Ach Ekein kamp ren Nuku
Ngeni ekkewe ra kutta, mutata, angang ngeni, ewe poputan nuku, fan ekkoch ekis me ekis, epwe fis ika niwinsefan.
Pwii me fefinei achengicheng, ese amwarar ach angei soposoponon pwarata seni nang me ren Preseten Russell M. Nelson me nouch souemwenin Mwichefen minne ra tingor ach sipwe manaueni ekkoch napanap mi fo me pin,1 non imw me non fan, ren unusen netipach, ekiekich, me pochokunach?
Met a fen wor ami tufich ne fori och mettoch minne oua mefi pwe ouse mwon ngeni ika naf ngeni nge oua feioch ren ami apwonueta?
A fen fis ngeni ei. Iei ew minnen awewe.
Non ekkewe ier ano, Elter Richard G. Scottt, emon chochon ewe Mwichen ekkewe Engon me Ruemon Aposel, a fokkun umoumoch ne etiwa ei, “Gerrit, en mi mochen om kopwe fitiei ne chunga?
Elter Scott a apasa pwe an chunga ren peinit a anisi ne atona me fori. A fen makkei: “Sotuni om kopwe nipwakoch non foffor, ina mwo ika pungun esap kon murino. … Ewe tufichin fori a tongeni efisata ewe memefin kinisou ren manau me ren met ewe Samon a fen afeiochu ngonuk. … Ika ka finioch, iwe esap anapa ewe fansoun.”2
Preseten Henry B. Eyring a anapanapa an ekiekin chunga pwe a fis me “ren ew memefin tong,” mi pachenong “ewe tongen emon Chon Fori ewe a mochen Noun kewe repwe winiti usun I—repwe fori me aueta.”3 An Preseten Eyring tufichin fori a awora ew “sokonon, kuna non pekin ngun won kapasen pwarata me nuku.”4
An Preseten Boyd K. Packer kewe chunga ra anapanapa ew auchean porousen kapas allim: Kot I ewe Chon Fori ekkewe nang me ewe fonufan me mettoch meinisin non ir, pwe mettochun fonufan ra pwarata usun tettenochun ewe foruta, me mi wor ew unusochun tipew nefinen masowen fonufan, sains, me ewe kapas allimen Jises Kraist.5
Alma a pwarata, “Mettoch meinisin ra esisinata pwe mi wor emon Kot.”6 Nouch kewe Kinter ra konu, “Nupwen ua rong konun emon machang ika nenengeni fan nang mi araw, … ua kinisou pwe ua nom non ei fonufan mi ning Semach won Nang a fori fan itei.”7 Ewe chon mak Victor Hugo a mwareiti amwararen nefinen aramas me mettoch; non ei watten fonufan, seni akkar ngeni man tete. … Ekkewe machang mi chang ra anomu och mettochun Kot rer. …Ekkoch kuchu a usun ew fasen fuu.”8
Iwe ena a aniwini kich ngeni an Elter Scott we tingor.
“Elter Scott,” ua ponuweni, “Ua mochen upwe kon tumunoch me nipwakoch. Ua meseik ne anapanapa non ai ekiek usun chungan Semach won Nang nein kuchuu me fan nang me konik. Nge”—ua kouno—“Elter Scott,” Ua apasa, “ese wor ai nipwakochen sinei ne peinit ren chunga. Ua aureki ika epwe anetipengawok ika kopwe sotuni ne aitiei.”
Elter Scott a amenimen me ota pwe aupwe chu. Non ewe ran a finata , mi amonna ewe toropwe, peinit, me ekkewe purosun peinit. A chungani ekkoch nain me anisiei ne achochonu ngeniei ewe toropwe.
