![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F9c%2F70%2F9c705e569447fdbd57d24d4ec74f6af2ae8ef0eb%2F9c705e569447fdbd57d24d4ec74f6af2ae8ef0eb.jpeg/full/!250,/0/default)
Ese Menemenoch ren Pekin Ngun
Ach sise menemenoch ren pekin ngun a tongeni pesei kich ne foffor non nuku, tapweno mwirin an ewe Chon Amanau tingor ne fori mi och, me fangeta manauach ngeni I.
Nupwen ai nom non sukunen elementeri, aua fetan ngeni neimw won ew aan mi simen mi pwennieta nepekin ewe chuk. Mi pwan wor ew aan, ese simen, a iteni ewe “aanen at.” Ewe aanen at ew aan non ewe puun mi weneta won ewe chuk. Mi mwoch nge a kon ppan. Nekukunui we, ngang mi sinei pwe ngang mi tongeni fetanta won ew aan ekkewe at ra tongeni. Auchean, ngang mi sinei pwe ua nom non ekkewe fansoun soponon me mi auchea upwe fori mettoch mi weires, usun ekkewe chon akkom mwach—me ua mochen upwe moneta. Iwe fan ekkoch, ua kan ammangeno nukunupen mwichen chiechiei kewe won ewe aan mi simen, ua pwiniti nei sus, me fetan atasi won ewe aanen at. Ua sotuni ne apochokuna pechei.
Nupwen ngang emon nengin non Kinter, ina met ua ekieki pwe upwe fori ai upwe moneta. Iei a sokono ai sinei! Nap seni ai upwe fetanta won anetan ewe chuk non ai atasi, ua sinei pwe ua tongeni amonata pechei ne fetan won ewe aanen pwon ren ai ponuweni tingoren ewe Ngun mi Fel. Ei pokiten ewe Samon, ren Noun soufos, a kokori kich pwe sipwe manau me tumun non ew “napanap mi nap me pin” me sipwe “murinono pwan ekis.”1
Ekkei kokko me ren soufos ach sipwe foffor, fiti ach memef pwe kich mi tongeni fori me winiti mi nap, fan ekkoch a forata non kich met Elter Neal A. Maxwell a aita ngeni “ese menemenoch ren pekin ngun.”2 Ese menemenoch ren pekin ngun a fis nupwen sia anono “met kich[ngeni] “met mi wor rech ewe manamanen met sipwe winiti.”3 Emon me emon kich, ika sipwe wenechar, sipwe mefi sokofesenin ach tufich me ion kich, me ewe tufich me ion sia mochen sipwe winiti. Sia mochen tufich mi nap. Mi wor rech ekkei memef pokiten kich noun Kot fopun me anuon, sia uputiw fiti ewe Saramen Kraist nge sia nom non ew fonufan mi ngaw. Ekkei memef ra feito seni Kot me ra fori ewe mochenin sipwe foffor.
Sipwe pesei memefin ach sise menemenoch ren pekin ngun ewe a akko ngeni napanap mi tekia, nupwen sia esinna me suseni an Setan nipwopom—a etipemwaramwarei kich ne foffor. Iei eu tufuch nupwen Setan a pesei ei sokkun memef. Sia tongeni finata ne fetan won ewe aan mi tekia ewe a emwenikich ne kutta Kot me An kinamwe me chen, are kich mi tongeni ausening ngeni Setan ewe a achoukich ren porousen sisap tongeni naf: sise pisekisek, sise tipachem, sise mesoch, mettochuch meinisin ese naf. Ach sise menemenoch ren pekin ngun a tongeni apochokuna kch—ika apwangapwanga kich.
Foffor non Nuku
Ew aanen ach sipwe esinna ach sise menemenoch ren pekin ngun seni an Setan nipwopom ina epwe ren ach sise menoch ren pekin ngun epwe emwenikich ngeni foffor mi tupwen. Ach sise menemenoch ren pekin ngun esap ew tingor ach sipwe chok fori mettoch mi mecheres are esap emwenikich ngeni riaffou. Ua fen Kaeo pwe nupwen ua ekingawa inisi, use fefeita, me ua kuna pwe a weires ai upwe mefi ewe Ngun.4
Nupwen i emon anuon, Joseph Smith a fokkun apareni an apwangapwang me aureki usun “pwapwan ngunun esemuch.” Non an kapas, “Mi ekiek a fokkun osukosuk, pun ua mefi chou ren ai tipis, me … mefi netipeta pokiten ai tipis me tipisin ewe fonufan.”5Ei a esenipa an epwe ekipwich me noninen.6 En mi esinna ei memef? En mi mefi nuokus me riaffou ren om apwangapwang?
