Mwareiti ewe Kot mi Fokkun Tekia

Seni Elter Ronald A. Rasband

Seni ewe Mwichen Engon me Ruemon Aposel

Apwapwan an Jises Kraist ewe tonong non Jerusalem me ekkewe mettochun ewe wik a fis minne mi anonga ekkewe nongonong sia tongeni fori non manauach ikenai.

Ikenai, ussun a fen wor kapasan, sia fiti ekkewe Souneng non unusen fonufan ne ofona Jises Kraist won ei Palm Sunday. Arapakan 2,000 ier a no, Palm Sunday a esisinata ewe poputan ewe omuchunon wiken an Jises Kraist ewe fansoun afanafan non ei manau. Ina ewe akaewin auchean wik non uruon aramas.

Met a poputa fiti ewe esisinen Jises Kraist pwe ewe Messiah mi pwon non An ewe apwapwan tonong non Jerusalem arapakan ngeni An Irapengesino me Manausefan.¹ Ren ningochun foforun, An osoren achasefan a awesano An angangen afanafan non ei manau, a fori tufichin ach sipwe nom ren Samach Kot ren fansoun esemuch.

Ekkewe pukefel ra ait ngenikich pwe ewe wik a poputa fiti chommongun mwichen aramas ra uta arun ewe titin ewe teninim ar repwe kuna “Jises ewe soufos re Nazareth non Galilee.”² Ra “angei chon panen ekkewe ira, me ra feinno ar repwe churi i, me ra puchoruta: Mwareiti: Feioch I ewe Kingen Israel ewe a feitto non iten ewe Samon.”³

Ena porousen non paipen non fansoun nom a achema ngeniei atun ai fori ew kokoi non Mwichefen non Takoradi, Ghana. Eingeingan, ua nom ikana won Palm Sunday.

Upwe ineti feseni ewe Takoradi Ghana Steik an epwe forata ewe Mpintsin Ghana Steik. Ikenai, a wor napeseni 100,000 memper non ewe Mwichefen non Ghana.⁴ (Sia etiwa ewe Ga Mantse, I Tekian King Nii Tackie Teiko Tsuru II seni Accra, Ghana, ewe mi nom rech ikenai.) Mwich ngeni ekkei souneng, ua mefi ar wachemuken tong me nikitu ngeni ewe Samon. Ua pwarano ai wachemuken tong ngenir me ewe Presetenin ewe Mwichefen a tonger. Ua no ngeni anon ewe Chon Amanau ewe a mak seni John: “Pwe oupwe tong fengen, ussun chok ngang ua tongekemi.”⁵ Ra ekieki pwe eu “Ngang ua tongek mwich.”⁶

Nupwen ua nenetai me nenetiwei ewe tenin pwi me fefinei kewe achengicheng me ar kewe famini non ewe fan, ua tongeni kuna non meser ewe saramen kapasen pwarata me nuku non Jises Kraist. Ua mefi ar mochen pwe repwe aneanong ar repwe kinikinin An ewe Mwichefen a chouno. Iwe nupwen ewe mwichen kon a kon, ra kon ussun ekkewe chon nang.

Ussun won Palm Sunday me nom, ekkei noun Jises Kraist kewe chon kuno ra chufengen ar repwe awora ar sufon ngeni I ussun ekkana ren ewe tittin Jerusalem ekkewe, ra komoch panen ira non pour, ra puchoruta, “Mwareiti …: Feioch ewe a feitto non iten ewe Samon.”⁷

Pwan mwo ekkewe chon non ew mwichefen mi chok kaneto ra afona Palm Sunday. Nupwen uwa kapas seni ewe nenien afanafan, ua kuna seni ewe asamwacho ar ra fetanetiw won ewe an fiti ar pwapwa ne akanipou kewe panen ira non pour, pwan ussun chok ekkewe non ewe sasing. Ew mettoch ua kuna mi amwarar usap tongeni nemenono—meinisin am non ena ran, aua fen ngeni ewe Kingen King.

