Ewe Sam

Seni Brian K. Ashton

Aruomonun Chon Aninis non ewe Presetensin ewe Sunday School Unus.

Emon me emon neich a wor rech ewe tufichin ach sipwe winiti ussun ewe Sam. Ren ach sipwe fori ei, sipwe iotek ngeni ewe Sam non iten ewe Nau.

Ren unusen manauen punuwei we, Melinda, a achocho ngeni ren unusen netipan an epwe emon noun Jises Kraist chon kuno mi nukuchar. Nge, nepoputan an chok ierin sarafo, a mefi pwe ese nimenimoch ngeni an Samach won Nang we tong me ekkewe feioch pokiten ese weweiti ussun nonnomun. Iwe menochun, Melinda a sopweno ne aponueta ekkewe annuk inamo ika mi mefi netipengaw. Ekkoch ier a no, a wor ekkoch an sinenap minne a anisi neminewe an epwe weweochuti ussun nonnomun Kot, pachenong an tong fan iten noun kewe me an kinisou ren ach pochokun ika mwo ese unusoch ne fori an ewe angang.

A awewei ifa ussun ei a anisi I. “Iei uwa mefi ren ennetin pwe ewe kokkot an ewe Sam mi pung, I a pwisin awora non ach fefeita, me a awora ngeni kich fiti nesen me weweiti pwe sipwe niwin ngeni I. Ua pwisin kuna inisi me ekkoch nap seni an Kot kunakich. Ua tufichin upwe emon sam, afanafan, me angang fiti wachimuken tong nge kukkun nuokus. Ua mefi kinamwe me nukunuk nap seni aurek me tipemwaramwar. Nge ren ai mefi an aramas tipingeniei met ese pung, uwa mefi aninis. Ai nuku a napeno. Ua mefi an Semei we tong iteitan me anononun.”¹

Awora “ew ekiek mi pung ren ununun, me unusochun [Samach won Nang] me an fofor” a namot ngeni angangen nuku a naf ngeni ach sipwe angei manau fefeita.² Ew pungun ach weweiti napanapen Samach Kot won Nang a tongeni siwini ifa ussun ach kuna kich me ekkoch me aninikich ne weweiti ukukun an Kot tong ngeni noun kewe me an wachimuken mochen anisikich ach sipwe winiti ussun I. Ew met ese pung ussun ach sinei ussun napanapan a tongeni ngenikich ach sipwe mefi nge ita sise tongeni ach sipwe niwin sefan ngeni fan mesan.

Ew mettoch uwa mochen upwe angang ngeni upwe afanafana auchean afanafanen ewe Sam epwe mut ngenikich, akaewin ekkewe ra ekieki ika Kot mi tongeikich, ar repwe weweochuti ennetin napanapan me anganga wachimuken nuku non I, Noun we, me An kokkot fan itach.

Ewe Manau Mwen ei Manau Fonufan

Non ewe manau akkom me mwen ei manau fonufan, sia uputiw ussun ngun ngeni samach me inach Nang me nonom rer ussun eu famini.³ Ra sinei kich, aiti kich, me tongeikich.⁴ Sia fokkun mochen sipwe chok ussun Samach won Nang. Nge ren ach sipwe fori, sia sinei pwe sipwe:

1. Angei inisichich mi ning, me ese tongeni mano;⁵

2. Sipwe pupunu me forata famini ren ewe manamanen eriri an ewe pristut;⁶ me

3. Angei meinisin tufichin sinei, manaman, me mettoch ussun napanapen Kot.⁷

Ussun met a pwano, ewe Sam a fori ew kokot pwe epwe mut ngenikich ekkoch mettoch,⁸ ach sipwe angei inisich pwe resap chiwen mano me ningeno non ewe Manausefan; pupunu me forata famini non manauach iei ika, ren ekkewe mi nukuchar ese wor rer ei tufich mwirin manauach iei;⁹ fefeita ngeni unusoch; me mwirin niwinsefan ngeni Samach me Inach non Nang me nonnom rer me ach kewe famini non manau fefeita me pwapwa ese much.¹⁰

Ekkewe pukefel ra eita ngeni ei ewe kokoten amanau.¹¹ Sia kinisou ren ei kokot pwe nupwen a kawor ngenikich, sia puchor ren pwapwa.¹² Emon me emon kich sia etiwa nonnomun ewe kokot, pachenong ekkewe mettoch sia sinei me ekkewe sosotun manauach iei pwe epwe anisikich ach sipwe anapano ach angang ussun Kot.¹³

