwokukun aan me puchor, “Aier! Napengeni, wewen pwe sipwe aier sipwe omusano, me nupwen sipwe afanafan ngeni ekkoch, sipwe awora nukunuk me kinamwe pwe epwe wor aier—pokiten sia fen pwisin fori.

Ua fen fifiti ekkewe Aronik Pristut nupwen rano churi chiechier kewe pristut. Ua kuna usun ar tong me ra anisi pwiir kewe ar repwe pwan mefi usun ewe tongen Kot. Ua rong an emon anuan apasa an kapasen pwarata usun ewe manamanen aier. Nupwen an a pwarata, ekkewe netip ra suk, ra fori ar kewe pwon, me ra mefi ewe manamanen echikara an Kraist.

Preseten Gordon B. Hinckley a apasa: “Eu mettoch ren aier. Pwan eu sipwe amusano ach kewe tipis. Ewe manaman ach sipwe fori ei sia kuna me non ewe Aaronik Pristut.” Ekkewe angang mi pin ren ewe Aaronik Pristut paptais me ewe sakrament ra pwarata me ounusano ach aier ren omusomusen ach tipis. Preseten Dallin H. Oaks a awewetiw: “Sia angei ach mumuta ach sipwe aier seni ach kewe tipis me feito ren ewe Samon ren unusen netipach me ngunuch me angei ewe sakrament. … nupwen sia asofosefani ach kewe pwonen papatais non ei an, ewe Samon epwe asofosefani ewe nimenimoch a fis ren ach we paptais.”

Pwii kana, eu tufich mi pin ach sipwe fori ekkewe angang mi pin mi awora omusomusan tipis ngeni netipan ekkewe mi aier me ren manamanen an ewe Chon Amanau we achasefan.

Ua keran chok rongorong usun emon ekkewe pris ewe a nuokus an epwe pwarano inisin, an a akaewin efeiochu ewe sakrament. Nupwen a fori, eu manamanen ngun a feitiw won me unusen ewe mwich. Mwirin non ewe mwich, a apasa eu kukun me fatochun kapasen pwarata usun ewe manamanen Kot mi mefi nupwen ewe sakrament.

Mwichen Pris ren Mbuelongo famini

Non Sydney, Australia, fomon chochon ewe mwichen pris ra paptaisi ewe faminien Mbuelongo. Inan emon ekkei pris mi awewe ngeniei ifa usun ei angang a apochokuna noun we. Ekkei pris ra kaeo met auchean me popun ar repwe chon angang fan iten Jises Kraist.

Usun ka fen sinei, pwe pris ra tongeni ar repwe fori ewe angangen paptais non tempel. Nei we at a 17 ierin a keran chok paptaisi ei ren ekkoch am kewe newo. Am me ruemon aua men mefi kinisou ren ewe Aaronik Pristut me ewe tufichin angang ren manau ese much fan iten noun Kot kewe semirit.

Ami kana onuan, nupwen oua tiniken ne apwonueta ami sekining non pristut, oua anisi Kot non An angang ne awora manau fochofoch me manau ese much ngeni aramas. Ekkei sokkun mi apochokuna netipemi me ammonakemita oupwe afanafan usun aier me paptaisi chon ekkesiwin nupwen ami misineri. Mi pwan ammonakemita ren ami angang non ewe Pristut seni Melkisetek ren unusan manauemi.

John ewe Chon Paptais, Ach we nenien Apiru

Ekkewe ra komoch ewe Aaronik Pristut, a wor ach tufich me angang ach sipwe fiti John ewe Sou Paptais ne chon aninnis.. John a angei an mumuta pwe epwe ii emon chon uwei ewe kapas allim me pwarata usun Kraist me uweato meinisin ar repwe aier me paptais—pwe iei, a anganga ewe kien Aaronik Pristut sia awewei. John a apasa, “Upwe paptaisiuk ren ewe konikin aier: nge ewe epwe tapweto mwiri a nap seni ei … : epwe paptaisiuk ren ewe Ngun mi Fel, me ewe Ekei.”

Ina, ewe Aaronik Pristut, angangen amonata ewe kapas allim, amonata ewe an ren noun Kot kewe semirit ar repwe angei, seni ewe Melkisetek Pristut, ewe niffangen Ngun mi Fel, ewe watten niffang sia tongeni angei non ei manau.

Met ren ei auchean wis Kot a fang ngeni ekkei Aaronik Pristut!

