Winiti emon Chon Kuno
Ai anean pwe ekkewe ka iamwirir repwe kunok usun chiener en, non en, epwe wor neur champion me epwe pwipwiech ngenir.
Ew ier a no, ua churi emon Kinter non Chile a wato ew mese pwapwa won mesei. “Kapong ngonuk,” a apasa, “Ngang David. En mi tongeni porous ussi non mwichenapen mwichefen?”
Non mosonosonen fansoun, ua ekieki an David ewe kapong use tepereni. Kich meinisin sia mochen sipwe sineno. Sia mochen sipwe namot, epwe wor achechemach, me epwe wor tongach.
Pwi kana me mongeei, emon me emon neimi mi auchea. Inamo ika ese wor e porous ussumi non mwichenapen mwichefen, ewe Chon Amanau mi sineikemi me tongekemi. Ika ouase nukunuk ika mi pung, kopwe chok nenengeni pun i a fen “esisina [en] won kumuchun [poun].”1
Ach sinei pwe ewe Chon Amanau a tongei kich, meni sipwe ekieki, ifa ussun ach sia tongeni pwarano ach tongei I?
Ewe Chon Amanau a eisini Peter, “En mi tongei … ?”
Peter a ponueni, “Ewer, Samol, en mi sinei pwe ngang mi tongek. A apasa ngeni I, Iwe kopwe tumunu nei kewe siip.”
Nupwen an eis ei kapas eis oruwan me eunungatin fansoun, “En mei tongeiei?” Peter, a noninen an epwe pwan eisini, a afata an tong: “Samol, ka sinei mettoch meinisin, ka sinei pwe ngang mi tongek. Jises a apasa ngeni, Tumunu nei kewe siip.”2
Met Peter ese ne fen pwarano pwe i emon mi tong chon tapweno mwirin Kraist? Seni ewe aewin fansoun ra chufengen me aroset, a chok “utasini” poutano noun kewe chew o tapweno mwirin ewe Chon Amanau.3 Peter, a winiti emon chon attawa aramas mi ennet. I a fen emon chon kuno mi fokkun achocho, a chiechi ngeni ewe Chon Amanau non fansoun an ewe pusin angang me aninis ne afanafana ekkoch ewe kapas allimen Jises Kraist.
Nge iei ewe Samon mi manau a sinei pwe esap chiwen nom unukun Peter, epwe pwar ngeni ifa ussun me inet epwe angang. Non an ewe Chon Amanau ese nom, mi auchea Peter epwe kutta emwen seni ewe Ngun mi Fel, angei pwarata won pusin an, me wor ren ewe poracho me nuku ne mokutukut. Nenengenochu noun kewe siip, ewe Chon Amanau a mochen Peter an epwe fori met I epwe fori ussun I mi nom ikei. A ureni Peter pwe epwe winiti emon chon masen siip.
Non ewe April a no, Preseten Russell M. Nelson a wau ew tingor ngenikich pwe sipwe tumunu noun Samach kewe siip non ew napanap mi pin me fori non angangen tong me umoumoch.4
Ren ach sipwe etiwa ei tingor, sipwe forata ew netip, netipen emon chon masen siip me weweiti me mi auchea ngeninoun ewe Samon siip.. Iwe ifa ussun ach sipwe winiti ekkewe chon masen siip ewe Samon me aa mochen sipwe ussun?
Ren kapas eis meinisin, sia tongeni nengeni ach ewe Chon Amanau, Jises Kraist—ewe Chon Masen Siip Mi Murinno. Noun ewe Chon Amanau kewe siip ra fen fat ion ir me iteiter, a fen wor chon mamaser; ra ioi fengen non ewe mwichen noun Kot siip.
Fat ion ir me Iteiter
Nupwen sia achocho ne opuru napanapen ewe Chon Amanau, sipwe akkom, sinei me iteiten Noun siip. Sia fen ewis ngeni emon me emon me famini ar repwe foforoch pwe sipwe fat pwe meinisin noun ewe Samon kewe repwe annea me esap wor epwe poutuno. Anneani, esap wesewesen wewen eiteita; sipwe fori pwe emon me emon epwe mefi ewe tong an ewe Chon Amanau seni emon a angang ngeni I. Ren ena, meinisin sia tongeni esinna pwe ra siin meren emon Sam non Nang mi tong.
