132 වන කොටස
1843 ජූලි 12, නාවූ, ඉලිනොයිස් හිදී, වර්තාගත වූ, සදාකාලික විවාහ ගිවිසුම සහ බහු විවාහ මූලධර්මය ඇතුළුව, නව සහ සදාකාලික ගිවිසුම සම්බන්ධව, ජෝසෆ් ස්මිත් අනාගතවක්තෘවරයා තුළින් දෙනු ලැබූ එළිදරව්වකි. මෙම එළිදරව්ව වාර්තා වූයේ 1843 දී වුවත්, මෙම එළිදරව්වේ ඇතුළත්ව තිබෙන සමහරක් මූලධර්ම, අනාගතවක්තෘවරයා විසින් 1831 සිටම දැන සිටි බව සාක්ෂි වලින් පැහැදිලි වන්නේය. 1 වන නිල ප්‍රකාශය බලන්න.
1–6, උත්කර්ෂය ලබාගත හැකිවන්නේ නව සහ සදාකාලික ගිවිසුම තුළින්ය; 7–14, එම ගිවිසුමට අදාළ නියමයන් සහ කොන්දේසි දක්වා ඇත්තේය; 15–20, සෙලෙස්ටියල් විවාහය සහ පවුල් ඒකකයේ පැවැත්ම මනුෂ්‍යයන්ට දෙවිවරුන් බවට පත්වීමට හැකියාව ලබාදෙන්නේය; 21–25, අවහිර සහ පටු මාර්ගය සදාකාලික ජීවිත වලට මගපෙන්වන්නේය; 26–27, ශුද්ධාත්මයාණන්වහන්සේට විරුද්ධව දේව අපහාස පිළිබඳ නීතිය දෙනු ලබයි; 28–39, සදාකාලික වර්ධනය සහ උත්කර්ෂයේ පොරොන්දු සියලු කාල වල අනාගතවක්තෘවරුන් සහ ශුද්ධවන්තයන්ට ලබාදී ඇත්තේය; 40–47, පොළොවේ සහ ස්වර්ගයේ බැඳීමේ සහ මුද්‍රා කිරීමේ බලය ජෝසෆ් ස්මිත් හට ලබාදී ඇත්තේය; 48–50, ස්වාමින්වහන්සේ විසින් ඔහුගේ උත්කර්ෂය ඔහු මත මුද්‍රා කරන සේක; 51–57, එමා ස්මිත්ට ඇදහිලිවන්තව සහ සත්‍යවාදීව සිටීමට උපදෙස් දෙනු ලබයි; 58–66, බහු විවාහ පාලනයට නීති පිහිටුවනු ලබයි.
1 සැබවක්, ස්වාමින්වහන්සේ මාගේ සේවක ජෝසෆ් වන නුඹ හට මෙසේ පවසන සේක, එනම් එපමණකින් ස්වාමින්වහන්සේ වන, මම, මාගේ සේවකයන් වූ ආබ්‍රහම්, ඊසාක්, සහ යාකොබ්ද, එසේම මාගේ සේවකයන් වන මෝසෙස්, දාවිත්, සහ සොලමොන්ද, ඔවුන් බොහෝ භාර්යාවන් සහ උපභාර්යාවන් තබාගැනීමේ මූලධර්මය සහ දහම සාධාරණීයකරණය කිරීම පිළිබඳව මාගේ හස්තයෙන් දැනගැනීමට සහ තේරුම්ගැනීමට නුඹ ඉල්ලා ඇත—
2 බලන්න, තවද බලව, මම නුඹගේ ස්වාමින් වූ දෙවියන්වහන්සේ වෙමි, තවද මෙම කාරණාව පිළිබඳව මම නුඹට පිළිතුරු දෙන්නෙමි.
3 එසේහෙයින්, මම නුඹ හට දැන් දීමට යන්නාවූ උපදේශ ලබාගැනීමට සහ ඒවාට කීකරු වීමට නුඹගේ හදවත සූදානම් කරගන්න; මක්නිසාද මෙම නීතිය එළිදරව් කරනු ලැබූ එම සියල්ලන්ම එයට ඒ ආකාරයෙන් කීකරු විය යුතු වන්නෝය.
4 මක්නිසාද බලන්න, මම නුඹලා හට නව සහ සදාකාලික ගිවිසුමක් එළිදරව් කරන්නෙමි; තවද නුඹලා මෙම ගිවිසුමෙහි නොපවතින්නේ නම්, එවිට නුඹලා විනාශයට පත්වන්නෝය; මක්නිසාද කිසිවෙකුට මෙම ගිවිසුම ප්‍රතික්ෂේප කොට තවද මාගේ මහිමය තුළට ඇතුළත් වීමට අවසර ලැබිය නොහැක්කේය.
5 මක්නිසාද මාගේ හස්තයෙන් ආශිර්වාදයක් ලබන සියල්ලෝ එම ආශිර්වාදයට නියම කරනු ලැබූ එම නීතියෙහි, සහ එයට අදාළ කොන්දේසි වල පැවතිය යුතු වන්නෝය, තවද ඒවා ලෝකයේ පටන්ගැන්මටත් පෙර පිහිටුවන ලද්දේය.
6 තවද එම නව සහ සදාකාලික ගිවිසුම සම්බන්ධව, එය මාගේ මහිමයේ පූර්ණත්වය උදෙසා පිහිටුවන ලද්දේය; තවද එනම් එහි පූර්ණත්වය ලබාගන්නා ඔහු තවද එම නීතියේ පැවතිය යුතු සහ යුතුම වන්නේය, නැතහොත් ඔහුට ශාපකරනු ලබන්නේ යැයි, ස්වාමින් වූ දෙවියන්වහන්සේ පවසන සේක.
7 තවද සැබවක් මම නුඹලා හට පවසන්නෙමි, එනම් මෙම නීතියේ කොන්දේසි මේවාය: සියලුම ගිවිසුම්, ගිවිසගැනීම්, බැඳීම්, පොරොන්දු, දිව්රුම්, භාරයන්, ක්‍රියාවන්, සම්බන්ධතාවයන්, ඇසුරු කිරීම්, හෝ බලාපොරොත්තු, මේ කාලය සහ සදාකාලය යන දෙකම සඳහා, ආලේපලත් උන්වහන්සේ වන, තවද වඩාත් ශුද්ධ වන, මාගෙන් ආලේප ලද උන්වහන්සේගේ එළිදරව් සහ ආඥාව මගින්, මෙම බලය දරන්නට පොළොව මත මා විසින් පත්කරන ලද (තවද අවසාන දවස් වලදී මෙම බලය දරන්නට මම මාගේ සේවක ජෝසෆ් ස්මිත් හට එය පත්කර ඇත්තෙමි, තවද මෙම බලය සහ පූජකවර යතුරු පවරා ඇත්තේ පොළොව මත එක අවස්ථාවකදී එක අයෙකු මත පමණක්මය), පොරොන්දුවේ ශුද්ධාත්මයාණන්වහන්සේ මගින් මුද්‍රා වී සහ ඒවා තබා ඇතුළත් නොවූයේ නම්, ඒවාට කිසිඳු සඵලත්වයක්, යහපත්කමක්, හෝ මරණයෙන් නැවත නැගිටීමේදී සහ ඉන්පසු බලයක් නොමැත්තේය; මක්නිසාද මේ ආකාරයට තබා නොගත් සියලු ගිවිසගැනීම් මනුෂ්‍යයන්ගේ මරණයත් සමඟම අවසන් වන්නේය.
8 බලන්න, මාගේ ගෘහය පිළිවෙලේ ගෘහයක් මිස, තවද ව්‍යාකූලත්වයේ ගෘහයක් නොවන්නේ යැයි, ස්වාමින් වන දෙවියන්වහන්සේ පවසන සේක.
9 එනම් මාගේ නාමයෙන් නොකරන ලද්දාවූ ඔප්පුකිරීමක් මම පිළිගන්නෙම් දැයි, ස්වාමින්වහන්සේ අසන සේක?
10 නැතහොත් එනම් මම පැවරූ නැති දෙයක් නුඹලාගේ හස්තයෙන් මම ලබාගන්නෙම්ද?
11 තවද ලෝකය මැවීමටත් පෙර, මම සහ මාගේ පියාණන්වහන්සේ විසින් නුඹලා හට නියම කළ ලෙස, නීතිය මගින් මිස, මා නුඹලාට යමක් නියම කරන්නේ දැයි, ස්වාමින්වහන්සේ පවසන සේක?
12 මම ස්වාමින් වූ නුඹලාගේ දෙවියන්වහන්සේ වෙමි; තවද මම නුඹලා හට මෙම ආඥාව ලබාදෙන්නෙමි—එනම් මා තුළින් සහ මාගේ වචනය තුළින් මිස, කිසිඳු මනුෂ්‍යයෙකු පියාණන්වහන්සේ වෙතට පැමිණෙන්නේ නැත, එය මාගේ නීතිය යැයි, ස්වාමින්වහන්සේ පවසන සේක.
13 තවද මෙම ලෝකයේ තිබෙන සියලුම දේවල්, එය මනුෂ්‍යයන් මගින්, සිංහාසනයන් මගින්, හෝ රාජ්‍යයන්, හෝ බලයන්, හෝ ප්‍රසිද්ධ දේවල් මගින් යන ඕනෑම ආකාරයක් මගින් නියම වී තිබුණද, ඒවා මා මගින් හෝ මාගේ වචනයෙන් නොවන්නේ නම්, ස්වාමින්වහන්සේ මෙසේ පවසන සේක, ඒවා පහතට විසිකරනු ලබන්නේය, තවද මනුෂ්‍යයන් මරණයට පත්වූ පසුත්, එමෙන්ම මරණයෙන් නැවත නැගිටීමෙන් පසුව වුවත් ඒවා නොපවතින්නේ යැයි, ස්වාමින් වූ නුඹලාගේ දෙවියන්වහන්සේ පවසන සේක.
14 මක්නිසාද කවරාකාර දේවල් පවතින්නේද ඒවා මා මගින් වන්නේය; තවද කවරාකාර දේවල් මා මගින් නොවන්නේද ඒවා කඩාබිඳ දමා තවද විනාශ කරනු ලබන්නේය.
15 එසේහෙයින්, මනුෂ්‍යයෙකු ලෝකය තුළ ඔහු උදෙසා භාර්යාවක් විවාහ කරගන්නේද, තවද ඔහු මා මගින් හෝ මාගේ වචනය මගින් ඇයව විවාහ කර නොගන්නේද, තවද ඔහු ලෝකයේ සිටින තාක්කල් ඇය සමඟ සිටීමට ඔහු ගිවිසුම් තබාගන්නේද, ඔවුන්ගේ ගිවිසුම සහ විවාහය ඔවුන් මරණයට පත්වූ විට, තවද ඔවුන් මෙම ලෝකයෙන් පිටවූ විට බලපැවැත්වෙන්නේ නැත; එසේහෙයින්, ඔවුන් ලෝකයෙන් පිටත සිටින විට කිසියම් හෝ නීතියකින් ඔවුහු නොබැඳෙන්නