An Fefin Anins ren ewe Chusefan ren ekkewe Aramasen Israen
Ua ngenikemi eu tungoren soufos, ami ekkewe fefin non ewe Mwichefen, pwe oupwe siwini ewe fansoun mwach ren ami ochusefani ekkewe aramasen Israel.
A fokkun och ai upwe nonnom remi, fefinei mi acheingicheing me echipor. Naman porausen met a fis ngeniei epwe pwari mefiei usumi me ami tufich seni nang minne a nonnom remi.
Eu ran nupwen ua afanafan ngeni eu mwichen aramas non South America, ua ennetin pwapwa ren itenapen ai afanafan, me non eu fansoun mi auchea, ua apasa “Pokiten ngang inen 10 semirit, ua tongeni ereni kemi ena …” Me mwirin ua sopweno ne osopwano ai afanafan.
Use sinei pwe ua aea ewe kapas in. Ewe chon awewe, a sinei pwe ua mwanino non ai kapas, iwe a siwini ewe kapas in ngeni sam, iwe chon ewe mwich rese sinei pwe ua era pwe ngang emon in. Nge punuei Wendy a rong, me a eminemen ren ai mwanino non ai kapas.
Non ena fansoun, ren ennetin mochenin netipei ai upwe efeiochu fonufan—usun chok emon in a fori—a tou seni netipei. Non ekkewe ier, nupwen aramas ra kapas eis pwata ua finata ai upwe winiti emon chon toktorin safei, met ua punueni mi nonno chok: “Poketen use tongeni finata ai upwe emon in.”
Ouse mochen sinei pwe nupwen ua aea ewe kapas in, use chok kapas usun ekkewe fefin mi fen nonatiw are muti semirit non ei manau. Ua kapas usun meinisin noun Semach won Nang kewe fefin. Iteiten fefin mi emon in pokiten ewe napanapen nang a nonnom rer.
Iwe nepwinei, ren wisei emon seman 10 semirit—tiwemon neingen me emon at—me wisei Presetenin ewe Mwichefen, ua iotek pwe oupwe weweiti meifiei usumi—usun ian ami me mettoch meinisin mi murrino minne oua fori. Ese wor emon a tongeni fori met fefin mi tupwen mi tongeni fori. Ese wor emon a tongeni siwini are kopi aninisen emon in.
Ekkewe mwan ra tongeni pwarata ewe tongen Semach won Nang me ewe Chon Amanau ngeni ekkoch, me ra fori fan chommong. Nge mi wor an fefin tufich mi murrino ar repwe fori—a feito seni nang. Oua tufichin sinei met emon a osupwang ren—me inet mi namwot repwe angei. Oua tongeni churi, aruru, aiti, me apochokuna emon nupwen chok a namwot ngeni.
An fefin kuna mettoch a sokono seni ifa usun mwan ra kuna mettoch, me ennet, ifa usun ami kuna mettoch mi namwot ngenikich! Napanapemi a esenipato ami ekieki usun ekkewe ekkoch akkom, ami ekieki usun met epwe fis ngeni ekkoch pokiten met oupwe fori.
Inach Eve mi acheingicheing—ren an weweiti mi aucheanap usun an Semach won Nang kokkot—a poputani met sia kokkori “ewe Turutiw.” An mirit me met a finata mi weires me an Atam fiti i ren met a finata a amokutuano an Kot kokkotun pwapwa. Ra otufichikich ach sipwe feito fonufan, angei inisich, me pwarata pwe kich sipwe finata ach sipwe angang fan itan Jises Kraist iei, usun chok sia fori me mwen sia uputiw.
Fefinei mi acheingicheing, mi wor ami niffang me napanapen ngun. Nepwinei, ua pesei ngenikemi, ren unusen apinukunukun netipei, pwe oupwe iotek pwe oupwe weweiti ami niffangen ngun—ne apochokuna, aea, me awatteno ekkewe niffang, nap seni oua fen fori me nom. Ren ami fori ei oupwe siwini ewe fonufan.
Pokiten ami fefin, oupwe emweni ekkoch me oupwe eu nenien appiru. Upwe awewe ngenikemi usun ru mettoch aua siwini non ewe mwichenapen mwichefen. Ami, fefinei kana, mi auchea ren ir me ru.
