Ew Kokko mi Unusen Auchea

Seni Joy D. Jones

Presetenin Mwichenapen Kinter

Ren fefin chon nuku, sia tongeni angei nongonongun ennet seni met ewe a fisingeni ewe Soufos Joseph an epwe awora anononun wewe ren ach sipwe pwisin angei pusin ach pwarata.

Ua kinisou ai uwa anonga ai porous ikenai won wisen kewe fefin mi soposopono non ewe Niwinsefanito. Mi fat pwe non unusen porousen nom pwe fefin ra auchea me non an Samach Kot won Nang ewe kokkot. Presetent Russell M. Nelson a afanafana, “Esap mecheres ach sipwe apou met … ewe fefin mi tongeni fori esap chok non famini nge pwan non an ewe Samon ewe Mwichefen, ren fefin mi pupunu, inenap, inen iner, ren pwipwi me pwin iner; ren sense me souemwen; me akaewin ren ekkewe sia aanir nenien apiru me chon nikitu ne eppeti ew nuku.” ¹

Non ewe akkowen Mwichen Fin Anisi non Nauvo, 178 ier a no, ewe Soufos Joseph Smith a fonou kewe fefin ar repwe “murino non (ar) ewe tufich.” ² Ar pisekin appiru a aitikich ikenai. Ra chufengen ne tapwei mongungun ewe soufos me aponueta ar pochokunen nuku non Jises Kraist ren ra anisi forutan ewe nongonong iei sia uta won. Pwi kan, iei ach fansoun. A wor ach auchean angang seni ewe Samon, me ach nukuchar, ekkewe chok sokkun aninis ra fokkun auchea.

Presetent Spencer W. Kimball a awewei: “Ren om kopwe emon fefin mi tupon non sokun mokutun ei fonufan, me mwen ewe oruen niwinsefaniton ach Chon Amanau, ew kokko mi auchean. Pochokunen ekkewe fefin mi tupon me ar foffor murinno ikenai a tongeni enniwin fan engon murinon non fansoun kinamwe.” ³

Presetent Nelson a pwan tingor: “Ua tingorei fefinei kewe non [ewe] Mwichefen … sipwe awora aninis! Angei pusin neniemi mi auchea non imwemi, nein aramas, me non ewe muun Kot—nap seni met a wor remi akkom.” ⁴

Iwe chok ekiseno, uwa feioch, fiti ew mwichen semiritin Kinter, ren am churi Presetent Russell M. Nelson non ewe neni a ussun chok imwen ewe faminien Smith non Palmyra, New York Ausening ngeni nouch we soufos an osukuna ekkewe semirit met repwe tongeni fori ar repwe awora aninis.

1:55

Sister Jones: “Ua fen mochen sinei ika epwe wor ami kapas eis ouwa mochen eisini Presetent Nelson. Ouwa mommot ikei ren ewe soufos. Mei wor mettoch ouwa fen mochen eisini emon soufos? Ewer, Pearl.”

Pearl: “Mi weires an emon epwe emon soufos? En mei, ussun ma, fokkun osukosuk?”

Presetent Nelson: “Ewer mi weires. Mettoch meinisin sia fori ren ach sipwe winiti ussun ewe Chon Amanau mi weires. Awewe chok, nupwen Kot a ngeni Moses ekkewe Engon Annuk, ian ewe A ureni Moses epwe no ian? Won ungen ew chuk, won ungen ewe Chuk Sinai. Iwe Moses epwe fetanita ngeni ungen ena chuk an epwe angei ekkewe Engon Annuk. Iei, Samach won Nang mi fen tongeni ura, “Moses, kone poputa me ikana, me ngang upwe poputa me ikei, nge upwap churuk me nukapanan.’ Apw, ewe Samon a fokkun sani otures, pun otures a wato niffang ese tongeni wor ika ese fiti. Awewe chok, ka fen angei nesenin kaeo piano?”

Semirit: “Ewer.”

Pear: “Ua angei violin.”

Presetent Nelson: “Me ka fori angangen kaeo?”

Semirit: “Ewer.”

Presetent Nelson: “Met a fis ika kose fori om angangen kaeo?”

