Fefin me Kaeon Kapas Allimen non ewe Imw
Ewe Chon Amanau I ewe nenien appiru mi unusoch ngeni ifa usun ami oupwe anisi non An achocho ne awatteno ewe kaeon ewe kapas allim non ewe imw.
Fefinei mi achengicheng, ua men pwapwa ren ai chufengen remi. Fansoun ikenai a men ur ren pwapwa non Ewe Mwichefenin Jises Kraist ren Aramas mi Pin non Fansoun Soponon. Ewe Samon a ninatiw tipachem won An Mwichefel pwe usun a pwonei.
Oua chechemeni met a era: “Ifan nagatamen fansoun chonupupu mi nonnom ngaueno? Menni manaman epwe akouno manamanen nang? Emon mwan epwe fen eitau poun mi apwangapwang an epwe sotuni ne akaunoi ewe chonupupu Missouri non fetanin, nap seni an epwe akounoi Kot seni an epwe ninatiw mirit seni nang won mokuren ekkewe Aramas mi Pin.1
Eu kinikinkin an ewe Samon ineiti mirit ikenai mi awewei ngeni mwitirin An ninatiw mirit won mokur me netipen Noun aramas. A afateno pwe noun Samach won Nang nengin repwe mokutukut eu wisan mi namot non ena mwitirin aan mi amwarar. Eu me nein ekkana minnen amwarar pwe I A emweni Noun we soufos ne esisinna tichikin won nongonongun ewe kapas allim non ewe imw me non ewe famini.
Meni kopwe eis, “Epwe ifa usun a fori ekkei fefin mi nukunuk ar repwe popun pochokun ne anisi ewe Samon ne ninatiw mirit won Noun Souneng?” Ewe Samon ponuweni me non “An eEe Famini: Esinesin ngeni ei Fonufan.” Ami mi sinei ekkewe kapas, nge oupwe kuna minafo wewen me esinna pwe ewe Samon a fen osini ekkei siwin mi amwarar. Non ewe esinesin, A ngeni ekkewe fefin wis pwe repwe nongonongen chon asukuna ewe kapas allim me non ewe famini non ekkei kapas: “Ekkewe in ra wisen tumunu nour kewe semirit.”2 Ei mi pachenong tumunun ennetin ewe kapas allim me mirit.
Ewe esinesin a sopweno: “Mwan me Fefin mi apupunu mi wor wiser are repwe tongei me tumunu emon em emon pwe ir nonno chok.”3 Ir me ruemon mi nonnofengen, nonno me non feifeita non pekin ngun me angei mirit, pwe ir mi ririfengen non ar aninnisfengenir. Ir mei nonnofengen non ar wisen non pekin ngun are repwe seikata fengen. Iwe mo, ir resap tongeni seikita anaemon.
Pwata, pwe noun Kot nengin mi chufengen o nonnofengen nonnomun ar ra angei ei wisen popun mi auchea ne tutumunu ren ewe mettoch mi fakkun namot meinisin repwe etiwa, eu miritin ennet a feito me nang? Usun chok met ua kuna, iei aanen ewe Samon seni ewe fansoun a foriata famini me non ei fonufan.
Inai Eve ewe a angei ewe mirit pwe Atam epwe namot an epwe ochei ewe founiran mirit ar repwe anneasochi an Kot kewe annuk me forano famini. Ngang usap mo sinei pwata a feito ren Eve akkom, nge Atam me Eve ra nonnofegnen non unusoch nupwen ewe mirit a ninatiw won Atam.
Pwan eu minnen appiru an ewe Samon aea nifangen tutumunu mi nom ren fefin ne anisi noun Ilaman at. A ku tipei nupwen ua anneani ei porous me ua chechemeni an inei we kapas mosonoson me amwasangaei atun ua no mwichen sounfiu.
Ilaman a makkei:
“Ra fen kaeo me ren iner kewe, pwe resap tipemwaramwar, Kot epwe angaser.
