Mwareiti Kot me Konun Mwareiti—Ewe Jises Kraist mi Manau: Ewe Auchean popun Niwinsefanito me Paska
Atun ei fansoun mwareiti Kot me konun mwareiti, konu alleluia—pokiten I epwe nemenem feinfeino me esap wor ne muchun!
Pwii me mogeei achengicheng non unusen fonufan: fiti hosanna me alleluia, sia fori pwapwan ewe Jises Kraist mi manau non ei fansoun soposoponon ewe niwinsefanito me Paska. Ren unusochun tong, ach Chon Amanau a pwon ngeni kich: “Non ngang epwe wor ami kinamwe. Fonufan epwe eriaffou kemi. Nge oupwe chok epinukunuk! Ua fen okkufatiw fonufan.”1
Ekkoch ier ra no, nupwen ngang me Sister Gong aua churi ew mwirinon famini, nour we kukkun nengin Ivy a wau pworun noun violin non an saw. A wau ewe wokun ettikin violin, emmeiano me onei. Mwirin a wanong sefani ewe wokun ettik non ewe pwor, a poretiw mwem, me a mwotiw. Emon minafon chon ettik, a chok pwar ngenikem meinisin met a sinei usun ewe violin. Iei, ekkoch ier mwirin, Ivy a fokkun acheoch ne etticki ewe Violin.
Non ei fansoun ach manau me fonufan, kich meinisin sia ekis usun Ivy me noun we violin. Sia poputa me nepoputan. Ren kaeo me nikitu, sia marita me ochuno. Ren fetanin fansoun, ochun pungun finata me nonnomuch won fonufan a anisikich ne winiti usun ach Chon Amanau nupwen sia angang ren non An atake2me tapweno mwirin An aan mi pwon.
Achechem, mi pachenong ei achemen ruepuku ier, ra pwar ngenikich tettenin ei niwinsefanito.3 Non ach fori pwapwan ewe saposoponon Niwinsefaniton ewe kapas allimen Jises Kraist, sia pwan mwonneta ngeni Paska. Non ir me ru, sia pwapwa non ewe wareton Jises Kraist. Mi manau—esap chok me nom, nge iei; esap chok fan iten ekkoch, nge fan iten meinisin. A fen war me feito an epwe echikara ekkewe mi netipengaw, angasa ekkewe mi fotek, anenenoi ekkewe mi chun repwe kuna sefanir, me angasa ekkewe mi riaffou4 Ina emon me emon kich. An pwonen angasa mi fich ngeni, ese nifinifin nonnomuch me nom ikenai, ika ekieki nonomuch non fansoun mwach.
Nesor ewe ranin apwapwan an Jises a tonong non Jerusalem. Non pekin oruni, panen ira ra esisinata mi pin ne pwarano pwapwa non ewe Samon, ussun non osufonun me apwapwan an Jises a tori Jerusalem, ikewe “chommong … ra poku kewe panen ira, me ra feinno pwe repwe churi i”5 (Meni kopwene mochen kuna ewe wesewesen chungan ei Harry Anderson a itiwetiw non an Preseten Russell M. Nelson ewe ofes, nukunupen chok an ewe chepen) Non ewe puken Pwarata, ekkewe ra mwareiti Kot me ewe Nam ra fori ren ar “ufouf mangaku mi pwechepwech o ra kokkomwoch ekkewe panen ira non pour.”6 Pwan fiti “ufoufen wenechar” me “mwaramwar mi ning,” panen ira ra pachenong non ewe iotekin epinipinin ewe Kirtland Tempel.7
Ennetin, ewe auchean apwapwan ewe fansoun Jises a tori Jerusalem a nununo chommongun kewe aramas repwe etiwa Jises fiti panen ira. Non ewe ranin apwapwan an Jises ewe a tonong Jerusalem non napanapen ekkewe mi tupwon ra esinna pwe ewe oesini a ponueta. Usun Zachariah8 me ewe chon makkei Konupin ra osini, ach Samon a tonong non Jerusalem epwe wawa emon tongki nupwen ewe mwichen aramas ra puchor, “Mwareiti Kot mi tekia.”9 Hosanna wewe “amanawa iei.”10 Iwe, usun iei, sia pwapwa, “Feioch ngeni I ewe a feito non iten ewe Samon.”11
