Ochufengeni Forian kewe Meinisin fan Nemenian Kraist
Ewe manamanen an ewe Chon Amanau we kapas allim epwe ekkesiwini kich me efeiochu kich a eto seni ach ekkipwichi me manaueni an kewe nongonong, annuk, me fofor.
Efoch san ew pisekin angang mi auchea kich meinisin sia weweiti. Ekkewe san ra for seni morun mangak, ira, mecha, ika pwan ekkoch mettoch ra piti fengen efoch me efoch ika fures fengen. Met akon ameseik, ren ekkoch rese fen pechekun ra fen tongeni feuwenewen fengen me ra wesen pochokun. Iwe, pisek mi mecheres ra tongeni ririfengen me fofofengen ra forata efoch pisekin angang mi auchea.
Usun chok efoch san a pechekun ren ekkewe penen mor mi pitifengen, ewe Kapas Allimen Jises Kraist a awora ewe wewenapen ennet me a pwan awora ngeni kich ewe watten feioch nupwen sia rongorong ngeni an Paul we aurour ngeni kich ne “ochufengeni forian kewe meinisin non nang me won fonufan fan nemenian Christ.”1 Auchean, ei ochufengenin ennet mi auchea a nongonong won me a wenewen won ewe Samon Jises Kraist pun I “ewe aan, ewe ennet o ewe manau.”2
Ua iotek pwe ewe Ngun mi Fel epwe asarama emon me emon kich pwe sipwe ekieki ewe nongonongen ewe ochufengeni meinisin forian kewe fan nemenian Kraist sipwe manaueni non anen ach kaeo me manaueni An we kapas allim mi niwinsefanito non manauach.
Eu Fansoun Angei Pwarata
Sia nom non ew fansoun a men murino me a ur ren pwarata ren niwinsefaniton ewe Mwichefen Jises Kraist. Mei wor ew chok popunapan ekkewe porousen ekkesiwin mi fis ikkenai: epwe apochokuna nuku non Semach won Nang me An we kokot me non Noun we At Jises Kraist me An we Achasefan. Ekkewe mwich non Raninfel rese chok mochuno. Nge, iei sia fen anapano ekkewe tufich me wisen emon me emon me famini ar repwe aea ar fansoun ne pinini ewe Sabbath pwe epwe uren pwapwa non imwer me non mwichefen.
Fan ewe April ano, ewe tetenin ekkewe mwichen pristut ese chok ekkesiwin. Nge, auchean me pechekunan mi fang ngeni ewe napanap mi tekia me pin ren ach iamwiri pwich me fefinach.
A chok usun ekkewe morun san mi fures mi winiti efoch pisekin angang mi mammaw me pochokun, ekkei sokkun mokutukut meinisin ir kinikinin ew angnag fengen fan iten an epwe awena tinikenin, aninisin, me angangen an ewe Chon Amanau we Miwchefen mi niwinsefanito ngeni popunapan: ne anisi Kot non An we angang an epwe efisata ewe feifeita me manau ese much ngeni Noun aramas. Ouse mochen ousapw anonga ami ekiek won tichikin ekkewe mokutukutun met a fen esinesin. Sisapw mut ngeni tichikin ekkewe mokutukutun angang epwe afatangaweno ekkewe popunap non pekin ngun ekkesiwin ra fis iei.
Aua mochen pwe nuku non an ewe Sam we kokkot me non an ewe Chon Amanau we angangen angasano epwe wateno non fonufan me pwe an Kot we pwon ese much epwe kauta.3 Wisach chok pwe sipwe aninnis fengen pwe aramas repwe sopweno ne ekkesiwin ngeni ewe Samon me pwe sipwe anapano ach tongfengen me aninnis fengen ngeni pwich me fefinach.
Emwicha me Kaimwu
Fan ekkoch kich sounengin ewe Mwichefen sia emwicha, kaimwu, me manaueni ewe kapas allim non manauach seni ach forata nangataman taropwen tetenin pekin kaeo me fofor sipwe fori. Nge ena sokkun ekkiek mi tongeni osukosuka ach weweiti me kuna. Sipwe tumunuoch site usun ekkewe Pharisee ne nennengeni ekkewe taropwen tichik mi tongeni epwe atowawakicheno seni ewe Samon.