“Iwe ra apasa sefani ngeniei ekkewe kapas an iner kewe, ra apasa: Am ause tipemwaramwar inem kewe ir mi sinei.”4
Ika mo usap sinei an ewe Samon popun an ngeni ekkewe fefin mi nukuchar ewe wisen tumun me non ewe famini, ua nuku pwe pokiten ami ukukkun tongeni ne tong. Mi auchea watten tong and epwe mefi an emon mochen nap seni pwisin om. Ina ewe ennetin tongen Kraist ren emon ka tumunu. Ena mefien tongen ennet a feito seni ewe aramas mi kefin ne tutumunu mi fich ngeni pokiten mokutun ewe Angangen Achasefanin Jises Kraist. Ewe kapasen esinesin an Mwichen Fin Anisi Unus, minne pwisin inei a anapano, a esinesinano: “Tong Ennet esap Mano.”
Ren noun Kot nengin, mi nom remi eu wis mi namot me ewe tufichin mefin mochenin ekkoch me tong. Iwe ina, a for pwe om kopwe mefi pwetete ngeni mongungun ewe Ngun mi Fel. Ewe Ngun epwe tongeni aweina om ekiek, met kopwe apasa, me met kewe oupwe fori ne tutumunu aramas pwe ewe Samon epwe ninatiw tipachem, ennet me pochokun wor.
Ami fefin mi rongorong neuwei emom me emon ami mi sokkono non ami fetanin aanen ami manau. Ekkoch neimi mi serafo o meni oua keran chok choni ei mwich. Ekkoch fefin ese chinnup ra ammona angangen tumun usun Kot a mochen are repwe fori. Ekkoch re keran pupunu rese mo nounoui semirit, ekkoch ra fen wor emon are ekkoch nour semirit. Ekkoch ra inn ngeni serafo me pwan ekkoch mi wor nour semirit non mission. Ekkoch mi wor nour semirit ar nuku mi apwangpwang me ra men towau seni imw. Ekkoch ra nonnom anaemon ese wor chienar. Ekkoch ra in chinnapeno.
Iwe, ese nifinifin nonnomum, en ka eu kinikinin—efoch kiien—ewe faminien Kot me om famini, ika pwe non fansoun mwach, non ei fonfufan, are non ewe nenien ngun. Wisom me ren Kot pwe kopwe tumnuochu chommong me nein Noun kewe me chon om famini seni om tong me nukuchar on Jises Kraist.
Finiom auchea pwe om kopwe sineiochu ion kopwe tumunu, ifa usun, me inet. Kopwe mochen an ewe Samon anninisoch. I A sinei netipan ekkoch, me a sinei nupwen ra moneta ne etiwa om angangen tumun. Om iotek me nuku repwe kiien om angangeoch. Kopwe anonga won An aweinaoch.
A ngeni kich ei kapasen pesepes: “Ika pwe sia tingor ewe Sam fan Itan, non nuku achifoua pwe sipwe angei, epwe wor rech ewe Ngun mi Fel, minne mi pwarano mettoch meinisin mi angangoch.”5
Kapach ngeni iotek, om tiniken ne kaeo pukfel epwe eu kinikinin marinon om pochokun ne tumun. Iei ewe kapas pwon, ewe Samol a ereni kich pwe sisap ekieki me mwen met kewe sipwe apasa. Sipwe isoni kapasen allim non ach ekiek iteitan, me ekkewe kapas epwe tou seni auach inet chok fansoun sipwe mochen.6
Iwe kopwe aea fansoun om kopwe iotek, ekipwich, me ekikeiochueno won mettoch non pekin ngun. Kopwe angei miritin ennet epwe nitiw wom o kopwe marino non om pochokun ne tumun non om famini.
Meni epwe wor fansoun om kopwe mefi pwe om fefeita non om kaeon tumun mi mang. Nge epwe namot pwe epwe wor nuku ne nikitu. A tinano reom ei kapassen pesepes:
Sisap mang are chipwang ne fori mettoch mei och, pokiten sia ameresi nongonogen angangen auchea. Ekkena mettoch mi napanap a popueta seni mettoch kisikis.
Ewe Samon, me ren Soufos Joseph Smith, a era pwe a mochenin netip me ewe mochenin ekiek, me ewe chon mochen me chon anneasochisi repwe mongo och me mon ewe fonuen Zion non ekkewe rannin soponon.7
Om feito non ei pwinnin a eu pisekn pwarata pwe ka pwisin mochen ne etiwa an ewe Samon kokko ne tumun. Ena a men ennet ren ewe chokukkun a pwan nom nepwinei. Kopwe sineioch ion kopwe tumunu non om famini. Ika ka iotek ren unusen netipom, eu it are mas epwe feito non om ekiek. Ika ka iotek ren met kewe kopwe fori are apasa, kopwe angei ponuwan. Iteitan fansoun ka anneasochisi, om pochokun ne tumun epwe marino. Kopwe ammonata ren ewe ranin fansoun en kopwe tumunu noum pwisin semirit.
