Feito me Fitikem
Sia etiwa meinisin noun Kot semirit non unusan fonufan ar repwe fiti kich non ei angang mi nap.
Pwi me fefinei mi acheingicheng, chienei kewe, iteitan wiik chon Ewe Mwichefenin Jises Kraist ren Aramas mi Pin non Fansoun Soponon non unusan fonufan ra fen ngeni Samach won Nang, ewe Kot me Kingen universe, me Noun we Achengicheng, Jises Kraist. Sia ekieki ewe manau me afanafanen Jises Kraist—ewe chok emon ese wor tipisin, me ewe Namen Kot mi nimenimoch. Iteiten fansoun mi tufich, sia angei an sakrament ren achechemenien An angangen Asor me esinna pwe I ionapen manauach.
Sia tongei I me asomonu I. Pokiten An tong mi esemuch, Jises Kraist riaffou me mano fan itom me fan itei. A suki ewe titin mano, a ataieno ewe eppetin chiechi me atongeach,1 me a esenipato apinukunuk ngeni chon osupwang, echikara chon semwen, me epichano ngeni chon fotek.2
Ngeni i sia awenengeni netipach, manauach, me ach fofori iteitan ran. Ren ei popun, “aua kapas usun Kraist, aua pwapwa non Kraist, aua afanafan usun Kraist, aua osini usun Kraist, … pwe noum kewe repwe sinei ngeni ian repwe apinukunuk won ren omusomusen ar kewe tipis.”3
Foffori Ach Sounang
Nge, emon chon kuno noun Jises Kraist a nap met epwe fori nap seni chok kakkapas me afanafan usun Kraist. Ewe chok Chon Amanau a eniwinsefanito An Mwichefel pwe epwe anisi kich won ewe aan pwe sipwe winiti usun chok I. Napanapen Ewe Mwichefenin Jises Kraist ren Aramas mi Pin non Fansoun Soponon a foruta pwe epwe awora tufichin fofori nongonongen chon kuno. Ren ach fiti non ewe Mwichefen, sia kaeo pwe sipwe esinna me fori ourouren ewe Ngun mi Fel. Sia forata ewe fofor ne anisi ekkoch non kirokiroch me tong.
Iei ewe achocho ren unusuan manauach, me mi namot ach sipwe kakaeo.
Chon sports ra aea fitu fitu awa ne practice nongonongun are kewe sport. Ekkewe nurses, networkers, nuclear engineers, me pwan usi ekkewe chon for mongo non an Harriet nenien for mongo ra winiti nipwakoch pwe ir mi chok kaeo iteitan.
Nupwen ua kaptinin sepenin, ua aiti pwan pilot non simulator—och machine a kapini wawan ewe sepinin. Ewe machine simiulator esap chok anisi ekkew pilot non are kaeo nongonongun wawa sepin; nge mi pwal wor pwe sinei me ponueni och osukasuk epwe fis.
Ewe chok nongonong mi pung ngeni chon kuno noun Jises Kraist.
Fifiti ewe Mwichenfenin Jises Kraist me sokopaten tufichin epwe ammona ngeni sokopaten siwiniwin nonnomuch, ese nifinifin met ewe epwe fis, me ifa ukukun osukosukan. Kich chon ewe Mwichefen, sia pesepes ne kaeo kapasen Kot seni Noun soufos, soufosun nom me ikenai. Ren ennetin me masonoson iotek ngeni Samach won Nang, sia kaeo ne esinna mongungun ewe Ngun mi Fel. Sia etiwa kokko ne angang, aiti, kokkot, iamwir, me anisi ekkoch. Ekkei tufich ra mut ngeni ach sipwe marita non pekin ngun, ekiek, me napanap.
Repwe amonakicheno ne amwochu me fori ekkewe pwon mi pin minne repwe efeiochu kich non ei manau me manau epwe feito murin.
Feito, Fitikem!
Sia etiwa meinisin noun Kot semirit non unusan fonufan ar repwe fiti kich non ei angang mi nap. Feito me Kuna! Ika mo sia mesengeni ei osukasuk ren semwenin COVID-19, fiti kich online. Mwich ren noum misineri online. Kutta ren pwisin ika met popun ei Mwichefel! Murin ei fansoun osukasuk epwe wesino, momot rem non imwem me non imwen fen!
Aua tingor oupwe feito me aninis! Feito me angang rem, angang ngeni noun Kot semirit, tapweno murin ipwan ewe Chon Amanau, me fori ei fonufan epwe eu neni mi ningoch.
Feito me choni! Kopwe fori pwe kich meinisin sipwe pochokun. Me en kopwe winiti emon mi ochueno, kirokiroch me pwan pwapwa. Om nuku epwe pochokun me pochokununo—pwe epwe tongeni nikitu ngeni osukasuken me weiweitan sossotun manau.
Me epwe if usun ach sipwe poputa? Mi chommong och sokkun aan.
