Kautan ewe Nongonongen ew Angang Murinno

Ren Elter Steven R. Bangerter

Seni Ekkewe Fik

Mettoch sia kaeo seni ach oreni sia efisi non imwach, ika mo mi mecheres me kukkun, mi kan watten auchean non fonufan ikenai.

Kich in me sam non Zion, mi wor wisach mi pin ach sipwe anisi nouch kewe repwe fakkun mochen me achocho ngeni ewe pwapwa, saram me ennet seni ewe kapas annimen Jises Kraist. Ren ach tumunu nounch kewe, sia efisi ach oreni pwan non imwach sia efisi napanapen poraus me foffor non ach nonnom fengen non famili. Ren ach fori ekkei oreni repwe fis non am famili epwe fotetiw me apochokkuna sokkun nikinik mi murinno non nouch kewe pwe repwe pochokkun ne pworacho ngeni weiresin manauer.

Non chommong ier am famili a pwapwaiti am oreni ren am feino won chuuk Uintah me non Utah me mour non imwem tento. Aua sai 20 mail (32 km) won aan mi kitifoufou ngeni eu neni mi ningoch, ren watten chuuk, me eu pupu mi patapat me fatoch. Iteiten ier, ren am mochen asofo sefani auchean nongonongen ewe kapas allim non netipen noum kewe me noun noum kewe, Susan me ngang aua eisini noum kewe onomon at me ar famili repwe ammonata ekis afanafan won eu itenap ir mi nuku pwe mi auchea non ei imw mi anongonong won Jises Kraist. Iwe, aua chusefan fengen non fenin famili non eu neni mi mosonoson, me meinisin ir mi afanafan.

Non ei ier noun noum kewe ra makei ar itenap won fau me mwirin me eu me eu ra ireir fan pun pwe epwe tupuni eu nongonong pochokkun mi efisi manauen pwapwa. Met mi fat non ekkewe onu afanafan me ese fanefaneno, ewe ennet pwe Jises Kraist I ewe foun nongonong.

Non ekkewe kapasen Isaiah, “Iei met ewe Samol mi Napanap a apasa, ‘Ua annomu non Zion ew nongonongun mi fakkun pochokkun o nukuchar. Non ei nongonong ua annomu efou fouchon foun nepokukun imw.’”¹ Jises Kraist I ewe foun nongonong mi auchea non Zion. I ewe a pwarata ngeni ewe Soufos Josef Smit pwe sisap pekus non foffor murinno pun sia kauta nongonongen ewe angang murinno. Me seni mettoch mi kukkun a feito mettoch mi amwarar.²

Mettoch sia kaea seni ach oreni sia efisi non imwach, ika mo mi mecheres me kukkun, mi kan watten auchean non fonufan ikenai. Met ekkewe mettoch mi kukkun me mecheres, ekkewe epwe efisi angang murinno non manauen nouch kewe?

Preseten Russell M. Nelson a poraus ngeni eu watten mwichen aramas arap ngeni Toronto, Canada, me a pesei ekkewe in me sam usun ewe wis mi pin pwe sipwe osukuna nouch kewe. Me nein ekkewe wis mi pin a affata, Preseten Nelson a pochokkun ne awewei wisan in me sam mi wor rech ach sipwe aiti nouch kewe pwata sia angei ewe sakramen, auchean semirit repwe uputiw non famili mi riri non tempel, me auchean ar ammonata ren me angei ar feioch seni patriarch, me a pwan pesei in me sam repwe emweni ar famili.³ Ren ach fori ei nouch soufos a pesei kich pwe sipwe fori imwach pwe epwe eu “nenien nuku.”⁴

Non ewe Puken Mormon, Enos a makei usun anonnonen an kinisou ren fofforochun seman ewe a “a aiti [i] usun kapasen fonuan, me pwan usun tumun me kapasen fon an ewe Samon.” Ren pochokkunen memmef Inos a puchor, “iwe epwe feioch itan ai Kot pokiten ena.”⁵

Ua aucheani ekkewe oreni mi kukkun mi kan fifis non imwem non aukukun 35 ierin am pupunu. Napengeni am oreni mi chok mecheres nge ir mi auchea. Awewe chok:

Nupwen ngang mi angang towaw seni imwei, ua sinei pwe fan emwenien Susan, noum we at mwannichi ewe mei nomw neimw epwe pwisin finata won winikapan an epwe emweni am famili non annean pukefel me iotek.⁶
Pwan eu oreni—ause totou seni imwem, ika asopwano poraus won fon, ika ause fen apasa, “Ua tongeok.”
Manauem ra men feioch ren am aua aea ekis fansoun iteiten pwe aupwe mwot ren emon me emon noum kewe at non interview. Non eu interview ua eisini nei at usun an mochen me an ammonata ren misineri. Aua ekis poraus, me a fanefano, me a nengeniei me pwarata ngeniei, “Semei, en mi chechemeni nekukuni me sia poputa ach kei interview?” Ua era, “Ewer.” A era, “Iwe, ua pwon pwe upwe no misineri me en me mama oua pwon ngeniei pwe oupwe pwan no misineri nupwen oua chinnap.” Iwe, a faneno. “Ami mi nom non weires epwe epetikemi seni misineri—pun meni upwe anisikemi?”