Akkomwan, iamwiri. Ach Chon Amanau, Jises Kraist, i ewe ennetin nenien appiru mi nap ren iamwir. Napengeni, fansoun meinisin fefin ir ra karap ngeni ei nenien appiru nap seni mwan. Nupwen oua ennetin iamwir, oua ausening ngeni mefiemi pwe oupwe anisi emon an epwe anapano an mefi ewe tongen ewe Chon Amanau. Ami mochen iamwir a chok fis me ren fefin mi tupwen. Ua sinei fefin mi iotek iteiten ran, “Ion Ka mochen ai upwe anisi ikenai?”
Me mwen aua pwarata non April 2018 usun ewe napanapen tumunu aramas mi tekia me pin, ekkoch mwan ra chok awesano wiser ne fori sensen famini me ra sopweno ngeni ekkewe ekkoch mettoch repwe fori.
Nge nupwen ami oua kuna pwe emon fefin oua churi a mochen aninis, oua mwitir chok anisi me pwan sopweno aninisin non unusen ewe mwaram. Iwe, seni ina napanapen ifa usun oua fori wisen chon amwa a esenipato ach siwinita ngeni iamwir.
Oruan, non ewe mwichenapen mwichefen, sia pwan siwini tetenin ekkewe mwichen ewe Melchizedek Pristut. Nupwen aua ekikei ifa usun aupwe anisi ekkewe mwan non ewe Mwichefen ar repwe nipwakoch ne fori wiser, aua ekieki usun met ekkewe Fin Anisi mi fori.
Non Fin Anisi, fefin mi sokopat ierer me kinikinen manauer ra chufengen. Iteiten kinikinen manauach mi sokofesin ekkewe sossot, nge, ami oua nomofot fengen, iteiten wik, oua chufengen, oua mamarita me aiti ewe kapas allim fengen, me oua ennetin efeiochu ewe fonufan.
Iei, ren ach appiru ami, chon ewe Melchizedek Pristut ir chon ewe mwichen elter. Ekkei mwan seni 18 tori 98 ierer (are pwan feita), mi pwan sokopat met a fis ngeniir non ewe pristut me Mwichefen. Ekkei mwan ra tongeni apochokuna ar pwipwi fengen, kaeo fengen, me anapano ar tufichin efeiochu aramas.
Non ewe June, Ngang me Sister Nelson aua kapas ngeni ekkewe serafo non ewe Mwichefen. Aua tungorer ar repwe fiti an ewe Samon serafo sounfiu ar repwe aninis ren ewe chusefan ren ekkewe aramasen Israel won ekkewe ru epekin ewe eppet. Ei chusefan ew watten okuf, ewe watten mokutokut, meewe watten angang won fonufan ikenai!1
Fefin mi namwot ngeni ei angang, pokiten fefin ra siwini fansoun mwach. Iwe nepwinei, upwe ngenikemi, ekkewe fefin chon ewe Mwichefen, eu tungor seni ewe soufos, pwe oupwe siwini ewe fansoun mwach ren ami aninis ren ewe chusefan an ekkkewe aramasen Israel.
Ifa usun oupwe tongeni poputa?
Upwe ngenikemi ruanu tungor:
Aewin, ua tungoreikemi oupwe asoso seni ami katon social media usun ekkewe mettoch seni internet ukkun 10 ran me seni ekkoch sokkun mettoch won fon are komputer minne a esenipato ekiek mi ngau me nimingau. Iotek pwe oupwe sinei met oupwe asoso seni non ami asoso seni ekkei mettoch. Naman oupwe mairu ren met epwe fis ngenikemi non ekkei 10 ran. Met oupwe kuna mwirin oua asoso seni ekkewe mettochun fonufan minne a efeingaua ngunumi? Mi sokofesen met oua fori ren ami fansoun me pochokun iei? Met mi auchea ngenikemi mi siwin—ina mo pwe mi chok kukkun? Ua pesei ngenikemi oupwe maketiw me anganga ewe pwarata oua angei.
Oruan, ua tungor ngenikemi oupwe anneani ewe Puken Mormon seni iei tori nesoponon ewe ier. Ina mo pwe ita epwe weires oupwe fori fitifengen ren mettoch meinisin oua fori non manauemi, ika oupwe etiwa ei tungor ren ennetin netipemi, ewe Samon epwe anisikemi pwe oupwe tongeni fori. Iwe, nupwen oua anneani, ua pwon pwe nang epwe suk ngenikemi. Ewe Samon epwe efeiochu kemi ren pwan och memmef me pwisen pwarata.
Nupwen oua anneani, ua pesei ngenikemi oupwe esina ekkewe wokisin mi kapas usun ewe Chon Amanau. Iwe, oupwe ennetin achocho ami oupwe kapas usun Kraist, pwapwaiti Kraist, me afanafan usun Kraist ren ami famini me chienemi.2 Ami me ir oupwe karap ngeni ewe Chon Amanau ren ami fori ei. Me mettoch non manauemi epwe siwin, me pwan manaman, epwe poputa ne fis.