Eu Tingor me Pwon

Sam me in me ekkewe souemwenin pristut, oua kuna ukukun auchean met Preseten Monson a emwen ngeni ekkewe anuon ar repwe weweiti “ met auchean … ar repwe komoch ewe pristut an Kot”? Weweiti me pwarata usun ewe Aaronik Pristut iei ewe auchean amoneta sia tongeni fori ngeni ekkewe mi nukuchar Melkisetek Pristut, pochokun a wor ren missineri, me mwan mi pupunu me semenap mi wenechar. Seni ar angang, repwe weweiti me mefi ewe auchean me manamanen pristut, ewe pochokunen angang non iten Kraist ren ewe manau ese much ngeni noun Kot kewe semirit.

Ekkewe anuon a wor an Kot angang ngeni kemi ami oupwe fori. Wisemi we Aaronik Pristut a fokkun auchea an epwe anisi Noun kewe semirit ar repwe mefi manamanen an Kraist we fangono manau. Ua pwon ngonuk pwe ika ka aucheani ei wis mi pin me non manauom, kopwe mefi ewe manamanen Kot mine kose memefi me mwan. Kopwe weweiti wisom usun en noun Kot anuon, pwe ka koko ngeni ei wis mi pin om kopwe fori An angang. Me, usun John ewe Sou Paptais, kopwe aninis ne amonata ewe waroton Noun we At. Ekkei mettoch mi ennet ua pwarata non iten Jises Kraist, amen.

Esinesin

  1. Iei usun met a fis ngeni Moses. Mwirin an we amwararen churi Kot, a poputa ne ekieki usun sokonon manauan—pwe a emon noun Kot at. Ei ekiek a anisi an epwe pochokun ngeni Satan, ewe a iteni “noun aramas” (nengeni Moses 1:1–20). Pwan nengeni Thomas S. Monson, “See Others as They May Become,” Liahona, Nov. 2012, 68–71; Dale G. Renlund, “Through God’s Eyes,” Liahona, } Nov. 2015, 93–94.

  2. Thomas S. Monson, general conference leadership meeting, Mar. 2011.

  3. Nengeni Dale G. Renlund, “The Priesthood and the Savior’s Atoning Power,” Liahona, Nov. 2017, 64–67.

  4. Nengeni 2 Nifai 31–32; 3 Nifai 11:30–41; 27:13–21; Ether 4:18–19; Moses 6:52–68; 8:24.

  5. Moronai 10:32; pwan nengeni Preach My Gospel: A Guide to Missionary Service (2004), 6.

  6. Nengeni Doctrine and Covenants 13:1; 84:26–27; 107:20.

  7. Rome 10:14–15, 17. Joseph Smith a asukun usun chok pwan ei ennet: “Nuku a feito seni rongorong ewe kapasen Kot, seni ekkewe kapasen pwarata an noun Kot kewe chon angang (soufos); ena pwarata a wor iteitan seni ewe Ngunun osini me pwarata” ( Teachings of Presidents of the Church: Joseph Smith [2007], 385).

  8. Moronai 7:22; nengeni Alma 12:28–30; 13:21–24; 32:22–23; 39:17–19; Ilaman 5:11; Moronai 7:21–25, 29–32; Doctrine and Covenants 20:35; 29:41–42; Moses 5:58; pwan nengeni Matthew 28:19; Rome 10:13–17.

  9. Nengni George Q. Cannon, Gospel Truth, sel. Jerreld L. Newquist (1987), 54.

  10. Nengeni James Strong, The New Strong’s Exhaustive Concordance of the Bible (1984), Hebrew and Chaldee dictionary section, 66, Greek dictionary section, 7.

  11. Doctrine and Covenants 20:59.

  12. Nengeni Henry B. Eyring, “That He May Become Strong Also,” Liahona, Nov. 2016, 75–78; Alma 17:3; Ilaman 5:18; 6:4–5; Doctrine and Covenants 28:3.

  13. Nengeni 1 John 2:14; Alma 17:2; 26:13; 32:42. Fulfilling My Duty to God: For Aaronic Priesthood Holders eu pisek mi auchea an epwe anisi ei wis epwe fisioch.