Manau Non ei Fonfufan

Fansoun manauach iei, Samach won nang a ngenikich ekkewe mettoch sia mochen ach sipwe fefeita non An ewe kokot. Ewe Sam a nounatiw Jises Kraist non pekin futuk¹⁴ me a awora ngeni I aninis an epwe aponueta an ewe angang non ei manau. Samach won Nang epwe pwan anisi emon me emon neich ika sipwe achocho ne aponueta an kewe annuk.¹⁵ Ewe Sam a ngenikich pungun finata.¹⁶ Manauach ra nom non poun, me ach kewe “ran ra fen fat” me “resap anneanir.”¹⁷ Me I epwe eteneki pwe meinisin mettoch ra fisingeni ekkewe mi murinno ra tongei I.¹⁸

Samach Kot won Nang ewe a nifang ngenikich anach mongo,¹⁹ ewe a pachenong ir me ruu ekkewe mongo sia ani me ewe pochokun sia mochen ach sipwe apwoneta an kewe annuk.²⁰ Ewe Sam a ngenikich niffang mi murinno.²¹ I a rongorong me ponueni ach iotek.²² Samach won Nang a tin senikich mi ngaw nupwen sipwe mut ngeni.²³ I a kechiweitikich nupwen sia riaffou.²⁴ Soponon, meinisin ach feioch ra feitto seni ewe Sam.²⁵

Samach won nang a emwenikich me ngeni kich ekkewe sinesin sia mochen anongonong won ach pochokun, apwangapwang, me ach fini pwe sipwe uwaoch.²⁶ Ewe Sam a fonou kich nupwen a tufich pokiten I a tongei kich.²⁷ I emon Mwan mi sinei fon,”²⁸ epwe emwenikich ika sia tingor.²⁹

Samach won Nang ewe a tinato ir me ruu ewe amemef me ewe nifangen ewe Ngun mi Fel non manauach.³⁰ Ren ewe niffagen ewe Ngun mi Fel, ewe ningen—ika miritin, saramen, me manamanen—ewe Sam a tongeni nonnom non kich.³¹ Ika sipwe achocho anapano saram me ennet tori an masach repwe chok awenewen ngeni an Kot ning, Samach Kot non Nang epwe tinato ewe Ngun mi Felin Pwon ach sipwe riri fengen ngeni manau ese much me pwarano mesan ngeni kich—ika non ei manau ika non en manau mwirin.³²

Manau Mwirin Mano

Non ewe nenien ngun mwirin mano, Samach won Nang a sopweno chok ne tinato ewe Ngun mi Fel me tinato misineri ngeni ekkana ir mi mochen ewe kapas allim. I a ponueni iotek me anisi ekkana a nafangaw ar angei sinesin non onnukun an kapas.³³

Ewe Sam a amaratai Jises Kraist me ngeni An manaman an epwe wato manausefan,³⁴ minne a wewen sipwe angei inis ese tongeni mano. An ewe Chon Amanau ewe Amanau me Manausefan a uweisefanikich ngeni mwen mesen ewe Sam, ikewe ie sipwe kapong ren Jises Kraist.³⁵

Ekkana ra wata an nongonong won “ekkewe feiochun, me umoumochun, me chenin ewe Messaia mi Fel”³⁶ repwe angei ningen inisir ussun ewe Sam³⁷ me nonnom ren I “non nonomun pwapwa ese tongeni epwe muchuno.”³⁸ Ina, ewe Sam epwe tonano chonun mesach³⁹ me anisikich ne soposopono won ach ewe sai ach sipwe winiti ussun I.

Ussun ka tongeni kuna, Samach won Nang a tumunukich me nonnom rech fansoun meinisin.⁴⁰

Ewe Napanapen ewe Sam

Ach sipwe winiti ussun ewe Sam, sipwe forata nikinikin nonomun. An Samach won nang unusoch me napanapan mi pachenong ekkewe mi tapweto:

• Ewe Sam I “Esemuch me Fochofoch.”⁴¹

• I mi fokkun unusoch, umoumoch, kirekiroch, weiresitam, me mochen met ekkewe ra murinno ngenikich.⁴²

• Samach won Nang i mi tong.⁴³

• I a amochu An kewe pwon.⁴⁴

• I ese siwin.⁴⁵

• I ese tongeni mwaken.⁴⁶

• Ewe Sam esap chon nifinifin aramas.⁴⁷

• I a sinei mettoch meinisin—fansoun a no, fansoun iei, me fansoun mwach—seni nepoputan.⁴⁸

• Samach won Nang a kon tipachem⁴⁹ senikich meinisin.⁵⁰

• A wor ren ewe Sam manaman meinisin⁵¹ me fori meinisin me wanong non netipan an epwe fori.⁵²

