Ekkewe Im Mi Murinno
Ewe Chon Amanau inai ewe a fokkun unusoch an sinenap non pekin napanapen, forutan, me napanapen eningen non imw. An ewe kokotun angang ewe ounusochun ewe pwapwan ngunuch feinfeino.
Ekis fansoun a no me non Salt Lake City ua kuna ew pap watte. A aporousa ussun ew kompeni a fori non imw me pisekin non imw. A chok apasa, “Anganga ekkewe Imw Mi Murinno non Salt Lake City.”
Ewe porous a ngeniei ai upwe chok ekieki—met ei “imw mi murinno”? Uwa kuna pwe uwa ekieki ussun ena kapas eis, akaewin fan iten ekkewe semirit punuwei ewe, Kathy, me ngang am ouwa amarireta me ekkewe semirit repwe amarireta ikenai. Ussun sam me in ekis meinisi, sia ekieki me ioteki ach famini. Sipwe fori. Sia fokkun mochen met mi murinno fan iter. Ifa ussun ir me nour ewe semirit repwe nom non ekkew im mi murinno? Ua chemensefani imwen chon ei Mwichefen kewe Kathy me ngang am ouwa kan no churir. Sia fen pin chuchuno non imw non Korea me Kenya, non Philippines me Peru, non Laos me Latvia. Mut ngeniei upwe aporousa ruanu ussun angangen nenengeni ussun imw mi murinno.
Aewin, seni an ewe Samon napanapen forata ekewe murinon imw mettoch meinisin a fis ren pusin nonomun ekkewe aramas ra nom ikewe. Ekkei imw rese foruta non murinon me auchean ika nomotamen masowen non ika seni murinon nonnomun ekkewe aramas minne imwer kewe. Ewe murinon napanapen ew imw ina ewe ununun Kraist a pwano non ekewe imw non ewe neni. Met mi auchea ewe napanapen foforun ngunun ekkewe aramas ra nom ikewe, nge esap napanapen koutan ewe imw.
Ewe mettoch Kraist a fori ra wor non “fansoun me fansoun”1 ren chounon ngeni meinisin fiti ewe an mi pwon. Ekkewe angangen Kraist ra eningeochu manauen ekkewe ra achocho ne manaueni manau murinno. Ra amasowa ekkewe imw ngeni saramen ewe kapas annim, ika mo non ewe imw mi pwakak ika rume simenin. Ika mwo en chok non ewe imw ka finata pwe kopwe “kukuta ekkei mettoch,”2 ka tongeni awora ngeni chon om ewe famini non imwemi ewe ekkei mettoch non pekin ngun.
Sia apiru an ewe Samon kapasen aurour ach sipwe “forochu [inisich]; amonata metoch meinisin mi namot; me forata ew imw” ren anapanapa, amonata, me forata manauach non pekin ngun, esap imwach me fonuach. Nupwen sipwe nikitu ne tapweno non an ewe Chon Amanau ewe an mi pwon, imwach ewe a ew “imwen mwareiti, ew imw mi tetenoch, [me] ew imwen Kot.”3
Oruan, kewe chon nom non kewe imw mi murinno repwe awora fansoun ne kaeo ekkewe pukefen me ekkewe kapasen ekkewe soufos mi manau iteiten ran. Preseten Russell M. Nelson a tingor pwe sipwe “ekesiwini” me “forsefani” imwach kewe ren ach sipwe kaeo ewe kapas annim.4 An ewe tingora a esina pwe ekkewe imw mi murinno ra anomu ewe angang mi murinno ren amarata me forsefani pusin ach apwangapwang. Aiersefan iteitan ina ew pisekin ekesiwin a anisikich ach sipwe ekis marita non kirekiroch, anapono tong me wewe. Ach kaeo ekkewe pukefen a akana kich ngeni ewe Chon Amanau, ewe minne an ew tong me kirekiroch ra anisi kich ren ach marita.
Ewe Paipen, Puken Mormon me ewe Pearl of Great Price ra aporousa ekkewe porousen famini, iwe sisap mairu ren ekkewe auchean puken koutan ekkewe imw mi murinno. Ra makkei ekkewe aurek an sam me in, ekkewe osukosuk mi chok weiweita, pwapwan winen mi tupwon, ekkewe fansoun weiresin echik me wou, me ekkewe eniweniwin maun me nifangen kinamwe. Eniwin me eniwin ekkewe pukefen ra pwar ngenikich ifa ussun kewe famini ra tour ngeni ar mochen ren ar manauen tupwon me ifa ussun an rese tour ren ar tapweno ekkoch an.
