Mwichenapen Mwichefen
Non anononun netipach
April 2020 mwichenapen mwichefen
2:3

Non anononun netipach

Seni Douglas D. Holmes

A Keran wes seni wisan ren Aemonun Chon Aninis non ewe Presetensin Enuwon Unus

Ewe Samon a achocho an epwe anisikich—kich meinisin—epwe wanong ewe kapas allim non anononun netipach.

Fefinei me pwii kana, met ren amwararen ei fansoun kich sia nomw non. Ren ach sia apwapwai nepwopwutan ewe Niwinsefanito, mi och sipwe pwan apwapwai ei Niwinsefanito a fifis ewe sia pwarata usun. Ngang uwa fiti kemi me meseik me manaw non ei raan.1 Ewe Samon a sopweno me wanong non neni, ren neun ewe soufos, meinisin kewe ra tufichin repwe anisikich ach sipwe monata ach sipwe churi Ii.2

Ew me nein ekena metoch sipwe aea ina ewe minafon emwenin Semirit me Serafo. Chomong me neimi ouwa sinei nongonongun ei prokram ren forutan met sia mwochen awesi, minafon nikinikin nonomw, me Ewe mwichen Pochokunen Sarafo. Nge sisapw mwut ngenir repwe otopwutopwu ach nenien nenengeni ren foforun ewe prokram a foruta won me nongonongun: epwe anisi ngeni ewe kapas allimen Jises Kraist epwe nomw non anononun netipen noun kewe semirit me serafo.3

Ngang uwa nuku pwe ach kuna ekei fofor, kich sipwe weweiti pwe ei a nap seni ew prokram fan iten kewe memper ierir 8 ngeni 18. Kich sipwe kuna ifa usun an ewe Samon a achocho an epwe anisikich—kich meinisin—an epwe wanong ewe kapas anim non anononun netipach. Uwa iotek pwe ewe Ngun mi Fel epwe anisikich me kaeo fengen.

Chiechioch—“Epwe nomw rer”4

Ewe aewin anukun chiechi. Pwokiten ikena ekkewe kinikinin ewe Mwichefenin Jises Kraist, kich fan ekoch sia menuki namwoten chiechi non ach sai ngeni Kraist. Sisapw ekieki pwe kich chok sipwe kutta ika fetan won ewe anen pwon; Sipwe mwochen an samach me inach tong me aninis, ekoch chon famini, chiechiach, me souemwen ekewe rapwan fetan won ewe anen pwon.

Ekkei sokun chiechi epwe tam fansoun. Fansoun nonomw fengen. Otun sipwe takir, urumwot, kaeo me aninis fengen. Fansoun ach sipwe kinisou renmochenin emon me emon me osukosuk. Fansoun sipwe suuk me wenechar fengen ren ach achocho ach sipwe ochu fengen. Ekei pekin chiechi iir ew me nein kewe pwopwun sia chufengen ren famini, quorum, klasses me ewe mwicheich. Ikei pekin nongongun angangechun iamwir.5

Elter Dale G. Renlund a ngenikich ew kien awatenon ekei chiechi nupwen a apasa: “Ren ach sipwe aninisoch ngeni ekkoch sipwe kuner … usun an Samach non Nang kuner. Iwe ina chok atun sipwe tongeni weweiti ewe enetin auchean ngun. Ina chok ewe otun sipwe weweiti an Samach won Nang tong fan iten Noun kewe meinisin.”6

Kuna ekkoch usun Kot a kuner ina ew nifang. Ngang uwa tingorekich meinisin sipwe kutta ei nifang. Ren mesach ra suk ar repwe kuna,7sipwe pwan anisi ekoch repwe kuner usun mine Kot a fori.8 Preseten Henry B. Eyring a apasa: “Met epwe kon euchean in met [ekoch] ra kaeo seni [en] usun ion iir me met repwe tongeni winiti. Ai chok anapanap pwe resapw kaeo chomong seni afanafan. Iir repwe angei seni memefren en io, ion ka ekieki pwe iir, me met ka ekieki pwe repwe winiti.”9 Anisi ekoch repwe weweiti nonomwechur me ar pwopwun ina ew me nein kewe nifang sia tongeni ngenir. 10 Ach kuna ekoch me manawach usun an Kot kunakich a asarama manawch “chufengen non tipew me non tong.”11