Pwi me fefinei, sia tongeni nukunuk non me wata ach nongonong won ewe Sam. Pokiten a wor ren an sineochu mettoch fochofoch, Samach won Nang a tongeni kuna mettoch sise tongeni. An pwapwa, angang, me ning repwe wato rech manau fochofoch me manau fefeita.⁵³ Mettoch meinisin a fori fan iten tufichich. I a “mochen [ach] pwapwa ese much nap seni pwisin [kich] .”⁵⁴ Me ese pwan mochen [kich] sipwe sinei ew fansoun epwe weires nap seni met a wor ren [ach] tufich ika ren ekkewe [kich] sia tonger.”⁵⁵ Ussun pungunon, I a chok kon ouonam won an epwe anisikich ach sipwe fefeita, nge esap an epwe apungukich me esitakich.⁵⁶

Ach Winiti usun Samach

Ussun noun Kot at me nengin non pekin ngun, emon me emon neich a wor rech ewe tufichin ach sipwe winiti ussun ewe Sam. Ren ach sipwe fori ei, sipwe iotek ngeni ewe Sam non iten ewe Nau.⁵⁷ Sia fori ei ren ach achocho ach sipwe anneasosich ngeni mochenin ewe Sam, ussun ewe Chon Amanau a fori,⁵⁸ pwan ren ach sopweno ne aier.⁵⁹ Ika sia fori ekkei mettoch, sia “angei chen ren chen” tori ach sipwe angei an ewe Sam unusoch⁶⁰ me ra kawor fiti “napanapan, unusochun, me an angangen aninis.”⁶¹

Awora towawen nefinen kich mi manau me met Samach won Nang a winiti, ese amairu an ekkoch repwe mefi pwe winiti ussun ewe Sam mi fakkun weires. Nge ren ena, ekkewe pukefel ra afat. Ika sipwe komochunuk non nuku ngeni Kraist, aier, me kutta ewe chenin Kot ren ach anneasosich, sipwe winiti ussun ewe Sam. Ua angei achimuken kinamwe non ewe ennetin pwe ekkewe ra achocho ne anneasosich repwe angei chen ren chen me amuchunon”angei unusen an Kot ewe chen.”⁶² Pwan usun we chok, sisap winiti ussun ewe Sam seni pwisin ach tongeni.⁶³ Nge, epwe feitto ren niffangen chen, ekkoch chen repwe watte nge napengeni kukkun, pwe epwe kauta won emon me emon tori ach sia angei unusan an unusoch. Nge, pwii me fefinei kana,ennet epwe feito!

Ua tingor ngenikemi oupwe epinukunuk pwe Samach won Nang a sinei ifa ussun an epwe afefeitakemi; kutta an aninis fansoun meinisin; me feinno mwemi fiti nuku non Kraist nupwen mwo om kose mefi ewe tong an Kot.

Mi atte met sise weweiti ussun ach sipwe winiti ussun ewe Sam.⁶⁴ Nge ua tongeni pwarata fiti ennetin pungun pwe achocho ngeni ach sipwe winiti ussun ewe Sam a namot ngeni meinisin asor.⁶⁵ Ekkewe asor sia fori non manauach iei, inamo ika ra fokkun murinno, ese mecheres ar repwe anonno ngeni ewe pwapwa me meseik, me tong sipwe mefi me mwen mesen Kot.⁶⁶ Ika a weires ami oupwe nuku a namot ekkewe asor a wor tingoran ami oupwe fori, ewe Chon Amanau a korikemi, a apasa, “Ouse mo weweiti ussun murinnon ekkewe feioch a wor ren ewe Sam … ra fen moneta fan itemi; … ouse tongeni mwarei mettoch meinisin iei; iwe nge, oupwe pwapwa, pun ngang upwe emwenikemi.”⁶⁷

Ua pwarata pwe Sememi won Nang a tongei ami me mochen ami oupwe nom sefan ren. Non iten Jises Kraist, Amen.

Esinesin

1. Ekkoch uwokisin an ewe chon mak; nengeni pwan D. Melinda Ashton, “The Holy Ghost: Direction, Correction, and Warning” (Brigham Young University Women’s Conference, Apr. 28, 2016), byutv.org.

2. Lectures on Faith (1985), 38.

3. Nengeni “An ewe Famini: Esinesin ngeni ei Fonufan,” Liahona, May 2017, 145; “Mother in Heaven,” Gospel Topics, topics.lds.org.