Ounungatin, imw mi murinno ra apiru ewe chunga a for seni ewe Samon fan iten Iwan kewe im mi murinno, ewe tempel. Kautan ew tempel a poputa ren menapen poputan fetanin—enimenima me asosona ewe fonu. Ekana angangen nepoputan an epwe amonata ewe pwun ussun epwe awewe ngeni ach aponueta ekkewe annuk. Ekkewe annuk ir ekkewe soon minne angangen apiru Kraist a kau won. Kaeo angangen apiru Kraist a emweni kich ach sipwe nukuchareno, wenechar, me posono,5 ussun ewe macha a anisi kautan ewe tempel. Ei napanapen oueta a mut ngeni an ewe Samon epwe tinato Ngunun we an epwe siwini netipach.6 Nupwen sia sinei ussun ew watten siwinin ew netip ussun nge kapachetan ningeochun pisekin foforun ewe tempel.
Nupwen sia soposopono non nuku, ewe Samon epwe siwini kich. Sia angei ununun non ach pusin amesemesa me poputa ne nengen sefani ewe tong me ningeochun I.7 Nupwen sipwe winiti ussun chok I, sipwe mefi ketiweochuch me non imwan, me I epwe mefi ketiweochun me non imwach.
Sia tongeni sipwe tumunu imwach ewe an epwe chok akoko ngeni chok imwan ewe ren an epwe wor mumutan ach sipwe nounou taropwen mumutan non tempel ese pwan nifinifin inet fansoun a mutata. Nupwen sia fori, ewe manamanen imwen ewe Samon ewe epwe nonnom non imwach ewe.
Ewe amwararen ningeochun Salt Lake Tempel a chok kaneto. A kauto seni ekkewe akaewin chon ei mwichefen ra aueta ren ar pisek pusin forier, me angang weires ese wor ne kaukun, ewe tempel a foruta seni 1853 ngeni 1893. Ekkewe angeochun chon ei Mwichefen me akkom ra awora non anapanapa kautan och mettoch, chungan napanapen kautan imw, me foforun ningeochun ew imw a forata ew itefounon angang a pwaoch meren minionen aramas.
Arapakan 130 ier a no seni ewe fansoun ewe tempel a efeioch. Usun Elter Gary E. Stevenson a apasa nanau, ekkewe nongonongun napanapen kautan mettoch ra aea ne aueta tempel ra siwini ngeni minefon napanapen koutan me nonomun tumunun seni efeiengaw. Nupwen esap ponueta angangen murinonon kautan tempel me forun met mi tano me won epwe angawano ewe nukunuk an ekkewe akaewin chon ei Mwichefen, ekkewe ra fori non ukukun ar tongeni me nikitano tumunun ewe tempel ngeni ekkewe tappin aramas repwe tapweto.
Ewe Mwichefen a fen poputani ew ruanu-ier kokotun foforun emwirinoueno ewe tempel me pochokunenon inisin we.8 Sonun ewe, simenin, me etipan kewe repwe apochokunono. Ewe a kon murinno non sinenapei pekin foforun koutan imw a wor ikenai epwe fori an ewe tempel epwe for non minefon nonomun koutan imw. Sisap tufichin kuna kewe siwin ngeni napanapen koun ewe, nge met a pwano repwe wesewesen ennetin me auchea. Non kei angang meinisin, ningeochun foforun ewe tempel epwe chok nonnom.
Sipwe apiru ewe minen apiru a kawor ngeni kich seni ewe forsefanin ewe Salt Lake Tempel me awora fansoun ne nenengeni pusin ach angangen kouta non pekin ngun ach sipwe tumunu pwe epwe chok fifis. Chekin nonnomun inisich epwe chok fifis, epwe akoko ngeni ach eisini ewe Samo, “Met ese wor rei nge?”9 a tongeni anisi emon me emon kich ne awora ne oueta ew imw mi murinno.
Aruanun, imwach kewe mi murinno ir ew nenien epet seni ekkewe monumonun non manauach. Ewe Samon a pwon pwe ion kewe ra aponueta an kewe annukun Kot “repwe feioch me non ewe fonu.”10 Feiochun Kot ina ewe manaman ach sipwe achocho ne feinno mwach ina mo ika mi wor osukosuken non manauach.
