Wisen ewe Puken Mormon non Ekkesiwin
Sia ionfengeni Isreal ren ewe amuchunon fansoun me sia fori ena angang ren ewe Puken Mormon, ew pisekin angang me nein ekkewe pisekin ekkesiwin mi kon pochokun.
Chommong aramas ikenai ra aureki usun ewe ennetin Kot me usun nefinach Ngeni. Chommong ra chok sinei ekis ika rese sinei och mettoch usun An kokkotun pwapwa. Nap seni 30 ier a no, Preseten Ezra Taft Benson a kuna pwe “unusen ewe … fonufan ikenai ese etiwa pinin ewe Chon Amanau. Ra tipemwaramwarei usun manamanen An uputiw, manauan mi unusoch, me usun ennetin An manausefan mi ning.”1
Non ach ei fansoun kapaseis rese chok anongonong won ach Chon Amanau nge pwan won An Mwichefen—Ewe Mwichefenin Jises Kraist ren Aramas mi Pin non Fansoun Soponon—minne a niwinato sefan me ren ewe Soufos Joseph Smith. Ekkei kapaseis ra kan anonga ewe uruo, asukun, ika mwokutukutun ewe an ewe Chon Amanau Mwichefen.
Ewe Puken Mormon a Anisi Kich ne Marita non Kapasen pwarata
Seni Preach My Gospel, sia annea: “Chechemeni pwe ach weweiti [usun Samach won Nang me An kokkotun pwapwa] a feito seni soufosun ikenai—Joseph Smith me ekkewe mwirin—ekkewe ra angei pwarata seni Kot. Ina minne, ewe aewin kapaseis emon epwe eis epwe ika Joseph Smith ennet i emon soufos, me ena aramas epwe ponuweni ei kapaseis ren an aneani me iotek usun ewe Puken Mormon.”2
Ai kapasen pwarata usun auchean wisen ewe Soufos Joseph Smith a fen pochokununo ren ai ennetin kaeo ewe Puken Mormon: Pwan ew Kapasen Pwarata usun Jises Kraist. Ua fen fori an Moronai tingor ne “tingor ren Kot, ewe Sam Esemuch, non iten Kraist,” ai upwe sinei ennetin ewe Puken Mormon.3 Ua pwarata pwe ngang mi sinei pwe mi ennet. Ena mirit a fen fis ngeniei, usun a fen fis ngonuk, “ren manamanen ewe Ngun mi Fel.”4
Nepoputan ewe Puken Mormon a apasa: “Ekkewe ra angei ei manamanen pwarata [usun ewe Puken Mormon] me ren ewe Ngun mi Fel repwe pwan sinei me ren chok ewe manaman pwe Jises Kraist I ewe Chon Amanauen ei fonufan, pwe Joseph Smith I Noun chon pwarata me soufosun non ekkei fansoun soponon, me pwe Ewe Mwichefenin Jises Kraist ren Aramas mi Pin non Fansoun Soponon an ewe Samon muu a pwan for sefan won ei fonufan, amonnetan ngeni ewe Aruwen Wareto an ewe Messiah.”5
Nupwen ai we emon kukkun misineri ngeni Chile, ua kaeo ew nesen mi fokkun watte usun ekkesiwinin manamanen ew Puken Mormon. Mr. Gonzalez a angang non ew wis mi sufon me non an we mwichefen non chommong ier. A men watte an sinei usun namanam, mi pachenong ew tikri non sukunen namanam. A men fokkun sikaseni an angoch usun paipel. Mi fat ngenikem pwe i emon mi angangoch non namanam.
I mi ennetin sinei usun ekkewe misinerin Ewe Mwichefenin Jises Kraist ren Aramas mi Pin non Fansoun Soponon ren ar feinfetan ne fori ar angang non sopwun we Lima, Peru. A soun mochen epwe churir pwe epwe tongeni asukuner usun ewe Paipel.
Non ew ran, usun ita ew niffang seni nang, ina met a ekieki, ruemon misineri ra akounoi I me won ewe aan me eis ika ir mi tongeni churi i non imwan me porous ngeni usun ekkewe pukefel. Iei an anean a pwonuta! An iotek a ponu. Saingonon, epwene pwar ngeni ekkei at mi morukueno usun muanin ar afanafan. A urenir pwe mi sani ika repwe feito non imwan we pwe repwe porous usun ekkewe pukefel.
A fokkun mwasangasang ren ar repwe chu. A mwoneta an epwe nounou ewe Paipel ne amuani ar nuku. A apinukunuk pwe ewe Paipel epwe affataochu me pwari muanin ar afanafang. A tori ewe pwinin repwe chu, me ekkewe misineri ra fichifich won ewe asam. A fokkun meseik. An we fansoun a wareto.