Fiti ekewe-napwonon pochokunen sokun namanam ra efikich, sipwe mwochen ewe pochokun a feito seni tongen chiechi. Iwe ren ach sia ekieki sokun urumwot, mwich, me ekoch pekin chufengen, sipwe chechemeni ekkewe pwopwun me euchean ekkei chufengen an epwe amarata sokun chiechi kewe ra ochufengenikich me aninis me wanong ewe kapas animen Jises Kraist non anononun netipach.12

Pwarata, Pwungun finata, me Aier—”Ochufengenir ngeni Nang”13

Ewer, ese naf ach sipwe chok chuchu fengen Mei chomong sokun mwicheich me mwichen okot ekkewe ra awora tipew non sokun pwopwun. Nge ewe tipew sia kutta ren ach sipwe winiti emon non Kraist, ach sipwe ochu manawach ngeni.14 Ren ach sipwe ochu manawach ngeni nang, epwe wor ach sinei ren ngun, usun Elter Andersen achok keran pworous ngenikich usun. 15 Ekkena sine ra feito nupwen ewe Ngun mi Fel a uwei ewe kapas me tongen Kot ngeni ach ekiek me netipach.16

Ei pwarata a feito ngeni kich non kewe pukfel, akaewin ewep Puken Mormon; non kewe kapasen emwen seni ewe soufos mi manaw me ekoch chon kaeo mi nukuchar; me non ewe kukun mengungu.17 Ekei kapas ra nap seni kewe maken won peich, mengungu non seningach, ekiek non tupuach, ika memef non netipach. Ewe kapasen Kot ew pochokunen ngun mi pin.18 Mi enet me saram.19 Ina usun ach rongorong ngeni I! A pwopwutani me awateno ach nuku non Kraist me anonow non kich ew mwochen ach sipwe winiti usun ewe chon Amanaw, ina ren ach sipwe aier me fetan won ewe anen pwon.20

Non ewe April ano, Preseten Russell M. Nelson a anisikich ach sipwe weweiti pwopwun aier non ei sai mi pwano. 21 A apasa: “Nupwen sia finata sipwe aier, sia finata sipwe siwin! Sia mut ngeni ewe Chon Amanau an epwe ekkesiwinikich ngeni napanapochun manawach. Sia finata ach sipwe winiti usun Jises Kraist!”22 Ei foforun ekesiwin, a masow seni ewe kapasen Kot, ren ifa usun ach chufengen ngeni nang.

Asisinano an Preseten Nelson ewe tungor ach sipwe aier ina ewe anukun pwungun finata. Sipwe fenfinata aier fan asengesich. Ewe kapas anim ese tongeni aweiresanong non netipach. Elter Renlund a apasa, “An Samach non Nang mochen non wisen in me sam esapw ren neun kewe repwe forimet mi pwung; ren an epwe ngeni neun kewe repwe finataar repwe fori met mi pwung.”23

Non ewe prokram a ekesiwin ngeni ewe prokramun Semirit me Serafo, rafen nuseni 500 sokun fofor sipwe awesi ren ach sipwe angei chomong nifang.24 Ikenai, mi wor ew mi euchea. Iei ew tungor ach sipwefinataach sipwe usun ewe chon Amanaw. Sia fori ei ren ach angei ewe kapasen Kot non ewe Ngun mi Fel me an mut ngeni Kraist epwe ekesiwinikich ngeni echun manawach.

Iei a nap seni ew pekin kaeon pekin finata met sipwe awesi ika echunon-manawach. Iei ew fofor ach sipwe chufengen me nang ren ach pwarata, pwisin finata, me aier—ach sipwe feito ngeni Kraist me angei an ewe kapas allim non anononun netipach.

Tipeew ngeni me Afangama—“Mwut ngenir repwe emwen”25

Saingonon, sipwe angei ewe kapas allimen Jises Kraist ngeni non anononun netipach, sipwe tipew ngeni—ach sipwe fangono ach fansoun me sine ngeni, ach sipwe afangema fan itan.26 Kich meinisin sia mwochen manaweni ew manaw mi namwot, me iei ei mi ennet ngeni ekkei tapin aramas ra mamarita. Ra mwochen ew pwopwun.

