ගිවිසුම් හරහා දෙවියන්වහන්සේගේ බලයට ප්රවේශ වීම
ඔබ බව්තීස්මයේ සිට දේවමාළිගාව දක්වා සහ ජීවිත කාලය පුරාම ගිවිසුම් මාවතේ ගමන් කරන විට, ඔබට ස්වාභාවික ලෞකික ප්රවාහයට එරෙහිව යාමට බලය ලැබෙන බව මම ඔබට පොරොන්දු වෙනවා.
පසුගිය නොවැම්බර් මාසයේදී බෙලෙම් බ්රසීල දේවමාළිගාව කැප කිරීමේ වරප්රසාදය මට ලැබුණා. උතුරු බ්රසීලයේ සභාවේ කැප වූ සාමාජිකයන් සමඟ සිටීම ප්රීතියක් වුණා. ලෝකයේ බලවත්ම ගංගාව වන ඇමසන් ගංගාව ඇතුළත් කලාපයට පිවිසෙන දොරටුව බෙලෙම් බව මම එදා දැනගත්තා.
ඒ ගංගාවේ එම ශක්තිය තිබියදීත්, වසරකට දෙවරක්, යම් අස්වාභාවික දෙයක් සිදු වෙනවා. ඉර, හඳ සහ පෘථිවිය එක පෙළට පිහිටන විට ස්වාභාවික ජල ප්රවාහයට එරෙහිව බලවත් උදම් රළක් ගඟ හරහා ගලා යනවා. කිලෝමීටර් 50 ක්2 දක්වා ඉහළට ගමන් කරන මීටර් 6 ක් පමණ උස1 රළ පිළිබඳ ලේඛනගත කර තිබෙනවා. මෙම සංසිද්ධිය, සාමාන්යයෙන් උදම් සිදුරක් ලෙස හැඳින්වෙනවා, එය නිකුත් කරන අධික ශබ්දය නිසා දේශීයව එය පොරෝරෝකා හෝ “මහා ගර්ජනය” ලෙස හැඳින්වෙනවා. බලවත් ඇමසන් පවා ස්වර්ගීය බලයන්ට යටත් විය යුතු බව අපට නිවැරදිව නිගමනය කරන්න පුළුවන්.
ඇමසන් මෙන්, අපගේ ජීවිතයට ස්වභාවික ගලායාමක් තිබෙනවා; අපි ස්වභාවිකව ලැබෙන දේ කිරීමට නැඹුරුවක් දක්වනවා. ඇමසන් මෙන්, ස්වර්ගීය උපකාරයෙන්, අපට අස්වාභාවික ලෙස පෙනෙන දේවල් කරන්න පුළුවන්. ඇත්ත වශයෙන්ම, අප නිහතමානී වීම, මෘදු වීම හෝ අපගේ කැමැත්ත දෙවියන්වහන්සේට භාර දීමට කැමැත්තෙන් සිටීම අපට ස්වභාවයෙන්ම එන දෙයක් නොවේ. නමුත් අපට පරිවර්තනය වී, දෙවියන්වහන්සේ ඉදිරියෙහි ජීවත් වීමට ආපසු යාමට සහ අපගේ සදාකාලික ඉරණම සාක්ෂාත් කරගත හැක්කේ එසේ කිරීමෙන් පමණයි.