Orenien famili mi murinno me mi fis iteiten usun iotek, anneafengen pukefel, fenin famili, me fiti fan, ika mwo ir mi mecheres me kukkun, ra efisi nikinikin tong, sufon, tipeu me tumun. Non ewe ngun mi fiti ach achocho, nouch kewe repwe tumun seni ekkewe minen feiengau seni setan mi nonnom non orenien fonufan ikenai.

Sia chechemeni pesepes seni Ilaman ngeni noun kewe at: “Chechemeni pwe ina won ewe foun ach Chon Angasano, i ewe Kraist, ewe Noun Kot, ewe mi auchea oupwe aueta ami nongonong won; pwe nupwen ewe tefin epwe tinato an asepwan mi pochokkun, ewer, an kewe assefich non ewe ewuniar, ewer, nupwen an kewe pungun foun ice meinisin me an monumon mi pochokkun repwe wichi kemi, esap wor an nemenem womi ne etekinikemitiw ngeni ewe pwangen riaffou me riaffou esemuch, pokiten ewe fau minne oua kauuta won, minne a ew nongonong mi nukuchar, ew nongong won minne ika aramas ra kauuta won resap tongeni turutiw.”⁷

Fite ier a no, nupwen ngang emon pisop, me emon mwan a watte mwei a eis an epwe churiei. A awewe usun an tou seni ewe Mwichifen me ekkewe oreni mi murinno seni inan me seman nupwen I a kukkun. A aweweochu ewe netipengau a weri non manauan ren an kutta pwapwa mi mwoch, usun met ewe fonufan epwe awora. Iei, non an ekis chinnap, a kuna ewe pesepes a fos ngeni seni ewe Ngun mi Fel me a emweni I sefan ngeni ekkewe itenap, foffor, memmef, me ngunun tumun mi fis nekukkunun. I a pwarata an kinisou ren ekewe orenien inan me seman, me a awewei, usun anon Inos: “iwe epwe feioch itan ai Kot pokiten ena.”

Non manauei, an ewe mwan niwinsefan ngeni ewe kapas allim ina usun chommong me a kan soun fis chommong nein noun Kot kewe ra touau ren ekis fansoun, me ra niwin ngeni ekkewe nongong me fofforun nekukkunur. Non ekei fansoun, sia kuna ewe tipachem seni ewe soumak ewe a pesei in me sam, “Kopwe aiti emon kukkun semirit epwe ifa usun nonnomun manauan, iwe epwe chechemeni non unusen manauan.”⁸

Iteiten in me sam ra kuna atun netipengau me sokkopaten mefien pochokkun me achocho non ach tumunu nouch kewe. Nge, ika in me sam ra anganga nuku ne osukuna, wenechar, me ren tong me anisir ren ar pochkkun ne kuna ewe aan, ar epinukunuk epwe watteno pwe ekkewe foun ira repwe fot non netipen me ekiekin nour kewe.

Moses a weweiti namwoten ach sopweno ne osukuna nouch. A aiti, “Oupwe aiti ngeni noumi kewe semirit. Oupwe pwan aporausa nupwen oua nom non neniemi are towaw seni neniemi, nupwen ami asoso are nupwen ami angang.”⁹

Sia fotopuku ren nouch non iotekin famili, sia tumunur ren ach achocho ne anneafengen ekkewe pukefel, sia tongeir non tipepwos me tumunur non ach angang fengen non fenin famili, me sia netipechou rer me chapetiw non ach iotek ngeni nang. Sia ennetin pesei ekkewe foun ira pwe repwe fot non netiper me ekiekin nouch kewe semirit.

Ua nuku esap ika nouch kewe “ra weweiti” non atun ach osukuner, usun ach achocho ne annea fengen pukefel ika fori fenin famini ika fiti mwichen Serafo are pwan ekkoch mwichen Mwichefen. Esap eu kapas eis ika non ekei fansoun ir mi weweiti auchean ekkei mwokutukut nge auchean ika kich, in me sam, sipwe aea ach nuku pwe sipwe anneasochisi ewe Samon me achocho ngeni ach manaueni, osukuna, me pwarano ewe aan ren nouch kewe me epwe wewe ngeni ewe kapas allimen Jises Kraist. Iei eu angang mi fis ren ach nuku—ach nuku pwe eu ran ekkewe foun ira sia fotuki nekukkunur repwe marita non ngunur.

Ekkewe metoch sia poraus usun, ekkewe mettoch sia afanafana me asukuna repwe emweni met epwe fis neich. Ika sipwe efisi oreni mi osukuna nongonongen Kraist, ewe Ngun mi Fel epwe pwarata ewe ennetin ach poraus me amongoni ewe foun iran ewe kapas allim mi fotetiw non netipen nouch kewe seni ach achocho won ewe aan. Ua pwarata non iten Jises Kriast, amen.