A suki ewe asam me etiwanong ekkewe misineri non imwan we. Emon ekkewe misineri a ngeni i ew puk mi enuwen araw me apasata ew kapasen pwarata mi ennet pwe i mi sinei pwe ewe puk mi masoweni ewe kapasen Kot. Ewe aruemonun misineri a apachata an kapasen pwarata mi fokkun napanap usun ewe puk, a pwarata pwe a fen chiaku me ren emon soufosun Kot non ei fansoun, itan Joseph Smith, me a afanafana usun Kraist. Ekkewe misinieri amusereno me feino seni imwan.
Mr. Gonzalez a fokkun tipengaw ren ar mwitir feino. Nge a suki ewe puk, me i poputa ne anneani ekkewe peich. A anneani ewe aewin peich. A anneani peich mwirin peich mwirin peich me ese kouno tori mwirin neonowasen ewe ran mwirin. A anneani unusen ewe puk me sinei pwe mi ennet. A sinei met epwe fori. A kori ekkewe misineri, angei ekkewe nesen, fangeta ewe manau mi sinei pwe epwe emon chon Ewe Mwichefenin Jises Kraist ren Aramas mi Pin non Fansoun Soponon.
Ena mwan murino i nei sense non ewe MTC non Provo, Utah. An Brother Gonzales porousen ekkesiwin me ewe manamanen ewe Puken Mormon a men amwarar ngeniei.
Nupwen ua tori Chile, nei we misin preseten, Preseten Royden J. Glad, a tingorei kem aupwe anneani ewe kapasen pwarata an ewe Soufos Joseph Smith mi mak non ewe Joseph Smith—History iteiten wik. A aiti kem pwe ew kapasen pwarata usun ewe Aewin Nemasepwi epwe apochokuna am pwisin kapasen pwarata usun ewe kapas allim me am kapasen pwarata usun ewe Puken Mormon.
Ua ennetin etiwa an we tingor. Ua fen anneani uruon ewe Aewin Nemasepwi; Ua fen anneani ewe Puken Mormon. Ua fen iotek usun mi aurouritiw me ren Moronai me eis “Kot, ewe Sam Esemuch, non iten Kraist”6 ika ewe Puken Mormon mi ennet. Ua pwarata ikenai pwe ngang mi sinei ewe Puken Mormon, usun ewe Soufos Joseph Smith a apasa, pwe mi “unusen pung me nein puk meinisin me won fonufan, me ewe efou foun nongonongen ach namanam, me emon aramas a tongeni arap ngeni Kot seni an manaueni annukun ei puk, me nein puk meinisin.”7 Ewe Soufos Joseph a pwan affata: “Angeiano ewe Puken Mormon me ekkewe pwarata, iwe ifan ach we namanam? Ese wor.”8
An emon pwin Ekkesiwin
Nupwen a murino ach weweiti ion kich me ekkewe popun ewe Puken Mormon, ach ekkesiwin a pochokununo me a kon ennet. Sia pochokununo non ach nikitu ne aneasochisi ekkewe pwon sia fori ngeni Kot.
Ew popunapen ewe Puken Mormon pwe epwe ionfengeni chon Israel mi toropas. Ei ionfengen a ngeni noun Kot kewe meinisin ewe tufichin tonong non ewe aanen pwon me, ren ar apwonueta ekkei pwon, repwe niwin sefan ngeni me mwen ewe Sam. Nupwen sia asukuna aier me papataisei chon siwin, sia ionfengeni Israel mi toropas.
Ewe Puken Mormon a kapas fan chommong usun ewe imwen Israel. Nepoputan ewe Puken Mormon, Nifai a aitikich, “Ren ai we unusenapen popun pwe upwe pesei aramas ar repwe feito ren ewe Koten Abraham, me ewe Koten Isaac, me ewe Koten Jacob, me kuna manau.”9 Ewe Koten Abraham, Issac, me Jacob I Jises Kraist, ewe Koten ewe Testamen Noom. Sia manau nupwen sia feito ren Kraist ren ach manaueni An kapas allim.
Mwirinon, Nifai a makkei:
“Ewer, pwan mwo semei we a kapas chommong usun ekkewe chon Gentile, me pwan usun ewe imwen Israel, pwe repwe wewe fengen ngeni efoch iran olif, ekkewe panan ira repwe kaimuno me repwe paras fetan won unusen ewe fonufan. …
“Iwe mwirin ewe imwen Israel epwe paras fetan repwene pwan ioi sefan fengen; ika, amuchunon, mwirin an ekkewe chon Gentile angei unusen ewe Kapas Allim, ekkewe wesewesen panen ewe iran olif, ika ekkewe mwirimwirin ewe imwen Israel, repwe kapachenong, are feito ngeni ewe ennetin mirit usun ewe ennetin Messiah, nour Samon me nour Chon Angasano.”10
Usun chok, nesopun ewe Puken Mormon, ewe soufos Moronai a achema kich usun ach pwon, a apasa, “ Pwe ousap chiwen nofit fengen, pwe ekkewe pwon mi pin an ewe Sam Esemuch minne a fen fori ngenikemi, O imwen Israel, repwe pwonueta.”11
Ekkewe Pwon mi pin an ewe Sam Esemuch
Met ekkewe pwonen ewe Sam Esemuch a wewe ngeni me ren Moronai? Sia anneani me non ewe Puken Abraham:
Ewe Samon a ureni Abraham pwe itan Siowa me mi sinei ewe nesoponon seni ewe nepoputan me poun mi nom won.