Ew wiik mwrin ewe ranin apwapwan an Jises ewe a tonong non Jerusalem ina ewe Raninifen ranin Jises a manawesefan. Preseten Russell M. Nelson a aitikich pwe Jises Kriast “a feito epwe moni ew niwinimang esap an, pokiten a wor ach niwinimang sise tongeni moni.”12 Ennetin, seni ewe Achasefan an Kraist, noun Kot meinisin “repwe kuna manau, ren ar aneasochisi ekkewe annuk me angangepin ren ewe Kapas allim.”13 Fansoun Paska, sia konu konun mwareiti. Allelua wewen “konun mwareiti ewe Samon Siowa.”14 Ewe “Kores Hallelujah“ non an Handel ewe kon Messaia mi ew esinesin mi auchea ren Paska pwe I “Kingen king, me Samonun samon.”15
Ekkewe mettoch mi pin a fis nefinen ewe Ranin apwapwan an Jises ewe a tonong non Jerusalem me Raninfen ewe Ranin Manausefanita ikkena wewen hosanna me alleluia. Mwareiti Kot ina ach tingor ngeni Kot an epwe angasa kich. Konun mwareiti a pwarano ach mwareiti ewe Samon ren ewe apinukunukun amanau me feifeita. Non ach mwareiti Kot me konun mwareiti sia esinna ewe Jises Kraist mi manau pwe I ewe auchean popun Easter me niwinsefanito non ranin soponon.
Ewe Niwinsefanito non fansoun soponon a poputa ren an Kot pwato—ewe ennetin pwaton Kot ewe Sam me Noun we At, Jises Kraist, ngeni ewe kukkun soufos Joseph Smith. Ewe Soufos Joseph a apasa, “Ika en mi tongeni nenenong non nang non nimu minich, epwe watte om sinenap seni ren om anneani mettoch meinisin mi mak won ena itenap.”16 Pokiten ekkewe nang ra suk sefan, sia sinei me “nuku non Kot, ewe Sam Esemuch, me Noun We, Jises Kraist, me ewe Ngun mi Fel”17ewe unumon non Kot.
Non Raninfen ranin Manausefan, April 3, 1836, non ekkewe aewin ierin ewe Niwinsefanito, ewe Jises Kraist mi manau a pwato nupwen ewe Kirtland Tempel a epinipinino. Ekkewe ra kuna I ikeweia ra pwarata usun I pwe mi weweoch ngeni sokofesenin ekkei me konik: “Mesan ra usun ew ngetengetin ekkei; meten won mokuran a pwechepwech usun ewe snow mi nimenimoch; won mesan a saram nap seni saramen ewe akkar; me neuwan a usun neuwen ewe pupun watten konik, pwan mwo neuwen Siowa.”18
Non ena fansoun, ach Chon Amanau a apasa, “Ngang ewe akkom me we amuchunon; Ngang ewe mi manau, Ngang ewe a ninnino; Ngang noumi chon peni ren ewe Sam.”19 Eniwinisefani, weweoch mi sokofesen—nepoputan me nesoponon, manau me ninnino. I Nepoputan me Nesoponon, ewe nepoputan me ewe nesoponon,20ewe popun me ewe chon ounusa ach nuku.21
Mwirin pwanton Jises Kraist, Moses, Elias, me Elijah ra pwan feito. Seni emwenien nang, ekkewe murinon soufosun nom ra aniwini kiien pristut me mumuta. Iwe, “ekkewe kiien ei kinikinin fansoun ra kawor”22non An Mwichefen mi niwinsefan an epwe efeiochu noun Kot semirit.
Feiton Elijah non ewe Kirtland Tempel a pwan apwonueta an Malachi osini me non Testamenun Noom pwe Elijah epwe niwin “me mwen ewe wareton ran mi napanap me onuokus ranin ewe Samon.”23 An epwe fis, an Elijah pwato a sereni, ngo esap ren serengeni, an chon Jew fansoun Passover, minne ar oreni ne esuku an Elijah niwin sefan.