Iwe, Joseph a fori och mettoch. A aporousa pwe a kan soun apasa ngeni pwisin i: Met upwe fori usun?7 Joseph a foffor non nuku. A kun ngeni ekkewe pukefel, aneani ewe tingor non James 1:5, me kun ngeni Kot ren aninis. Ewe nemasepwi a poputani ewe Niwinsefanito. Ua men kinisou ren an Joseph ese menemonoch ren pekin ngun, an memefin nuokus me osukosuk, a pesei ngeni foffor mi tupwen.
Tapweno mwirin ekkewe Memef ne Fori mi Och
Ewe fonufan a kan soun aea ewe memefin menemenengaw pwe ew popun sipwe pwisin ekieki kich, ach sipwe akunnu ach ekiek ngeni nom me ekipwich won ion Ngang, me ion esap Ngang, me met Ngang mi mochen. Ese menemenoch ren pekin ngun a pesei kich ne tapweno mwirin appiruen ewe Chon Amanau, ewe a fein fetan ne fori mi murino.8 Nupwen sipwe fetan won ewe aanen chon kuno, sipwe angei aurouren ngun ach sipwe anisi ekkoch.
Ew porous ua rong ekkoch ier a no a anisiei ne esinna me foffor won ekkewe aurour seni ewe Ngun mi Fel. Sister Bonne D. Parkin, Presetenin Fin Anisi Unus akkom, a aporousa ei porous:
“Susan, I emon chon tete a men angoch. Preseten [Spencer W.] Kimball a nom non an we wart. Non ew Raninfel, Susan a apareni pwe mi wor echo ufan minafo sekit. Seman Susan we a keran moni ngeni ekkoch mangak sinik mi ning. Susan a ekieki pwe ewe mangak epwe och ngeni ew nektai mi ning epwe eponu ngeni ufan Preseten Kimball we minafo sekit. Iwe non Sarinfan a fori ewe nektai. A tukumi non echo toropwe me fetano ngeni imwan Preseten Kimball we.
“Nupwen a fetano ngeni ewe asam, a mwitir kouno me ekieki, ‘Ngang ion ai upwe fori ew nekai fan iten ewe soufos? Eni mi chommong an.’ A ekieki pwe a mwan, a kunsefan pwe epwene no.
“Non na chok fansoun Sister Kimball a suki ewe asam me apasa, ‘O, Susan!’
“Ren an mefi nuokus me saw, Susan a apasa, ‘Ua kuna Preseten Kimball non ufan we sekit non ewe Raninfel. Papa a keran chok moni ekkoch sinik seni New York … iwe ua fori ew an nektai.’
“Me mwen Susan epwe soposopono, Sister Kimball a akounoi, wata poun won afaran, me apasa: ‘Susan, kosap auku ew ekiek mi kirekiroch.’”9
Ua sani ena! “Kosap auku ew ekiek mi kirekiroch.” Fan ekkoch nupwen ua mefi pwe upwe fori och mettoch fan iten emon, ua ekieki ika ew aurour seni ewe ngun ika ew chok ai ekiek. Nge ua chemeni, “Met minne seni Kot a tingorei me pesei aramas pwe repwe fori mi och fansoun meinisin, ina minne, mettoch meinisin minne a tingorei me pesei pwe repwe fori och, me tongei Kot, me angang ngeni I, ra memef me ren Kot.”10
Ika pwe ir aurour seni ewe ngun are ir chok mochenin anins, och mettoch mi och esap namotongaw; pun “tong mi nom feinfeino chok”11—me esap tongeni epwe mwan.
Fan chommong ewe fansoun ese seroch, me sise kan sinei pungun ach kewe kukkun fofforun angang. Nge fan ekkoch, sipwe esinna pwe sia fen pisekin aninis me non poun Kot me sipwe kinisou ne sinei pwe an we Ngun mi Fel a angang non kich a ew esisinen an Kot tipew.
