Sacheta Mokurom me Pwapwa
Nupwen sia weri mettoch mi weires non napanapan ewe Samon, amo sipwe sacheta mokurach me sipwe pwapwa.
Non 1981, am me ruemon chienei, aua no kukunou non Alaska. Aupwe tori eu konik mi towau me tota won ekkoch ningochun chuk. Eu anen am aupwe pwas aupwe chok uwei ekkoch pisekim, aupwe tukumi pisekim kewe non por, tukumireno non epi, pachapacheta esisin wor epwe wate onuwer, me oturereu nukun asamwachon wam uwe pwe am pwe tori ikewe ie aupwe no ia.
Mwirin am aua tour, aua kut me kut, nge aua netipengaw, pwe ause kuna eu me nein ekkewe por. Mwirin chok aua kuna eu. Ewe a wor eu kukun kas sitof, eu tento, ekkoch okasi, me ekkoch chotan nofitin ampeker—nge ese wor ampeker. Ese wor anen am aupwe fos ngeni ekkoch me ewe fansoun am aupwe niwin ika emon epwe angei kem eu wik mwirin.
Ua kaeo ru mettoch amen auchea ren met a fisingeniei: Ewin, kosapw maneu onom mongo nukun asamwacho. Oruan, fan ekkoch sipwe kuna riaffou.
Napengeni, met sia kan ekieki nupwen sia mefi riaffou sikan “pwata ngang?” Eis pwata, nge, sise tongeni atowawa seni kich riaffou. Ewe Samon a mochen pwe sipwe nikitu ngeni sosot, me A sinei pwe ekkei mettoch meinisin, epwe aiti ngeni kich, me epwe fokkun murino ngeni kich.1
Fan ekkoch ewe Samon epwe ereni kich sipwe fori mettoch mi weires, me fan ekkoch sosotuch sipwe pusin forata ika seni ekkoch. A fen fisi ngeni Nifai ekkei ruu napanap. Nupwen Liai a tingorei noun kewe anuan repwe niwino ar repwe angei ekkewe seleich seni Laban, a apasa, “Nengeni pwium kewe ra ngunungun, ra apasa pwe ew mettoch mi weires minne ua ani echimw ngengir; nge nengeni use mwo echimwa ir, nge pwe ew annuk an ewe Samon.”2 Non eu pwan fansoun, pwin Nifai kewe ra finata pwe repwe auku an pungun finata: “Ra turufiei, pun nengeni, ra fokkun ningeringer, iwe ra fotiei ngeni san, pun ra mochen ar repwe angeiano manauei.”3
Joseph Smith a kuna riaffou, me non ewe kanupus Liberty. Ikewe ie ese fat inet epwe tongeni musou me ia non an riaffou, Joseph a kechiw nouomong, O Kot, ifa ii en?4 Ngang mi nuku pwe ekkoch me neich sia mefi usun met mi fis ngeni Joseph.
Kich meinisin sia kuna riaffou: mano ren ekkewe sia tonger, kaimufesen ren pupunu, emon semirit mi towaw seni ewe kapas allim, samau, sosotun nuku, tou seni angang, are pwan ekkoch riaffou.
Ua unusen ekesiwin nupwen ua rong ekkei kapas seni Elter Neal A. Maxwell seni ewe Mwichen Engon me Ruemon Aposel, a kapas nupwen an we manau riafou ren an ewe kanser. A apasa, “Ua fori ekkoch anononun ekiek me ekkei aninisochun me kinamwen kapas ra tonong non ekieki: ‘Ua ngonuk kanser pwe kopwe asukuna aramas iwe repwe nuku pokiten ir mi kuna om riaffou.’” A sopweno ne aporousa usun eu feioch mi fisingeni ren “napapen met mi fis non fansoun ese much. … Ei wewe ren fansoun ese much a tongeni anisi kich ach sipwe sopweno ne nikitu ngeni ekkewe fansoun enip epwe fokkun weires.”5
An epwe anisi kich ne sopweno ne nikitu ngeni ach manau riaffou ren ei wewe ren fansoun ese much, upwe apasa ruu mettoch. Sipwe kuna riaffou, aewin, ren ach sipwe omusano ekkoch me, oruan, ren ach sipwe fangono manauach ngeni Semach won Nang.