Non 2002 ua kaeo ew auchean nesen ussun osukosuk. Nupwen ua non non Asunción, Paraguay, ua churi ewe steik preseten ren ewe city. Non ena fansoun, Paraguay a osukosuken pekin mwoni, me chommong chon ewe Mwichefen ra riaffou me rese tufichin moni met ururun repwe monatiw. Use mo nonno ngeni South America seni ewe fansoun uwa fori angangen misineri me use nonno Paraguay. Ua chok angang non ena Presetensi seni area ren ekkoch wik. Seni ai nuokus ren ai use tufichin awora emwen ngeni ekkewe steik preseten, ua urenir repwe ureniei met chok a fetanoch non ar ewe steik. Ewe aemonun chon aninis ren ewe steik presetensi a ureniei porousen ekkewe mettoch mi fetanoch. Ewe emon a apasa kewe mettoch ra fetanoch me ekkoch osukosuk. Ren ewe fansoun sia tori ewe omuchunon steik preseten, a chok apasa ew chok mettoch a efisata ningeringer, mangaw, kotongaw. Nupwen ewe steik preseten a awewei napenon ewe osukosuk, a napeno ai aurek, arapakan usap chiwen sinei met upwe ura.
Nupwen ewe preseten steik a awesano an afanafan, ua ekieki: “Elter Clayton, a eisinir ei kapas eis: ‘Ekkewe presetenin chochon ami kewe steik ekkewe ra monatiw unusen ar ew na engon, ra anapano ururun met repwe monatiw ren ar ewe asorun echikefen, a emwirinoueno wiser non ewe Mwichefen, fen pwan churi ar kewe famini ussun sensen famini ika fefin chon amwa11 iteiten maram, fori fenin famini, kaeo ekkewe pukefen, me fori iotekin famini iteiten ran, fitemon mi wor ar osukosuk rese tongeni pusin apasa nge ewe Mwichefen ese wor an epwe amweranong an epwe atawei ngenir ar kewe osukosuk?’”
Mwitir ne ponueni ewe ekiek uwa angei, ua eisini ekkewe steik preseten ena kapas eis.
Ra atonaei non mairu mosonoson me ra apasa, “Pues, ninguno,” wewen, “Wai, wor emon.” Mwirin ra ureniei pwe ese wor mo emon ekkewe chon ei Mwichefen epwe fori kei meinisin wor ar osukosuk rese tongeni pusin atawei. Pwata? Pun ra nom non ekkewe imw mi murinno. Ar nukuchar non ar nonnom a awora ngenir ewe pochokun, nemesepwi, me aninis seni nang ra mochen ar repwe nikitu non ewe osukosuken moni non fonuer ewe.
Esap wewen nge ekkewe mi tupwon resap tongeni semwen, riaffoun akseten, mesengeni osukosuken pisnis, ika churi chommong osukosuk non manauer. Manauach iei, a wato osukosuk iteitan, nge mwirin fansoun me fansoun uwa kuna pwe ekkewe ra achocho ne anneasosich ekkewe annuk ra feioch me kuna aner ra feinno fiti kinamwe me anean. Ekkana feioch a wor fan iten meinisin.12
Davit a afata, “Ika ewe Samon ese aueta ewe imw, iwe ekkewe chon angang ngeni repwe chok angang muan.”13 Ika metimo nonnommum, ika mwo ifa ussun nikinikin imwom, me metimo nonnomun om famini, ka tongeni aninis ne oueta ewe imw mi murinno fan iten om ewe famini. Ewe niwinsefaniton ewe kapas annimen Jises Kraist a awora ekkewe kokkot fan iten ena imw. Ewe Chon Amanau inai ewe a fokkun unusoch an sinenap non pekin napanapen, forutan, me napanapen eningen non imw. An ewe kokotun angang ewe ounusochun ewe pwapwan ngunuch feinfeino. Fiti an ewe tongen aninis, ngunum a tongeni epwe ina an mochen me en ka tongeni murinon won pusin inisum, ren om ammonata ne fori me manau non ew imw mi murinno.
Ua pwapwa ai upwe pwarata pwe ewe Kot me Samach kich meinisin mi manau. Noun Ewe, ewe Samon Jises Kraist, I ewe Chon Amanau me Chon Senani meinisin aramas. A unusoch ar tong ngeni kich. Ewe Mwichefenin Jises Kraist ren Aramas mi Pin non Fansoun Soponon ina an ewe Samon muu won fonufan. Soufos me aposel mi manau ra emweni kich ikenai. Ewe Puken Mormon mi ennet. Ewe kapas annimen Jises Kraist mi niwinsefan a awora ekkewe kokkot fan iten ena imw mi murinno. Non iten Jises Kraist, amen.