Sukono ekkewe Nang ren Aninnis
Sipwe aea ach nuku non ewe Samon Jises Kraist non foffor!
Ei mwich a fen sokkono me amwarar! Kinisou, achengicheng Laudy me Enzo. Oua tupuniochu ekkewe fopun me anuon mi amwarar non ewe Mwichefen non mwirino.
Pwi me fefinei achenicheng, ikenai sia fen ausening chommong usun Niwinsefaniton ewe Mwichefen—ewe chok Mwichefen ach we Chon Amanau, Jises Kraist, a forata fansoun An angang won fonufan. Ena Niwinsefanito a poputa 200 ier seni ei fansoun uwa nupwen Kot ewe Sam me Noun we, Jises Kraist, ra pwato ren ewe kukkun Joseph Smith.
Engon ier mwirin ei nemasepwi mi nap, ewe Soufos Joseph Smith me pwan nimmon ra kokko pwe chon forata an ewe Samon Mwichefen mi niwinsefan.
Seni ena kukkun mwich a chufengen non April 6, 1830, a fis ew watten mwicheich non fonufan mi nap seni 16 minion chon mwichefen. Mettoch mi och ei Mwichefen a awesano non ewe fonufan an epwe angasa riaffoun aramas me awora aninis ngeni aramas mi itefouno. Nge popun we mi kon auchea ina an epwe anisi mwan, fefin, me semirit ar repwe tapweno mwirin ewe Samon Jises Kraist, apwonueta An annuk, me tufich ngeni ewe watten feioch—ewe manau esemuch ren Kot me atongear kewe.
Nupwen sia achema ewe fansoun a poputani non 1820, mi auchea ach sipwe chechemeni pwe nupwen kich mi asamonu Joseph Smith pwe I soufosun Kot, esap iei ewe mwichefenin Joseph Smith, me esap mwichefenin Mormon. Iei ewe Mwichefenin Jises Kraist. A annuku met An Mwichefen epwe wesen iteni: “A apasa pwe met an mwichefen epwe iteni non ekkewe ranin soponon, epwe Ewe Mwichefenin Jises Kraist ren Aramas mi Pin non Fansoun Soponon.”
Ua fen kapas akkom usun ew auchean aanen ach sipwe apungu ewe napanap sia eita ewe Mwichefen. Seni ena fansoun, a fen watte met a fis an epwe awesi ei pungun. Ua men kinisou ren Preseten M. Russell Ballard me unusen ewe Mwichen ekkewe Engon me Ruemon Aposel, a fen watte met ra fori ar repwe emweni ekkei angang pwan ekkoch mi wewe ngeni pwan ew upwe esinei non ei pwinin.
Souemwenin Mwichefen me kinikinin, tettenin mi wewe ngeni, me minion chon mwichefen—me ekkoch—iei ra aea iten ewe Mwichefen mi pung. An ewe Mwichefen we napanapen emwen a fen ekkesiwin. An ewe Mwichefen we website mi nap iei a iteni ChurchofJesusChrist.org. Address ren email, iten website, me channel ren social media ra fen affor sefan. Ach we mwichen kon mi chen iei a iteni the Tabernacle Choir seni Temple Square.
Aua fen fori ekkei mwokutukut mi amwarar pokiten nupwen sipwe eimueno iten ewe Samon seni itan An Mwichefen, sise epereni pwe eimueno I seni an epwe ionapen ach fel me manauach. Nupwen wata och iten ewe Chon Amanau atun papatais, sia pwon ne pwarata, ren ach kapas, ekiek, me foffor, pwe Jises I ewe Kraist.
Akkom, ua pwon pwe ika sipwe “achocho ne eniwini iten an ewe Samon Mwichefen mi pung,” I epwe “ninatiw An manaman me feioch won mokuren ekkewe Aramas mi Pin, ekkewe sokkun sise mwo kukkuna.” Ua eminefeu ena pwon ikenai.
An epwe anisikich ne chechemeni I me esinna Ewe Mwichefenin Jises Kraist ren Aramas mi Pin non Fansoun Soponon pwe ina an ewe Samon Mwichefen, aua pwapwa ne pwari ew esisin epwe esissina ewe ionapen neenien Jises Kraist non An Mwichefen.
Ei esisin mi pachenong iten ewe Mwichefen mi nom non ew foun nongonong. Jises Kraist I ewe foun nongonong mi auchea.
Nukanapan ewe esissin ina mi pwarata an Thorvaldsen we niosun ewe Christus. A niosuni ewe Samon mi manausefan, mi manau an eitau poun epwe foropachei ekkewe ir mi feito ren.
Non esisin, Jises Kraist mi uta fan efoch chipwechipw. Ewe chipwechipw a achema kich usun ewe Chon Amanau mi manausefan tou seni ewe peias non ewe aunungatin ran mwirin An irapengesino.
Ei esisin epwe sinneno ngeni chommong, pokiten sia fen esinna ewe kapas allim mi niwinsefan ngeni ewe Kraist mi manau, mi manausefan.
