Ewe Mwichen Elter
Ren an epwe wor ew mwichen Pristut seni Melkisetek non ew wart ra etipew fengenii ekkewe mei wor wiser non Pristut ar repwe awesi meinisin foforun angangen ewe manau ese much.
Ese mo tam mwirin an ewe Mwichefen a foruta non ei amuchunon fansoun, ewe Samon a apasa non ew nemasepwi, Pwe ren ewe iotek ach nuku sipwe angei ai annuk, pwe sipwe sinei ifa ussun sipwe emweni an ewe Mwichefen me ani mettoch meinisin mi nom ren. Ei nongonong a fen fifis me non ei Mwichefen me ena pwon ewe Samon mi afona—seni ewe fansoun a wor ewe nemasepwi. Napanapen forutan me angangen ewe pristut a pwano poputa ren ewe Soufos Joseph Smith nupwen ekkewe wis non ewe pristut me ekkewe kinikinin mwich ra karan foruta. Auchean ekesiwin ra pwano me foruta non ewe fansoun ekkewe wis ren ekkewe Preseten Brigham Young, John Taylor, Spencer W. Kimball, me pwan ekkoch, fiti sufon ngeni ewe Mwichen Engon me Ruemon, ekkewe Fik, pris mi napanap, me ekkoch wis me mwich non ewe Melkisetek me Pristut seni Aaron. Iei, non porousen uruo ekis chok fansoun a no, Preseten Russell M. Nelson a awora esinesin ren soposoponon ew auchean ekesiwin.
Ika upwe eniwini ekkoch an kewe porous: “Sia esinesin ussun ew ekkesiwin mi auchea non ach kewe Mwichen Pristut ren Melkisetek pwe sipwe apwonueta angangen ewe Samon. Non ew me ew wart, ewe mwichen pris mi napanap me ekkewe elter iei repwene chok chufengen non ew mwichen elter… [me] ewe napanapen ewe [pris mi napanap non steik] mwichan epwe anongonong won minefon kokko ren pristut.”
Preseten Nelson a pwan apachata:
“Ekkei ekesiwin a fen wor rafen kaeo ngeni ren chommong maram. Aua mefi ew atapwanapwanen mochen ach sipwe emwirinochuno ewe anen ach eteneki nouch chon mwichefen. … Ren ach sipwe emwirinochueno, mi namwot sipwe apechekuna ach mwichen pristut pwe sipwe emwenochu ewe angangen tong me aninnis minne ewe Samon a mochen ngeni Noun Souneng.
“Ekkei ekkesiwin mi amokut me ren ewe Samon. Nupwen sia forir, sipwene nipwakochuno seni nom.”
Ren ewe emwen seni ewe Aewin Presetensi, Elter Ronald A. Rasband me ngang am ouwa apachata ekkoch tichikin minne am mi nuku repwe awora ponuwen kapas eis epwe wor remi.
Ekkewe Elters me Mwichen Pris Napanap.
Aewin, upwe apasa sefani, met ekkewe ekkesiwin ren mwichen pris napanap non wart me mwichen elter ? Non ewe wart, chochon ewe mwichen elter me pris mi napanap iei repwene chufengen non ew mwichen Melkisetek Pristut fiti ew presetensi. Ei mwich, a chommongono chochon me tipeew fengen, epwe finata ewe mwichen elter.” Mwichen pris mi napanap a kouno. Ewe mwichen elters pachenong meinisin elters me ekkewe repwe elter non ewe wart ussun chok pwan pris mi napanap ekkewe rese mwo angang non ewe pisoprik, non ewe steik presetensi, ewe mwichen soupung napanap, ika ren mokutukutun angangen patriarch. Ewe mwichen ekkewe pris napanap non ewe steik epwe masoweni ekkewe pris napanap ra angang non ewe steik presetensi, non pisoprik, won ekkewe soupung napanap, me ussun angangen petriark.
Ewe Presetensin ewe Mwichen Elter
Ifa ussun an ewe mwichen elter presetensi epwe foruta? Ewe steik presetensi epwe epichano mwichen souemwenin pris mi napanap seni wiser me mwichen elter presetensi repwe wisen ewisa emon minefon presetenin mwichen elter me chon emwen non ew me ew wart ika pranch. Ewe minefon presetenin mwichen elter epwe pachenong elter me pris mi napanap ren ier mi sakofesen me nipwakoch repwe angang fengen non ew mwichen presetensi. Ina mwo ika emon elter ika emon pris mi napanap epwe angang ussun emon chon ewe mwichen preseten ika emon chon emwen non ewe presetensi. Esap chok pokiten mi wor ekkewe pris mi napanap iwe ra meinapen ewe mwichen elter. Ei ese tufich an emon epwe “angei wisen emon” seni ewe mwichen elter ren ekkewe pris mi napanap. Sia osukusuku pwe elter me pris mi napanap repwe angang fengen non sokopaten kochufengen me non ewe mwichen presetensi me non angangen ekkewe mwich. Ekkei ekkesiwin non ekkewe mwich epwe foruta esap mang seni inet chok a tufich.
