Feingaw
Non weiresen metekin sosotun fonufan, netipepos ach fetano, o an ewe Chon Amanau chikaren manaman epwe wato reom saram, miritioch, kinamwe, me apinukunuk.
Non March 22, 2016, me mwen kunok wanu nesosor, ru pakutang a chopw non ewe Armaik non Brussels. Elter Richard Norby, Elter Mason Wells, me Elter Joseph Empey ra fiti Sister Fanny Clain ngeni ewe ermaik an epwe fiti sepanin ngeni an we misin non Cleveland, Ohio. Inik me ruemon ra mano, me meinisin ekkewe misineri ra feingaw.
Ewe mi fakkun watte feingawan ina Elter Richard Norby, 66 ierin, a angang fengen me punuwan we, Sister Pam Norby.
Elter Norby a poraus won ena fansoun:
“Muttir chok, ua sinei met a fis.
“Ua achocho ne sa ngeni nenien kinawe, nge ua turuno. … Ua tongeni kuna pwe pechei we a fakkun feingaw. Ua [kuna] Achon, ita pwe usun kewe fasen spaiter, a surutiw seni pei kewe. Ua efi, nge ua esinna pwe esap anut nge ai unuchei a fen kar. Ufei mi pwech a siwin ngeni parapar seni feingawei won nesukuri.
“Nupwen ua weweiti met a keran fis, a wor ei ekiek mi fakkun pochokun, … ewe Chon Amanau a sinei ia ua nom ian, met a keran fis, me [met] ua mefi non ena fansoun.”1
Ekkewe ran mwirin mi weires fan iten Richard Norby me punuwan we, Pam. A annututam seni safei, fiti reirei, paiking, me tipemwaremwar.
Richard Norby a manau, nge manauan epwe siwin. Ruu esop ier mwirin, feingawan ese mwo chikar; mecha a ekkesiwini kinikinin pechan; iteitan fansoun mi sokkono seni me mwen ena fansoun non ewe Armaik non Brussels.
Pwata ei epwe fis ngeni Richard me Pam Norby?2 Ra wenechar ngeni ar pwon mi pin, ra fiti misin akkom non ewe Ivory Coast non Africa, me ra amarata ew famini mi och. Emon a tongeni apasa, “Ese pungoch! Wesen ese pungoch! Ra fangeno manauer fan iten ewe kapas allimen Jises Kraist; ifa usun ei epwe fis?”
Iei ach Manau non ei Fonufan
Inamo porausen epwe sokofesen, ekkewe efeingaw, ekkewe tes me sossot rese kokkot ngeni, won pekin inis me won pekin ngun, ra feito ngeni emon me emon kich. Pokiten iei manauach.
Nupwen ua ekiek non ei soran usun ekkewe chon afanafan non ei chok kinikinin mwichenap, a fat ngeniei pwe pwe ruemon a wor nour semirit me unumon a wor noun nour ra niwin ngeni imwer nang. Ese wor esap samaw me netipechou, me non ei chok wik, emon chon nang won fonufan ewe sia tongei, Sister Barbara Ballard, a mano. Sisap fokkun monnuki an Preseten Ballard kapasen pwarata nesesor ewe.
Sia kutta ren pwapwa. Sia mochen kinamwe. Sia epinukunuku tong. Me ewe Samon a tinatiw chommong efeioch ngenikich. Nge fiti pwapwa, eu mettoch mi pung: epwe wor fansoun, awa, ran, fan ekkoch ier nupwen ngunum epwe feingaw.
Ekkewe pukfel ra aiti pwe sipwe moni ewe mi kipwaw3 me epwe wor “apponu non mettoch meinisin.”4 Jises a apasa, “[Semom] a etinatiw an we akkar won aramas mi ngaw o aramas mi och anonnono chok o a apungatiw ut won ekkewe mi fofforoch o ekkewe mi fofforungaw.”5
Efeingawen ewe ngun esap chok fis ngeni ekkewe mi pisekisek ika woungaw, non eu oreni, eu eif, are eu tappin aramas. Ra feito ngeni meinisin. Ir kinikinin ach kaeo sia weri seni ei manau won fonufan.
Ekkewe Chon Tupwon Ir Resap Imuno
Ai poraus ikenai wesewesen fan iten ekkewe ir mi anneasochisi ekkewe annukun Kot, apwonueta ar pwon ngeni Kot, me, usun chok ekkewe ruemon Norby ika ekkoch mwan, fefin, me semirit non ei mwicheih non unusen fonufan, ra weri sossot me osukosuk mi weires.