Iei ewe esisin epwene fis pwe pisekin esinnata puk mi kapunguo, porous, me mwokutukutun ewe Mwichefen. Epwe achema meinisin pwe iei an ewe Chon Amanau Mwichefen me mettoch sia fori chon ewe Mwichefen epwe ionapei Jises Kraist me An kapas allim.
Iei, achengicheng pwii me fefinei, nesor a Raninfenin Palm, ren met Elder Gong afen afata. Iwe sia tonong non ewe auchean wiik ewe a asopono fiti Easter. Kich chon tapweno mwirin Jises Kraist, sia nom non ew fansoun nupwen ewe semwenin COVID-19 a wanong ewe unusen fonufan non osukosuk, sisap chok kapas usun Kraist ika afanafan usun Kraist ika fori ew esisinen Kraist.
Sipwe aea ach nuku non ewe Samon Jises Kraist non foffor!
Usun ami mi sinei, chon ewe Mwichefen ra aneasochisi ewe annukun ewe echikipin ew ran iteiten maram.
Ewe nongonongen echikipin a minen nom. Ekkewe mi pwaracho non fansoun nom non paipel ra fen fori. Moses, David, Ezra, Nehemiah, Esther, Isaiah, Daniel, Joel, me chommong ekkoch ra echikipin me afanafana echikipin. Seni an Isaiah mak, ewe Samon a apasa: “Esap iei ewe echikipin ua finata? epwe epichano senin mettoch mi ngaw, epwe awesi oser mi chou, me mut ngeni ekkewe mi riaffou repwe ngaseno?”
Ewe Aposel Paul a fonou ekkewe Souneng non Corinth ne “fangeta inisir ngeni echikipin me iotek.” Ewe Chon Amanau Pwisin a affata pwe ekkoch mettoch “rese suno nge ren chok iotek me echikipin.”
Ua keran chok apasa non ew video won social media pwe “pokiten ngang emon tokter me chon reirei, a watte ai sufoniti ekkewe chon safei, scientists, me ekkoch mi angang fansoun meinisin ne auku chewnon COVID-19.”
Iei, Presetenin ewe Mwichefenin Jises Kraist ren Aramas mi Pin non Fansoun Soponon me emon Aposelun Jises Kraist, Ngang mi sineipwe Kot “a wor an unusen manaman, unusen mirit, me unusen tipachem; a weweiti mettoch meinisin, me I a emon Kot mi umoumoch, pwan mwo ngeni amanau, ngeni ekkewe repwe aier me nuku non itan we.”
Iwe, fansoun anonnonun netipengaw, usun nupwen samwau a tori unusen fonufan, ewe mettoch sipwe fori ina sipwe Iotek ngeni Samach won Nang me Noun we—ewe Mastan Echikar—ar repwe pwarano Ar manaman ne efeiochu aramasen ewe fonufan.
Non ai we porous won video, ua tingor meinisin repwe fitiei ne Echikipin non ewe Raninfel, March 29, 2020. Chommong ami oua katon ewe video me fitiei non ewe echikipin. Meni ekkoch rese. Iei mi chiwen auchea ngeni kich aninis seni nang.
Iwe nepwinei, pwi me fefinei achengicheng, usun noun Mosaia kewe anuon, ekkewe ra ewisa inisir ngeni echikipin me iotek chommong, me pekin ach April 2020 mwichenapen mwichefen, ua pwan tingor fan iten ew echikipin an unusen fonufan. Ren ekkewe meinisin ar pochokun epwe mutata, sipwe echikipin, iotek,me achufengeni sefan ach nuku. Sipwene iotek ne tingor fan iten ngaseno seni ei semwenin unusen fonufan.
Ua tingorei meinisin, mi pachenong ekkewe esap chon ach namanam, ne echikipin me iotek non Animu mwen Easter, April 10, pwe ewe semwenin fonufan iei epwe aukuk, chon tumun repwe tumun, ewe weuochun fonu epwe pochokununo, me manau epwe ochuno.
Ifa usun sipwe echikipin? Ru mwongo ika ukukun 24 awa usun mi affat. Nge kopwe finata met kopwe ekieki pwe ew fangeo me reom, nupwen ka chechemeni ewe fangeno mi napanap ewe Chon Amanau a fori fan itom. Sipwene chufengen non tingor fan iten chikar non unusen ewe fonufan.
Animu mwen Easter epwe ina ewe ran mi murino an Samach won Nang me Noun we repwe ausening ngeni kich!
Pwi me fefinei achengicheng, ua affata anonnonen ai tong ngenikemi, fiti ai kapasen pwarata usun ennetin ewe angang sia angang non. Iei Ewe Mwichefenin Jises Kraist ren Aramas mi Pin non Fansoun Soponon. A uta unungan me emweni mettoch meinisin sia fori. Ngang mi sinei pwe epwe pwonueni an Noun aramas tingor. Ua pwarata non itan Jises Kraist mi pin, amen.