Me I epwe fori mwirimwirin Abraham pwe epwe ew muu mi nap, me epwe efeiochu I nap seni an epwe auku, me fori itan epwe nap nein muu meinisin, me I epwe ew feioch ngeni mwirimwirin, pwe non pour repwe uwei ei angang me ewe Pristut ngeni muu meinisin.”12
Preseten Russell M. Nelson a keran afanafan non ew unusenapen mwich won tv pwe “ennetin ikkei ekkewe ranin soponon, me ewe Samon a amwitiri An angang ne ionfengeni Israel. Ena ionfengen mi kon auchea a fis won fonufan ikenai. Ese wor mettoch mi nonno ngeni non napan, ese wor mi nonno non auchean, ese wor mi nonno ngeni non tekian. Me ika ka fini, ika ka mochen, ka tongeni kopwe apach ei wisan kinikinin mi watte. En mi tongeni kopwe ew watten kinikinin och mettoch mi watte, och mettoch mi nap, och mettoch mi tekia!
“Nupwen sia kapas usun ewe ionfengen, sia chok apasa ei auchean ennet: meinisin noun Samach won Nang semirit, won nang me fonufan, mi auchea repwe rong ewe porousen ewe kapas allimen Jises Kaist mi niwinsefan. Ra finata pwisin ika ra mochen sinei pwan ekkoch.”13
Iei met sia fori kich chon ewe Mwichefenin Jises Kraist ren Aramas mi Pin non Fansoun Soponon: sia kutta ach sipwe fori ewe fonufan an epwe weweiti— me ekkesiwin ngeni—ewe kapas allimen Jises Kraist. Kich ekkewe “chon ionfengen non ranin soponon.”14 Ach misin mi fatoch. Pwi me fefinei, sipwe pwano pwe kich sia ennetin etiwa an Moronai pwon, iotek me angei ponuwan ne sinei pwe ewe Puken Mormon mi ennet, iwe mwirin aporousa ena mirit ngeni ekkoch seni ach kapas me, akkaewin, seni foffor.
Ewe Wisen ewe Puken Mormon non Ekkesiwin
Ewe Puken Mormon a masoweni unusen ewe kapas allimen Jises Kraist.15 A uwei ngeni kich ekkewe pwonen ewe Sam, ewe ika sipwe aneasochisi epwe pwonei ngenikich usun An we niffang mi nap—manau esemuch.16 Ewe Puken Mormon ina ewe foun nongonongen ekkesiwinin noun Samach won Nang at me nengin.
Upwe apasa sefani an Preseten Nelson kapas: “Nupwen oupwe … annea seni ewe Puken Mormon iteiten ran, oupwe kaeo nongonongen ewe ionfengen, ennet usun Jises Kraist, An Achasefan, me unusochun An kapas allim ese pwa me non ewe Paipel. Ewe Puken Mormon ina ionapen ewe ionfengenin Israel. Ennetin, ika ese wor Puken Mormon, ewe pwonen ionfengin Israel esap fis.”17
Upwe asopwano ren ekkei kapas an ewe Chon Amanau nupwen A aiti ekkewe Chon Nifai usun pwonen efeioch: “Ami ekkewe noun ekkewe soufos; me ami seni ewe imwen Israel; me ami chon ewe pwon mi pin minne ewe Sam a fori ngeni sememi kewe, a apasa ngeni Abraham: Iwe me ren mwirimwirum meinisin chon fonufan repwe feioch.”18
Ua pwarata pwe kich at me nengin noun Kot, ekkewe mwirimwirin Abraham, ewe imwen Israel. Sia ionfengeni Isreal ren ewe amuchunon fansoun me sia fori me aea ewe Puken Mormon—ew puk ren an, chufengen me ewe Ngunun ewe Samon, a ina ewe pisekin akkasiwin mi kon pochokun. Sia emwen me ren ewe soufosun Kot, Preseten Russell M. Nelson, ewe a emweni ewe ionfengenin Israel non ach fansoun. Ewe Puken Mormon mi ennet. A fen siwini manauei. Ua pwon ngeni kemi, usun Moronai me chommong soufos me nom, pwe mi tongeni siwini manauom.19 Non iten Jises Krait, amen.