Ach feingaw a tongeni feito seni osukosuken fonu are seni aksiten. Ra tongeni feito seni punuwen mwan are fefin ese wenewen, afitikokono manauen punuwan me noun kewe mi nukuchar. Ekkewe feingaw ra feito seni kirochun ngawen ekiek, seni ew samaw mi weiweita, seni weiresin an emon sia tongei a mano, ewe netipengawen emon chon om famini a nikitano an nuku; memmefin anaemon nupwen ese mo wor punuwom; are fitepuku sokkopaten netipengaw, feingaw “[netipechou] ewe mas ese tongeni kuna.”6
Sia weweiti pwe weires mi eu kinikinin manau, nge nupwen ra feito ngenikich pwisin, ra tongeni fakkun weires. Sisap mo niukous, mi namot sipwe monnota. Ewe Aposel Peter a apasa, “Ousap mairu ren ewe riaffou mi weires a tori kemi, usun ita nge och mettoch a keran chok fis ngenikemi.”7 Fitifengen me ekkewe pwapwa mi tikitik, sossot me feingaw mi kiroch a pwan chufengen non kokkoten ewe Sam. Ekkei feingaw, ina mo mi weires, ra fakkun aitikich.8
Nupwen sia aporausa usun manamanen porousen noun Ilaman kewe 2,060 kukkun sounfiou, sia apasa ewe wokisin: “usun ewe kirekirochun Kot, me ren am fokkun mairu, me pwan pwapwan unusen noum kewe sounfiu, ese wor emon aramas me neir a mano.”
Nge a sopweno: “Me ese pwan wor emon aramas mi mano me neir ekkewe rese angei chommong feiengaw.”9Emon me emon nein ekkewe 2,060 anuon ra feingaw, me emon me emon kich sipwe feingaw non maunen manau, ika epwe ren inis, ngun, ika ir me ru.
Jises Kraist Inai Nouch Samaritan Murinno
Nge ousap fangeta, ese nifinifin annonnon feingawen ngunum, ia ra feito me ia, ian chok are inet ra fis, me ifa ukukun taman ra nom, a kefin pwe kosap mano non pekin ngun. Mi kefin pwe kopwe manau non pekin ngun me kopwe manau me anapano non om nuku me epinukunuku Kot.
Kot ese fori ngunuch kewe pwe sipwe aimufesen seni I. Ach Samon me Chon Amanau, Jises Kraist, seni ewe niffangen An we Achasefan, ese chok amanaukich seni mano me musenon ach tipis, seni aier, nge A pwan monnota an epwe amanaukich seni ekkewe netipechou me weiresin ngunuch kewe mi feingaw.10
Ewe Chon Amanau mi Re nouch we Samaria mi Och,11a etto epwe “echikera ekkewe mi netipechou.”12 A feito ngenikich nupwen pwan ekkoch ra nikitikicheno. Ren umoumoch, A awora an safein apochokuna won ach feingaw me a tumunur. A ekiekikich. A tumunukich. A apasa ngenikich, “Feito rei … upwe echikar[akemi].”13
“Me [Jises] epwe engino ngeni metek me riaffou me sokopaten sossot meinisin; … pwe … i epwe wata won inisin ekkewe metek me semwenin noun kewe aramas. … [wata won Inisin ach] apwangapwang, [a ureno[ ren umoumoch.”14
Feito, ami ouse kinamwe, ian chok oua riaffou me ian;
Feito ngeni ewe nenien tong, oupwe fotupukutiw.
Iei wato netipemi mi feingaw; ikkei oupwe aporausa ami weires.
Ese wor feingaw won fonufan minne nang ese tongeni echikara.15
Non eu fansoun watten riaffou, ewe Samon a ureni ewe Soufos Joseph, ekkei mettoch meinisin kopwe weri, me epwe fis ren ochum.16 Ifa usun feingaw epwe fan iten ochun kich? Non ewe weiresin sossotun fonufan, an ewe Chon Amanau manamanen echikara epwe awora saram ngenikemi, weweiti, kinamwe, me epinukunuk.17
Kosap fakkun fangeta
Iotek ren unusen netipom. Apochokuna ami nuku non Jises Kraist, non ennetin I, non an tong. Komochannuk ngeni kapasan kewe: “Ai chen mi naf ngonuk: pun ai manaman mi fakkun pochokun nupwen ka apwangapwang.”18
Chechemeni, aier mi safein ngun mi pochokun.19 Anneasochisi ekkewe annuk me oupwe weri “ewe Chon Anisi,” Chechemeni ewe Chon Amanau a pwon, “Usap nikitikemino: upwe niwinsefaniti kemi.”20
Ewe kinamwen ewe tempel mi ew safei ngeni ewe ngun mi feingaw. Niwinsefanita ngeni imwen ewe Samon ren netipemi mi tekison me ren iten chon om famini fan chommong. Ewe tempel a wewen ngeni eu kukkun fansoun non manauch non pekin fansoun ese much.21
Nenneno mwirum, chechemeni pwe ka pwarata om nimenimoch non ewe manau me mwen ei. En emon noun Kot mi pochokun, me ren An aninis, ka tongeni pworacho non ekkewe maunen ei fonufan. Ka fen fori, me ka tongeni forsefanni.