Aua aea an we chunga mi ning a iteni Ekein Kamp ren Tuputiwen Akar. pwe ew minen appiru. Nupwen aua chunga, aua kapas usun nuku—usun nupwen sia nengeni ewe saram me pwichikaren ew ekein kamp, sia suseni ewe rochopwak me mettoch ese fat—usun, non ekkoch pwin mi tam me anamon, ach we ekein kamp ren nuku a ngenikich apinukunuk me fatafatoch. Iwe winimweran a wareto. Ach we ekein kamp ren nuku—ach achechem, mettoch sia weri, me ach nuku non an Kot kirekiroch me umoumoch non manauach—a apochokuna kich non fansoun osukosuk.
Ai kapasen pwarata epwe—ngeni ekkewe ra kutta, mutata, me angang ngeni—ewe poputan nuku, fan ekkoch ekis me ekis, epwe fis ika niwinsefan. Ewe saram epwe wareto, nupwen sia mochen me kutta, nupwen sia tipepos me aneasochisi an Kot annuk, nupwen sia etiwa an Kot chen, echikar, me pwon mi pin.
Nupwen aua poputa ne chunga ren peinit, Elter Scott a peseiei, “Gerrit, ina mwo ika mwirin chok ew nesen kopwe peiniti och mettoch kopwe mochen anomu me chechemeni.” Elter Scott mi pung. Ua aucheani ewe chungan ekein kampen nuku minne Elter Scott a anisiei ai upwe peiniti. Ai tufichin chunga mi chok aukuk, nge ai chechemeni am ekein kamp ren nuku mi tongeni pesei kich non nimu napanap.
Aewin, am ekein kamp ren nuku a tongeni pesei kich ne kuna pwapwa non tufichin fori mettoh mi murino.
Mi wor pwapwa non anean, kaeo, me fori mettoch minafo mi auchea. Ei mi akkaewin ennetin nupwen sia anapano nuku me apinukunuk non Semach won Nang me Noun we, Jises Kraist. Esap naf ach pwisin tongeikich ne angasa kich. Nge an Semach won Nang tongei kich me sineiochu kich nap seni ach tongei me pwisin sinei kich. Kich mi tongeni nuku ewe Samon me sisap apinukunuku met sia ekieki pwe sia sinei.9
Ka fen ewe emon ese ketiw ngeni an emon parin uputiw?
Ka fen pin finita saingonon, are kese fen finita, nupwen ekkewe mwich ra kefin?
Ka fen amoneta ngeni ew tesin sukun, ew interfiun angang, ew tufich ka fokkun mochen—me ka mefi pwe ka tur?
Ka fen iotek fan iten ew nefin ewe, ren ekkoch popun, ese fisioch?
Ka fen weri semweningaw, me punuwom a susonuk, riaffou fan iten om famini?
Ach iwe Chon Amanau a sinei nonnomuch. Nupwen sia aea pungun finata me ren Kot me aea unusen ach tufich non tekison me nuku, nouch Chon Amanau, Jises Kraist, a tongeni amenemenochu osukosuken me pwapwan manau. Achifoua mi pachenong ew mochen me finata ne nuku. Nuku a pwan feito seni ach aneasochisi an Kot annuk, ekkewe repwe afeiochu kich, nupwen sia tapweno mwirin An we aanen pwon.
Nupwen sia mefi, pwe sise fat, anamon, ningeringer, song, tur, tipengaw, ika keimu seni Kot me An Mwichefen mi niwinsefanito, menin epwe nap ach achocho me nuku ne niwin sefan ngeni An we aanen pwon. Nge mi fokkun namot! Ouse mochen feito, ika niwin sefanito, ngeni ewe Samon Jises Kraist! An Kot tong mi pochokun seni ewe senin mano—ren pekin inis me ngun.10 An ach we Chon Amanau ewe Achasefan mi fochofoch. Mi wor ach tipemwaremwar me tur. Fan ekkoch sipwe morukeno. Kot a affata ngeni kich pwe ese nifinifin ia sia nom ia me met sia fen fori, kich mi chok tongeni niwin sefan. Mi chok mwoneta an epwe foropachekicheno.11
Aruwan, ach ekein kamp ren nuku a tongeni peseikich ne iamwir non ekkoch napanap mi fo, unusoch me uren ewe ngun mi Fel.