Ewe popun me nimenimoch, ewe pwapwa me kinamwe, me ewe sopwosopwonon ekesiwin me tumun a feito seni ach “fangeta [netipach] ngeni Kot”4 me “angei nikinikin me non nikinikin [mesach]”5 ese tufich pwe sipwe chok angei ren ach sia fori me awesano meinisin ekkewe angangen ngun ita sipwe fori. Nge mwo, ewe manamanen an ewe Chon Amanau we kapas allim epwe ekkesiwini kich me efeiochu kich a eto seni ach ekkipwichi me manaueni an kewe nongonong, annuk me fofor. Nupwen chok sia ochufengen forian kewe meinisin fan nemenian Kraist, fiti ach nennengeniochu I, ewe kapas allim mi ennet a tongeni aninnis ne apochokuna kich ach sipwe winiti minne Kot a mochen kich sipwe winiti6 me nikitu tori nesopwonon.7
Kaeo me Ochufengeni ewe Ennetin Kapas Allim
Ewe kapas Allimen Jises Kraist mi usun echo okkorun ennet men fokkun amwarar ningoch me ennet mi “amwochu [fengen]”8 me pit fengen. Nupwen sia kaeo me ochufengenni pwaratan ekkewe ennetin ewe kapas allim, sia feioch ne kunaoch me wateno ach souneng ren mesach mi tongeni kuna mokutukutun ewe Samon me seningach mi tongeni rong neuwan.9 Me ewe nongonongen ochufengen forian kewe meinisin fan nemenian—pwisin I—a tongeni anisi kich ren ach kewe tichikin ereni ngeni ew mi tipew, chufengen, apachanong, me awesi unusan. Mut ngeniei ai upwe awewe non pekin nongonong pwan pekin Mwichefen usun met ua fen apasa.
Awewe 1. Ewe Aruanun nongonongen achifouwa ew ekkewe nenien apiru mi murino usun ochufengeni forian kewe meinsin non Kraist: “Sia nuku pwe ekkewe aewin nongonongen me angangepin an ewe Kapas Allim: ewin, Nuku non ewe Samon Jises Kraist; oruan, Aier; eunungatin, Papatais ren mono non konik ren omusomusen tipis; eruanun, Ewe nifangen Ngun mi Fel seni iseta paw won mokur.”10
Ennetin nuku a nongonong won ewe Samon Jises Kraist—non I ewe mi pin me Noun ewe Sam we Anaemon me non I me ewe angangen angaseno I a awesi. “Pun a fen apwonueta ekkewe popun ewe annuk, me a nemenano ir meinisin ekkewe a wor ar nuku non i; iwe ir ekkewe a wor ar nuku non i repwe kamwochuno won mettoch mi öch meinisin; ina minne a peni ewe mwokutukut an ekkewe noun aramas.”11 Ach aea nuku non Kraist a wewen pwe epwe wor epinukunuk me sipwe anonga ach tipe pochokun non I pwe I ach Chon Amanau, non Itan, me non An pwon.
Ewe aewin me ewe pwisin niwinin ach apinukunuk non ewe Chon Amanau i aier me kunuseni mi ngau. Nupwen sia anganga ach nuku non me won ewe Samon, sipwe fokkun sape ngeni, feito ngeni, me epinukunuk non I. Iwe, wewen aier pwe sipwe nuku non me epinukunuk won ewe Chon Angasano an epwe fori fan itach minne chok sise tufich ngeni. Kich emon me emon sipwe “unusen anukunuk won ekkewe nimenimochun fofforun i ewe mi manaman ne amanaua kich”12 pokiten seni chok “ekkewe nimenimochun foffor, me umoumochun, me chenin ewe Messiah mi Fel”13 sia tongeni winiti minefon aramas non Kraist14 me niwin sefanino me nonomw ren Kot.
Ewe angang mi pin ren paptaisin mono fan konik ren omusomusen tipis a namwot ngeni kich ach sipwe nuku non I, apinukunuk non I, me tapweno Mwirin. Nifai a afanafana, “Ua sinei pwe ika oupwe tapweo mwirin ewe Nau, ren unusen netip, esap wor fofforun nikatuputup me mwaken me mwen Kot, nge epwe ren ennetin mochen, aier seni ami kewe tipis, pwarata ngeni ewe Sam pwe oua mochen mwarei womi iten Kraist, ren paptais—ewer, ren ami tapweno mwirin ami we Samon me ami Chon Amanau ren ami feitiw non ewe konik, anongonong won an kapas, nengeni, mwirin oupwe angei ewe Ngun mi Fel; ewer, mwirin epwe feito ewe paptais ren ekei me ewe Ngun mi Fel.”15
Ewe annukun iseta pau won mokur ren ewe nifangen Ngun mi Fel a namwot ach sipwe nuku non I, apinukunuk non I, tapweno mwirin I, me feino mwach non I fiti ewe aninisin Ngunun Fel. Usun Nifai a apasa, “Iwe iei … ua sinei seni ei pwe tiwenon chok ika emon aramas epwe nikitu tori nesoponon, ne tapweno mwirin ewe nenien appiru an Noun ewe Kot mi manau, I esap tongeni manau.”16
Ewe aruanun nongonongen achifouwa nuku ese chok esinna ekkewe nongonongen kapas allim me ekkewe annukun ewe niwinsefaniton kapas allim. Nge nengeni, ei kapas mi pin usun nuku mi ochufengeni forian kewe meinisin non Kraist: nuku non I, apinukunuk non I, me tapweno mwirin I, me fiti I ne feino mwach ren I—pwan non I.
Awewe 2. Iei ua mochen upwe awewei ifa usun meinisin kokkotun me angangen Mwichefen ra chufengen non Kraist. Mei wor chommong sokkun awewe sia tongeni pworaus won; upwe chok kapas usun fitu ua finata.