ඇමසන් මෙන් නොව, අප ස්වර්ගික බලයන්ට යටත් වෙනවාද නැතහොත් “ප්රවාහය සමඟ යනවාද”3 කියා අපට තෝරාගන්න පුළුවන්. ප්රවාහයට එරෙහිව යාම දුෂ්කර වෙන්න පුළුවන්. නමුත් අපි “ශුද්ධාත්මයාණන්ගේ පොළඹවා ගැනීම්වලට” යටත් වී ස්වභාවික පුරුෂයාගේ හෝ ස්ත්රියගේ4 ආත්මාර්ථකාමී නැඹුරුවාවන් ඉවත් කළ විට, අපගේ ජීවිතවලට ගැලවුම්කරුවාණන්ගේ පරිවර්තනය කිරීමේ බලය, දුෂ්කර දේවල් කිරීමට හැකි වන බලය ලබා ගන්න පුළුවන්
සභාපති රසල් එම්. නෙල්සන් මෙය කරන්නේ කෙසේදැයි අපට ඉගැන්වුවා. ඔහු මෙසේ පොරොන්දු වුණා, “බව්තීස්ම තටාක සහ දේවමාළිගා වල ගිවිසුම් ඇතිකරගන්නා—සහ ඒවා රකින—සෑම පුද්ගලයෙකු වෙනුවෙන්ම, [මෙම වැටුණු ලෝකයේ ඇදගෙන යාමෙන්] අපව ඔසවා තැබීමට යේසුස් ක්රිස්තුස්වහන්සේගේ බලයට ප්රවේශය වැඩි කර තිබෙනවා.”5 වෙනත් වචන වලින් කිවහොත්, අපට දෙවියන්වහන්සේගේ බලයට ප්රවේශ වෙන්න පුළුවන්, නමුත් එසේ හැකි වෙන්නෙ අපි පරිශුද්ධ ගිවිසුම් හරහා උන්වහන්සේ සමඟ සම්බන්ධ වූ විට පමණයි.
පොළොව මැවීමට පෙර, දෙවියන්වහන්සේ ගිවිසුම් ස්ථාපිත කළේ උන්වහන්සේගේ දරුවන්ට උන්වහන්සේට අපව එක්සත් කිරීමට හැකි වීමේ යාන්ත්රණයක් ලෙසයි. සදාකාලික, නොවෙනස්වන නීතිය මත පදනම්ව, උන්වහන්සේ අපව පරිවර්තනය කරන, ගලවන සහ උත්කර්ෂවත් කරනු ලබන සාකච්ඡා කර වෙනස් කළ නොහැකි කොන්දේසි නියම කළා. මේ ජීවිතයේ දී, අපි පූජකවරයේ නියෝග වලට සහභාගී වෙමින්, දෙවියන්වහන්සේ අපෙන් ඉල්ලා සිටින දේ කිරීමට පොරොන්දු වීමෙන් අපි මෙම ගිවිසුම් ඇති කර ගන්නවා, ඒ වෙනුවට දෙවියන්වහන්සේ අපට යම් යම් ආශිර්වාද ලබා දෙනවා.6
ගිවිසුමක් යනු අප සූදානම් විය යුතු, පැහැදිලිව අවබෝධ කර ගත යුතු සහ සම්පූර්ණයෙන්ම ගරු කළ යුතු පොරොන්දුවක්.7 දෙවියන්වහන්සේ සමඟ ගිවිසුමක් ඇති කර ගැනීම සාමාන්ය ලෙස පොරොන්දුවක් වීමට වඩා වෙනස්. පළමුව, ඒ සඳහා පූජකත්ව අධිකාරිය අවශ්ය වෙනවා. දෙවනුව, ස්වාභාවික ප්රවාහයේ ඇදීමෙන් අපව ඔසවා තැබීමට දුර්වල පොරොන්දුවකට සම්බන්ධක ශක්තියක් නැහැ. අපි ගිවිසුමක් ඇති කර ගන්නේ එය ඉටු කිරීමට සුවිශේෂී ලෙස කැපවීමට අප අදහස් කරන විට පමණයි.8 විශේෂයෙන් අපි ගිවිසුම සමඟ සම්පුර්ණයෙන්ම අපව හඳුනා ගන්නා විට, අපි දෙවියන්වහන්සේගේ ගිවිසුම් ලත් දරුවන් සහ උන්වහන්සේගේ රාජ්යයේ උරුමක්කාරයන් බවට පත් වෙනවා.