Preseten Russell M. Nelson a pesei ngenikich ach sipwe fori Palm Sunday epwe “ennetin pin ren ach chechemeni, esap chok ekkewe panen ira ra akanipou ne afona an Jises ewe tonong non Jerusalem, nge ren pwan achechemenien kumuchun poun kewe.” Mwirin Preseten Nelson a no ngeni Isaiah, ewe a porous ussun an ewe Chon Amanau ewe pwon, “Ngang usap tongeni monukikemino,” fiti ekkei kapas: “Nengeni, ua fen fori esisinemi won kumuchun pei.’”⁸

Ewe Samon a fen sinei me akkom pwe manauach iei mi weires. Kinasan kewe ra achema ngenikich pwe I a “feittiw fan … meinisin”⁹ ita epwe anisikich nupwen sia riaffou me ach pisekin apiru ne “komochuno won an ewe an,”¹⁰ An an, pwe “Kot epwe nom [rech] feinfeino chok.”¹¹

Palm Sunday esap chok ew mettoch a fis, ika pwan ew peich non uruo fiti pwinin maram, fansoun, me neni. Apwapwan an Jises Kraist ewe tonong non Jerusalem me ekkewe mettochun ewe wik a fis mwirin a awora minen awewen ekkewe nongonong sia tongeni fori non manauach ikenai.

Sipwene nenengeni ekkoch ekkewe nongonong ese much ra foruta seni An angangen afanafan a muchuno me non Jerusalem.

Aewin, osini. Awewe ren, soufosun Testamen Noom Zechariah a osini apwapwan an Jises Kraist ewe tonong non Jerusalem a pwan awewei pwe I epwe wawa emon tongki.¹² Jises a fen sinei An ewe epwe irapengesino nupwen I a amonata an epwe tonong non ewe teninim, a apasa:

“Oupwe ousenig, sipwene feitta Jerusalem; ikewe ie repwe afangama ewe Noun Aramas ngeni ekkewe sou-asor mi nap me ekkewe Sou-annuk. Repwe etipisi pwe epwe ninnino,

“Iwe repwe uweano i ngeni ekkewe Gentiles, pwe repwe takiri i, wichi o irapengesi i: nge mwirin unungat ran epwe manaueta.”¹³

Oruwan, ewe chiechi fengen me ewe Ngun mi Fel. Joseph Smith a afanafana, “Ese wor aramas epwe tongeni sinei pwe Jises i ewe Samon, ika esap seni ewe Ngun mi Fel.”¹⁴ Ewe Chon Amanau a pwon ngeni Noun kewe chon kuno¹⁵ atun ewe Omuchunon Fetanap¹⁶ non ewe rum asan,¹⁷ “usap nikitikemino nge upwe pwan niwinitikemi.”¹⁸ Resap anamon ne mwarei ekkewe ennet ussun ewe kapas allim nge repwe aani ewe unusochun niffangen ewe Ngun mi Fel an epwe emwenir. “Upwe ngenikemi kinamwe, upwe fang ngeni kemi pwisin ai kinamwe,” I a pwon; “esap usun an fonufan fang ngenikemi.”¹⁹ Ren ewe niffangen ewe Ngun mi Fel, a wor rech ewe nukunuk—pwe “Ngunun we epwe nonnom [rech] fansoun meinisin”²⁰ me “seni ewe manamanen ewe Ngun mi Fel [sipwe] sinei ennetin mettoch meinisin.”²¹

Ounungatin, wisen emon chon tapweno mwirin Jiese Kraist. Ennetin chon tapweno mwirin Jises Kraist, esap wor mwanin ar pwon pwe repwe fori mettoch, repwe anneasosich ngeni ekkewe annuk ese much, me ewe tongen Kot, aewin me auchean mettoch. Ese wor och mettoch a apwangapwangeno. Ewe mwichen aramas ekkewe mi fori wiser ne komoch panen ira ne kapong ngeni ussun ewe Messiah. Ina wesewesen I ion. Ra arap ngneni I, An manaman, me An afanafan. Nge ewe mwareiti ren chommong ese nomotam. Ekkoch ekkewe ra akkom ne puchor, “Mwareiti”²² mwirin chok kun me puchoruta, “Irapengesieno.”²³

Oruanun, ewe Achasefan an Jises Kraist.²⁴ Non An kewe omuchunon ran, mwirin ewe Palm Sunday, I a awesano an ewe Achasefan, seni ewe wachemuken riaffou me Gethsemane tori ewe turunufas ren An ewe kapung, An ewe riaffoun metek me won ewe irapenges, me An ewe peiaseno non ew nenien peias esap pusin nenien peiasan. Nge ese kouno me ikana. Fiti amwararen Wisan ussun ewe Chon Angasano meinisin Noun Saman we kewe semirit, unungat ran mwirin I a ipweu mwan seni ewe peias, a manau sefan,²⁵ ussun I a fen osini.