Ena sokkun iamwir a wato manaman me feiochun pwonen winipos—ikewe sipwe mefi an Kot tong me kutta ne iamwir ngeni ekkoch non ena napanap.
Ngang me Sister Gong aua keran sisinei emon sam me famini ra feioch me ren emon mwanin ewe pristut mi tupwen ewe a feito ren nour we pisop me tingor ika i (ewe pristut brother) mi tongeni epwe chiechi ngeni ewe sam ne asukuna famini. Ewe sam ese pochokun non ewe mwichefen me ese pwapwaiti asukunen famini. Nge, nupwen netipen ewe sam a siwin, I me ei mwanin pristut ra poputa ne churi “ar kewe famini. Mwirin ar churi ew famini, punuwan we—i ese fifiti fan non ena fansoun—a eisini punuwan we ifa usun mettoch. Ewe sam a pwari, “Eni ua fen mefi och mettoch” —mwirin a no ngeni ewe kichen an epwe angei efoch pio.12
Nge ekkei mettoch ra fis mwirin ew me ew. Mettochun tong, angangen iamwir, siwinin netip, klasin amonetan non tempel, no ngeni fan, riri fengenin famini non ewe tempel mi pin. Ekieki usun kinisoun ekkewe semirit me noun nour kewe ngeni semer me iner kewe, me ngeni chiechian we chon iamwir ewe a feito pwe chienan semer we ne tongei me iamwiri ekkoch.
Aunungatin pesepesin ekein kamp ren nuku: nipwakochun pwapwan kapas allim me feioch ra feito nupwen sia kutta ne tongei ewe Samon me monun unukuch ren unusen netipach me ngunuch.
Ekkewe pukefel ra tingor ngeni kich ach sipwe wata ach achocho won ewe rongen tong me angang. Non ewe Testamen nom, Deuteronomy a auroura kich ne tongei ewe Samon ach Kot ren unusen netipach, ngunuch, me pochokun.13 Joshua a pesei, “Oupwe tongeni ewe Samol noumi God, … fori netipan, … aneasochisi an kewe annuk, …nikitu ngeni i o angang ngeni ren unusen netipemi me ngunumi.”14
Non ewe Testamen Sofo, ach Chon Amanau a apasa ekkewe ru watten annuk: “Kopwe tongei ewe Samol om God ren unusen netipom o unusen ngunum o unusen om pochokun; … me tongei monun unukum.”15
Non ewe Puken Mormon: Pwan ew Kapasen Pwarata usun Jises Kraist, King Benjamin a angang “ren unusen pochokunen inisin me ewe tufichin mwokutukutun unusen ngunun” me forata kinamwe non ewe fonu.16 Non ewe Doctrine and Covenants, usun misineri meinisin mi sinei, ewe Samon a tingorei kich sipwe angang ngeni I ren unusen netipach, ach tongeni, ekiek me pochokun.17 Nupwen ekkewe Souneng ra tonong non ewe neni Jackson, ewe Samon a annukur ne epini ewe ranin Sabbath, ren ar tongei ewe Samon ar Kot ren unusen netiper, unusen ar tongeni, ekiek, me pochokun; me non iten Jises Krait oupwe angang ngeni.18
Sia pwapwa non ewe tingor ne ounusa unusen ngunuch ne kutta aan mi nap me pin ne tongei Kot me tongei monun unukuch, me ne apochokuna ach nuku non Semach non Nang me Jises Kraist non netipach me non imwach me non fan.
Aruwanun, ach ekei kamp ren nuku a peseikich ach sipwe forata tettenin manau tupwen mi apochokuna nuku me pekin ngun.
