Feitto, Rongorong ngeni mongungun emon Soufos

Seni Pisop Dean M. Davies

Aemonun Chon aninis non ewe mwichen chon Nemeni Pisoprik

Nupwen sia arun ngeni non manawach ne rorongorong ngeni me tumunoch ngeni ewe mongungun ewe soufos mi manau, sipwe angei kewe pwonen feioch ese much.

Ren ach kapas ussun ewe Presetenin ewe Mwichefenin Jises Kraist ren Aramas mi Pin non Fansoun Soponon, ewe Samon a awora esinesin:

“Wisen ewe Preseten ren ewe ofesin Pristut mi Napanap epwe wisen nemeni unusen ewe mwichefen, me pwan ussun Moses—

“…Epwe emon chon osini, emon chon pwarata, emon chon chiaku, me emon soufos, a wor ren meinisin ekkewe niffang seni Kot ekkewe a watiw won ewe mokuren ewe mwichefen” (nengeni Doctrine and Covenants 107:91–92; esisin mi kapacheta).

Ua fen feioch ne pwarata chommong ekkewe niffang seni Kot won Noun soufos. Ua mochen upwe aporousa ngeni ami ew mettoch mi pin a fis ngeniei. Me mwen upwe angei wisei we, ua aninis ne kutta nenien koutan ekkewe tempel. Mwirin September 11, 2001, ach feinno arun ewe kinikinin U.S. a tichikino. Pokiten ei, chommong chon mwichefen ra feinno seni Vancouver, Canada ren ruu ngeni unungat awa, nupwen feino ngeni Seattle Washington Temple. Preseten Gordon B. Hinckley, Presetenin ewe Mwichefen non ena fansoun, a ekiekieta pwe ew tempel non Vancouver epwe efeiochu chon ewe Mwichefen. Ew neni a kut a mumuta, iwe mwirin am cheki ekkoch nenien ei Mwichefen, ekkoch neni esap nenien ewe Mwichefen am ouwa pwan cheki.

Am oua kuna ew neni mi mumuta pwe nenien namanam a kan ngeni ewe Anenapen Canada. Ewe neni a fokkun murinno fefetanin ie, a wor murangkain Canada mi ningoch, me sani ew neni ewe a tongeni fateoch ngeni ngoroun chon uwou taraku.

Aua awora sasingin me mapun ewe neni non ewe Mwichen Temple Sites. Preseten Hinckley a mutata pwe aupwene anomu non etipeew me chekiochu ewe neni. Non December non ena ier, aua repotuni sefani ngeni ewe mwich pwe ewe chek a taweno, me aua tingor mumutan am aupwe sopweno ren kamon. Mwirin an a rongorong am ewe repot, Preseten Hinckley a apasa, “Ua mefi pwe upwe katon ei neni.”

Pwan non ena maram, ruu ran mwirin Kirisimas, aua feinno ngeni Vancouver fiti Preseten Hinckley; Preseten Thomas S. Monson; me Bill Williams, emon chon anapanapa koutan tempel. Aua churi Paul Christensen, ewe steik preseten non ewe neni, ewe a wisen uweikem ngeni ewe neni. Mi ekis chochchon me toputop non ena ran, nge Preseten Hinckley a mweteu seni ewe taraku me a poputa ne fetan won unusen ewe neni.

Mwirin am nonnom won ena neni, ua eisini Preseten Hinckley ika mi mochen epwe pwan katon ekkewe ekkoch neni am ouwa pwan ekieki. A apasa pwe ewer, a mochen ena. Ka kuna, ren am nenengeni pwan ekkewe ekkoch, aua tongeni anonno fengeni sokofesenin napanaper.

Sia rokopwan fetan arun Vancouver ne nenengeni ekkewe pwan ekkoch neni, mwirinon am ouwa niwinsefaniti ewe aewin neni. Preseten Hinckley a apasa, “Ei neni a fokkun ningoch.” Mwirin a eis, “Sia tongeni feinno ngeni ewe nenien mwich an Mwichefen ina epwe ew ne ruanu mwain [0.4km] towawan?”

“Ewer, Preseten,” am ouwa ponueni.

Am ouwa tonong sefan non ewe taraku me feinno ngeni ewe nenien mwich mi kan. Nupwen am ouwa tori ewe fan, Preseten Hinckley a apasa, “Okunu ngeni peniefefin me ikei.” Am ouwa kun me tapwei ewe an ussun a urenikem. Ewe an a poputa ne ekis nangeta.

Atun chok an ewe taraku a tori asan ewe, Preseten Hinckley a apasa, “Akouono ewe taraku, akouono ewe taraku.” Iwe a itini peniemwanin ew kinikinin pun me apasa, “Nge met ren ei neni? Ikeia ewe tempel epwe nom ie. Ikeia ewe Samon a mochen ewe tempel ie. Ami mi moni? Ami mi moni?”