Omusano ekkewe ra eriaffou kich me siwini nonomun [inisich] ngeni netipen Kot”6 mi weires. Akon fen metek nupwen emon chochon ach famini mine a eriafoukich, emon chienach sia kon fitipach ngeni, are fen pusin kich.
Nupwen ua emon chok anuon pisop, ua kaeo usun omusomus nupwen nei we presetenin steik, Bruce M. Cook, a aporousa ewe porous. A awewei:
“Fansoun nesoponon 1970, am me chienei kewe aua fori eu pisnis. Ina mwo am use atai annuk, ekkoch ekiek mi ngaw, kapach fengen me ewe fansoun amen riaffou fetanin mwoni, a efisata am nipwakingaw.
Ekkoch chon isois ra fori ar angangen kapung ren ar repwe angei mine ra nus ren. Nour iwe sou kapung fen pwan emon chon aninis non ai we faminien mwichen pisop. A fokkun weires ai upwe etiwa ewe mwan ewe usun epwe angawano manauei. Ua poputa ne oput me ekieki pwe usapw sani. Mwirin nimu ier am osukosuken kapung, aua nusuni am kewe tufich meinisin, kapachonong imwem we.
“Non 2002, am me punuwei we aua kaeo pwe ewe presetensin steik ikewe ie ngang emon chon aninis epwene siwin. Nupwen am ua sai non mochomochen fansoun asoso me mwen upwe asoso seni ewe steik presetensi, a eisini ei ion upwe fini epwe nei chon aninis ika pwe u koko ngeni emon minefon steik preseten. Use mochen upwe kapas usun, nge achok sopweno ne kapas. Ese mang me mwirin, nge eu it a tonong non ekieki. Nge afen pwan apasa iten ewe sou kapung minne aua ekieki pwe I popun am riaffou non 20 ier me mwan. Nupwen a kapas, ewe Ngun mi Fel a apungano pwe epwe ii emon chon aninis. Upwe tongeni omusano ewe mwan?
“Nupwen Elter David E. Sorensen a ngeni ei ewe kokon angang ren ewe presetenin steik, a ngeni ei eu awa upwe fini ekkewe chon aninis. Fiti surun mesei, ua sinei pwe ewe Samon a fen ngeni ei ewe pwarata. Nupwen ua apasa iten ewe mwan ua ekieki pwe usapw sani, ewe chou, ningeringer, me koput mi nomw rei a morono. Non na fansoun, ua kaeo usun ewe kinamwe a feito seni omusomus ren ewe Achasefan an Kraist.”
Non eu kapas, nei we steik preseten a “ennetin” omusano ii, usun Nifai me nomw.7 Ua sinei pwe Preseten Cook me noun ewe chon aninis ir ruemon souemwenin pristut wenechar ra tong fengen. Ua mochen upwe pwan chok usur.
Ekkoch ier me mwen, nupwen am we osukosuk non Alaska, ua mwitir ne kaeo pwe tipingeni emon met aua fori—ren an ewe pwanet katuru mongo ewe ia mi kiroch ie—ese anisi ewe osukosuk. Nge nengeni, nupwen aua mefi riaffou, ese wor mongo, samau, me anut non puun nupwen akasepwan fan eu chok tento, ua kaeo pwe “ese wor och mettoch God ese tongeni fori.” 8
Serafo, Kot a fori mettoch mi weires ngeni kemi. Emon foppun 14 ierin a fiti eu okokuf basket. A anean pwe epwe fiti basket non high school usun chok pwin iwe watte. Nge afen pwan sinei pwe seman me inan ra koko ar repwe nemeni me emweni unusen ewe missin non Guatemala.
A wareno, a sinei pwe ekkoch an kewe klass repwe fosun Spain, ewe kapas ese mwo awen sine. Ese pwan wor an nengin timen sport non an ewe sukun. A nomw won ewe 14sasar non ewe tenin imw mi ureno ren chon mas. Ren ekkei wewe, ese tongeni an epwe tou nukun akanaemon ren pekin tumun.
Seman me Inan kewe ra kan rongorong an kechiw iteiten nepwin an anut non fitu maram. Ra fokkun netipengaw! Iwe ra finata ar repwene eniwinano ikewe inan we chinap a nom iwe epwe sukun.