Kich mi sopweno ne kinisou ren ewe Achasefan ewe ese wor mi nonno ngeni an Jises Krasit? Kich mi mefi an we manamanen nimenimoch, iei? Ina pwata Jises Kraist, ewe Chon Fori me Chon Awesano ngangen manaua, a no ngeni Jerusalem, pwe epwe amanaua kich meinisin. Ekkei kapas non Alma mi itini echo kon: “Ika oua sinei ew ekesiwinin netip, me ika oua mefi ami oupwe konu ewe konun tongen angasano, upwe kapas eis, oua fen mefi iei?”²⁶ Ua tongeni ennetin apasa, ewe mwichen kon Takaradi atun ena Palm Sunday a konu “ewe konun tongen angasano.”

Ewe omuchunon wiken chommong mettoch mi fis, Jises Kraist a wau ewe kapas monomon ren ekkewe engon fopun.²⁷ A afanafana ussun An ewe niwinsefan ngeni ekkana ra amonata ar repwe etiwa I, esap ren panen ira non pour nge ren ewe saramen ewe kapas allim non ir. A aea ewe sasingin ekkewe nam mi kek me tin, fiti oil mi naf ne oku ewe tinan, ussun ew awewe ren ew mochen ne manaueni An kewe an, etiwa An kewe ennet, me aea fengen An ewe saram.

Ka sinei ewe porous. Ekkewe engon fopun ra wewe ngeni chon ewe Mwichefen, me ewe mwan chon opupunu a wewe ngeni Jises Kraist.

Ekkewe engon fopun ra angei nour kewe nam me “feino ar repwe churi ewe mwan chon opupunu.”²⁸ Nimmon ir mi tipachem, ra amoneta fiti nonon nour kewe nam me pwan uwei soposopun anonon, me nimmon mi tiparoch, ra uwei nour kewe nam nge ra kiroch ese wor soposopun anonon. Nupwen ewe kokko a feito, “Nengeni, Iei i ewe chon apupunu; oupwe feinno o souni i,”²⁹ ekkewe nimon ir mi “tipachem me [ra] angei ewe ennet, me [ra] angei ewe Ngun mi Fel ren ar chon emwen,”³⁰ ra moneta ren “nour king me nour chon awora annuk”³¹ pwe “an ning [epwe] nom wor.”³² Ekkewe pwan nimmon ir mi tiparoch ra osukosuk ne retin kut fetan nonon nour kewe nam Nge a ser nupwan. Ewe kametipen opupunu a poputa senir. Nupwen ra fichifich won ewe asam me tingor ar repwe tonong, ewe Samon a ponueni, “Ngang use sinekemi.”³³

Ifa ussun ach sipwe mefi ika I a apasa ngenikich, “Ngang use sinekemi!”

Kich, sa ussun ekkewe engon fopun, a wor nam, nge mi wor nonor? Ua nuokus mi wor ekkoch ra chok tufich ngeni ren ekis nonon, ra chok osukosuken kokotun ei fonufan ar repwe moneochuta. Oil a feitto seni nuku me mokutukut won osini me ekkewe kapasen ekkewe soufos mi manau, Preseten Nelson i emon akkaewin, noun kewe chon aninis, me ekkewe Engon me Ruemon Aposel. Oil a anonou ngunuch nupwen sia rongorong me mefi ewe Ngun mi Fel me mokutukut won ena auchean emwen. Oil a anonouonong non netipach nupwen ach mochen a pwarano pwe sia tongei ewe Samon me sia tongei met a tongei. Oil a feitto seni aier me kukuta ewe echikara ren ewe Achasefan an Jises Kraist.