ගිවිසුම් මාවත යන්නෙන් අදහස් කරන්නේ අප ක්රිස්තුස්වහන්සේ වෙතට පැමිණ උන්වහන්සේ හා සම්බන්ධ වන ගිවිසුම් මාලාවක් ගැනයි. මෙම ගිවිසුම් බැඳීම තුළින් අපට උන්වහන්සේගේ සදාකාලික බලයට ප්රවේශය තිබෙනවා. මෙම මාවත ආරම්භ වන්නේ යේසුස් ක්රිස්තුස්වහන්සේ කෙරෙහි ඇදහිල්ලෙන් හා පසුතැවිලි වීමෙන් පසුව බව්තීස්මය හා ශුද්ධාත්මයාණන් ලබා ගැනීමෙනුයි.9 යේසුස් ක්රිස්තුස්වහන්සේ බව්තීස්ම වූ විට එම මාවතට ඇතුළු වන ආකාරය උන්වහන්සේ අපට පෙන්වා දුන්නා.10 මාර්ක් සහ ලූක්ගේ නව ගිවිසුමේ ශුභාරංචි වාර්තාවලට අනුව, යේසුස් ක්රිස්තුස්වහන්සේගේ බව්තීස්මයේදී ස්වර්ගික පියාණන්වහන්සේ උන්වහන්සේට සෘජුවම කතා කරමින් මෙසේ කිව්වා, “ඔබ මාගේ ආදරණීය පුත්රයාය; ඔබ ගැන මම ඉතා සතුටු වෙමි.” අපි බව්තීස්මය හරහා ගිවිසුම් මාවතට පිවිසෙන විට, ස්වර්ගීය පියාණන්වහන්සේ අප සෑම කෙනෙකුටම එවැනිම දෙයක් පවසනු ඇතැයි මට සිතාගන්න පුළුවන්: “ඔබ මා ප්රිය කරන මගේ ආදරණීය දරුවා ය. දිගටම යන්න.”11
බව්තීස්මයේදී සහ අප සක්රමේන්තුවට සහභාගී වන විට,12 අපි යේසුස් ක්රිස්තුස්වහන්සේගේ නාමය ගැනීමට කැමැත්තෙන් සිටින බවට අපි සාක්ෂි දරනවා.13 මෙම සන්දර්භය තුළ, “තාගේ දෙවිවූ ස්වාමීන්වහන්සේගේ නාමය නිකරුණේ ව්යවහාර නොකරව”14 යන පරණ ගිවිසුමේ ආඥාව අපි මතක තබා ගනිමු. අපගේ නූතන කන්වලට, මෙය ස්වාමින්වහන්සේගේ නාමය අගෞරවනීය ලෙස භාවිතා කිරීමට එරෙහි තහනමක් ලෙස පෙනෙනවා. මෙම ආඥාවට එය ඇතුළත් වෙනවා, නමුත් එහි නියෝගය ඊටත් වඩා ගැඹුරුයි. “ගැනීම” ලෙස පරිවර්තනය කර ඇති හෙබ්රෙව් වචනයේ තේරුම “ඉහළට එසවීම” හෝ “රැගෙන යාමයි,” එනම් එයින් යන්නෙන් අදහස් කරන්නේ කණ්ඩායමක් හෝ පුද්ගලයෙකු සමඟ තමාව හඳුන්වන බැනරයක් වැනි දෙයක්.15 “නිකරුණේ” ලෙස පරිවර්තනය කර ඇති වචනයේ තේරුම “හිස්” හෝ “රැවටිලිකාර” යන්නයි.16 ස්වාමින්වහන්සේගේ නාමය නිකරුණේ ව්යවහාර නොකරව යන්නෙහි තේරුම තමයි “ඔබ යේසුස් ක්රිස්තුස්වහන්සේව නිසි ලෙස නියෝජනය කිරීමට අදහස් කරන්නේ නම් මිස, ඔබ උන්වහන්සේගේ ගෝලයෙකු ලෙස ඔබව හැඳින්විය නොයුතුයි.”
අපි උන්වහන්සේගේ ගෝලයන් බවට පත්වන්නේ සහ උන්වහන්සේව නිසි ලෙස නියෝජනය කරන්නේ අපි චේතාන්විතව සහ වර්ධනය වන ලෙස ගිවිසුම් තුළින් යේසුස් ක්රිස්තුස්වහන්සේගේ නාමය අප මතට ගත් විටයි. අපගේ ගිවිසුම් අපට ගිවිසුම් මාවතේ රැඳී සිටීමට බලය ලබා දෙන්නේ යේසුස් ක්රිස්තුස්වහන්සේ සහ අපගේ ස්වර්ගික පියාණන්වහන්සේ සමඟ ඇති අපගේ සම්බන්ධතාවය වෙනස් වී ඇති බැවිනුයි. අපි උන්වහන්සේලා සමඟ ගිවිසුම් බැඳීමකින් සම්බන්ධ වී සිටිනවා.