Non 1978, Preseten Spencer W. Kimball a auroura sounengin ewe Mwichefen repwe auweta me apochokunata Zion non unusen fonufan. A auroura ekkewe Souneng pwe repwe nomwetiw non fonuwer kewe me auweta ekkewe steik mi pochokun ren ar repwe ionifengeni ewe faminien Kot me eiti ngeniir usun mokutukutun ewe Samon. Apwan apasa pwe epwe chommong tempel repwe kauta me a pwon epwe effeiochu ekkewe souneng ikkeweia ra kan nonnnomw ia won fonufan.17
Nupwen ekkewe steik ra chommongono, a namwoteno pwe imwan souneng repwe “winiti neni ikeweia chon famini repwe tongei repwe nom non, ikkeweia repwe aochuno manauer me kuna tong, aninnis, kinisou, me apochokun.”18 Anongonon won ena, non 1980, mwichen fan ra kapacheno non ew chok kinikini fansoun ukukun unungat owa pwe epwe “apechekunasefanita wisach kewe ren pwisin kich me ach famini ne kaeo, manaueni, me asukuna ewe kapas allim.”19 Ei a apochokunasefani ewe famini me imw a pwan ennetata non “Ewe Famini: Esinesin ngeni ewe Fonufan” minne Preseten Gordon B. Hinckley a pwarata non 1995.20
Non April 1998, Preseten Hinckley a esinesin usun forutan chommong kukun tempel, iwe a awora ekkewe angang mi pin non imwen ewe Samon minne a kanengeni emon me emon souneng me famini non unusen fonufan.21 Me ekkei tufichin marita non ngun me fefeita mi pwan apechekuneta ren fefeitan pwan non an aramas pwisin ammonata non aion me ren ewe Perpetual Education Fund non 2001.22
Non an we angang, Preseten Thomas S. Monson a sopweno ne apochokuna ekkewe Souneng repwe “cheri aramas” me a afataochu ach tumunu ekkewe mi osupwang me mwenene pwe ina ew wisan ewe Mwichefen seni nang. Sopwenon ewe afataochun angangen amonata non aion, ewe Self- Reliance Services a poputa me non ewe 2012.
Non ekkewe ier ano, ekkewe auchean nongonong ach sipwe fori pwe ewe Raninfen epwe apwapwa me non imw me non fan a fen pwano me apochokun,23 iwe a ammonakicheta ngeni ewe tetenin mwichen ranninnifel mi fen apworaus non ei mwichen mwichenap unus.
Me onu maram a no, ewe mwichen Pristut seni Melkisetek a fokkun pochokun me aweneochuno ren ekkewe kinikinin mwich pwe repwe apwouneweta wiser ne afanafan me iamwir mi tekia me pin.
Ua nuku pwe ewe kokot me fansoun ekkei fofor ra tongeni anisi kich mwirin chommong ier ach sipwe weweiti pwe iei ew angangen tipew me aninnis fengen me esap chok kokkotun kaimwu. “Kot a pwarata ew tetenin fefeitan souneng ren emon me emon me famini seni ekkewe angang mi pin, ekaeo, mwich, me mokutukut epwe nongonong won ewe imw me ewe Mwichefen epwe anisi. Forutan mwichefen me kaworen ekkewe prokram an epwe efeiochu emon me emon kich me famini me nge ese kawor fan iten pusin ar.”24
Ua iotek pwe sipwe tongeni esinna angangen ewe Samon pwe ew angang non unusen fonufan mi anapano non an nongonong won ewe imw me aninnis ren ewe Mwichefen. Ua sinei me pwarata pwe ewe Samon a pwarano me “epwe pwan pwarano chommong mettoch mi amwarar me auchea fan asengesin ewe Muun Kot.”25
Pwon me Kapasen pwarata
Ua poputani ai ei porous seni ai ua esisina ewe pochokun a foruta nupwen ekkewe mor mi pitifengen are fures fengen non efoch san. Non ew napanap usun chok, ua pwon pwe napanonon popun manauach, me manaman epwe pwano ren ach kaeo me manaueni ewe nwinsefaniton ewe kapas allimen Jises Kraist ren ach achocho ne ochufengeni meinisin forian kewe non Kraist-pwan non I
Meinisin tufich me feioch mi auchea ngeni manauach ese much mi poputa non, tufich ren me namwot ren, me a nikitu ren ewe Samon Jises Kraist. Usun Alma a fen pwarata: “Ese wor pwan ew aan are napanap ren minne aramas ra tongeni manau, non chok me seni Kriast. Nengeni, I ewe manau me ewe saramen fonufan.”26
Ua fokkun pwapwa ne apasa ai pwarata fan iten ewe mi pin me ennetin manauan ewe Sam ese Much me Noun we Achengicheng, Jises Kraist. Non ach we Chon Amanau, sia kuna pwapwa. Me non I sia kuna ewe unusen kinamwe non ei fonufan, me manau ese much non en fonufan epwe war.27 Ua pwarata ekkei non ewe it mi pin ewe Samon Jises Kraist, amen.