Sia tingor oupwe anneani ewe Puken Mormon. Ika pwe esap or noum kopi, ka tongeni anneani ewe on ewe ChurchofJesusChrist.org4 are pwe download ewe app Puken Mormon. Ewe Puken Mormon a pwan eu kapasen pwarata usun Jises Kraist me chienan ewe Paipel Testamen Nom me Testamen Sofo. Sia aucheani meinisin ekkei pukefel me sia kaeo seni ir.
Sia tingor oupwe awora fansoun ne atona ComeuntoChrist.org ne kutta met ekkewe chon ew Mwichefel ra aiti me achifoua.
Tingor ekkewe misineri are repwe churuk online are non pwisin imwemi ika epwe mi tufich—mi wor are porousen apinukunuk me chikar. Ekkei misineri ir noum achengicheng at me nengin ra angang non sokopaten neni non unusan fonufan ra pwisin nounou nour moni me fansoun.
Non ewe Mwichefenin Jises Kraist, kopwe kuna eu aramasen famini esap mo sokofessen seni en. Kopwe kuna aramas ra mochen om aninnis me ir ra pwan mochen anisuk ren om ka achocho ne winiti emon mi fo—ewe emon Kot a forata om kopwe winiti.
Ewe Chon Amanau Forapachei Meinisin
Meni kopwe ekieki, “Ua fen fori mwanin non manauei. Usap sinei ika pwe ua tongeni fiti ewe Mwichefenin Jises Kraist. Kot esap mo mochen emon usui.”
Jises Kraist, inamo i emon “Kingen King,”5 ewe Mesaia, ewe Noun Kot mi manau,”6 a men tongei emon me emon noun Kot semirit. A tongei kich ese nifinifin wisan emon—ika mi woungau are pisekisek, ika emon ese unusoch. Fansoun an manau non ei founfan, ewe Chon Amanau angang anisi chommong: ngeni ekkewe mi pwapwa me nipwakoch, ngeni chon ta me chon poutuno, me ekkewe ese wor ar nukunuk. Fan ekkoch, ekkewe aramas a angang ngeni resap iir aramas tekia, ningoch are pisekisek. Fan ekkoch, ekkewe aramas I a seikata esap met repwe eniwini nge kinisou chok, netip mi tekisoson, me tipemochen nuku.
Ika unusen manauen Jises a angang ngeni “ekkewe chon osupwang,”7 esap I epwe tongeiir ikenai? Esap wor eu neni non An Mwichefen fan iten noun Kot seimirt? Pwan fan iten ekkewe rese mefi fich ngeni, chon monuki are anaemon?
Esap wor aukukun usnusoch kopwe angei pwe kopwe fich ngeni an Kot chen. Om iotek esap neumwong are ititoch an epwe tori nang.
Ennetint, Kot esap emon mi nifinifn8—ekkewe mettoch ewe fonufan mi acucheani rese namot me ren. I a sinei netipom, me I a tongeok esenifinifin itanpen wisom, noum moni, are numpan chon tapweno murum non Instagram.
Nupwen sia akunu netipach nengeni Samach won Nang me arap ngeni I, sipwe mei I a arap ngeni kich.9
Kich Noun kewe achengicheng.
Pwan ekkewe ra oput I.
Pwan ekkewe ra, usun semirit mi nukumach me menninimang, ra song ren Kot me An Mwichefen, o non an song a mutir tou non ewe asam me esinei pwe esap chiwen niwin sefan.
Nupwen emon semirit a su seni imw, i esap sinei noninenasini seman me inan ar neneu non ewe asamwacho. Ren netip tekison, ra atona nour at me nengin ar feinno—ra aneanei pwe nour we epwe kaeo och mettoch seni ei napanap me neman epwe kuna manau ren mas mi fo—o epwap niwin ngeni imwan.
Pwal ina usun Samach won Nang. I a witiwit ach niwin.
Om Chon amanau, ren chonun mesan me kirekiroch, I a witiwiti ach niwin. Ika mo ka mefi touau seni Kot, I epwe kunok; I epwe mefi tipekiroch reom me epwe sa ngonuk me forapachei en.10
Feito me choni.
Kot a Mut ngeni Kich ach Sipwe Kaeo seni Ach Mwan
Kich sia chon pilgrims sia fetan won ewe aanen ei manau ren ach kukkuta ewe popun me ennetin pung. Fan ekkoch, sia chok kuna ewe aan mi wenenuk mwan—sisap tongeni kuna ia ewe aan epwe rikino me feino ngeni. Samach won Nang ese mwo ngeni kich punuwan meinisin. I a mochen ach sipwe kutta och mettoch ren pwisin kich. I a mochen ach sipwe nuku—inamo a men weires
I a mochen ach sipwe pochokuneno afarach me forano ach sipwe fetan wenewen—me fetan ipw me ipw.
Ina ewe aan sipwe kaeo me marita.
Kopwe fakkun mochen meinisin epwe for fan itom? Kopwe mochen meinisin kapaseis epwe ponu? Iteitan sai pwe epwe kinamwe?