Ewe kapas allimen Jises Kraist ina ew watten pwopwun non fonufan. Preseten Ezra Taft Benson a apasa: “Sia angei ach angang seni Kot pwe sipwe uwei ewe kapas allim ngeni unusen fonufan. Ina ewe pwopwun epwe tongeni ochufengenikich ikenai. Ewe chok kapas allim epwe epeti fonufan seni ekewe ngawen pwisin-tatakis. Ewe chok kapas allim epwe ochu mwan [me fefin] ren sokopaten sokun aramas me kinikinin fonu non kinamwe. Ewe chok kapas allim epwe wato meseik, pwapwa, me manaw ese mwuch ngeni faminien aramas.”27

Elter David A. Bednar a apasa, “Ren ach apochokuna ekewe serafo ren ach tungorer me mwut ngenir repwe anganga, ewe Mwichefen epwe sopwosopwono non echipwerun chomongun wewe.”28 Napengeni sise tungor me mwut ngeni ekkewe sarafo repwe afangama ren ei watten pwopwun non Kraist. Elter Neal A. Maxwell a nengeni, “Ika [nouch] sarafo rese kokono [seni an Kot angang] repwe fokun kokono ren fonufan.”29

Ewe minfon prokram Semirit me Serafo a eteneki apochokunen ekkewe sarafo. Ra pwisin finata met kewe repwe awesi. Quorum me presetenin kewe klass ra nomw non pwisin wiser. Neun ewe wart souemwenin sarafo, usun chok kewe souemwenin ewe wart, re ekipwichi ewe angangen manaw ese mwuch me manaw fefeita.30 Me quorums me kewe klass repwe pwopwuta aar mwich ren aar pworous usun repwe fori ewe angangen Kot afen ngenir.31

Preseten Nelson a apasa ngeni kewe sarafon Mwichefen: “Ika ka finata kopwe, ika en mi mwochen … en kopwe tongeni ew watten kinikinin ew watten metoch, metoch mi wachemwuk, metoch mi ningech! … En me nein kewe mi unusoch ewe Samon a keran tinato ngeni ei fonufan. Mi wor remw ewe tufich omw kopwe tipachem me epwe wor omw fofor ngeni fonufan nap seni ekewe tapin aramas memwan!”32 Non pwan ew fansoun, Preseten Nelson a apasa ngeni kewe sarafo: “Ngang mi unusen nuku kemi.” Ngang mi tongei kemi usun chok ewe Samon. Kich neun aramas, nomw fengen non an angang mi pin.”33 Ekewe kukun aramas, en mei tongeni mefi ewe nuku a wor ren Preseten Nelson fan itemi me ifa namwotom non ei angang?

In me Sam pwan sou emwen watte, Uwa tungorei kemi ami oupwe nengeni kewe sarafo usun chok Preseten Nelson. Ren an kewe sarafo ra mefi om tong me nukunuk, ren omw ka apochokuner me aitir ar repwe emwen—me ka kinesenir—repwe eingok fiti ar aninis, tongeni, me mwochen ngeni ewe kapas allim.34 Repwe mefi ewe pwapwan ar finata ar repwe fiti me fangeno fan iten ei watten pwopwun Kraist. Ewe kapas allim epwe tori anononun netiper, me ewe angang epwe sopwosopwono non sokun ningechun.

Pwon me Kapasen Pwarata

Uwa pwon, ren ach sia fori ekei anukun—chiechi, pwarata, pwungun finata, me fangeno—ewe kapas animen Jises Kraist epwe akokakono non anononun netipach meinisin. Sipwe kuna ewe Niwinsefanito epwe sopwosopwono tori ewe pwopwunapan, Israel epwe pwano me fisinon Zion, 35 ikewe Kraist epwe nemenemen kingen king.

Uwa pwarata pwe Kot a sopweno me fori mettoch meinisin an epwe amonata noun aramas ren ena raan. Amwo sia kuna peun non ei angang mi ningech nupwen sia achocho ne feito ren Kraist, me unusoch non ii.”36 Non iten Jises Kraist, amen.

