Ekkewe Fopun non ewe Angang
Meinisin ekkewe fopun non ewe Mwichefen repwe mefi pun ra men auchea, mi wor ar tufichin angang, me repwe mefi pwe mi wor mettoch mi auchea repwe fori non ei angang.
Non ewe ier a no, non ewe mwichenapen pristut unus, Pisop Gérald Caussé a kapas ngeni ekkewe mwanin ewe Mwichefen ren an awewei ifa usun ekkewe chon amwochu ewe pristut seni Aaron me Melchizedek ir chiechi mi nukuchar fengen ren ar apwonueta ewe angangen amanau. Ena porous a fen winiti ew feioch ne anisi ekkewe anuon mi anomu Pristut seni Aaron ar repwe kuna wiser ne aueta ewe muun Kot won ei fonufan. Ar angang fengen a apochokuna ewe Mwichefen me efisi ennetin siwin me nukuchar non netipen nouch kewe anuon nupwen ra apareni usun auchean ar aninis me ifa usun amwararen ei angang.
Ikenai ua mochen ai kapas epwe pachengeni ena porous nupwen upwe kapas usun an ekkewe fopun non ewe Mwichefen ekkewe ra men auchea me murino ar repwe apwonueta an ewe Samon we angang me non ar kewe famini me An we Mwichefen.
Usun Pisop Caussé, ua nonom non eu kukunun pranch an ewe Mwichefen non ai kewe ierin serafo, me ra soun tingoreei ai upwe foffori ekkoch wis me angang ita ururun ekkewe watte repwe kan wisen fori. Ren awewe, am ekkewe mi nom non kinikinin serafo aua pwisin emweni ne akokkota me fori am urumot me mwich. Aua mak sipai, efisi mwichen kon ren am aupwe apwapwai urumotun pranch, me aua soun fiti meinisin ekkewe mwich. Ua kokko ngeni au upwe noun ewe pranch chon emwenin kon me ua emweni konun sakrament iteiten wik. Eu angang a men unusen auchea ngeni emon 16 ierin an a uta me mwen meinisin non ewe pranch iteiten Raninfel me emwenir ne konu ekkewe kon mi fel. Ua wesen mefi pwe a men namot me auchea met ua fori. Aramas ra anonga ar ekiek ai upwe nom, me ua wesen sani ai ua tongeni aninis. Ena angang a anisi ei ne amarano ai kapasen pwarata usun Jises Kraist, me usun chok met Pisop Caussé a fori a fokkun anisi me apochokuna manauei non ei angangen kapas allim.
Meinisin chon ewe mwichefen repwe sinei pwe ir mi auchea. Mi wor ren emon me emon mettoch mi auchea an epwe awora me mi wor ren an angangoch me tufich minne epwe anisi fefeitan ei angang mi auchea. Mi wor ren nouch kewe anuon wisen Pristut seni Aaron mi awewetiw non Doctrine and Covenants ekkewe mi pwano me fatafatoch. Eni esap kon fat ngeni ekkewe fopun non ewe Mwichefen, semer me iner kewe, me nour kewe souemwen pwe, seni ewe fansoun ra papatais, ekkewe fopun a wor wiser mi pin “ne netipeta ren ekkewe ra netipeta; ewer, me aururu ekkewe ra mochen aurur, me repwe chon pwarata usun Kot fansoun meinisin me non mettoch meinisin, me non neni meinisin repwe nonnom non, pwan mwo tori mano.” A wor an ekkewe fopun tufich ne apwonueta ekkei wis nupwen ra angang non klasin presetensi, non mwichen serafo, me non ekkoch wis. Meinisin ekkewe fopun non ewe Mwichefen repwe mefi auchea, epwe wor wis rer ne angang, me mefi pwe mi wor rer och mettoch mi murino ar repwe awora ngeni ei angang.