Am ouse mo fen nengeni ei neni. A nom towaw seni ewe anenap, me ese nom won tetenin kamo. Nupwen am ouwa ponueni pwe am ouse sinei, Preseten Hinckley a pwan apasa, “Ikeia ewe tempel epwe nom ia.” Am ouwa ekis nonnom ren ekkoch minich mwirin am ouwa feinno ngeni ewe kasoro ren am oupwene niwin ngeni imw.

Ewe ran mwirin, Brother Williams me ngang am ouwa koko ngeni an Preseten Hinckley ewe ofes. I a fen chungani mettoch meinisin won echo chon taropwe: ekkewe aan, ewe fan, kunu ngeni peniefefin ikei, X  a esisina ewe neni ren ewe tempel. A eisinikem ika met am ouwa sinei. Am ouwa ureni pwe ese tongeni epwe fini ew neni epwe kon weires. Ewe neni, nenien unumon aramas: emon seni Canada, emon seni India, me emon seni China! Me ese mumuta pwe nenien manaman.

“Iwe, fori ukukun ami tongeni,” a apasa.

Mwirin ewe manaman a fis. Non ekkoch maram am ouwa nenieni ewe neni, me mwirin ewe teninimwen Langley, British Columbia, a wau mumutan an epwene kouta ewe tempel.

Vancouver British Columbia Temple

Non ai uwa nengen sefani met ei mi fis, a wor tekisosonun ai ekiek ren met ewe uwa kuna pwe nupwen Brother Williams me ngang a wor am watten sukun me chommong ierin am sinenap non neni ika fonu me anapanapen tempel, Preseten Hinckley ese wor an watten kaeo, nge a wor ren ew mettoch mi napanap—ewe nifangen sineochu me osini. I a tongeni an epwe kunaochu ian an Kot tempel epwe uta ian.

Nupwen ewe Samon a annuk ngeni ekewe Souneng akkom non ei kinikinin fansoun ar repwe oueta ew tempel, a affata:

Nge oupwe oueta ew imw fan itei epwe chok ussun ewe napanap minne upwe aiti ngeni ir.

Nge ika noun kewe aramas repwe aueta nge esap ussun ewe napanap minne epwe pwar ngenir … , I esap etiwa (nengeni Doctrine and Covenants 115:14–15).

Ussun ekkewe Souneng akkom, nge pwan iei ussun ren kich ikenai: ewe Samon a pwarano me sopweno ne pwarano ngeni ewe Presetenin ewe Mwichefen ewe napanap minne ewe muun Kot epwe emwen non ikenai. Me, ren nonnomun pusin emon, a awora emwen ren ifa ussun emon me emon kich sipwe emweni manawach, minne ach mokutukut epwe ketiw meren ewe Samon.

Non April 2013 Ua porous ussun ewe pochokun ne amonata forutan sonun ew me ew tempel an epwe foforoch pwe epwe tongeni pochokun ngeni asapwan watte me mettoch epwe tongeni atai. Nge ewe sonun imw ina poputan. Ew tempel a masoweni chommong mettoch mi pochokun mi kochu fengen ussun ekkewe napanap mi fen anapanap me akkom. Ika manauach repwe winiti ewe tempel emon me emon kich sipwe achocho ngeni ach sipwe kauta ussun met ewe Samon a aiti ngenikich (nengeni 1 Corinth 3:16–17), sia tongeni ne eisinikich, “Met mettoch mi pochokun sipwe amosowanong pwe epwe fori manauach epwe murinno, ningeoch, me pochokun ngeni kewe asapwanin ei fonufan?”

Sia tongeni kuna ponuwen ei kapas eis me non ewe Puken Mormon. Ussun ewe Puken Mormon, ewe Soufos Joseph Smith a apasa, “Ua ereni pwi kewe pwe ewe Puken Mormon a unusen pung me nein puk meinisin me won fonufan, me ewe foun nongonongen ach namanam, me emon aramas a tongeni arap ngeni Kot seni an manaueni annukun ei puk, me nein puk meinisin.” (kapasen awewe ngeni ewe Puken Mormon). Non ewe kapasen awewe ngeni ewe Puken Mormon, sia kaeo pwe “ekkewe ra angei pwarata seni ewe Ngun mi Fel pwe ewe Puken Mormon kapasen Kot epwe pwan sinei seni pwan ewe manaman pwe Jises Kraist I ewe Chon Amanauen fonufan, pwe Joseph Smith I noun chon pwarata me soufosun ewe Niwinsefanito, me Ewe Mwichefenin Jises Kraist ren Aramas Mi Pin ina ewe Muu an ewe Samon a pwan forsefanita won ei fonufan.”