Ekkei oreni mi pin, nikinik mi tupwen, ika tetten kich mi iotek fan iter mi pachenong iotek, kaeo pukefel, echikifen, chechemeni ach Chon Amanau me pwon fansoun angangen ewe sakrament, aea fengen feiochun kapas allim me ren misineri, tempel me uruon famini, me ekkoch angang, makkei ew puken ekiekin ngun, me pwan ekkoch.
Nupwen ekkoch tetten mi tupwen me mochenin ngun ra chufengen, fansoun me esemuch repwe chufengen. Saramen Ngun me manau repwe fis nupwen fofforun mettochun namanam ra uwei kich ngeni Semach won Nang me Ach Chon Amanau, Jises Kraist. Nupwen sia tongei ewe Ngun mi fel me annuk mi makketiw, ekkewe mettochun fansoun esemuch repwe mworetiw woch ngunuch epwe usun amurenipwin seni nang.19 Ren aneasochis iteiten ran me konikin manau, sipwe kuna ponuwan, nuku, me pochokun ne weri osukosuken iteiten ran me tufich ren tipeposun kapas allim, kunaoch, me pwapwa.
Enimuwan, nupwen sipwe foffori ewe tetten mi fatoch ngenikich nupwen sipwe kutta ekkewe napanap mi fo me pin ne tongei Kot me anisikich me ekkoch ach sipwe churi I, ach ekein kamp ren nuku a tongeni peseikich ach sipwe chechemeni unusoch non Kraist, esap non kich ika non fonufan.
An Kot tingor mi uren tong me eni pokiten Jises Kraist I “ewe aan, ewe ennet o ewe manau.”20 Ngeni ekkewe mi mefi chou, A tingor, “Oupwe feito rei,” me ngeni ekkena ir mi feito ren, A pwonei, “Upwe asoso kemi.”21 “Feito ren Kraist, me oupwe unusochuno non I, …tongei Kot ren unusen ami tongeni, ekiek me pochokun, iwe an chen epwe naf ngenikemi, pwe seni an we chen oupwe tongeni unusochuno non Kraist.”22
Non ei pwon “ren an chen oupwe tongeni unusochuno non Kraist” ina pwan ewe aurur, kinamwe, me pwon pwe sia tongeni nikitu ren nuku me apinukunuk non ewe Samon, pwan mwo nupwen mettoch rese fis usun ita sia mochen, tiwenon chok, are sise fich ngeni, esap ren met sia fori, ina mwo ika sia fori unusen ach tongeni.
Non ekkoch fansoun me napanap sia mefi pwe sise fich ngeni, sise fatoch, meni sise nimenimoch. Nge non ach achocho ne tongei Kot me iamwiri chon oruch, sipwe mefi an Kot tong me mettoch mi auchea seni nang fan iter me fan itach non napanap mi fo me pin.
Ren umoumoch, ach iwe Chon Amanau amwasanga me pwonei pwe kich mi tongeni “nikitu fiti tipepos non Kraist, epwe wor ami unusochun saramen apinukunuk, me ew tongen Kot me aramas meinisin.”23 Ewe annukun Kraist, an ach we Chon Amanau Achasefan, me ach unusen aneasochisi An we aanen pwon mi tongeni anisi kich ach sipwe sinei An ennet me angasakich.24
Ua pwarata pwe unusen An kapas allim me An kokkoten pwapwa ra niwinsefanito me aiti kich t me non ewe Mwichefenin Jises Kraist ren Aramas mi Pin non Fansoun Soponon, non pukefel mi pin, me ren soufos seni ewe Soufos Joseph Smith ngeni Preseten Russell M. Nelson ikenai. Ua pwarata pwe An aanen pwon mi emwen ngeni niffang mi nap Semach won Nang a pwonei: “Oupwe weri ewe manau esemuch.”25
Amwo An feioch me pwapwa mi fochofoch epwe pwan ach, nupwen sia apochokuna netipach me ach apinukunuk me nikitu ren ach we ekein nuku non kamp, Ua iotek non ewe it mi monomon me pin Jises Kraist, amen.