Non Handbook 2, sia kaeo pwe ewe angangen manau ese much non ach kewe wart pachenong “an memper angangen misineri, a apochokuna minafon memper, a apochokuna ekkewe mi ekis patatapteno, angangen tempel me uruon famini, me afanafana ewe kapas allim.” Ei angang non ewe wart a fis me ren nouch kewe pisop ekkewe ra amwochu kiien pristut fan iten ar we wart. Ren chommong ier am we presetensi a fen soun eis ei kapaseis, “Menni nein kinikin a fen affatetiw nouch kewe fopun resap nom non?” Ponuwan we pwe mi wor rer och mettoch repwe awora non meinisin kinininin ewe angang meinisin.
Ren awewe, ua keran churi ekkoch fopun non ewe neni Las Vegas ekkewe ra kokko ar repwe chon aninisin wart tempel me uruon famini. Ir mi fokkun pwapwa ar repwe aiti me anisi ekkewe memper non ar we wart ne kutta ar kewe neuo. Ra fokkun angangoch won ewe kampiuter, me ra kaeo ifa usun repwe aea FamilySearch, me ra cheng ne aea fengeni ena mirit ngeni ekkoch. Mi fatoch pwe mi wor ar kapasen pwarata me weweiti auchean ach sipwe kutta iten ach kewe neuo mi mano pwe ekkewe angang mi pin repwe fis fan iter me non ewe tempel.
Ekkoch maram a no, ua tufich ne tesini ew kokkot ngeni ruemon 14 ier fopun. Ua angei uracho kapin ototun mwichen ewe wart me ua ngeni Emma me Maggie.Ua tingorer repwe anneani ekkewe ottot me katon ika mi wor och mwokutukut seni ewe mwichen wart ir mi tongeni angang non. Emma a kuna pwe mi wor ew minafon famini epwene etto non ewe wart, me a era pwe mi tongeni epwe anisirenong. A ekieki pwe epwe chiechi ngeni ekkewe semirit non ewe famini me pwar ngenir ar we minafon sukun. Mi sinei pwe epwe wor mwongo non ewe wart me a mefi pwe mi wor chommong napanap mi tongeni aninis non.
Maggie a kuna pwe mi wor ekkoch chinnap non ewe wart ekkewe mi och an memper repwe churir me chiechi ngenir. A apasa pwe mi sani an epwe churi me anisi ekkei chinnap memper mi amwarar. A pwan mefi pwe mi tongeni aiti memperun ewe wart ifa usun repwe fori me aea pekin internet. Ese fokkun wor och mettoch won ekkewe otot ekkei ruemon fopun rese tongeni aninis ren!
Ami ekkewe chon ewe mwichen wart, ika ekkewe mi wor wisemi non ewe wart, ami ekieki pwe ekkewe fopun ir pisek mi auchea ne amwosowa ekkewe pekin aninis non ach kewe wart? Mi kan wor tettenin ekkei mettoch mi tam mi murino an emon epwe aninis non, me sia kan soun ekieki pwe ekkewe chok mwan me fefin non ewe wart ra tongeni atawei ekkei osupwang. Usun chok ekkewe Pristut seni Aaron ra fen ketiw ne angang ren semer kewe me ekkoch mwanin ewe Pristut seni Melchizedek, nouch kewe fopun ra tongeni kokko ngeni ar repwe awora aninis me angang ngeni osupwangen ekkewe memper ren iner kewe me ekkoch sister mi amwarar. Ir mi tongeni, ir mi mochen, me cheng ne fori pwan ekkoch nap seni chok ar fiti fan non Raninfel!
Nupwen sia ekieki ekkewe wis nouch kewe fopun repwe wiseni non ekkan ran mwach, meni sipwe pwisin eisini kich met sokkun tufich kich mi tongeni awora ngenir iei an epwe anisir ar repwe moneta ngeni ar repwe misineri, mi sinenap non ewe kapas allim, souemwen non kinikinin ewe Mwichefen, chon angangen tempel, fefin mi pupunu, inenap, chon aurour, nenien appiru, me chiechi. Ra ennetin tongeni poputa iei ne amwosowa chommong wis. Fan ekkoch sia kan tingorei serafo repwe aninis ne asukuna nesen non Raninfel non ar kewe klas. Mi wor ekkewe tufich fan iten nouch kewe fopun ar repwe fori non ewe tempel mi kan akkom fis ren chon angangen tempel ika chon aninis nupwen ra no fiti nour mwichen serafo ne papatais fan iten ekkewe mi mano. Nouch kewe nenginin Kinter iei ra tongeni fiti mwichen amonen Tempel me Pristut, mine epwe anisir ar repwe weweiti pwe ir mi pwan auchea non ei angang mi emwen me ren pristut. Repwe kaeo pwe mwan, fefin, serafo, me semirit ir mi tongeni angei ekkewe feiochun pristut me ir meinisin mi tongeni aninis ne apwonueta an ewe Samon angang.