4. The Soufos Paul a pwarano pwe sia sineiochu ewe Sam iwe ngunuch ir mi chok chiwen mochen kori ngeni Abba,, wewen “Papa,”ew it a kan keimuno fan iten sam ekkewe sia fen nap ach sisiner (nengeni Rome 8:15).

5. Nengeni Doctrine and Covenants 130:22.

6. Nengeni Doctrine and Covenants 132:19–20.

7. Nengeni Matthew 5:48; nengeni pwan 2 Peter 1:3–8.

8. Ekkei napanap ra pachenong tumunochu pisekich kewe akkom (nengeni Abraham 3:26) iwe mwirin non manauach iei sipwe anganga nuku non Jises Kraist me An ewe Achasefan, aier, papatais ren mwono fan konik seni emon a wor ren ewe mumutan pristut an Kot, angei ewe nifangen ewe Ngun mi Fel, me nikitu tori soponon (nengeni 3 Nifai 27:16–20).

9. Preseten Dallin H. Oaks a afanafana: “Ekkoch ra rongorong ngeni ei afanafan repwe ura, ’Nge ngang?’ Sia sinei pwe chommong Aramas mi Pin non Fansoun Soponon ra nimenimoch me murinno nge ese wor ewe tufich me auchea ngeni ar repwe fefeita. Nipich, ese nounou, mano, me mufesen a epeti murinon me amanganon ponuetan ekkewe feioch mi pwon. … Nge ekkei eppet ren chok ekis fansoun. Ewe Samon a pwon pwe non manau esemuch ese wor feioch epwe amam noun kewe at me nengin ekkewe ra aponueta ekkewe annuk, ra ennet ngeni ar kewe pwon, me mochen met mi pung” (“ The Great Plan of Happiness,” Ensign, Nov. 1993, 75).

10. Nengeni Mosaia 2:41.

11. Nengeni Alma 42:5; a pwan iteni ewe kokkotun amanaua (nengeni, awewe, Jacob 6:8) me ewe kokkotun pwapwa (nengeni Alma 42:8, 16).

12. Nengeni Job 38:4–7.

13. Nenengeni, ren awewe, Hebrews 5:8; 12:11; Ether 12:27. Me akkom, ekkoch me nein ekkewe sossot sia mesengeni non manauach iei meni epwe aukuku ach weweiti pwe ir mi tongeni epeti kich seni ach sipwe angei ekkoch ach kewe aneanen feioch mi pwon. Non ekkei kochufengenin ekkewe mettoch, Kot epwe ngenikich kewe feioch mi pwon ika sia nukuchar.

14. Nengeni Luke 1:31–35; John 1:14; 1 Nifai 11:18–21; Guide to the Scriptures, “Jises Kraist,” scriptures.lds.org.

15. Nengeni Doctrine and Covenants 93:4–5, 16–17, 19–20.

16. Nengeni Moses 7:32.

17. Doctrine and Covenants 122:9.

18. Nengeni Rome 8:28.

19. Nengeni Matthew 6:11.

20. Nengeni N. Eldon Tanner, “The Importance of Prayer,” Ensign, May 1974, 50–53.

21. Nengeni Luke 11:10–13; James 1:17.

22. Nengeni Luke 11:5–10; Joseph Smith Translation, Luke 11:5–6 (non Luke 11:5, footnote a); 3 Nifai 13:6.

23. Nengeni Matthew 6:13.

24. Nengeni Moses 7:31–40.

25. Nengeni James 1:17.

26. Nengeni John 15:1–2; Doctrine and Covenants 122:6–7.

27. Nengeni Hebrew 12:5–11; Doctrine and Covenants 95:1.

28. Moses 7:35.

29. Nengeni Alma 37:12, 37.

30. Nengeni John 14:26; 2 Nifaii 31:12.

31. Nifai John 17:21–23, 26; Doctrine and Covenants 93:36.

32. Nengeni Doctrine and Covenants 76:53; 88:67–68.

33. Nengeni 1 Peter 4:6. Elter Melvin  J. Ballard, a afanafan ussun pwata emon mwan a papataisei a choni ewe Mwichefen, a apasa, “A pwa ngeniei pwe mwirimwirin kewe non ewe nenien ngun ra fen etiwa ewe Kapas Annim chommong ier a no me ra ikiotek pwe emon seni ar ewe famini won fonufan epwe suki ewe asam ngenir, me ar kewe iotek ra ponu me ewe Samon afen emweni ekkewe misineri ngeni asamen ewe mwan” (non Melvin R. Ballard, Melvin J. Ballard, Crusader for Righteousness [1966], 250).