Ach pwarata ewe siwin nesesor ewe usun ewe minafoun kokkotuen mwich non Raninfel me ekkewe nesen repwe anongonong non imw, me ewe Mwichefen epwe aninis ren. Ami, fefinei kewe mi acheingicheing, mi namwot ngeni ei minafon sokkun kaeo usun ewe kapas allim mi wenewenoch. Ose mochen aiti ekkewe oua tongei usun met oua kaeo seni ekkewe puk fel. Aitir ifa usun ar repwe kun ngeni ewe Chon Amanau ren An manamanen chikar me nimenim nupwen ra tipis. Me aitir ifa usun ar repwe angonong won An mamamanen apochokun iteiten ranin manauer.
Unungatin, oupwe sou feino ngeni ewe tempel. Naman epwe namwot oupwe fangeno ekkoch non manauemi pwe oupwe fori. Ami sou feino tempel epwe mut ngeni ewe Samon an epwe aitikemi ifa usun oupwe aea An manamanen pristut minne oua angei non An tempel. Me ami ekkewe ouse karap ngeni eu tempel, ua tungoreikemi oupwe keao fiti iotek usun ekkewe tempel seni ekkewe puk fel me kapasen ekkewe soufos mi manau. Kuta ami oupwe sinei pwan och, weweiti pwan och, meffi pwan och usun ekkewe tempel nap seni nom.
Non ach mwichen serafo non unusen fonufan non ewe June, ua kapas usun emon anuon minne manauan a siwin nupwen inan me seman ra siwini an smart fon ren eu ekkewe flip fon. Inen ei anuon a emon fefin mi nukuchar me ese nuokus. A kuna noun we at a poputa an epwe finata mettoch epwe epeti i an epwe feino misin. A feino ngeni ewe tempel an epwe iotek an epwe sinei ifa usun epwe anisi noun we at. Iwe a anganga ekkewe memef a angei.
A apasa: “Ua mefi ewe Ngun mi Fel a emweniei ai upwe cheki an nei we fon non ekkoch fansoun ai upwe kuna mettoch. Use sinei minan ekkei smart fon, nge ewe Ngun mi Fel a emweniei won ewe social media minne use sou aea! Ua sinei pwe ewe Ngun mi Fel a anisi sam me in minne ra kuta emwen ar repwe tumunu nour kewe. [Akkomwan] nei we at a song rei. … Nge mwirin chok unungat ran, a apasa an kinisou! A tongeni mefi met a siwin.”
Fofforun me napanapan noun we a ennetin siwin. A anapano an aninis non imwer, a eminemen, me a weswesen ausening non Fan. A men sani an fansoun angang non ewe nenien papatais non temple me a ammonata ngeni an misin.
Oruaruen ai tungor, pwe ami mi watte ieremi, oupwe fiti mokutokuten ewe mwichen Fin Anisi. Ua peseikemi oupwe anneani popunen Fin Anisi. A fokkun amwarar. Epwe emwenikemi nupwen ua fori ami pwisin itenapen popunen manauemi. Ua tungor ngenikemi oupwe pwapwaiti ekkewe mettoch mi ennet non ewe popunen Fin Anisi minne a mak nap seni 20 ier me nom.3 Echo taropwe ren ei popun a pacheta non ewe ofisin ewe Aewin Presetensi. Ua pwapwa iteiten fansun ua anneani. A awewe ion ami me ion ewe Samon a mochen oupwe winiti non ei fansoun nupwen oua fori wisemi ren ewe chusefanin ekkewe aramasen Israel.
Fefinei mi acheingicheing, ami mi namwot ngenikich! “Sia mwochen ami pochokun, ami ekesiwin, ami kapasen pwarata, ami tufichin emwen, ami mirit, me ami kapas mi namwot ngenikich.”4 Sise tongeni ochusefani ekkewe aramasen Israel ika ouse anisikich.
Ua tongei kemi me kinisou remi, me iei ua efeiochukemi ren ewe tufich oupwe tongeni efeiochu ewe fonufan nupwen oua aninis ren ei angang mi namwot me auchea. Ren ach angang fengen sia tongeni fori mettoch meinisin minne Semach won NAng a mochen ne ammonata ewe fonufan ren ewe Oruan Niwinsefaniton Noun we At.
Jises I ewe Kraist. Iei An Mwichefen. Ua pwarata ekkei fan iten Jises Kraist, amen.