Chommong faminien Jew mi nukuchar ra awora ew neni fan iten Elijah ren ar chepenin Passover. Chommong ra aurano ew kap ar repwe wasonachu me etiwa I. Me ekkoch, fansoun ewe Passover Seder, ra tinano emon semirit ngeni ewe asam, fan ekkoch mi ekis suk, ar repwe kuna ika Elijah mi nom nukun an witiwit epwe ketiwenong.24
Non pwonutan osini me pekin ewe pwonen niwinsefaniton mettoch meinisin,25 Elijah a feito usun mi pwonei, atun Paska me poputan Passover. A wato ewe mumutan ririfengen an epwe rifengeni famini won fonufan me non nang. Usun Moronai a aiti ewe Soufos Joseph Smith, Elijah “epwe fotuki non netipen ekkewe semirit ekkewe pwon ra for ngeni ekkewe sam, me netipen ekkewe semirit repwe kun ngeni semer kewe. Ika esap ina,” Moronai a sopweno, “pwe unusen ewe fonufan epwe tano atun an [ewe Samon] epwe wareto.”26 Ewe ngunun Elijah, a pwano me ren ewe Ngun mi Fel, a amara kich ngeni ach tappin aramas—akkom, iei, fansoun mwach—non ach tettenin neuo, uruo, me angangen tempel.
Sipwe pwan mwitir achema met wewen Passover. Passover a chechemeni ewe ngaseno an semiriten Israel seni 400 ierin fotek. Ewe puken Exodus a awewei ifa usun ei ngaseno a fis mwirin eriaffou ren kairu, tengu,nong, manon kou, mach, kinas, asapwanin foun ice me ekkei, nifichifichimas, me manuunuun rochopwak. Ewe amuchunon eriaffou epwe manon ekkewe mwannichi non ewe fonu, nge esap non imwen Israel ika—ika chon ena imw repwe tonata chaan ewe aemonun nam mi unusoch won auchamwen asamer kewe.27
Ewe chon nangin mano a no seni ekkewe imw mi esisin ren ewe esisinen chaan ewe nam.28 Ena feinno seni, ika mwet seni, a awewei Jises Kraist an akkufu mano. Ewer, ewe chaan affor an ewe Namen Kot epwe ngeni nouch we Chon Masen siip mi Murino an manaman ne ionfengeni Noun aramas ekis meinisin me nonnomur ngeni An mwich mi tumun ekkewe mi manau me mi mano.
Ren auchean, ewe Puken Mormon a awewei ewe “manaman me manausefanin Kraist”29—ewe auchean Paska”—mi wewe ngeni ru niwinsefanito.
Aewin, manausefan mi pachenong niwinsefaniton inis ngeni “wesewesen me unusochun napanaper”29pau me peche me nekafon chuu,” “pwan mwo emet meeten ewe mokur esap turuno.”30 Ei pwon a awora apinukunuk ngeni ekkewe a turusenir pour me pecher, ekkewe rese chiwen tufichin kuna, rong, ika fetan, ekkewe mi mano ren semwen, semwenin ekiek, ika ekkewe inisir ese unusoch. A kutta kich. A fori sipwe unus.