  14. Doctrine and Covenants 11:21; pwan nengeni Doctrine and Covenants 84:85.

  15. Nengeni 2 Nifai 32:3; Doctrine and Covenants 42:14; 50:17–22.

  16. Nengeni Moronai 7:25.

  17. Russell M. Nelson, “Honoring the Priesthood,” Ensign, May 1993, 40; pwan nengeni Alma 27:4.

  18. Nengeni Alma 34:17; Ilaman 14:13.

  19. Doctrine and Covenants 84:27.

  20. Nengeni Doctrine and Covenants 20:46, 51–59, 73–79. Fulfilling My Duty to God: For Aaronic Priesthood Holders ew pisekin angang mi auchea a anisi kich ach sipwe weweiti ach sekining ika wisach.

  21. Gordon B. Hinckley, “The Aaronic Priesthood—a Gift from God,” Ensign, May 1988, 46.

  22. Elter D. Todd Christofferson a awewei: “Paptais ren konikn ina ewe sangonon nato ren ewe angangen aier. Ewe omusomusen tipis, chufengen me ach pwonen aneasosich, ounusochun ach aier; ren ennetin, aier ese unusoch me nukun ean pwon”(“Building Faith in Christ,” Liahona, Sept. 2012). Pwan nengeni D. Todd Christofferson, “The Divine Gift of Repentance,” Liahona, Nov. 2011, 38–41;Joseph Smith Translation, Matthew 26:24 (non ewe Bible appendix).

    Annukun ewe sakrament a ngeni kich “eu tufich ach sipwe asofosefani ach kewe pwon iteiten wik me mefi ewe umoumochun ewe fangono manau an ewe Chon Amanau ren ewe chok ngunun nimenimoch sia angei nupwen sia paptais me angei ewe niffangen ewe Ngun mi Fel” (“Understanding Our Covenants with God,” Liahona, July 2012, 21). Pwan nengeni Dallin H. Oaks, “Always Have His Spirit,” Ensign, Nov. 1996, 59–61.

  23. Dallin H. Oaks, “The Aaronic Priesthood and the Sacrament,” Liahona, Jan. 1999, 44.

  24. Elter David A. Bednard a awewei: “Ewe annukun ewe Manau ese Much me angangen manau fochofoch me non an ewe Samon we Mwichefen mi niwinsefanito a nap seni anagangen kaeo me anapanap. Ra nap, ra angei mumutan angang seni ewe efeioch me manamannen nang a tongeni tonong non manauen emon me emon” (“Always Retain a Remission of Your Sins,” Liahona, May 2016, 60).

  25. Doctrine and Covenants 20:73.

  26. Moses 1:39.

  27. Matthew 3:11.

  28. Napengeni souemwenin ewe Mwichefen ra anapanapa pwe ewe Ngun mi Fel eu auchean nifffang ese much.

    President Dallin H. Oaks a apasa, “Ewe Ngun mi Fel epwe soposopono ne nonom rech pun iei met akon auchea ngeni manauch” (“The Aaronic Priesthood and the Sacrament,” Liahona, Jan. 1999, 44).

    Elder Bruce R. McConkie a aiti kich: “kapasen ekkewe ekiek ren manau ese much, manau ese much iei eu me nein an Kot kewe niffang a nap seni meinisin. Nge a anongonong won met kewe sia foffori non ei manau, ewe ngun mi fel iei ewe auchean niffang kich meinisin sia tongeni angei” (“What Is Meant by ‘The Holy Spirit’?” Instructor, Feb. 1965, 57).

    President Wilford Woodruff a pwarata: “Ika pwe ewe ngun mi fel a nonom reom—ika kich meinisin—ua tongeni apasa ngonuk pwe ese pwan wor eu me nein ekkei niffang akon auchea, ese pwan wor och feioch, ese wore u kapasen pwarata ngeni aramas meinisin won fonufan. Kopwe angang usun ewe chon nang; kopwe kuna chommong manaman; kopwe kuna chommong murino won fonufan; nge upwe pwarata pwe ewe Ngun mi Fel ina ewe auchean nifang me nein meinisin ngeni aramas meinisin” (Teachings of Presidents of the Church: Wilford Woodruff [2004], 49).

    Me Elder David A. Bednar added: “Ekkewe annuk an Kot sia aneasosichi me ekkewe aurour mi pin an ekkewe souemwenin ewe Mwichefen sia aneasosich me ekipwichi usun ewe Ngun mi Fel. Manaueni, meinisin asukunen ewe kapas allim and fofforun ra kon auchea ren ewe wareton Kraist seni ach angei ewe Ngun mi Fel non manauach” (“Receive the Holy Ghost,” Liahona, , Nov. 2010, 97).

  29. Thomas S. Monson, general conference leadership meeting, Mar. 2011.

  30. Nengeni Moses 1:6.