Nupwen punuwei we a tonong non rumen noum we nengin we an epwe ereni metewe ra ekieki, a kuna noum we nengin a fotopuku ne iotek fiti ewe Puken Mormon mi suk won ewe pet. Ewe Ngun mi Fel a mongunungun ngeni punuwei we, “Pwe epwe pochokununo,” me punuwei a tou seni ewe rum non mosonoson.
Am use chiwen rong an epwe kechiw sefan. Ren pochokunen ekiek me an ewe Samon aninis, a tongeni pochokun ngeni ekkewe unungat ier.
Nesoponon am we missin, ua eisini nei we nengin ika epwe fori an angangen misineri. Ponuan me ren, “Apw, Papa, ua fen fori.”
Ngang mi tipeeu ngeni mefian we! Nge mwirin onu maram, ewe Ngun mi Fel a apwaeita non eu pwin ren ei ekiek: “Ua kokori noum we nengin epwe fori an angangen missin.”
Ua ponueni “Semei won Nang, akon wate minne a fangano.” Ewe Ngun mi Fel a mwitir ne apungu ei me ua weweiti pwe an angagen misineri a feito seni ewe Samon.
Ua mwitir uwei nei we nengin neno mongon neanowas. Aua sapefengen won ewe chepen, Ua eisini, “Ganzie, en mi sinei pwata sia eto ikei?”
A apasa, “Ewer, Papa. En mi sinei pwe upwe fori ai angangen missin. Use mochen upwe no, nge upwene no.”
Pokiten a fangeta manauan ngeni Semach won Nang, a angang ngeni ren unusen netipan, ngunun, ekiekin me an pochokun. A aiti seman we usun fofforun mettoch mi weires.
Non an Preseten Russell M. Nelson kapasen pesepes ngeni serafo non unusen fonufan, a tingor ekkoch mettoch mi weires ren ekkewe serafo. Preseten Nelson a apasa: “Ai enimuen etiwetiw ngeni kemi ami aupwe sokono seni ewe fonufan. … Ewe Samon a mochen oupwe nikinikin, nouweni, fofforun, me ufoufen noun Jises Kraist chon kuno.”9 Ena a tongeni eu mettoch mi weires, ngang mi sinei pwe oua tongeni fori—fiti pwapwa.
Chechemeni pwe “aramas ra manau, pwe repwe tongeni mefi pwapwa.”10 Ekkei meinisin Liai a kuna, mi chiwen kuna pwapwa. Chechemeni nupwen Alma a “choutiw ren netipechou”11 pokiten ekkewe aramasen Ammonihah? Ewe chon nang a ereni ii, “Feioch en, Alma; iei minne, sachetai mokurom me pwapwa … pun ka fen nukuchar ne anneasochisi ekkewe annukun Kot.”12Alma a kaeo ew ennet mi nap: kich mi tongeni pwapwa nupwen sia anneasochisi ekkewe annuk. Chechemeni pwe nupwen maun me sosot a fis nupwen kaptin Moronai, “ese mwo wor ew fansoun a kon apwapwa me nein ekkewe aramasen Nifai.”13 Sia tongeni me kuna pwapwa nupwen sia kuna riafou.
Ewe Chon Amanau a kuna riaffou: “Iwe ewe fonufan … repwe apungu i pwe ew mettoch ese wor auchean; ina minne repwe wichi i, ina i epwe nikitu ngeni. Ewer, ra ottufeta won, me i a nikitu ngeni, pokiten an kirekiroch me tong me an engino ngeni ekkewe noun aramas.”14
Pokiten ewe tong-kirekiroch, Jises Kraist a riaffouni ewe Achasefan. Pwe niwinin, A apasa ngeni emon me emon kich, “Fonufan epwe eriaffou kemi. Nge oupwe chok epinukunuk! Ua fen okkufatiw fonufan.”15 Pokiten Kraist, sia tongeni okkufu ei fonufan.
Nupwen sia kuna riaffou non an ewe Samon kokkot, sipwe sacheta mokurach me pwapwa. Ren ei tufich mi pin upwe pwarata ngeni fonufan, ua pwarata pwe ach iwe Chon Amanau mi manau me a emweni An Mwichefen. Non iten Jises Kraist, amen.