Afanafanen Nepwopwutan
A iei fansoun kaeo ewe kapas allim non imwach kewe aninis epwe feito seni met a fis non ach kewe pranch, wart, me imwan steik.
Atongei pwii me fefinei kana, sia fen mwasangasangeiti ach sipwe chufengen sefan ngeni kemi non ei mwichenapen Mwichefen non ei October. Sia pwarano ach enetin tong me pwapwa ngeni emon me emon ami. Sia unusen kinisow ren ami kewe iotek fan item. Aiwa mefi manamaner. Kinisou!
Sia unusen kinisou ren watten ami angang me fori ekkewe eureur ra kawor non ewe mwichenap onu maram a no. Presetensien Steik non unusen fonufan ra fen kutta kewe pisekin pwarata ar repwe sinei ar repwe fori sefani ekkewe mwichen elter. Mwan non ekkewe mwichen elter fiti fefinach kewe Fin Anisi mi achocho ra fokkun angang weires me iamwiri pwiich me fefinach kewe non echun, nikinik mei manaman. Sia unusen memef ren ami angangech me watten ami wato an ewe Samon tong ngeni ami kewe famini, chon orumw, me chiechiemi kewe me iamwirir usun met I a fori.
Seni ewe mwichenap non ewe April, Sister Nelson me ngang auwa churi chon Mwichefen non ruwanu kinikinin fonufan me won fonuen non ewe saat. Seni Jerusalem tori Harare, seni Winnipeg tori Bangkok, sia fen sinei ami watten nukunuk me pechekunen ami kewe kapasen pwarata.
Am auwa unusen pwapwa ren chochon sarafo ekkewe ra fiti ewe mwichen sarafo an ewe Samon ar repwe ochufengeni ekkewe chon Israel.1 Sia kinisow ngenikemi! Ren ami ouwa achocho me fori ai kewe tungor ngeni kemi non ewe watten mwich an sarafo, ouwa fori kei nikinik ren am meinisin aupwe tapwena mwirimi. Me mwa met watten ochupor ami ekkewe sarafo ouwa fori!
Non kukuton ier, am non ewe chon angangen nonomwun ewe Mwichefen auwa fen kakapasen ew euchean kapas eis: ifa usun ach sipwe uwei ewe kapas allim non mecheresin ningochun, me kewe annuk fiti fengen me ekkewe fofor ese mwuch, ngeni neun Kot meinisin?
Ren Aramas mi Pin non Fansoun Soponon, sia fen eruni me ekieki usun “faan” ren och mettoch a fis non ach kewe imwenipen, a aninis ren met a fis non imwach. Sia mwochen ekesiwini ei nikinik. A iei fansoun kaeo ewe kapas allim non imwach kewe, aninis epwe feito seni met a fis non ach kewe pranch, wart, me imwan steik.
An ach Mwichefen sopwosopwono me watteno non unusen fonufan, chomong chon Mwichefen ra nomw non neni ese wor imwen fel ia—me esapw wor non fansoun nakatam. Uwa chechemeni ew famini ren, pwokiten ei wewe, ra fel non imwer ewe. Uwa eisini ewe inenap ifa usun an sani an no ngeni faan non imwan ewe pwusin. A penuweni, “Uwa sani! Pwunuwei we a kapas eech non imwem iei, pwokiten a sinei pwe epwe efeiochu ewe sakramen ikei iteiten Raninfel.”
Ewe pwopwun mei nomw ren ewe Mwichefen non nakatamen fansoun an epwe anisi ekewe chon Mwichefen ar repwe awateno ar nuku non ach Samon Jises Kraist me An Achasefan, epwe anisir non ar fori me amwochu ar kewe pwon me ren Kot, me ar repwe epwechokuna me rii ar kewe famini. Non ei fonufan mei osukosuk ikanai, ei ese mecheres. Ewe chon kopwut afen awateno an atai ach nuku me kich me ach kewe famini afen mwutirino. Ren ach sipwe manaw non ngunuch, sia mwochen sipwe fori me fiu sefan me kokot epwe anisikich. Pwokiten ei, sia mwochen ach sipwe fori ekkoch kinikinin fofor pwe epwe sopweno me epechekuna eppetin neuch chon Mwichefen me ar kewe famini.
Non chomong ier, chon emweni Mwichefen rafen angang won pekin kaeo ren non faan me non imw an epwe epechokuna famini me emon me emon non imwach kewe sia kaeo ewe kapas alim me an Mwichefen aninisin okot me kaeo ekewe annuk, awateno nuku, me pwapwaiti watenon ach piningeni. Ach fofor non ekei ier ach sipwe epini Raninfel—sipwe fori an epwe amwarar me fori ach ranin piningeni Kot ren ach tong fan Itan—epwe echuno ren ei ekesiwin sipwene apworousa.
Non ei sosoran sipwe pwarana ew minafon kokot mi rerifengen nefinan ach kaeo usun ewe kapas allim non imwach me non ewe Mwichefen. Wisach pwisin sipwe fori met sipwe mamarita non pekin ngun. Me ekkewe pukfel ra afata pwe sam me in repwe wisen aiti nour kewe usun ekkewe nongonong.2 Wisen ewe Mwichefen pwe epwe anisi chon ewe Mwichefen non ar awatteno ar sinei ewe kapas allim.
Elter Quentin L. Cook epwene awewei ekkei auchean ekesiwin. Meinisin chon ewe Mwichen ewe Aewin Presetensi me ewe Mwichen Engon me Ruemen Aposel ra tipeew ngeni me finata ei pworous. Sia unusen kinisou me sinei an ewe Samon anisikich non angangen ei kokot me fofor iei Elter Cook epwe apworousa.
Atongei pwii me fefinei kana, uwa sinei pwe Kot mi manaw! Jises ii ewe Kraist! Iei an Mwichefen ewe A emweni ren An osuni me pwarata ngeni Neun kewe chon angang. Uwa fokkun pwarata non ewe iten Jises Kraist, amen.