Ika ekkoch neimi oua kutta ami oupwe anonou met ekkoch re eita ngeni “ew tetenin mettoch emon aramas a mochen angang ngeni an epwe awesano me mwen epwe mano,” iei: anonou ami na pwekit ren oil non nikinikin ewe konik mi manau an Jises Kraist,³⁴ minne a esisinata Manauan me an kewe afanafan. Nge won ewe epek mi sokono, om awesano ne feino ngeni eu neni toau ika och mettoch mi amwarar esap tongeni ourano ngunum ika emenemenochu; manaueni ewe nongonong mi keit me ren Jises Kraist epwe chok tongeni. Uwa fen apasa me akkom: foropachei osini me ekkewe afanafan an ekkewe soufos, mokutukut won amemefin ewe Ngun mi Fel, winiti emon ennetin chon kuno, me kutta ewe manamanen echikara ren an ach Samon ewe Achasefan. Ewe pwekiten tetenin mettoch epwe uweiukono ikewe ka mochen kopwe no ia—sefan ngeni Semom won Nang.

Ewe Palm Sunday non Takoradi a ew auchean mettoch ngeniei pokiten ua chiechi ngeni ew mwichen fefin me mwan tupwon. A fen fis won ekkewe fonu watte me fonu kukkun non unusen ewe fonufan. Ewer nguni me netipei, usun chok noumi kewe, a kan mochen, “Mwareiti ngeni ewe Kot mi Fokkun Tekia.”³⁵

Inamo ika sise uta ren ewe titin Jerusalem ikenai fiti panen ira non pouch, ewe fansoun epwe feitto nupwen, ussun a fen osini non Pwarata, “a wor ew mwich watte, ese wor emon aramas a tongeni anneani ekkewe aramas meinisin, ra feitto seni iteiten sokkun aramas, seni ekkewe einang, muu me sokkun kapas, [repwe uta] me mwen ewe nenien motun King, me mwen ewe Apanen Siip, ra ufouf mangaku mi pwechepwech, me ra kokomoch kewe pan nu non pour kewe.”³⁶

Ua nikitatiw remi ai efeioch ussun emon Aposel noun Jises Kraist pwe oupwe tiniken ne achocho ngeni ami oupwe fokkun tupen me nom nein ekkana ir, ra komoch panen ira non pour, epwe esisinen ewe Noun Kot, ewe Chon Angasano mi napanap fan itach meinisin. Non iten Jises Kraist, amen.

Esinesin

1. Ir me ruanu ekkewe puken kapas allim meinisin—Matthew 21–28; Mark 11–16; Luke 19–24; me John 12–21—re awewe usun ekewe saigon ranin an Jises Kraist iamwir non pekin inis, minne a kokkot me non nang epwe atufichi ekkewe feiochun manau me manau ese much ngeni meinisin noun Kot semirit. Ren ekkoch fansoun ewe chon mak ra sokono non met ra apachanong nge esap non an ewe Chon Amanau ekkewe afanafan me foforun.

2. Nengeni Matthew 21:10–11.

3. John 12:13.

4. Ren Uruon Chon Mwichefen me Rekotun, mi wor 102,592 chon mwichefen non Ghana.

5. John 15:12.

6. Iteiten upwe kapas ngeni ekkewe memper, repwe chok ureniei, “Elter Rasband, nouch achengicheng Aposel, ai tong ngonuk.” Ekkei aramas ra fokkun urono ren ewe Ngun me ewe tongen Kot ewe a mecheres ar repwe aea.

7. Matthew 21:9.

8. Nengeni Russell M. Nelson, “The Peace and Hope of Easter” (video), Apr. 2021, ChurchofJesusChrist.org/media; Isaiah 49:16.

9. Doctrine and Covenants 122:8. Non October 1838 ewe Soufos Joseph me ekkoch souemwenin Mwichefen ra kanapus non ewe nenien kanapus Liberty ren och popun ese pung. Nonnomun kewe ra efisata watten riaffou. Mwirin ekkoch maram non watten osukosuken riaffou, a mak ngeni ekkewe memper non March 1839, pachenong ekkewe iotek ikewe a fen tingor ngeni ewe Samon an epwe awora an umoumoch won nonomun ewe me ekkewe “souneng mi riaffou.” I a pwan aporousa met an ewe Samon ponueni ngeni an kewe iotek ussun a makketiw non Matthew 25:1–12; Doctrine and Covenants 56–23.

