Meinisin Sipwe Uwei me Pwarata Iten Jises Kraist
Iten ewe Chon Amanau mei unusen auchea me pechekun. Iei chok ew iit epwe tongeni otufichi kich.
Fitu wik ra no, uwa aninis non papataisen ekkoch semirit wanu ieriir. Rafen poputa ne kaeo ewe kapas allimen Jises Kraist seni iner me semer pwan neur kewe sense. Uwan ar nuku non ii afen poputa ne mamarita. Iwe iei ra mwochen repwe tapwono mwurin me tonong non ewe konikin papatais ren ar repwe chochon an ewe Mwichefen. Non ai uwa katon ar mwochen, ngang uwa ekieki ifa ukukun ar weweiti usun ewe ew euchean ar pwonen papatais: ar pwon pwe repwe mwarei iten Jises Kraist.
Seni nepoputan , fan chommong Kot a aiti kich usun euchean ewe iit Jises Kraist non an kokot fan itach. Emon chon nang a aiti semach ewe akom, Adam: “Kopwe fori mettoch meinisin non iten ewe Nau, me kopwe aier me kokori Kot non iten ewe Nau feinfeino chok.”1
Emon soufos non ewe Puken Mormon ren King Benjamin a aiti neun kewe aramas, “Esapw wor ew iit epwe kawor ika pwan ekkoch fofor ika wewen ian omw feioch epwe waroto me ia.”2
Ewe Samon apwan eniwini ei kapas ennet ngeni ewe soufos Joseph Smith: “Nengeni, Jises Kraist ewe iit a kawor meren ewe Sam, me ese pwan wor ekkoch iit mei kawor epwe tongeni amanaua aramas.”3
Non ach fansoun, Preseten Dallin H. Oaks a fen afanafana pwe “ekkewe ra pwari ar nuku non ewe iten Jises Kraist mei pin me tonong non an pwon … ra tongeni angei feiochun an Jises Kraist mano.”4
Samach won Nang a mwochen sipwe fatech renpwe iten nuen we at, Jises Kraist, esap eu iit nein chommong iit. Iten ewe Chon Amanau mei unusen auchea me pechekun.Iei chok ew iit epwe tongeni etufichikich. An achema ei pworous mei ennet iteitan, Samach ewe mei tong a aiti ngeni neun kewe pwe mei wor ew nenien niwin sefan ngeni. Nge an epwe wor ew chok an esapw wewen pwe ach niwin ngeni epwe mecheres. Kot a ureni kich pwe ach foffor mi namwot: “Fan iten ena, mwan meinisin [me fefin] repwe take me pwarata ewe iit minne a kawor meren ewe Sam.”5
Ren ach sipwe angei ekkei manamanen manau a feito seni chok iten Kraist, mi auchea sipwe “etekisona [kich]fan mesen Kot … me feito ren netipechou me niemam … me [sipwe] mochen mwarei [woch] iten Jises Kraist” me sipwe tufichin, usun chienei kewe wanu ierir ra “ketiw ren papatais non an mwichefen.”6
Meinisin kewe ra unusen mochen uwei iten ewe Chon Amanau repwe tufich ngeni me angei ekkewe anukun papatais ar repwe pwarata ngeni Kot ren ar finata.7 Nge papatais ina nepoputan .
Ewe kapas angei esapw kapas ese fiti fofor. Ew kapas mei fiti fofor mei chomong wewen.8 Usun chok, ach pwon pwe sipwe uwei me pwarata iten Jises Kraist epwe fiti fofor mei chomong masowan.