Esinesin

  1. Nengeni Doctrine and Covenants 45:12. Preseten Nelson a apasa: “Kopwe chok ekieki usun ekewe amwarar me mwitirin meinisin: soufos meinisin rafen pwopwuta ren Adam ra kuna ranich ei.” Me meinisin soufos rafen kapas usun ranich ei, nupwen Irael epwe tongeni chufengen me fonufan epwe monota ngeni ewe Oruwen Waroto an ewe chon Amanaw. Ekieki ussun! Seni meinisin ekewe aramas rese mwo nonomw won ei fonufan, kich ekewe sipwe fiti ewe saingon, watten angangen ochufengeni. Ifa me amwararan!” (“Hope of Israel” [worldwide youth devotional, June 3, 2018], HopeofIsrael.ChurchofJesusChrist.org).

    Elter Jeffrey R. Holland a aitikich:

    “Met ren amwararen ei fansoun sia nomw non!

    “Ewe kapas animen Jises Kraist in ew mi nukunuk, mi tumun, mi nongonong, me ewe euchean nifangen enet won fonufan me non nang, non fansoun me esemwuch. Ese wor—esapw och metoch, esapw emon, esapw ekoch fofor—epwe epeti ei Mwichefen seni an pwuung me kuna nonomwun a pwano seni memwen ewe nongonongun seni fonufan. Ese wor ach sipwe nuokus ika pireir ren mwach kan.

    “Ese usun ekoch fansoun memwach, ei fansoun esapw kuna ew nenien mano; esapw kuna peutunon ewe kien pristut; esapw eriafou ewe emwuchunon ewe pwarata seni mengungun ewe Kot mi nap.” Met ren ei raan kich mi nomw non!

    “… Ika kese mwo apareni, ngang uw men apinukun usun kewe saingon raan.” Nuku. Utaa. Kopwe nukuchar. Me fori euchean ei raan mi unusech kich mi nomw non!” (Facebook post, May 27, 2015; pwan nengeni “Be Not Afraid, Only Believe” [address to Church Educational System Religious Educators, Feb. 6, 2015], broadcasts.lds.org).

  2. Nengeni John 1:12.

  3. Ekis fansoun mwirin am akekengeni ewe Presetensin Enuwon unus, Preseten Henry B. Eyring a awewei ngeni kich ewe sokun osukosuk me ew sokun kewe sarafo non ewe Mwichefen ra kuna ikanai. A aitingenikich sipwe ekieki usun ekewe metoch epwe anisi ewe kapas allimen Jises Kraist ngeni anononun netipach. Ena kait a fen asarama ngeni kem ren Presetensin Mwichen Enuwon unus.

  4. Nengeni “Kopwe nomw rer,” ChurchofJesusChrist.org/callings/aaronic-priesthood-quorums/my-calling/leader-instruction/be-with-them.”

  5. Nengeni Mosaia 18:25; Moronai 6:5.

  6. Dale G. Renlund, “Through God’s Eyes,” Liahona, Nov. 2015, 94; pwan nengeni Moses 1:4–6.

    Preseten Thomas S. Monson a aitikich: “Mi wor wisach ach sipwe kuna ren esapw ren iir nge ren met repwe winiti. Upwe tungor ngeni kemi oupwe ekieki usun iir non ei wewe” (“Nengeni ekoch usun met repwe winiti,” Liahona, Nov. 2012, 70).

    Elter Neal A. Maxwell a aitikich: “Napengeni, nonomwun emon sarafo ngeni ese-namwot ngeni nonomwun Mwichefen, ika an kewe kapas eis mi pochokun, ika an ese nukunuk a mwitir me angawa itan. Pwungune ekewe repwe towaw me, fan ekoch, rese chiwen chuu. Tong enet ese sani makan!“Epwe nomw non ewe fefeitan tapin aramas,” Ensign, Apr. 1985, 9).