ගිවිසුම් මාවත දේවමාළිගාවේ බලයෙන් සැරසීම වැනි දේවමාළිගාවේ නියෝග වලට මග පාදනවා.17 බලයෙන් සැරසීම යනු දෙවියන්වහන්සේගේ පරිශුද්ධ ගිවිසුම් සඳහා ත්යාගය වන අතර එය අපව උන්වහන්සේට සම්පූර්ණයෙන්ම සම්බන්ධ කරනවා. බලයෙන් සැරසීමේදී, අපි, පළමුව, දෙවියන්වහන්සේගේ ආඥා පිළිපැදීමට උත්සාහ කිරීමටත්, දෙවනුව, බිඳුණු හදවතකින් හා පසුතැවිලි වූ ආත්මයකින් පසුතැවිලි වීමටත්; තෙවනුව, යේසුස් ක්රිස්තුස්වහන්සේගේ ශුභාරංචිය අනුව ජීවත්වීමටත් ගිවිසුමක් ඇති කර ගන්නවා. අපි මෙය කරන්නේ උන්වහන්සේ කෙරෙහි ඇදහිල්ල ක්රියාත්මක කිරීමෙන්, අපට ගැලවීම සහ උත්කර්ෂවත් වීමේ නියෝග ලැබෙන විට දෙවියන්වහන්සේ සමඟ ගිවිසුම් ඇති කර ගැනීමෙන්, එම ගිවිසුම් අපගේ ජීවිත කාලය පුරාම තබා ගැනීමෙන්, සහ දෙවියන්වහන්සේට සහ අසල්වැසියන්ට ප්රේම කිරීමේ උතුම් ආඥා දෙක අනුව ජීවත් වීමට උත්සාහ කිරීමෙනුයි. අපි, හතරවනුව, නිර්මලකමේ නීතිය පිළිපැදීමටත්, පස්වනුව, උන්වහන්සේගේ සභාව ගොඩනැගීම සඳහා අපව සහ ස්වාමින්වහන්සේ අපට ආශිර්වාද කරන සෑම දෙයක්ම කැප කිරීමටත් ගිවිසුමක් ඇති කර ගන්නවා.18
දේවමාළිගා ගිවිසුම් ඇති කර ගැනීමෙන් සහ ඒවා පැවැත්වීමෙන්, අපි ස්වාමින්වහන්සේගේ අරමුණු ගැන වැඩි වැඩියෙන් ඉගෙන ගන්නා අතර ශුද්ධාත්මයාණන්වහන්සේගේ පූර්ණත්වය ලබා ගන්නවා.19 අපේ ජීවිතයට මගපෙන්වීමක් ලැබෙනවා. අපි වෙනස් නොවන, නොදැනුවත් දරුවන් ලෙස නොසිටින පරිදි අපගේ අනුගාමිකත්වය තුළ පරිණත වෙනවා.20 ඒ වෙනුවට, අපි සදාකාලික ඉදිරිදර්ශනයක් සමඟ ජීවත් වන අතර දෙවියන්වහන්සේට සහ අන් අයට සේවය කිරීමට වඩාත් පෙලඹවීමෙන් සිටිනවා. ලෞකිකත්වයේදී අපගේ අරමුණු ඉටු කර ගැනීමට අපට වැඩි හැකියාවක් ලැබෙනවා. අපව නපුරෙන් ආරක්ෂා කරන අතර,21 පරීක්ෂාවට එරෙහි වීමට සහ අප පැකිළෙන විට පසුතැවිලි වීමට අපට වැඩි ශක්තියක් ලැබෙනවා.22 අපි අඩපණ වෙද්දි, දෙවියන්වහන්සේ සමඟ අපි ඇතිකරගත් අපගේ ගිවිසුම් මතකය අපට නැවත එම මාවතට යන්න උදව් වෙනවා. දෙවියන්වහන්සේගේ බලයට සම්බන්ධ වීමෙන්, අපි අපගේම පොරෝරෝකා බවට පත් වෙමු, එවිට අපගේ ජීවිත කාලය පුරාම සදාකාලිකත්වය දක්වාම අපට ලෝකයේ ගලායාමට එරෙහිව නැගී සිටින්න පුළුවන් වෙයි. අවසානයේදී, එම ගිවිසුම් මාවත උත්කර්ෂයට සහ සදාකාලිත්වයට මගපෙන්වන නිසා අපේ ඉරණම වෙනස් වෙයි.23
බව්තීස්ම තටාක වල සහ දේවමාළිගාවේ ඇති කර ගත් ගිවිසුම් පවත්වා ගැනීම ලෞකිකත්වයේ පරීක්ෂණයන්ට සහ සිත් වේදනාවන්ට ඔරොත්තු දීමට අපට ශක්තිය සපයනවා.24 මෙම ගිවිසුම් සමඟ සම්බන්ධ වූ දහම අපගේ මාර්ගය පහසු කරවන අතර බලාපොරොත්තුව, සැනසීම සහ සාමය ලබා දෙනවා.