Pearl: “Ka nemenono.”

Presetent Nelson: “Ewer, kose fefeita, en mei? Iwe ponuwan epwe ewer, Pearl. A och epwe wor otures, watten angang weires, achocho ne kaeo, iwe esap wor nemuchun. A murino ena! A murinno, pun sia feifeita iteitan. Pwan mwo non ewe manau mwirin sia pwan fefeita.”

An Presetent Nelson ponuwen kapaseis ngeni ekkewe auchean semirit a pwan no ngeni emon me emon kich. Ewe Samon a fokkun sani otures, me otures a wato chommong niffangan. Sipwe achocho ne fori angangen kaeo. Sipwe feifeita fansoun meinisin nupwen sipwe achocho ne tapweno murin ewe Samon. ⁵ Ese pwan ekieki unusoch ikenai Sipwe achocho ne toki pusin ach Chuk Sinai. Nupwen fansoun a pasino, sipwe oturesi ach sai, angang weires, kaeo, nge ach achocho ngeni ach sipwe fefeita a wato niffang ese much. ⁶

Pwan met chommong sia kaeo seni ewe Soufos Joseph Smith me ewe Aewin Nemesepwi ussun otures, angang weires, me kaeo? Ewe Aewin Nemesepwi a ngenikich emwen non ach kewe sekining mi chok soposopono. Ren fefin chon nuku, sia tongeni chungani nongonongun ennet seni met ewe a fisingeni ewe Soufos Joseph an epwe awora anononun wewe ren ach angei pusin ach pwarata Ren awewe:

Sia angang weires.
Sia kun ngeni ekkewe pukefen ach sipwe angei mirit ne mokutukut.
Sia pwarano ach nuku me apinukunuk non Kot.
Sia aea ach pochokun ne tingor ngeni Kot an epwe anisi kich ne epeti kich seni foforungawen ekkoch.
Sia fangetani mochenin netipach ngeni Kot.
Sipwe anonga ach ekiek won An ewe saram mi emweni mochenin manauach me asoso won kich nupwen sipwe kun ngeni I.
Sia sinei pwe I a sinei kich meinisin ren itach me awora wisach ach sipwe aponueta. ⁷

Kapach ngeni, Joseph Smith a eniwinato ewe sinenap pwe epwe wor ach tufich me aucheach feinfeino. Pokiten ena nefiin ngeni Samach won Nang, Ua achifoua I a mochen kich sipwe angei pwarata seni I.

Ewe Samon a ureni Emma Smith an epwe “angei ewe Ngun Mi Fel,” achocho ne kaeo, “nikiti ekkewe mettochun ei fonufan. … kutta ekkewe mettoch mi murinno,” me “kamwochunuk won [an] kewe pwon” ngeni Kot. ⁸ Kaeo a auchea ach sipwe fefeita, akaewin ren ewe chiechi ngeni ewe Ngun mi Fel a aitikich met a auchea ngenikich ach sipwe nikitano—wewen minne epwe tongeni orukano kich ika amangano ach fefeita.

Presetent Nelson a apasa, “Ua tingor ngenikemi oupwe anapano ami tufich non pekin ngun pwe oupwe angei pwarata.” ⁹ An nouch soufos kewe kapas ra soposopono ne nom rei nupwen ai uwa nenengenochu tufichin fefin ne awora aninis. I a tingor ngeni kich, minne a afata tetenochun mettoch. I a aitikich ifa ussun ach sipwe ngas non pekin ngun non ew fonufan mi eriaffou ren tipis ren ach sipwe angei me mokutukut won pwarata. ¹⁰ Nupwen sia fori, ne osufonu me aponueta ekkewe annukun ewe Samon, sia angei pwon, ussun pwan Emma Smith, “ew mwaramwarin tupwon.” ¹¹ Ewe Soufos Joseph Smith a afanafan ussun ewe auchean sinei pwe ewe an sia fetan won non ei manau a kapunguno meren Kot. Ika ese wor ena mirit, kich “sipwe marita non monunun non [ach] ekiek me apwangapwangeno.” ¹²