  7. Nengeni 2 Kings 6:17.

  8. Stephen L. Richards, nupwen an emon memper non ewe Aewin Presetensi, a apasa: “The highest type of discernment is that which perceives in others and uncovers for them their better natures, the good inherent within them” (in Conference Report, Apr. 1950, 162; in David A. Bednar, “Quick to Observe,” Ensign, Dec. 2006, 35; Liahona, Dec. 2006, 19). Pwan nengeni 2 Kings 6:17.

  9. Henry B. Eyring, “Teaching Is a Moral Act” (address at Brigham Young University, Aug. 27, 1991), 3, speeches.byu.edu; emphasis added; see also Henry B. Eyring, “Help Them Aim High,” Liahona, Nov. 2012, 60–67.

  10. Nengeni Moses 1:3-6.

  11. Mosaia 18:21; pwan nengeni Moses 7:18.

  12. “Enuwon ewe a wor, chiechioch ngeni chon mi pechekun [Aramas mi Pin non Fansoun Soponon] famini, chiechiach, me souemwen, ewe a anisir ne amarano nefiner ngeni Samach won Nang,ikenair ekkewe rakon pochokun. Tichikin tetenin prokram—usun ren masowen non Raninfel, an [Enuwen] prokram mi fifis, an emon me emon tufichin awesi mettoch. … repwe ekis mefi ekis pochokunen ekkei sokkun chiechifengen. … Ewe euchean kapas eis esapw ifa usun tichikin ei prokram me masowan ra fisino, nge ifa usun ar anisi chiechi epwe apochokuna kewe nikinikin namanam” [Aramas mi pin non Fansoun-Soponon] enuwen (kopwe nomw rer,” ChurchofJesusChrist.org/callings/aaronic-priesthood-quorums/my-calling/leader-instruction/be-with-them).

  13. Nengeni “Ochufengenir me Nang,” ChurchofJesusChrist.org/callings/aaronic-priesthood-quorums/my-calling/leader-instruction/connect-them-with-heaven.

  14. Nengeni John 15:1–5; 17:11; Philippians 4:13; 1 John 2:6; Jacob 1:7; Omni 1:26; Moroni 10:32.

  15. Ekewe Pukfel ra uur ren awewen ei; ikei chok ruu: 1 Nifai 2:16; Enos 1:1–4.

  16. Nengeni Luke 24:32; 2 Nifai 33:1–2; Jacob 3:2; Moroni 8:26; Doctrine and Covenants 8:2–3.

  17. Nengeni 2 Timothy 3:15–16; Doctrine and Covenants 68:3–4; 88:66; 113:10.

  18. Nengeni 1 Thessalonians 1:5; Alma 26:13; 31:5; Helaman 3:29; 5:17; Doctrine and Covenants 21:4–6; 42:61; 43:8–10; 50:17–22; 68:4.

  19. Nengeni John 6:63; 17:17; Alma 5:7; Doctrine and Covenants 84:43–45; 88:66; 93:36.

  20. Nengeni John 15:3; 1 Peter 1:23; Mosaia 1:5; Alma 5:7, 11–13; 32:28, 41–42; 36:26; 62:45; Ilaman 14:13.

  21. Nengeni 2 Nifai 31:19–21; 32:3, 5.

  22. Russell M. Nelson, “We Can Do Better and Be Better,” Liahona, May 2019, 67.

  23. Dale G. Renlund, “Kopwe Finata Non ei Raan,” Liahona, Nov. 2018, 104.

  24. Ekei kinikin a pachenong prokramun Scout, ewe iwe chok mei kinikinin urumwotun Mwichefen an kewe aat me enuwon, akaewin non United States me Canada. Non kewe neni rese fori pekin Scout, ukukun met repwe fori a nap seni 200. Pwan kapach, ekewe chomong sokun prokram fan iten aat, nengin, kukun aat, kukun nengin kewe ra sokono kokotur, ra efisi osukosuken kei pekin kaeo ngeni famini.

  25. Nengeni “Mwut ngenir repwe emwen” ChurchofJesusChrist.org/callings/aaronic-priesthood-quorums/my-calling/leader-instruction/let-them-lead.