Awewe, ew wewen ewe kapas uwei sipwe uwei ika angei inisin ekkoch, usun nupwen sia angei unumach. Ren ach sia uwei iten Kraist, sia pwan fori me uwei met kewe a aiti ngeni kich, nonomwun, me euchean an tong, unusechun tori non nonomwuch pwe repwe pwan usun kich. Pwokitenaucheanan Preseten Russell M. Nelson ewe tungor ngeni kewe sarafo ar repwe “iotek non ennetin me pechekunen [kutta] ar repwe weweiti met ew me ew iten an [ewe Chon Amanau] wewen kewe sokopaten wis me iit ren emon me emon [ngeniir]”9me kametip won ewe kapasen Kraist non kewe pukfel, akaewin ewe Puken Mormon.10
Pwan ew wewen ewe kapas uwei ach sipwe tipew ngeni emon aramas non ew sokkun angang ika anisi ewe ennetin ew ekiek ika annuk. Nupwen sia uwei ewe iten Kraist, sia tipew ngeni an epwe ach Chon Amanau me tipew ngeni me fori met a aitikich epwe anisi manawach. Non iteiten pwungun finata sia fori, sipwe tongeni uwei an kapas allim pwe mei ennet me manaweni ren unusen netipach, ach tongeni, ach ekiek, me ach pechekun.
Ewe kapas uwei mei tongeni pwan wewe ngeni ach apacha emon ngeni ew iit ika ew popun . Napengeni kich sia fen sinei usun pekin wisach non angang ika wisach ren met mei namot ika ew fofor. Nupwen sia uwei me pwarata ewe iten Kraist, sia mwarei wisach kewe ren enetin chon kuno, sia pwarata fan iten mei namot, me sia “chon pwarata [fan itan] iteiten fansoun meinisin me non mettoch meinisin, me non neni meinisin ia [kich] sipwe nomw non.”11 Preseten Nelson a kekeri “meinisin sarafo nengin me meinisin sarafo aat repwe fiti ewe mwichen sarafon ewe Samon repwe aninis me ochufengeni chon Israel.”12 Me kich meinisin sia unusen kinisow ach uwei ewe kokko seni soufos ne aea iten An we Mwichefen mi niwinsefanito usun mi pwano ngenikich meren ewe Chon Amanau pwusin: Ewe Mwichefen ren Aramas Mi Pin Non Fansoun Soponon.13
Non ach foforun uwei iten ewe Chon Amanau, mi auchea sipwe weweiti popun Kraist me an ewe Mwichefen iir chok ew. Resapw tongeni kaimu fesen. Usun chok, ach nuku ewe Chon Amanau me ach choni an ewe Mwichefen resapw pwan kaimwu fesen. Ika sipwe tipemwaramwar non ach pini ngeni emon, ach pini ngeni ekkoch epwe kukununo, usun epwe fis.
Ekkoch aramas rese mwochen repwe uwei me pwarata ewe iten Jises Kraist me an popun pwokiten ra awewei ngeni pwe ese namwot mei aweires, mei keuk, me ese mwumwuta ngeni ekkoch. Non unusechun, ach uwei me pwarata iten Kraist mei amwusakich me echukicheno. A pwan uweato ewe mwochen sia mefi nupwen sia finata an Kot ewe kokot non ach nuku non ewe Chon Amanau. Ren ei ennetin mwochen, sia tongeni kuna ewe euchean popun ngeni kich me ach sine, an aitikich tong, me ach mamarita non ach eurek a nonomwun ekkoch. Nupwen sia uwei me pwarata iten ewe Chon Amanau, sia enetin kamwochunuk kewe mettoch mei eech me sia tongeni usun ii.14
Mei euchea ach sipwe chechemeni pwe ach uwei me pwarata iten ewe Chon Amanau ew pwon mi finita—a pwopwuta seni ewe pwon sia fori ach sia papatais. Preseten Nelson afen aitikich, “[Ach] finata pwe sipwe tapwono mwurin ewe Chon Amanau ren ach fori ach kewe pwon ngeni me aponueta kewe pwon epwe fangoto fansoun meinisin feiechun ngun me feiech epwe wor.”15 Ew kewe feiechun nang ach uwei iten ewe Chon Amanau ren ach papatais ina ewe an ngeni ewe anukun ewe anen pwon, ach finita. Nupwen uwa eisini emon nein chienei kewe wanu ier met wewen uwei me pwarata iten Kraist ngeni, a penuweni, “Wewen pwe ewe Ngun mi Fel a tongeni nomw rei.” Ewe nengin mei pung.