Nenneno mwom. Om osukosuk me weires me fakkun ennet, nge resap nonnom feinfeino.22 Om rochopwak epwe wesino. Pokiten ewe Nau a pwata sefan “fiti ewe pochokunen chikar non poun.”23
Ekkewe ruemon Norby ra ereniei, “Netipengaw a feito fan ekkoch nge ese mut ngeni an epwe nonnom.”24 Ewe Aposel Paul a apasa, “Am aua neiptechou … nge am ause mo achanu; fan ekkoch aua tipemwaremwar, nge am ause mo epinukunukungaw; mi chommong chon koum ngenikem, nge mi chok wor chienem; fakkun feingaw, nge ause mano.”25Eni kopwe pekus, nge kosap fokkun fangeta.26
Pwan mwo ren om feingaw, kopwe chok anisi ekkoch, kopwe apinukunuku an ewe Chon Amanau pwon: “Nge are emon epwe ponuku manauan fan itei, iwe epwe kuna sefanni.”27 Ewe mi feingaw epwe tumunu feingawen ekkoch ir noun Kot chon nang won fonufan.
Ekiseno chok, sipwe ausening ngeni nouch we soufos mi achengicheng, Preseten Russel M. Nelson, emon mwan mi watte an nuku non Jises Kraist, emon mwanin apinukunuk me kinamwe, Kot mi tongei nge ese keimu seni feingawen ewe ngun.
Non 1995 noun we fopun Emily, nupwen epwene nounou monukon, a semwenin cancer. Mi wor ranin epinukunuk me pwapwa nupwen noun we monukon a uputiw. Nge ewe cancer a niwinsefan, me nour we Emily a mano ru wik mwirin a 37 ierin, a no seni punuwan we me nimon noun kewe mi kukkun.
Non mwichenapen mwichefen, mwirin a mano, Elter Nelson a apasa: “Chonun mesei a suputiw fitifengen me ai mochen pwan fori ekkoch fan iten noum we nengin. … Ika a wor ai manamanen amanausefanni, upwe fen sossot pwe upwe amanaua. … [Nge] Jises Kraist a angei ekkena kii me epwe aea fan iten Emily … me fan iten meinisin aramas non an ewe Samon fansoun.”28
Non ewe maram a no, nupwen auwa chufengen me ekkewe Sounang non Puerto Rico, me an chechemeni ewe chepeniku, Preseten Nelson a fos ren tong me kinamwe:
“[Iei] eu kinikinin manau. Ina popun sia nonnom ikkei. Sia nonnom pwe epwe wor inisich me sipwe weri sossot me tes. Ekkoch tes mi fis non pekin inis, ekkoch non pekin ngun, me ami sossot ikkei mi fis non pekin inis me non pekin ngun.”29
“Ouse fangeta. Aua fakkun mwareitikemi. A pout senikemi chommong ami kana Sounang, nge non meinisin, oua anapano ami nuku non ewe Samon Jises Kraist.”30
“Me ren ach aneasochisi an Kot kewe annuk, sia tongeni kuna pwapwa nein ach feingaw.”31
Chonun Mes Meinisin Repwe Totonueno
Pwi me fefinei kana, ua pwon ngenikemi pwe ami anapano ami nuku non ewe Samon Jises Kraist epwe apochokunakemi me anapano ami epinukunuk. Fan itemi, ekkewe mi nukuchar, ewe Chon Echikaran ngunuch kewe, non pwisin napanapan, epwe echikarata meinisin om feingaw.32 Esap wor feingaw, koum, sossot, netipechou, riaffou, metek—ese nifinifin annonnonun, chenapan, are watte riaffoun—esap weri echipa, kinamwe, me epinukunukucharan I minne poun kewe mi suk me ewe poun mi feingaw epwe etiwakichenong fan mesan. Non ena ran, ewe Aposel John a pwarata, ekkewe mi nukuchar “ra fen ngaseno seni ewe ninni wachemuk”33 repwe uta non “ufer kewe repwe pwechepwech … mwen an Kot we nenien motun king.” Ewe Nam epwe “nom nukunaper … me Kot epwe tonano chonun meser meinisin.”34 Ei ran epwe wareto. Ua pwarata non iten Jises Kraist, amen.