34. Nengeni Mormon 7:5–6; see also John 5:21, 26; 1 Corinth 6:14; 2 Nifai 9:11–12; Alma 40:2–3; 3 Nifai 27:14.

35. Nengeni John 5:22; Jacob 6:9; Alma 11:44; Ilaman 14:15–18. Ewe Achasefan an Kraist a awesano meinisin ekkewe osukosuken ewe Turutiwen Adam, pachenong ir me ruu manon pekin inis me pekin ngun, minne ir me ruu sipwe ngas seni an epwe mut ngenikich ach sipwe niwino mwen mesen Samach won Nang. Ekkewe ra aier seni ar kewe tipis repwe nonnom ren ewe Sam me ewe Nau feifeino. Nge, ekkewe rese aier repwe aani weiresin ewe oruen mano, ewe a fis ren ar pusin tipis (nengeni Helaman 14:15–18).

36. 2 Nifai 2:8.

37. Nengeni Doctrine and Covenants 76:56; 88:28–29.

38. Mosaia 2:41.

39. Nengeni Pwarata 7:17.

40. Nengeni Moses 7:30. Samach Kot non Nang a fen sopweno an mamasakich me awora ngeni ekkewe non ewe muun ningen maram ren ewe angangen aninis an Jises Kraist me pwan ekkoch chon non ewe muun ningen akkar (nengeni Doctrine and Covenants 76:77, 87) me ekkewe non ewe muun ningen fuu ren ewe angangen aninis an ewe Ngun mi Fel me chon nang (nengeni Doctrine and Covenants 76:86, 88).

41. Moses 7:35; nengeni pwan Psalm 90:2.

42. Nengeni Psalm 103:6–8; Luke 6:36; Moses 7:30.

43. Nengeni 1 John 4:16.

44. Nengeni Doctrine and Covenants 84:40.

45. Nengeni James 1:17.

46. Nengeni Numbers 23:19.

47. Nengeni Foffor 10:34–35.

48. Nengeni 1 Nifai 9:6; Doctrine and Covenants 130:7.

49. Dictionary.com a awewei tipachem pwe ewe “tufichin kaeo, apungupung, weweoch, me napanap mi nonno ren mwokutukutun ekiek; tufichun sinei ennet, nefinen aramas, pung, wewen mettoch, me pwan ekkoch.” Me “mirit.”

50. Nengeni Abraham 3:19. Jises Kraist ussun emon mi ning me unusoch I a pwan tipachem seni kich meinisin.

51. Nengeni Pwarata 21:22.

52. Nengeni Abraham 3:17.

53. Nengeni Moses 1:39.

54. Richard G. Scott, “Trust in the Lord,” Ensign, Nov. 1995, 17.

55. Richard G. Scott, “Trust in the Lord,” 17.

56. Nengeni John 5:22; Moses 1:39. Setan me pusin kich sia angawakicheno (nengeni Pwarata 12:10; Alma 12:14).

57. Nengeni John 4:23; Doctrine and Covenants 18:40; 20:29.

58. Nengeni 3 Nifai 11:11; Doctrine and Covenants 93:11–19.

59. Aier ina ewe angangen ach sipwe ekesiwini napanapach pwe sipwe winiti ussun Kot. Ina minne, sipwe sopweno ne aier, sisap chok aier nupwen sia “fori och mettoch mi mwan.”

60. Nengeni Doctrine and Covenants 93:19–20.

61. Lectures on Faith, 38; pwan nengeni Moronai 7:48; 10:32–33; Doctrine and Covenants 76:56, 94–95; 84:33–38.

62. Nengeni Doctrine and Covenants 93:20; auchean mi kapacheta.

63. Nengeni Moronai 10:32–33; Doctrine and Covenants 76:69, 94–95.

64. Pwata Kot ese tongeni ika esap pwarano chommong ussun ewe angangen ach sipwe winiti ussun I? Use ennetin sinei popun meinisin. Nge mi chok wor ruu uwa weweiti. Ewe aewin pwe ekkoch mettoch ir mi weires ach sipwe weweiti non pisekich non ei manau (nengeni Doctrine and Covenants 78:17).Meni epwe nenno ngeni ach sotuni ne awewei ewe internet ngeni emon a nom non ekkewe fansoun nom. Ewe masowan me napanapan rese nom. Me ewe oruan ewe niffangen chen ran feitto ngenikich pun sipwe osukosuk me kotongaw ren ach sise sinei.

65. Ewe asor sipwe fori meni epwe wesewesen auchea ach sipwe unusoch (nengeni Joseph Smith Translation, Hebrews 11:40 [non Hebrews 11:40, footnote a]).

66. Nengeni Rome 8:18.

67. Nengeni Doctrine and Covenants 78:17–18.