Sia angei ewe nifangen ewe Ngun mi Fel fansoun sia finita mwurin sa fen nimenim meren ewe angangen papatais. Ewe nifang a ew angangen finata me fansoun ewe Ngun mi Fel epwe nomw rech usun chiechiach fansoun meinisin. Ika sia rongorong ngeni me fori an kukun, mengungu, Epwe anomwukich won ewe anen pwon sia tonong non nupwen ach papatais, a esine ngeni kich nupwen sia mwochen tou seni, me a anisi kich ach sipwe aier me siwin fansoun mei euchea. Ach mwochen mwurin ach papatais ach sipwe anomwu ewe Ngun mi Fel iteitan fansoun meinisin pwe sipwe tongeni echueno ach nonomw nonowmuch non ewe anen pwon. Ewe Ngun mi Fel epwe nomw rech ren chok ukukun manawach mei nimech me ese wor ach tipis.
Ren ei popun , ewe Samon a fen ngenikich ewe an ren ach sipwe fori safan ekkewe nimechun nonomwun ach papatais ren pwan ew kinikinin annuk—ewe sakramen. Iteiten wik sia tongeni “pwarata … pwe [kich] sia mwochen uwei [woch] ewe iten [ewe] Nau”16 sefan ren ach angei esisinen chaan me inisin ach Samon non peuch—ewe pinawa me ewe konik—me sia angeiir me wanong non netipach. Niwinin, ewe Chon Amanau epwe fori an manamanen nimetikich sefan me atufichi kich ach sipwe sopweno ne nonomw ren ewe Ngun mi Fel. Iei ewe nikinikin ewe waten omwusomwusen tipis mei kawor non uchok iten Jises Kraist? Usun chok ach uwei me pwarata itan, A uwei ach tipis me netipechow won Ii, nge peun mei chiwen “eitau ngeni kich”17 an epwe pwenni kich ren an tong.18
Ewe sakramen a ew achem iteiten wiik pwe ach uwei me pwarata iten Jises Kraist ew mettoch sipwe fori iteiten fansoun meinisin me sopweno me finata, esapw ew fofor epwe fis chok non ewe ran ach papatais.19 Sipwe tongeni sopweno me eniwini ach pwapwa “ina ach fang mei pin, ese wor aramas epwe weweiti euchean ei pwon, an ach tipis epwe mwusono me angei inisin me chaan.”20 Ese amairu pwe iteiten neun Kot kewe ra weweiti ewe pechekun, feiechun ngun epwe tongeni waroto seni ar uwei me pwarata iten Kraist, pwapwa ina met ra mefi iteitan me ar mwochen ar repwe chok tonong non ewe pwon ren ar Kot.21
Ach sia fiti ewe anen pwon, ach finata me fofor ach sipwe uwei me pwarata iten Jises Kraist epwe ngenikich ach pechekun “ach sipwe onomwu [itan] epwe mak non[netipach] iteitan.”22 Sipwe tongei Kot me chon oruch me mwochen sipwe iamwirir. Sipwe fori an kewe annuk me mochen sipwe arap ngeni ii ren ach fori pwan ekkoch pwon ngeni I. Nupwen sia apwangapwang me sise tongeni fori met kewe sia mwochen mi tupwen, sipwe tungor ren ewe pechekun ewe a feito chok non itan iwe epwe waroto epwe anisikich. Nupwen sia nikitu non wenechar ewe ran epwe wareto nupwe sipwe kuna me sipwe nomw ren, me sipwe kuna pwe sia winiti usun ii, me sia pwan tongeni niwiniti me nonomw ren ewe Sam.
Ren an ewe Samon pwon: Ion kewe ra “nuku non ewe iten Jises Kraist, me pin ngeni ewe Sam fan itan, me achocho non nuku fan itan tori feinfeino”23 repwe manaw non ewe muun Kot. Uwa fituk, uwa pwapwa pwe ekkei feioch rese aukuk ir mi tufich ren ach wata woch iten Jises Kraist, ewe fan itan me ewe uwa pwarata fan itan, amen.