Ikkei ekkoch auchean pisekin koutan ach pusin nuku me kapasen pwarata:

1. Jises Kraist I ewe Chon Amanauen fonufan.

2. Ewe Puken Mormon ewe Kapasen Kot.

3. Ewe Mwichefenin Jises Kraist ren Aramas Mi Pin non Fansoun Soponon ina ewe muun Kot won ei fonufan.

4. Joseph Smith i emon soufos, me a wor nouch soufos mi manau won ei fonufan ikenai.

Non ekkewe maram akkom, ua fen ausening ngeni afanafanen meinisin mwichenapen mwichefen minne Preseten Nelson a awora seni ewe fansoun a karan koko ngeni emon Aposel. Ei mokutukut a fen ekesiwini manauei. Nupwen uwa kaeo me ekieki ussun ren 34 ierin an Preseten Nelson sinenap, fatochun me pochokunen itenap a tou seni an kewe afanafan. Ekkei itenap a wewe ngeni ekkewe foun amasowen imw sia porous won pwe pwan kien foun apasowen ach pusin tempel. Ra apachanong nuku non ewe Samon Jises Kraist; aier; papatais ren omusomusen tipis, niffangen ewe Ngunn mi Fel, amanauen ekkewe mi mano me angangen non tempel, aponueta ewe annukun Raninifen kopwe pinini, poputani ren nesoponon non om ekiek, nonnom won ewe an mi pwon. Preseten Nelson a kapas ussun meinisin ren tong me iotek.

Ewe meinapen foun nongonong me foun amasouen ewe Mwichefen me manauach Jises Kraist. Iei an ei Mwichefen. Preseten Nelson i Noun soufos. An Preseten Nelson kewe afanafan a pwarata me pwarano ren tufichich ewe manau me napanapen Jises Kraist. A porous non tong me sineochu nonnomun manauen ewe Chon Amanau me an ewe misin. I a fen pwan awora kapasen pwarata ren ewe kokkon ekkewe soufos mi manau—ekkewe presetenin ewe Mwichefen—fan emwenien ewe a angang ngeni.

Iwe, ikenai, iei ach tufich ne etiwa i pwe noun ewe Samon soufos mi manau on ei fonufan. Sia oruni ne etiwa souemwenin Mwichefen non ewe napanapen eitieta pouch ach sipwe pwarano ach etiwa me aninis. Sia fori ei fitu minich a no. Nge ennetin angangen etiwa a fetanoch nununo seni ei sokkun napanap. Ussun a maketiw non Doctrine and Covenants 107:22, ewe Aewin Presetensi epwe apochokuna ewe epinukunuk, nuku me iotekin ewe mwichefen.” Sia unusen me ennetin etiwa ewe soufos mi manau nupwen sia forata ewe napanapen nukunuk non an kewe kapas, awora ewe nuku ne mokutukut wor, iwe mwirin sia iotek fan iten an ewe Samon epwe sopweno ne efeiochu.

Nupwen uwa ekieki ussun Preseten Russell M. Nelson, uwa angei kinamwe non ekkewe kapas an ewe Chon Amanau nupwen a apasa, Me ika noun kewe aramas repwe rongorong ngeni mongungun, me mongungun noun kewe chon angang ekkewe a finireta pwe repwe emweni noun kewe aramas, nengeni, ennet a apasa ngenir, resap tou seni non nenier (nengeni Doctrine and Covenants 124:45).

Rongorong ngeni me ausening ngeni ekkewe soufos mi manau epwe emwirinoueno pwan mwo ekesiwinin osukosuken non manauach. Sia pochokunono. Sia fokkun nuku me epinukunuk. Sia rong ewe kapasen ewe Samon. Sia mefi an Kot tong. Sipwe sinei ifa ussun sipwe emweni manauach fiti popun.

Ua tongei me etiwa Preseten Russell M. Nelson me ekkewe ekkoch ra fen koko ar repwe soufos, chon osini, chon pwarata. Ua pwarata pwe i a wor ren ekkewe niffang ewe Samon a fen efeiochu ngeni, me uwa pwarata pwe nupwen sia apochokuna ngeni non manauach ne aruni ngenikich ne rongorong ngeni me tumunoch ngeni mongungun ewe soufos mi manau, manauach epwe foruta anongonong won an ewe Samon ewe anapanap ngeni kich, me sipwe angei ekkewe feioch ese much mi pwon ngenikich. Ewe tingor a tou ngeni meinisin. Feitto, rongorong ngeni mongungun emon soufos. Non iten Jises Kraist, amen.