මගේ ආච්චි සහ සීය වන ලීනා සොෆියා සහ මැට්ස් ලියාන්ඩර් රෙන්ලන්ඩ්, 1912 දී ෆින්ලන්තයේ සභාවට සම්බන්ධ වූ විට ඔවුන්ගේ බව්තීස්ම ගිවිසුම හරහා ඔවුන් දෙවියන්වහන්සේගේ බලය ලබා ගත්තා. ෆින්ලන්තයේ සභාවේ පළමු ශාඛාවේ කොටසක් වීම ගැන ඔවුන් සතුටු වුණා.
වසර පහකට පසු ලීනා ඔවුන්ගේ දසවැනි දරුවා සමඟ ගැබ්ගෙන සිටියදී ලියාන්ඩර් ක්ෂය රෝගයෙන් මිය ගියා. ඒ දරුවා වන මගේ පියා, ලියාන්ඩර්ගේ මරණයෙන් මාස දෙකකට පසුව උපත ලැබුවා. ලීනා අවසානයේ ඇගේ සැමියාව පමණක් නොව ඇගේ දරුවන් දස දෙනාගෙන් හත් දෙනෙකුවත් භූමදාන කළා. දුප්පත් වැන්දඹුවක් ලෙස ඇය අරගල කළා. අවුරුදු 20ක් තිස්සේ ඇයට හොඳ රාත්රී විවේකයක් ලැබුණේ නැහැ. දිවා කාලයේදී ඇය තම පවුලට ආහාර සැපයීමට පොරබැදුවා. රාත්රියේදී ඇය මිය යන පවුලේ සාමාජිකයන්ව රැකබලා ගත්තා. ඇය ඒවාට මුහුණ දුන්නේ කෙසේදැයි සිතා ගැනීමට අපහසුයි.
මිය ගිය සැමියා සහ එම දරුවන් සදාකාලිකවම තමාගේ විය හැකි බව ඇය දැන සිටි නිසා ලීනා ඉවසා සිටියා. සදාකාලික පවුල් ඇතුළු දේවමාළිගාවේ ආශිර්වාද පිළිබඳ දහම ඇයට සාමය ගෙන ආවේ ඇය මුද්රා වීමේ බලය කෙරෙහි විශ්වාසය තැබූ නිසයි. ලෞකිකත්වය තුළ සිටියදී, ඇයට ඇයගේම බලයෙන් සැරසීම හෝ ඇය ලියාන්ඩර්ට මුද්රා වීම හෝ ලැබුවේ නෑ, නමුත් ලියාන්ඩර් ඇගේ ජීවිතයට වැදගත් බලපෑමක් ඇති කළ අතර අනාගතය සඳහා ඇයගේ විශාල බලාපොරොත්තුවේ කොටසක් වුණා.