Ua nuku pwe nap ngeni kich sipwe mutir chipwang ren ei sokkun tichiken mettoch me nang. Sia kaeo nesenin manau mi namot ren ach pwisin fori. Ren ach kaeo seni ach fori mi mwan. Ren ach aier me esinna ren pwisuin kich pwe “tipis esap tongeni pwapwa.”11
Jises Kraist, ewe Noun Kot, a mano pwe ach mwan esap etipisi kich me epetti ach mamarita. Pokiten I, sia tongeni aier, me ach mwan epwe winiti eu ipwen ngeni ach ning napeno.
Kosap anamon ne fori ei fetan. Samach won Nang ese nikitikicheno ach sipwe fetan non rochopwak.
Ina popun, non eu ran nessoran 1820, I a pwato fiti Noun we, Jises Kraist, ngeni emon anuwon, Josep Smith.
Ekieki usun ena non och fansoun! Ewe Koten universe a pwa ngeni emon mwan!
Iei aewin me nein chommong an Kot me ekkoch chon nang churi Joseph Smith. Chommong ekkei kapas ekkei chon nang ra era ngeni i me makkei non uruon pukefelin Ewe Mwichefenin Jises Kraist ren Aramas mi Pin non Fansoun Soponon. Ir ra men mecheres angei. Meinisin repwe tongeni anneaniir me kaeo seniir ewe porous seni Kot fan itach ikenai.
Aua tingor om kopwe kaeo ren pwisin en.
Joseph Smith a men kukkun nupwen a angei ekkei pwarta. Chommong ne neir ra a feito mwen an 30 ierin.12 I esap wor kaeo, me ngeni ekkoch, i esap fich ngeni an epwe noun Kot soufos.
Me inamo ewe Samon a kokkori i—tapweno ewe tetten sia kutta non ewe pukefel.
Kot ese witi an epwe kuna emon mi unusoch an epwe aniwinato An kapas allim.
Ika pwe a ina usun, I epwe chiwen witiwit.
Josepj a chok usun en me ngang. Inamo Joseph fori mwan, Kot a aea i an epwe apwonueta An popoun me napanap.
Preseten Thomas S. Monson a soun apasa ekkei kapasen fon: “Ion ewe Samoan a kokkori, ewe Samon a efichi.”13
Ewe Aposel Paul a poporous ren ekkewe Souneng non Corinth: “Ami pwi kana, oupwe chechemeni usun napanapen ami manau nupwen Kot a kori kemi. Non ekiekin aramas ekkoch chok me neimi, esap tipachem are pochokun are aramas tekia.”14
Kot a nounou ekkewe mi apwangapwang an epwe esenipato An popun. Ei ennet a uta pwe eu pisiekin pwarata pwe ina an Kot manaman, esap an mwan, ewe a apwonueta An angang won ei fonufan.15
Ausening ngeni I, Tapweno Murin I
Nupwen Kot a pwa ngeni Joseph Smith A esieni Noun we, Jises Kraist, me apasa,“Hear Him!”16
Joseph a aea unusan manauan an epwe ausening ngeni I me tapweno murin I.
Usun ren Joseph Smith, ach tapweno murin i a popueta ren finiach ne ausening ngeni me tapweno mwirin ewe Chon Amanau Jises Kraist.
Ika ka mochen ne tapweno murin I, ioni om nuku me mwarei wom An irapenges.
Kopwe kutta pwe en ka fiti An Mwichefen—eu neni mi mefi asoso me etiwaoch ian kopwe tongeni fiti ne fetanno won ewe aanen ewe kapas allim me pwapwa.
A ina ai apinukunuk pwe, non ei 200 ier ewe Awein Nemasepwi, ren ach ekipwichi me kaeo ewe Niwinsefaniton ewe Mwichefenin Jises Kraist, kich sipwe esinna pwe esap chok ewe mettoch a fis me noom. En me ngang sia fiti eu kinikinin mi nap, non ei porous mi sopweno.
Iwe, met kewe wisom non ei?
Pwe kopwe kaeo usun Jises Kraist. Pwe sipwe kaeo An kapas. Pwe sipwe ausening ngeni me tapweno murin I ren ach fiti an angang napanap. Ua tingor pwetete om kopwe feito me fiti kich!
Kosap unusoch om kopwe fori. Epwe chok wor om mochen me nuku ne arapakan ngeni I iteitan ran.
Wisach pwe sipwe tongei me angang ren Kot me tongei me angang ren noun Kot semirit.
Ren ami oua fori ei, Kot epwe epwe pwenieukeno ren An tong, pwapwa, me ekkoch aninnis non ei manau, inamo fan chommong osukasuk, me pwan nap seni.
Ren ei ua pwarata, me ngenikemi ai feioch on anonnonun kinisou me tong ren emon me emon ami, non iten ach Chon Amanau, ach Masta—non itan Jises Kraist, amen.