Non ei mwichenap, sipwe rongorong ekkewe ennet minne ra amwasanga kich ach sipwe siwin, fefeita, me nimenimoch non manauach. Seni pusin ach pwarata, sia tongeni eppeti met ekkoch ra eita ngeni “mwichenapen mwichefen a tamepich”—nupwen sia no seni mwichenap me finata ach sipwe fori {8meinisiniei. Kewe fefin ra imweim chommong akkaw, nge ese tufich ika ese auchea ar repwe imweim meinisin non ew chok fansoun. Ewe Ngun a anisikich ne forata menni angang sipwe anonga ach ekiek won ikenai. ¹³

An ewe Samon napanapen tong seni ewe Ngun mi Fel a anisi kich ach sipwe sinei An tetenochun mettoch non ach fefeita. Nengenochu ach pusin pwarata a emwen ngeni pusin ach fefeita. ¹⁴ Sia rongorong me anganga. ¹⁵ Ewe Samon a apasa, “Tingorei ewe Sam non itei non nuku, ka pwe kopwe angei, me kopwe angei ewe Ngun mi Fel, ewe a nom non mettoch meinisin minne ra tufich fansoun meinisin.” ¹⁶ Wisach mi soposopono ach sipwe angei pwarata mi soposopono.

Ach sia angei ew wachemuken kinikinin nipwakoch ne fori, sia tongeni angei chommong tufich ika pochokun non pusin wisach ne iamwiri me awesochuono ewe anganen manau ese much me manau fefeita—ren ennetin “nikitano ekkewe mettochun ei fonufan, me kutta ekkewe mettoch ra murinno.” ¹⁷ Sia tongeni nipwakochuno ne amwasanga ach ewe tapin aramas epwe marita ar repwe fori ussun chok pwan kich.

Mongeei me pwi, kich meinisin sia kukkuta an Kot ewe manaman non manawach. ¹⁸ Mi wor amwararen chufengen nefinen mwan me fefin non foforochunon an Kot angang ikenai. Sia tongeni angei ewe manamanen ewe pristut seni ekkewe pwon sia fori non ewe konikin papatais me pwan non ekkewe tempel mi pin. ¹⁹ Presetent Nelson a aiti ngeni kich, “Fefin me mwan meinisin mine ra fori ekkewe pwon mi pin ngeni Kot me aponueta ekkena pwon mi pin, me ekkewe ra aponueta me nimenimoch non pusin annukun pristut, a wor an tufichin angei ewe manamanen Kot.” ²⁰

Ai pusin kapasen anetata ikenai ussun emon fefin, use pwan tepereni iteitan non manauei pwe ngang ua tongeni angei ena mumuta, seni ai kewe pwon mi pin, ngeni ewe manamanen ewe pristut. ²¹ Pwi kana, ua iotek pwe sipwe esinna me tumunu me tongei ewe manamanen pristut nupwen sia “komochunuk won [ach] kewe pwon mi pin,” ²² faropacheno ekkewe ennet usssun ekkewe pukefel, me tumunoch ngeni ekkewe kapasen nouch kewe soufos mi manau.

Sipwene afata ach tong me ennet ngeni Samach Won Nang me Ach Chon Amanau, “fiti nukucharen nuku non I, anonga ren unusan won auchean I ewe mi napanap ne amanaua.” ²³ Sipwene pwapwa ne sopweno ei sai ngeni ach tekian tufich non pekin ngun me anisi ekkewe mi nom aruch ne fori ussun chok non tong, aninis, emwen, me umoumoch.

Elter James E. Talmage non pwetete an kapas a achema ngenikich, “Jises ewe Kraist noun fonufan ewe champion mi napanap ren fefin me ekkewe ra nom non kinikinin fefin.” ²⁴ Non ewe amuchunon tichikin porousen wisen fefin mi chok soposopono non ewe Niwinsefanito, me ren pwan kich meinisin, met wisach a kon auchea? Ua pwarata pwe sipwe rongorong ngeni I, ²⁵ ach sipwe tapweno mwirin I, ²⁶ sipwe apinukunuk non I, ²⁷ me sipwe winiti ew afoun an tong. ²⁸ Ua sinei pwe I mi manau. ²⁹ Non iten Jises Kraist mi pin, amen.