1938 දී, ලීනා සිය මියගිය පවුලේ සාමාජිකයන් සඳහා දේවමාළිගාවේ නියෝග ඉටු කළ හැකි වන පරිදි වාර්තා ඉදිරිපත් කළා, ෆින්ලන්තයෙන් ඉදිරිපත් කරන ලද පැරණිතම ඒවා තමයි ඒ. ඇය මිය ගිය පසු, ඇය, ලියාන්ඩර් සහ ඇගේ මියගිය දරුවන් වෙනුවෙන් වෙනත් අය විසින් දේවමාළිගාවේ නියෝග සිදු කළා. නියෝජනය මගින්, ඇයට බලයෙන් සැරසීම ලබාදුන්නා, ලීනා සහ ලියාන්ඩර්ව එකිනෙකාට මුද්රා තැබුවා, ඒවගේම ඔවුන්ගේ මියගිය දරුවන්ව සහ මගේ පියාව ඔවුන්ට මුද්රා තැබුවා. අනෙක් අය මෙන්, ලීනා “පොරොන්දු ලබා නොගෙන, ඇදහිල්ලෙන් මිය ගියා, නමුත් ඒවා දුර සිට දැක, … ඒවායින් ඒත්තු ගැන්වී, ඒවා වැලඳ ගත්තා.”25
ලීනා ජීවත් වූයේ ඇය දැනටමත් තම ජීවිතයේ මෙම ගිවිසුම් තබාගෙන සිටි ආකාරයටයි. ඇයගේ බව්තීස්ම සහ සක්රමේන්තු ගිවිසුම් ඇයව ගැලවුම්කරුවාණන්ට සම්බන්ධ කරන බව ඇය දැන සිටියා. ඇය “[මිදුම්කරුවාණන්ගේ] ශුද්ධස්ථානය සඳහා වූ මිහිරි ආශාව [ඇගේ] පාළු හදවතට බලාපොරොත්තුවක් ගෙන දීමට ඉඩ හැරියා.”26 ලීනා තම ජීවිතයේ ඛේදවාචක අත්විඳීමට පෙර සදාකාලික පවුල් ගැන ඉගෙන ගැනීමට හැකිවීම දෙවියන්වහන්සේගේ මහත් දයාවේ කොටසක් සේ සැලකුවා. ගිවිසුම් තුළින් ඇයට ඇගේ අභියෝග සහ දුෂ්කරතා විඳදරාගැනීමට සහ ඉන් ඔබ්බට යාමට දෙවියන්වහන්සේගේ බලය ලැබුණා.
ඔබ බව්තීස්මයේ සිට දේවමාළිගාව දක්වා සහ ජීවිත කාලය පුරාම ගිවිසුම් මාවතේ ගමන් කරන විට, ඉගෙනීමේ බලය, පසුතැවිලි වීමේ සහ පරිශුද්ධ වීමේ බලය සහ ඔබ ජීවිතයේ අභියෝගවලට මුහුණ දෙන විට බලාපොරොත්තුව, සැනසීම සහ ප්රීතිය පවා සොයා ගැනීමට බලය සමඟ—ඔබට ස්වාභාවික ලෞකික ප්රවාහයට එරෙහිව යාමට බලය ලැබෙන බව මම ඔබට පොරොන්දු වෙනවා. විශේෂයෙන්ම ඔබ දේවමාළිගාව ඔබේ ජීවිතයේ ප්රධාන අවධානයක් කරගන්නා විට විරුද්ධවාදියාගේ බලපෑමෙන් ඔබට සහ ඔබේ පවුලට ආරක්ෂාව ලැබෙන බවට මම පොරොන්දු වෙනවා.
ඔබ ක්රිස්තුස්වහන්සේ වෙතට පැමිණ, උන්වහන්සේට සහ අපගේ ස්වර්ගීය පියාණන්වහන්සේට ගිවිසුම් මගින් සම්බන්ධ වන විට, අස්වාභාවික ලෙස පෙනෙන දෙයක් සිදුවෙයි. ඔබ පරිවර්තනය වී යේසුස් ක්රිස්තුස්වහන්සේ තුළ පරිපූර්ණ වෙයි.27 ඔබ දෙවියන්වහන්සේගේ ගිවිසුම් දරුවෙක් සහ උන්වහන්සේගේ රාජ්යයේ උරුමක්කරුවෙක් බවට පත් වෙනවා.28 උන්වහන්සේ ඔබට මෙසේ කියනු ඇතැයි මට සිතාගන්න පුළුවන්, “ඔබ මා ප්රිය කරන මගේ ආදරණීය දරුවා ය. ඔබව නිවසට සාදරයෙන් පිළිගන්නවා. ” යේසුස් ක්රිස්තුස්වහන්සේගේ නාමයෙන්, ආමෙන්.