Ewe Pwapwan Aninisoch
Sia pwonei ngeni Samach won Nang pwe sipwe angang ren I me ekkewe ekkoch ren tong me An mochen non mettoch meinsin.
Mwurin ewe mwichenap a no, chommong aramas ra eisiniei ew kapas eis: “Ekkena sea mei kinamwe?” Ai penuweni mei nene iteiten fansoun meinisin. “Kanan sea ramen kinimwe ika kosapw afanafan.” Mei ennet, ika met? Ai we sea ese fen mwo kinamwe non ei mwichenap, nge uwa unusen kinisow ren ewe feiech me ofona ne afanafan ngeni kemi iei nekunion.
Fan ekkoch nupwen sia aninis, sia tongeni momot non sokopaten sea. Ekoch ra kinamwe me ekoch rese, nge sia pwon ngeni Samach non Nang pwe sipwe angang ngeni me ekoch non tong me fori netipan non mettoch meinisin.
Ekoch ier a no, sarafo non ewe Mwichefel ra kaeo pwe “nupwen ka fiti non ewe angangen Kot [nengeni Doctrine and Covenants 4:2], ka fiti ewe watten sai mi nap. Ka anisi Kot ne awateno An angang, me a murino, apwapwa, me ew sine mi amwarar.”1 Iei ew sai mi monota fan itach meinisin—meni ier—me pwan ew sai epwe uwei kich ngen met neuch ewe Soufos afen apasa ren ewe “anen pwon.”2
Nge ngawan chok, inamwo, sia nomw non ew fonufan mei maicha ian aramas rachok tutungor, “Met namwotan ngeniei?” nge sipwefen eis, “Ion upwe tongeni anisi ikanai?” ika “Ifa usun upwe tongeni angangech fan iten ewe Samon non wisei” ika “Uwa fangono meinisin ngeni ewe Samon?”
Ew nenirn appiru non manawei ren angang ese maicha ren Sister Victoria Antonietti. Victoria emon kewe sensen Kinter non ai we pranch non ai wa mamarita non Argentina. Iteiten neonowasun Oruu, nupwen auwa chufengen ren Kinter, a uwow enem chokonet keik. Am meinisin auwa sani ewe keik—nge, meinisin tiwenon ngang. Use sani chokonet keik! Inamwo ika a achocho an epwe amwongoniei ewe keik, iteitan use sani an ewe mwochen.
Ew ran nupwen a amwongoni ewe chokonet keik ngeni ekkewe ekkoch semirit, ua kapas eis ngeni, “Pwata kewe uwow pwan och sokun keik—usun orangei are vanilla?”
Mwurin a ekis takir, a eisiniei, “Pwata kose sotuni ekis? Ei keik a for fiti eoch nofit mei auchea, me uwa pwon ngonuk ika ke sotuni, kopwe sani!”
Uwa nenefetan, me uwa nupwuwei, meinisin ra fokkun sani ewe keik. Uwa tipew ngeni upwe sotuni. Kopwe tongeni ekieki met a fis? Uwa sani! Ina ew fansoun uwa keran sani ew chokonet keik.
Esapw ina tori ekoch ier mwurin uwa sinei met ewe nofit mei pin non an Sister Antoniett ewe chokonet keik. Am me nei kewe auwa no churi inei we iteiten wik. Non ew kei fansoun, ngang me ineiwe auwa mwongo chokonet keik, me uwa ureni ifa usun ai keran pwopwuta ne sani chokonet keik. Iwe apwan opworousa ngeni unusen ewe pworous.
“Ka kuna, Cris,” inei we a apasa, “Victoria me an we famini ese chomong nour moni, me iteiten wik epwe fini nein an epwe moniir won bus me neun kewe fomon ar repwe no fiti Kinter ika epwe kamo nofit an epwe for chokonet keik enen kewe Kinter. Iteitan a fini ewe chokonet keik nap seni ewe bus, me ii me neun kewe ra fetan nap seni ruu mwain [3 km], won an, ikamwo mei raningaw.”
Ena ran uwa unusen kinisow ren an ewe chokonet keik. Unusen auchean, uwa weweiti ewe nofit mei pin non an Victoria we keik ina an ewe tong fan iten kewe a angang fan iter me an angang weires fan item.
Ai uwa ekieki an Victoria we keik a anisi ai upwe chechemeni an angang weires non ewe fansoun kaeo seni ewe Samon ngeni neun kewe chon kaeo nupwen a fetan ngeni nenien mwonien ewe temple. En mei sinei ena pworous. Elter James E. Talmage a aitikich usun kewe 13 [engon me unungat] pwor, me non kei pwor aramas ra wanong ar aninis ren kewe sokun auchea met ra mak won kewe pwor. Jises a katon ewe nainen aninis, a foruta seni chomong sokun aramas. Ekoch ra watiw ar nifang non unusen ar mwochen me ekoch ra watiw ar ren silver me gold mei watte, ren ar mwochen repwe siin, sinei, me mwareitir ren ar kewe aninis.