Pwii kana, kich sia tongeni tingor ngeni ewe Ngun mi Fel an epwe pwari ngeni kich “mettoch meinisin met [sipwe] fori,”12 pwan mwo nupwen sia mefi pwe a chommong met sipwe fori. Nupwen sia memef, sipwe nikitano ach angang are amangano met aramas ra mochen sipwe fori pun sipwe annea ngeni emon semirit, churi emon chienach, tumunu noun chon oruch semirit, are angang non ewe tempel. Ousap awewengawaei—Ngang emon chon etetteni mettoch upwe fori, ua sani ai upwe chekieno ekkewe mettoch ua awesir, nge kinamwe a fis nupwen sia sinei pwe ach aramasoch ese nonno ngeni ach fori awesi ach angang. Ponuwen ach sise menemenoch ren ach awesano aurour a siwini napanapen ai ekieki usun “ai fansoun,” me use ekieki pwe aramas ra atai ai fansoun, nge ir popun manauei.
Ese Menemenoch ren Pekin Ngun a emweni Kich ngeni Kriast
Ach sise menemenoch ren pekin ngun a uwei kich ngeni tipetekison are ewe tipemwaramwar a feito seni ach anonno kich nge sise naf. Fefin mi apwonueta ar pwon ra feito non sokopaten sais me napanap; ar famini, mwokutun manauer, me nonnomur mi sokofesen.
Ewer, kich meinisin sisap ukungeni met kich mi tufich ngeni, me mi wor ekkoch ennet non ach sinei pwe anamon sisap naf. Nge ewe porousen ewe kapas allim mi och pwe ren ewe chenin Kot, kich mi naf. Ren an Kraist aninis, sia tongeni fori mettoch meinisin.13 Ekkewe pukefel ra pwonei pwe sipwe “kuna chen ne aninis non fansoun osupwang.”14
Ewe ennet mi amairu pwe ach apwangapwang mi tongeni epwe ew feioch nupwen sipwe tekison me kun ngeni Kraist.15 Ach sise menemenoch a winiti mi pin nupwen sa tekison ne no ngeni Jises Kraist ren mettoch sia mochen, nap seni ach tiperueru ren ach pwisin tongei kich.
Ennetin, an Jises manaman ra kan soun poputa ren an aramas esinna ar mochen, met mi auchea ngenir, nipwakingaw, are nafangaw. Chemeni ekkewe foun pinewa me ekkewe ik? Emon me emon ekkewe chon makkei ewe Kapas allim ra makkei ifa usun Jises a amwongoni ekkewe ngeroun aramas ra tapweno mwirin.16 Nge ewe porous a poputa ren an ekkewe chon kuno esinna ar nafangaw; ra apareni pwe mi chok wor “nimefou pinewa seni barley, me ruemon kukkun ik: nge resap naf ngeni ei ukukun aramas?”17 Ekkewe chon kuno mi pung: ese naf ewe mwongo rer, nge ra ngeni Jises met mi wor rer iwe I a awora ewe manaman.
Ka fen mefi pwe om sinei me niffang rese naf ngeni ewe angang mwach? Ua fen mefi. Nge kich mi tongeni ngeni Kraist met mi wor rech, iwe I epwe apochokuna met sia awora. Met kopwe awora mi nap—pwan mwo fiti om apwangapwang me nipwakingaw—ika kopwe anongonong won chenin Kot.
Ewe ennet pwe emon me emon kich sia tappin arams seni Kot, emon noun Kot.18 Usun chok a for ngeni soufos me mwan me fefin non uruon fonufan, pwan Semach won Nang a akokkota pwe epwe siwini kich.
C. S. Lewis a awewei siwinin manaman non ei napanap: “Aneanei pwe en ew imw mi manau. Kot a tonong pwe epwe ausefani ena imw. Akkom, menin, en mi tongeni weweiti met I a fori. I a apungu ekkewe kokusun konik me akounou ekkewe nichin osun ewe imw me pwan ekkoch; en mi sinei pwe ekkei angang repwe fis iwe kose mairu. Nge mwirin chok A poputa ne fori watten siwin non ew napanap mi fokkun emetek. … [En mi kuna,] A aueta ew imw mi sokono seni ewe ew ka ekieki usun. … Ka ekieki pwe kopwe for ngeni ew kukkun imw: nge I a aueta ew watten imw. A akokkota pwe epwe pwisin feito me nonnom non.”19
Pokiten an ach Chon Amanau we asoren achasefan, sia tongeni tongeni fori ekkewe angang mi nom mwach. Ekkewe soufos ra fen aitikich pwe, nupwen sipwe tota won aanen chon kuno, sipwe nimenimochuno me ren chenin Kraist. Ach sise menemenoch ren pekin ngun a tongeni pesei kich ne foffor non nuku, tapweno mwirin an ewe Chon Amanau tingor ne fori mi och, me fangeta manauach ngeni I. Non iten Jises Kraist, amen.