Inan ekkewe serafo repwe tongeni iotek ar repwe sinei ifa usun repwe tumunu emon at are nengin mi ekis nukumach. Kopwe iotek ne sinei ion mi wor an sinenapen ngun mi namot ngeni noum kewe me repwe etiewaochu. Kot a ausening me ponueni ennetin iotekin netipan inn mi aurek, me I A tinato aninnisoch.
Iwe pwan, in chinnap a nom ikeia a mefi netipechou seni weiresin me osukasuken noun kewe me tettenin noun kewe semirit. Kopwe mefi pochokun me angei emwen seni porousen ekkewe famini non ekkewe pukfel.
Seni fansoun Eve me Atam, ngeni Semanapen Israel, me ngeni iteitan famini non ewe Puken Mormon, mi wor eu nessen mi ennet usun netipengauen semirit mi nukumack: kosap kouno ne tongeiir.
Mi wor rech minnen appiruen ewe Chon Amanau an A tumunuochu ekkewe Noun Samach won Nang semirit ra ungeni. Ika mo iir me kich sia forata metek, poun ewe Chon Amanau mi chuen amweresi.8 I A apasa non 3 Nifai usun pwiin me fefinan kewe, ekkewe a achocho ne tumunu nge a nusmwan: “O ami aramas…ami oua feito seni ewe imwen Israel, fan fitu ua fen ionfengeni kemi usun emon inenapen chuko a ionfengeni etenin kewe fan poun, me ua fen tumunu kemi.”9
Ngeni ekkewe fin chinnap me kukkun ir meinisin mi nom won ei aan, iteitan nonnomun famini, me pwan seni ese nifinifin oerini, ewe Chon Amanau a eu minnen appiru mi unusoch ifa usun om kopwe fiti ei kinikin non An mokutukut me anenia tichikin ewe kapas allim me non imw.
En kopwe angeiato pwisin om memmefin tong ennet non urumot me sokopaten mettochun non om famini. Mi esenipato pochokunen marinon pekin ngun. Nupwen ka iotek fan ekkoch me fan iten om famini, kopwe mefi pwisin om pwan an ewe Samon tong fan iter. Ena epwe winino ekis me ekis om nifangen non pekin ngun atun om ka kutta. Chon om famini repwe mefi atun ka iotek ren pochokunen nuku.
Nupwen ewe famini a chufengen ne anneani pukfel, en ka fen wes ne anneanir me iotek usur pwe kopwe moneta. Kopwe kutta fansoun ne iotek ren ewe Ngun an epwe asarama om ekiek. Iwe, nupwen a toruk ewe fansoun ne anneani, chon famini repwe mefi om tong ren Kot me An kewe kapas. Ir repwe mefi tumun ren I me pwan Noun Ngun.
Ewe chok napanap epwe feito non achugengenin famini ika oupwe iotek me kokkot usun. Eni epwe fiti ekis angang me fansoun, nge epwe esenipato angangan amwarar. U checmeni eu nesen inei we a aitiei nekukkunui we. Ngang mi chiwen chemeni ewe map mi wor anuwan a fori usun an ewe Aposel Paul sai. Ua ekieki ifa usun an a kutta fansoun ne fori ena. Iwe tori ikenai ngang ua mefi feioch ren an tong ngeni ena Aposel mi nukuchar.
Emon me emon neimi epwe kutta aan ne anisi napenon ennet won om famini me non an ewe Samon mwichefel a niwinsefanito. Emon me emon oupwe iotek, kaeo, me ekieki ne sinei met om pwisin angangoch ne anisi won. Nge iei ua men sinei: iteitan ami, angang fengen ren noun Kot at, oupwe eu wisen auchea kaeo mi amwarar non ewe kapas allim me manaueni ena pwe epwe amwitiri ionfengenin Israel ne ammona an Kot famini ren pwapwan aniwinsefaniton ewe Samon Sises Kraist. Fan itan mi pin Jises Kraist, amen.