Wis non Pristut non ewe Mwichen Elter
Om ekieki ei ekesiwin non forutan kewe mwich a siwini ewe wis non pristut mi wor ren chochon non ekkewe mwich? Apw, ei mokutukut ese aukano ese nifinifin wis non ewe pristut minne monun non kewe mwich ra efeioch ngeni me nom. Ussun ka sinei, emon mwan mi efeioch ngeni sokopaten wis non ewe pristut non anein manauan, me ese pout seni ika mitino seni wisan ewe a fen efeioch ngeni nupwen a angei ew minefon wis. Ren pwan ekkoch napanap emon mi wor ren ewe prisut mi tongeni angang non nap seni ew wis non ew fansoun, ussun nupwen pris mi napanap a pwan angang ussun emon patriarch ika ussun emon pisop, napengeni ese kan foffor non wisan kewe non chok ewe pwan fansoun. Pisop me kewe Fik, ren chok awewe, rese chiwen pochokun ne angang non ekana wis nupwen ra kepich seni wiser kana ika rese chiwen angang non ekana wis. Nge pwan met ekkoch wis ren pristut emon mwan a wiseni, nupwen i emon chon ewe mwichen elter, i mi chok angang ussun emon elter.
Ekkoch ier ra no, Preseten Boyd K. Packer a nennengeni pwe ewe pristut a napanap seni ekkewe wis non. … Ewe pristut ese tongeni inet fesen. Emon elter a wor ren ewe pristut ussun chok pwan emon Aposel. (Nengeni D&C 20:38.) Nupwen emon mwan [a wor ren ewe pristut a ewis ngeni], a angei meinisin. Nge mi wor wis non ew pristut—kinikinin pochokun ika mumuta me wis. … Fan ekkoch ew wis sipwe ura pwe a ‘tekia seni’ ika ‘tekison seni’ pwan ew wis. Ita ren ‘tekia seni’ ika ‘tekison seni,’ wis non ewe Melkisetek Prstut a awora sokofesein kinikinin wis. Pwii kana Ua ennetin anean pwe sisap chiwen kapas non ititin pwe sia fen nap seni pwan ew wis non ewe Melkisetek Pristut.
Elters repwe sopweno ar repwe efeiochun pris mi napanap nupwen ra koko ngeni ew steik presetensi, chon emwen mi napanap, ika pisop—ika pwan ekkoch fansoun epwe kefinita seni ewe presetenin steik seni emwen me ekiek ren iotek. Nupwen ar fansoun angang non ew presetensin steik, chon emwen mi napanap, ika ewe mwichen pisop ra unus, ekkewe pris mi napanap repwene pwan choni sefani ewe mwichen elter non ar ewe wart.
Kapasen Emwen ren ewe Mwichen Presetensin Elter
Ion a emweni ewe angang ren ewe mwichen elter presetensi? Ewe steik preseten a nemeni ew Melkisetek Pristut non an ewe steik. Iwe nge, ewe mwichen presetenin elter ra ouonam won wiser ngeni ewe presetenin steik, ewe a awora pekin kaeo me emwen seni ewe steik presetensi seni ewe chon emwen mi napanap. Ewe pisop, i ewe chon nemeni pris mi napanap non ewe wart, a pwan chuchuri ewe presetenin mwichen elter. Ewe pisop a fiti ne awora kapasen aurour me emwen mi fich ngeni murinon ar repwe anisi me efeiochu chon ewe wart, angang non pwapwa fengen me meinisin mwicheich non ewe wart.
Popun Ekkei Ekesiwin
Met ekkewe popun ekkewe ekesiwin ngeni ekkewe mwichen Melkisetek Pristut? Ren an epwe wor ew mwichen Melkisetek Pristut non ew wart a ochu fengeni ekkewe mi wor rer pristut ar repwe awesano meinisin ewe angangen manau ese much pachenong ewe tempel me angangen uruon famini ewe mwichen pris mi napanap a wisen emweni angangan. A mutata chon ewe mwich ren meinisin fengen me met ar nipwakoch ar repwe tufich seni met ewe a pwano me nipwakoch ren emon me emon me ren ekkewe ra sokofesen non nonnomun non manauer. A pwan kawor tufich mi kapacheta ren pristut mi nipwakoch ar repwe emmweni ekkoch, pachenong minefon elter, minefon chon ei mwichefen, onuon me fopun mi mukono, me ekkewe ra niwiniti mokutukutun Mwichefen. Use tongeni awora menemenochun ai upwe pwarano ukukun meseikei ai upwe ekieki ussun napenon ekkewe wis epwe wor ren ekkewe mwichen elter non fansoun mwach. Ewe mirit, nipwakoch, ukukun, me pochokun repwe pwano me non ekkei mwich repwe esisinata ew nepoputan mi minefo me ew minefon nonnomun angangen pristut non unusen ewe Mwichefen.