10. Doctrine and Covenants 122:9. An ewe Samon kapasen pesepes ngeni Joseph Smith me non ewe Liberty Jail a ngeni i kinamwe me wewe non pekin ngun pwe nonnomun och mettoh mi weires me sosot ra tongeni apochokuna kich, eiti kich tipepos, me pesei ach sipwe pusin nemeni inisich. Ewe Samon a kori an epwe “komochuno won an ewe an,” ewe minne anen ewe Samon, nikitu ngeni fofor ese fiti pungun foforun “ewe noun [Kot, ewe] a fen feittiw far meinisin. Ka ekieki pwe ka nap seni i?” (Doctrine and Covenants 122:8).

11. Doctrine and Covenants 122:9. Ewe pwon pwe Kot “epwe nom remw” ew wesewesen pwon fan iten ekkana ra komochunuk won ar nuku me epinukunuk non ewe Samon.

12. Nengeni Zechariah 9:9.

13. Matthew 20:18–19. James E. Talmage a mak non Jesus the Christ: “Ew … eingeingen amairun ennetin mettoch ekkewe engon me ruemon rese weweiti An awewei. … Ngenir mei wor ekkoch sokofesen a efisata wachemuken riaffou, ekkoch ar kapas ese nonno fengen non fansoun mi sokofesen ika rese tongeni awewei ewe ennetin pwata ra u ngeni ekkewe kapasen nour Masta mi tong. Ra sinei I pwe ewe Kraist, ewe noun ewe Kot mi manau; me ifa ussun an Emon epwe tonong non fan nemenien emon me ninino?” ([1916], 502–3).

14. Joseph Smith a fori ei kapas esinesin ngeni ekkewe Fefin Relief Society non Nauvoo, April 28, 1842, ussun mi mak in Deseret News, Sept. 19, 1855, 218. No ngeni ewe engon me ruen sopun ren 1 Chorinth, i a affata non ewe third verse, “ese wor emon epwe apasa pwe Jises i ewe Samon, nge seni ewe Ngun mi Fel,” siwini ngeni ne apasa, “Ese wor emon epwe sinei pwe Jises i ewe Samon nge seni ewe Ngun mi Fel.” (Nengeni The First Fifty Years of Relief Society: Key Documents in Latter-day Saint Women’s History [2016], 2.2, churchhistorianspress.org.)

15. Jises me noun kewe chon kuno ra mongo fengen ewe Omuchunon Fetanap (nengeni Mark 14:12–18). Ekkewe engon me ruemon a pachenong Peter, Andrew, James, John, Matthew, Philip, Thomas, Bartholomew, James(noun Alphaeus), Judas Iscariot, Judas (brother of James), and Simon (nengeni Luke 6:13–16).

16. Jises a poputani ewe sakrament ngeni Noun kewe chon kuno atun ewe Omuchunon Fafi (nengeni Matthew 26:26–29; Mark 14:22–25; Luke 22:19–20).

17. Ewe wesewesen ran/pwin mi affat non minne Jises a poputani sakrament non ewe “rum asan” ren ennetin ra anini ussun pokiten ekkoch tipefesen nefinen Matthew, Mark, me Luke me John. Matthew, Mark, and Luke ra ekieki pwe ewe Omuchunon Fetanap epwe fis non “ewe aewin ranin fatanapen pinewe ese nofit,” ika mongon Passover (nengeni Matthew 26:17; Mark 14:12; Luke 22:1, 7). Iwe nge, John, a ekieki pwe Jises epwe ares mwen ewe mongon Passover (nengeni John 18:28), wewen pwe ewe Omuchunon Fetanap ita epwe fis ew ran me mwan ewe mongon Passover. Ekkewe mettochun taropwen Mwichefen me Aramas mi Pin non Fansoun Soponon usun repwe tipeew pwe Jises epwene efisi ewe Omuchunon Fetanap fiti Noun kewe chon kuno non ewe rum asan non ewe kunionun mwen I epwe irapengesino. Souneng ekkewe ra fori apwapwan Wik mi Pin ra esina Oruwanu pwe ewe ranin ewe Omuchunon Fetanap ussun ewe ranin Irapengesino me Raninifen ussun ewe ranin Manausefan—anongonong ngeni ewe Gregorian callendar.