Ua karan chok churi emon fopun a fin ngeni pwe epwe iamwiri emon sister arapakan fan nimu a watte seni ierin. Ir me ruemon, ra kuna pwe ra chok nonno non ar sani koon. Nupwen ei fopun a no churi, ra koon fengen ekkewe koon, me ra porous fengen won met ra kan sani. Ra forata ew chiechi nefiner a efeiochu manauer me ruemon.
Ua anean pwe ekana oua iamwirir repwe sinekemi pwe ami kamon chiechier me mefi pwe non ami, a wor nour ketiweno, emon chon peni, me emon chon eteneki nonomur me tumunur non ar anean me ar mochen.
Pepeto chok iei ua angei ew ai kokko ai upwe iamwiri emon sister esap chiechiei me use pwan sisinei. Nupwen ua porous ngeni Jess, chiechiei minen nom engon me onu ierin, a wata ew ekiek mi murinno, “a och sipwe akkom sisinei neminewe.”
Auwa mwittir ne ekieki pwe epwe wor sasing me kapas awewen. Ua kamoch ewe fon, me Jess a wisen fichi ewe sasing. Aewin am we tufichin iamwir ew tufichin chiechi fengen.
Am we aewin feinno churi, am ouwa eisini pwimw ewe ika mi wor met aupwe pwan tongeni apachanong non am ewe iotek fan itan. A aporousa ew porousen pusin inisin mi pwetete me a apasa pwe mi etiwa am ewe iotek. An kapas wenechar me nukunuk a wato ew pinukun tong. A ew tufich mi murino ne chechemeni I non am iotek iteiten ran.
Nupwen ka iotek, kopwe mefi ewe tongen Jises Kraist fan iten ekkana ka iamwirir. Aea ngenir ena tong. Met ren ei murinon anen ach sipwe tumunu Noun kewe siip ne anisir ar repwe mefi An ewe tong—sonuk?
Mamasa
Oruen anen ach sipwe forata netipen emon chon masen siip ina ach sipwe mamasa Noun kewe siip.Ussun Aramas mi Pin non Ewe Mwichefenin Jises Kraist ren Aramas mi Pin non Fansoun Soponon, sia omokutu, fori, for sefani, me ousefani ese pwan nifinifin met. Sia mwitir ne kuna ew mochen ren awora aninis ika ew peneichen okasi. Nge mi pwann wor chommong.
Nouch kewe siip ir mi sinei pwe sia mamaser fiti tong me mokutukut won met sipwe anisir ngenir?
Non Matthew 25, sia aneani:
“Oupwe feito, ami mi feioch me ren Semei, oupwe feitto o choni ewe muu a fen monnota ngeni kemi … :
“Pun ua echik nge oua amongoni ei, ua kaka nge oua aunu ei, ua emon wasona nge oua etiwa ei: …
“Iwe ekkewe aramas mi pung repwe ponuweni, Samol, inet am oua kunok pwe ka echik nge am oua amongonuk, are ka kaka nge am oua anunuk?
“Pwan inet am oua kunokk pwe en emon wasona nge am oua etiwok?”5
Mwongei me pwi kana, ewe ouwonamen fos ina kuna. Ekkewe aramas mi pung ra kuna ekkewe ir mi osupwang pun ra mamasa me kuna. Kich sia tongeni anenenoi mesach ach sipwe aninis me ekinamwei, ach sipwe fori apwapwan me pwan onotan. Nupwen sipwe amokutu, sia tongeni pwan affata ewe pwon non Matthew: “Fansoun meinisin oua fori ei napanap ngeni emon pwii kei mi kisifochofoch … , oua pwan fori ngeni ei.”6
Emon chiechiem—aua eita ngeni John—a aporousa met a tongeni fis nupwen sisap kuna ochu an emon osupwang: “Emon sister non ai we wart a ekiekin pusin angeano manauan. Mwirin ruu maram, ua kuna pwe ese wor emon non ai ewe mwich epwe churi punuwen neminewe ewe an epwe apasa ngeni ei napanap. Netipechoun, use pwan mokutukut won. Mwirin uwa tingorei punuwen neminewe ewe pwe am oupwe mwin ne no mongon neanowas. I emon mwan mi nisasaw, mochen epwe chok imuno. Nge nupwen uwa apasa, ‘Punuwom we a ekiekin pusin angeano manauan. Meni epwe kon eriafou ngonuk. En mi mochen porous ussun?’ atewe a kechiw. A wor am kinamwein poporous me forata ew chiechi me nukunuk non chok ekkoch minich.”