“Nein kewe chomong aramas a wor emon mei weungaw mi ma seni pwunuwan, iowe … a wanong non ewe pworun nifang ruefew kukun foun bronze kewe ra eita ngeni mites; an ewe aninis a wewe ngeni esopw senis non monien Merika. Ewe Samon a kekeri neun kewe chon kaeo repwe feito ren, a urenir repwe nengeni ewe mei osupwang mei ma seni pwunuwan me an ewe kukun aninis, me a apasa: ‘Upwe ereni kemi pwe ei fefin mi woungaw mi mano punuan, a fakkun watte an asor a isetiw non ewe neenien asor nap senir meinisin. Pun ekkewe ekkoch ra isetiw minne mi somono seni ar pisekisek, nge ewe fefin mi woungaw a isetiw meinisin minne a wor ren, a fangeno meinisin minne epwe manau seni.’ [Mark 12:43–44].”3
Ewe mei ma seni pwunuwan ese pwano pwe mi wor wisan non ewe fansoun. Afen wiseni ew mettoch mei watte auchean: an mwekutukut mei unusech, me a fangono meinisin met mei tongeni fangono. Ewer met a fongono mei kukun seni ekoch, ren unusen netipan nap seni ekkoch, sokoseni ekkoch. Non an ekkoch kuna, met a fangono ese namot, nge an ewe Samon kuna, ewe foforun ekiek me mwochenin netip,4 a fangono meinisin.
Pwii kana, met sia fangono unusan ngeni ewe Samon nge sisapw namanamono? Kich mei fangono ach fansoun me sine pwe kewe ra keran mamarita repwe tongeni kaeo ar repwe tongei ewe Samon me amwochu an kewe annuk? Met kich mei iamwiri kewe unukuch me kewe sia finita pwe sipwe iamwirir ren aninis me unusechun—fangono ar fansoun me pechekun kewe repwe tongeni aa no ekkoch wewe? Met kich mei nomw non kewe ruu auchean annuk—tongei Kot me tongei neun kewe?5Napengeni na tong a pwano non ach anisi aramas.
Preseten Dallin H. Oaks a aitikich: “Ach Samon a fangono inisin non anisi aramas. A aitikich pwe emon me emon kich sipwe tapweno mwurin ren sipwe nikitano ach mwochen mi ngaw pwe sipwe angang ngeni ekkoch.”
A sopwosopwono:
“Ew sokkun nikinik kich mei sinei ren ach sisapw ekieki inisich ren ach angang fan iten ekkoch … ina met kewe iin me sam ra fori fan iten neur kewe. Kewe iin ra riaffow non metek me peutano ar mwochen ren ar neunatiw neur kewe. Kewe sam ra siwini manawer me ar mwochen pwe repwe anisi ar famini. …
“… Sia pwan kinisow ren kewe ra angang ngeni kewe chon famini rese tongeni fori eoch mettoch me kewe iin me sam ra chinap. Esapw ew me nein kei pekin angang a eis, met namwotan ngeniei? Meinisin a eech ach sipwe peutano ach mwochen ren ach sipwe anisi ekkoch. …
“[Me] kei meinisin ra pwarata ewe foforun manau ese much pwe sia pwapwa me unusech nupwen sia fori me angang fan iten met sia fangono, esapw ren met sia angei.
“Ach Samon a aitikich ach sipwe tapwono mwirin ren ach sipwe fangono ren ach sipwe peutano manawach non ach angang ngeni ekkoch esapw namot.”6
Preseten Thomas S. Monson apwan aitikich pwe “nupwen sia nomw fan mesen ach ewe Chon Forikich, esapw eisinikich, ‘Fitu wiis en mei wiseni?’ nge epwe, ‘fite aramas ka anisi?’ Non enetin, kese tongeni tongei ewe Samon tori omw kopwe angang ngeni ren omw angang ngeni neun aramas.”7
Non ew wewe, pwii kana, ese namot ika sia mot won kewe sea mei kinamwe ika ach weires ne momot non mwich won kewe sea mei parang nesekur ewe mwich. Ese pwan namwot ika kich, sipwe tou seni ewe mwich ach sipwe echipa ewe semirit mi kechiw. Met epwe namwot ren ach sipwe mwochen aninis, ren ach sinei kewe sia wisen iamwiri me kapwong ngenir non pwapwa, me pworous ngeni kewe sia momot fengen—ren ach chiechingeniir inamo pwe sise angei ewe kokko ach sipwe iamwirir. Iwe epwe ennetin auchea pwe mettoch meinisin sia fori sipwe fori fiti ewe minen nofit ren angang fiti tong me fangafanogoch.
Uwa sinei pwe ese namwot sipwe fori chokonet keik ach sipwe emon sensen Kinter mi nipwakoch me tupwon, pokiten ewe keik ese namwot. An tong a esenipato met a fori ena met mi auchea.
Uwa pwarata pwe ewe tong a piin non an fangono—an ewe sense fangono me ewe watten me ese mwuch ren ewe Att noun Kot. Uwa pwarata pwe mi manau! Uwa tongei me mwochen upwe watiw tipei ren ai upwe tongei me iamwiri usun Ii mei fori. Non iten Jises Kraist, amen.