Pisop, am mi sinei pwe wisemi a men apekus, nge usun chok akkaewin met oua mochen pwe oupwe nemenem won ewe mwichen Pristut seni Aaron, Handbook 2 a awewei pwe “ewe pisop me noun kewe chon aninis repwe awora emwenin pristut ngeni ewe mwichen Ekkewe Fopun. Ra tumunu me apochokuna emon me emon ekkewe fopun, ra angang fengen me semer me iner kewe me souemwenin Ekkewe Fopun non ei angang,” A pwan mak pwe, “ewe pisop me noun kewe chon aninnis repwe soun fiti mwichen Ekkewe Fopun, ar angang, me urumot.” Sia kinisou ren pisop ekkewe ra awora ar fansoun ne churi ekkewe klasin Ekkewe Fopun me ra awora tufich ngeni ekkewe fopun an epwe wor wiser non ewe angang. Sia kinisou ren ami tumunuochu pwe ekkewe fopun repwe tumunu osupwangen ekkewe memper! Ekkei tufichin aninis non napanap mi murino ra efiochur nap seni ekkewe urumot ra chok sani.
Ngeni ami, ekkewe fopun non ewe Mwichefen, ierin ami serafo epwe osukosuk me fan ekkoch weires. Aua apareni pwe chommong me neimi oua osukosuk ren ami tipemwaramwar ren aucheami, nuokus, watten pekus, me eni fen pwan netipengaw. Ami ekieki ekkoch, nap seni ami aureki ami pwisin osukosuk, eni esap kon awesi ekkei osukosuk meinisin, nge aninis ngeni ekkoch a tongeni appanano osemi me fori pwe ami osukosuk repwe ekis kisitiw. Ew me nein ekkewe anen ami oupwe anapano memefin pwe ami mi auchea oupwe pwarano, non ach aureki me angang ngeni ekkoch, pwe mi wor aucheach ne aninis. Ua pesei kemi fopun oupwe eitieta poumi ne angang nupwen oua kuna osupwang neimi. Nupwen oupwe apwonueta wisemi mi pin me aninis ne aueta ewe muun Kot, feioch repwe feito non manauemi me oupwe kuna ewe pwapwan wisen chon kuno mi anonnon me esemuch.
Mwongeiei me pwii kana, nouch kewe fopun ra men amwarar. A wor ar angangoch, cheng ese much me pochokun, me ir mi kirekiroch me tong. Ra mochen repwe aninis. Mi auchea repwe sinei pwe ir mi chen me auchea me non ewe angangen manau ese much. Usun chok anuon ra moneta non ewe Pristut seni Aaron ngeni aninis mi nap nupwen ra tonong non ewe Melkisetek Pristut, nouch kewe fopun ra amoneta ar repwe winiti chon an ewe fefin watten mwicheich won fonufan—ewe Fin Anisi. Ekkei fopun me anuon ra men murino, pochokun, nikitu ra angang fengen ne mwoneta ar repwe mwan me fefin mi pupunu, me in me sam ekkewe repwe amari famini mi fich ngeni ewe muun selestial an Kot.
Ua pwarata pwe ewe angang an Semach won Nang epwe apwonueta ewe manau fochofoch me manau esemuch ngeni Noun kewe. Nouch kewe fopun mi wor wiser mi auchea repwe fori ar repwe aninis ne aponueta ei angang mi pin. Non iten Jises Kraist, amen.