Ew aruwen pwonen Paska me an ach Samon Achasefan ina non pekin ngun “mettoch meinisin repwe niwin ngeni wesewesen tettenir.”31 Ei niwinsefaniton ngun, a pwarano ach angang me mochen. Ina ewe feioch mwirin ewe foffor,32 a eniwini “met minne mi och,” “wenechar,” “pung,”me,”umoumoch.”33 Ina popun an ewe soufos Alma aea ewe kapas niwinsefaniton 22fansoun34nupwen a pesei kich ach sipwe “aninis non pung, kapung non wenechar, me soposopono ne fori mi och.”35
Pokiten “Kot pwisin a achasefani tipisin ewe fonufan,”36an ewe Samon we Achasefan esap chok tongeni ounusa met akkomwan, nge met epwe fis. Pokiten I mi sinei ach metek, riaffou, semwen, ach sokopatun sossot,37I mi tongeni, ren umoumoch, anisi kich anongonong won ach apwangapwang.38 Pokiten Kot “mi unusoch, emon Kot mi pung, me emon Kot mi pwan unusen umoumoch,” ewe kokkoten umoumoch mi tongeni “amenemenochu ekkewe mochenin pungoch.”39 Sia aier me fori mettoch meinisin sia tongeni. A rokopwannikicheno feinfeinochok “non poun an tong.”40
Ikenai sia fori apwapwan niwinsefanito me manausefan. Remi, ua pwapwa non ewe soposoponon Niwinsefaniton ewe unusochun ewe kapas allimen Jises Kraist. Ussun a poputa ruepuku ier a no non ei fansoun a pich chon ira, saram me pwarata ra soposopono ne feito seni noun ewe Samon soufos mi manau me An Mwichefen a eiteit non Itan—Ewe Mwichefenin Jises Kraist ren Aramas mi Pin non Fansoun Soponon—me seni ach pwisin pwarata me ourour seni ewe niffangen nang ewe Ngun mi Fel.
Remi, non ei fansoun Pa, ua pwarata usun Kot, Samach Esemuch, me Noun Achengicheng, ewe Jises Kraist mi manau. Aramas ra irapengesino non riaffou me mwirin a manausefanita. Nge ewe chok Jises Kraist mi manau non inisin mi manausefan mi unusoch mi chiwen uwei ekkewe esisinen irapengesino non Poun, pechen, me nepekin. I chok a tongeni apasa, Ua fen fanok me non kumuchun pei.41 I chok a tongeni apasa: Ngang ewe a kekita. Ngang ewe Jises ewe a irapengesino. Ngang ewe Noun Kot.”42
Ussun kukkun Ivy me noun ewe violin, kich mi chok nom non ekkoch nikinikin nepoputan. Ennetin, “Mas ese mo kuna, ika sening ese mo rongorong, esap ew me neir a fen tonong non netipen aramas, ekkewe mettoch minne Kot a fen amonata fan iter kewe ra tongei I.”43 Non ekkei fansoun, sia kaeo chommong usun an Kot umoumoch me ach tufich seni nang pun an Kot tong a mar non kich nupwen sia kutta I me anisi ekkoch. Non minafo napanap me neni, sia tongeni fori me winiti, tetenin kapas won tetenin kapas, kirekiroch won kirekiroch, emon me emon me kich fengen.
Pwii me me mongeei achengichen ekis meinisin, nupwen ua chu me keao fengen, ami nuku me kirekiroch ra auraeino ren ew memefin apwapwan kapas allim me kinisou. Ami kapasen pwarata me fefetan non ewe kapas allim a apochokuna ai kapasen pwarata me ai fetan non ewe kapas allim. Ami aurek me pwapwa, ami tong fan iten ewe imwen Kot me mwichen Souneng, me ami weweiti usun niwinsefaniton ennet me saram a anapano ai unusochun kapas allim mi niwinsefan, ren ewe Jises Kraist mi manau I a auchean popun. Kich fengen sia apinukunuk, “non kuchu me tinen akkar, Samon, nonnom rei.”44 Non chufengen sia sinei, pokiten chou me tumun, sia tongeni anneani ach feioch.45 Non tichikin iteiten ran me mettoch mi kukkun me mecheres, sia tongeni kuna mettoch mi nap epwe fis non manauach.46
“Iwe ewe fansoun epwe feito pwe ekkewe mi tupwon repwe kochufengen seni muu meinisin, me repwe feito Zion, repwe konu konun pwapwa esemcuh.”47 Atun ei fansoun mwareiti Kot me konun mwareiti, konu alleluia—pokiten I epwe nemenem feinfeino me esap much! Puchor ngeni Kot, mwareiti Kot me ewe Nam! Non iten Jises Kraist mi monomon me pin, amen.