18. John 14:18.

19. John 14:27.

20. Doctrine and Covenants 20:77.

21. Moronai 10:5.

22. Ewe Bible Dictionary a awewei, hosanna pwe wewen “amanau iei.” Ewe kapas feito seni Psalm 118:25. “Ewe konun ei konfel a chufengen ren ewe Kapetipen ewe Tabernacles fiti ewe akanipon panen ira; ina minne nounoun ewe kapas seni ewe mwichen aramas ren apwapwan an ach Samon ewe tonong non Jerusallem” (Bible Dictionary, “Hosanna”). Nengeni Matthew 21:9, 15; Mark 11:9–10; John 12:13.

23. Mark 15:14; Luke 23:21.

24. Ewe aucheanapen an Samach won Nang ewe kokotun amanaua ina ew achasefan epwe aworaochu manau ese ren meinisin Noun semirit me manau mi tekia fan iten ekkana mi nimenimoch ar repwe angei ena feioch. Nupwen Seman we a eis, “Ion upwe tinano?” Jises Kraist a ipweno mwan: “Ngang iei; tinieino” (Abraham 3:27). President Russell M. Nelson a afanafana: “[An Jises Kraist] misin ewe Achasefan. Ena misin wesewesen An. Uputiw seni emon in mi manau me emon sam ese tongeni mano, I chok ewe emon a pusin fangeno Manauan me angei sefani (nengeni John 10:14–18). Ewe amwararen foforun An Achasefan ese wor ne muchun me mi feinfeino chok. Minne mi tongeni mano me esap chiwen tongeni mano (nengeni 1 Corinth 15:54–55). Wisan ewe ren ewe Achasefan a fen chok fat me mwen ewe Forutan Fonufan me ewe Turutiw. Esap chok ren an epwe awora ewe manausefan me manau fochofoch ren meinisin aramas, nge epwe otufichi kich ach sipwe musono seni ach kewe tipis—anongonog won ekkewe tetenin ra foruta seni I. Ina minne An Achasefan a a suki ewe an minne sipwe tongeni chufengen me I me ach kewe famini fochofoch” (“The Mission and Ministry of Jesus Christ,” Liahona, Apr. 2013, 20).

25. Manausefan a masoweni chufengenin ewe inis me ewe ngun non ew nonnomun manau fochofoch, ewe inis me ewe ngun resap chiwen keimu fesen me esap chiwen torir semwen me mano (nengeni Alma 11:45; 40:23).

26. Alma 5:26; pwan nengeni Alma 5:14.

27. Ewe kapas monomon ussun ekkewe engon fopun a pwa non Matthew 25:1–12; Doctrine and Covenants 45:56–59. Ekkewe sopun ren Matthew 25 ra awora memef pwe, mwirin an Jises a afanafana ei kapas monomon non fansoun An ewe omuchunon wik, mwirin an tonong Jerusalem non Matthew 21 me mwen chok ewe Omuchunon Faf me An ewe ares non Matthew 26. Non kapachetan ngeni ewe kapas monomon ren ekkewe engon fopun non ena omuchunon wik, Jises a awora ewe kapas monomon ren ewe ira fik, (nengeni Matthew 21:17–21; 24:32–33), kapas monomon usun ekkewe ruemon nau (nengeni Matthew 21:28–32), ewe kapas monomon usun ewe mwan pupunu mi ngaw (nengeni Matthew 21:33–46).

28. Matthew 25:1.

29. Matthew 25:6.

30. Doctrine and Covenants 45:57.

31. Doctrine and Covenants 45:59.

32. Doctrine and Covenants 45:59.

33. Matthew 25:12. Non ewe Afanafan won ewe Chuk, ewe Samon a kapas ussun ekkana ra ekieki pwe ra fen fori “chommong angang mi murinno” ra apasa, ussun a fen affat non met ewe mi fis ngeni ekkewe engon fopun mi tiparoch, “Ngang use sinekemi” (nengeni Matthew 7:22–23).

34. Ussun chok konik a namot ngeni manauen aramas, Jises Kraist me An kewe afanafan (konikin manau) ra namot ren manau ese much (see Guide to the Scriptures, “Living Water,” scriptures.ChurchofJesusChrist.org; nengeni pwan Isaiah 12:3; Jeremiah 2:13; John 4:6–15; 7:37; 1 Nephi 11:25; Doctrine and Covenants 10:66; 63:23).

35. 3 Nephi 4:32.

36. Pwarata 7:9.