Rue ier a no non mwichenapen mwichefen, uwa aporousa ew porous Elter Vaughn J. Featherstone seni ewe mwichen Fik a aporousa akkom uwa nuku mi namot epwe pwan eniwin sefan ikei.
Non 1918 Brother George Goates emon chon atake ewe a fotuki me amari suke non Lehi, Utah. A mwitir tori fansoun patapat non ena ier me a fouuno chommong me nein fetan kewe ira non ewe puun. Meren George me noun ewe itan Francis, ewe fansoun kinikin uwa a mang me weires. Ren ewe fansoun, ew semwen a chouno a eriaffou aramas. Ei aweiresin samau a efisata an noun George ewe at itan Charles me unumon noun Charles kukkun semirit—ruemon kukkun nengin me emon at ra mano. Non ewe ukukun onu chok ran, ewe mi netipechou George Goates a fori unungat sai mi imufesen ngeni Ogden, Utah, an epwe uweano ekkewe inis ngeni nenier ren ar repwe peias. Nesoponon ei aweiresin fansoun, George me Francis ra amonata war ewe woken me ra niwin sefan ngeni ewe nenien atake.
“[Won ewe an] ra pasini efoch me efoch kewe woken mi masoweni ekkewe ira ra uweano ngeni ewe nenien for mettoch ekkewe chon atake ra wisen unteng. Nupwen ra afanger fesen, emon me emon kewe chon unteng ra kapong. ‘Kapong ngonuk Uncle George,’ ‘Ewer omusano, George,’ ‘Aweiresin ena sokkun ren manon noun kewe, George,’ ‘A fokkun chommong chiechiom, George.’
“Won ewe amuchunon woken … ewe at mi tep pono won mesan itan Jasper Rolfe. A kapong ew pwapwan kapong me kokkono: ‘Ikana meinisin, Uncle George.’
“[Brother Goates] a kun ngeni Francis me apasa: ‘Ua aneanei pwe meinisin ach.’
“Nupwen ra tori arun ewe titin ewe atake, Francis a mwetetiw seni ewe watten wokenin ira mi par me a suki ewe tit nupwen [saman ewe] a traifino won ewe punun atake. [George] a weiti ngeni ekkewe oris, akouono ewe kumi, … me a nenefetan won ewe punun atake. … Ese wor mo nge efoch ira won ewe pun. Mwirin a chemeni met ewe Jasper Rolfe a koko ngeni: ‘Ikana meinisin Uncle George!’
“[George] a totiw seni ewe woken, tuketa non poun ewe puun, mi kuung a fokkun tongei, iwe murin … efoch ununen ewe ira, iwe a nengeni ren ekis fansoun ekkei esisinen an angang, ussun nge ita ese nuku met a kuna.
“Mwirin [i] a motetiw won ewe ioien ununen ira—ei mwan ewe a uweano fomon atongean non nenier ar repwe peias non chok ukukun onu ran; a fori porur, tu peias, me fen pwan aninis ren ewe ufoufen peias—ei mwan mi fokkun murinno ese tongeni epwe apwangapwang ekiekin, ese nuokus, ese mefi chech non unusen ei fansoun mi mefi weiresin ekiek—a motiw won ew ioien ununen kewe ira me a fokkun kechiw ussun emon semirit.
“Mwirin a uta, tonu mesan, … a neneta fan nang, me a apasa: “Kinisou, Semei, ren ekkewe elter seni am wart.’”
Ewer, kinisou ngeni Kot fan iten kewe mwan ren ewe pristut me ren ewe aninis ra awora non ar eteneki aramas me famini me pwan ar forata Zion.
Ewe Aewin Presetensi, ewe Mwichen ekkewe Engon me Ruemon, me ewe Presetensin ekkewe Fik ra etiwa ekkei ekesiwin non ewe tamen fansoun. Fiti wachemuken iotek, tumunochu ne kaeo ekkewe nongonongun ewe mwichen pristut mi pin, me fatafatochun pwe iei mochenin ewe Samon, sia feinno mwach fiti tipeewin meinisin non met mi pung pwan ew chok ipw non ewe maritan ewe Eniwinsefaniton ewe Kapas Allim. An ewe Samon emwen a pwano, me uwa pwapwa non, nupwen uwa apasa kapasen pwarata fan Itan, An ewe pristut, me ami kewe efeioch non ena pristut, non iten Jises Kraist, amen.