  26. Nengeni Omni 1:26; 3 Nifai 9:20; 12:19; Doctrine and Covenants 64:34. “Ew namanam ewe ese namwot an epwe peutano metoch meinisin ese wokor ar pechekun an epwe pwopwutani ewe nuku mi namwot ngeni manaw me manaw ese much” (Lectures on Faith [1985], 69).

  27. Ezra Taft Benson, The Teachings of Ezra Taft Benson (1988), 167; in Preach My Gospel: A Guide to Missionary Service (2019), 13; see also Russell M. Nelson, “Hope of Israel,” HopeofIsrael.ChurchofJesusChrist.org.

  28. Mwich fiti Elter David A. Bednar; pwan nengeni “2020 Tempel me Uruwon Famini Eteten an Souemwen,” Feb. 27, 2020, ChurchofJesusChrist.org/family-history.

  29. Neal A. Maxwell, “Ngeni Nonomun Tapin Aramas,” 11. Elter Maxwell a sopwosopwono: “Ren angangan, fitemon sounkowa me sensen quorum presetensi a fisita ren akokon ekoch repwe iotek ika pasini ewe sakramen?” Pwii kena, ekei ngun mi unusen euchea, me ra tongeni fori metoch mi echipwer ika ra mwut ngenir!”

  30. Nengeni General Handbook: Serving in The Church of Jesus Christ of Latter-day Saints, 2.2, ChurchofJesusChrist.org.

  31. Ekoch pisek a wor non ewe nenien puken kapas allim epwe anisi emwenin kewe sarafo, a pachenong “pisekin Quorum me klass presetensi,” “Aea Feito, Tapweto Mwiri—Ren Mwichen Aaronik Pristut me Klassin Ekkewe Fopuun,” me non pisekin aninisin ekkewe fopuun me mwichen Aaronik Pristut “Wis non Wart.”

  32. Russell M. Nelson, “Hope of Israel,” HopeofIsrael.ChurchofJesusChrist.org. Nupwen ena mwichen afanafan, Preseten Nelson a apasa: “Semach non Nang afen angang ngeni chomong nein kewe ngun—ren ena, upwe pwan apasa, An ewe tiim—ren ei saingon kinikin.” Ekena ngun mi tipetekison—ekena chon urumwot mi sinenap, ekena mi win—en emon!”

  33. Russell M. Nelson, afanafanen nepwopwutan non “Semirit me Serafo: Ew mwich ngeni Elter Gerrit W. Gong,” Nov. 17, 2019, broadcasts.ChurchofJesusChrist.org.

  34. Preseten Nelson a apasa: “Sia mwochen mwut ngeni kewe kukun aramas repwe emwen, akaewin ekewe rafen keke me angei epinipinin wiser ar repwe angang non kewe klass me quorum presentensi. Souemwenin Pristut repwe angang ngenir. Repwe kaeo ifa usun ar repwe angei omw mwochen ar repwe emweni ar kewe klass ika quorum” (in “Children and Youth Introductory Video Presentation,” Sept. 29, 2019, ChurchofJesusChrist.org).

    Elter Quentin L. Cook a apasa, “Nouch sarafo rafen tungor ar repwe tumunoch non ar chiwen kukun—nap seni an in me sam me nouwis repwe angei seni met kewe sarafo repwe tongeni fori won winikaper” (“Adjustments to Strengthen Youth,” Liahona, Nov. 2019, 40).

  35. Preseten George Q. Cannon a aitikich: “Kot a aimwueno ngunupin fan iten ei fansoun ren kewe a wor ar mwochen me finata ar repwe kun ngeni ei fonufan, me meinisin kewe pechekunen ewe emon mingaw, pwano me ese pwano, an epwe angei ewe kapas anim me anomwu ewe enet me forata me euweta ewe Nionun Kot fan iten ach ewe Kot ese nuwokusiti kewe pwungun. Ii a fen tinato ekei ngun non ei tapin aramas an epwe fori nongonongun Zion an esapw peutun, me epwe uta me wateno ewe epwe enet, me epwe asamwonu Kot, me asamwonu an nemenem, me rongorong ngeni non sokopaten nikinik” (“Remarks,” Deseret News, May 31, 1866, 203); pwan nengeni Teachings of Presidents of the Church: Joseph Smith (2007), 186.

  36. Moronai 10:32.