John a pwan apachata, “Ua ekieki pwe ach mochen ach sipwe chok uouoto brownies nap seni ach sipwe kutta ika epwe ifa ussun ach sipwe tonong non ena fansoun fiti wenechar me tong.”7
Meni nouch kewe siip repwe mefi riaffou, morukono, ika fen ngaweno; ussun nouch chon masen siip, sipwe akkom ne kuna ar kewe osupwang. Sia tongeni rongorong me tong nge sisap apungur me ngenir anean me aninis fiti emwen seni ewe Ngun mi Fel.
Pwi me mongeei, ewe fonufan a ur ren anean me pwapwa pokiten ewe angangen kirekiroch ouwa fori. Nupwen ouwa kutta an ewe Samon emwen won ifa ussun oupwe uwei An ewe tong me kuna ekkewe osupwang an ekkewe ka iamwirir, mesach repwe nenneno. Ami ena angangen iamwiri mi pin epwe ngonuk ewe pung am oupwe omokutu memef. Oua tongeni kukuta ena amokutun memef fiti nukunuk.
Chufengen non ewe Mwichen siip noun Kot
Ounungatin, sia mochen nouch kewe siip repwe chufengen non ewe mwichen siip noun Kot. Ren ach sipwe fori, sipwe ekieki ra nom ia me won ewe aanen pwon me mochen sipwe fiti ekkoch ne fetan won ar ewe fetan non nuku. Ach ew tufich mi pin ach sipwe sinei netiper me emweni ir ngeni nour ewe Chon Amanau.
Sister Josivini non Fiji a wor an weires an epwe kuna an epwe feinno won ewe anen pwon—wesewesan. Chiechian ewe a kuna pwe Josivini a weires an epwe kunaochu ne anneani ekkewe pukefen. A awora ngeni Josivini noun minefon kinasun annea me efoch pin mi oneon an epwe esisina non ewe Puken Mormon ikewe e fou iten Jises Kraist iwe. Met a poputani ussun ew mecheresin mochen ne iamwiri me ne anisi ren kaeon ekkewe pukefen a pwano non an Josivini a akaewin feinno non tempel 28 ier mwirin an a papatais.
Ika mwo nouch kewe siip ra pochokun ika apwangapwang, non pwapwa ika non weires, sia tongeni fori pwe esap wor epwe fetan akanamon. Sia tongeni tonger ian ra nom non pekin ngun me awora aninis me pesepes ren ewe pwan ew ipweno mwach. Nupwen sia iotek me kukuta ach sipwe weweiti netiper, Ua pwarata pwe Samach won Nang epwe emwenikich me Ngunun ewe epwe fiti kich. A wor rech ewe tufich ach sipwe chon ekkewe “chon nang ra pwenieno ir nupwen a feinno mwer.8
Ewe Samon a kokori kich ach sipwe tumunu Noun kewe siip, ach sipwe eteneki Noun ewe mwichen siip ussun I a fori. A tingorei kich pwe sipwe chon masen siip ngeni muu meinisin, fonu meinisin. (Me ewer, Elter Uchtdorf, aua sani me mochen ekkewe konank German shepherds.) Me a mochen Noun kewe sarafo repwe tonong non ei angang.
Ekkoch nouch kewe sarafo ra tongeni nouch chon masen siip mi pochokun. Ir mi , ussun Preseten Russell M. Nelson a apasa, “mi nom me nein ekkewe mi murinno ewe Samon a fen tinatiw ngeni ei fonufan.” Ir ekkewe “ngun mi murinno, “nouch chon urumot mi angeoch” ekkewe ra tapweno mwirin ewe Chon Amanau.9 En mi tongeni anchangei ewe manaman ekkewe chon masen siip repwe wato nupwen ra eteneki Noun kewe siip? Ach iamwir fengen me ekkei serafo, sia kuna amwarar.
Fopun me anuon, sia mochen ami! Ika ese wor ami angangen iamwiri, porous ngeni ami ena mwichen Fin Anisi ika presetenin mwichen elter. Repwe pwapwaiti ami mwasangasang ne fori pwe Noun kewe siip repwe fat ion ir me iteiter, mamaser, me ionirenong non ewe mwichen siip noun Kot.
Nupwen ewe ran epwe feitto pwe sipwe fotupukutiw ren pechen ach ewe Chon Amanau mi tong, ren ach sia fen tumunu Noun kewe siip, ua iotek pwe sipwe tongeni ponueni ussun met Peter a fori: “Ewer, Samol; en mi sinei pwe ngang mi tongek.”10 Ekkei siip, a wor e tonger, ra pwan kinamwe, me ra pwan nom non imwer. Non iten Jises Kraist amen.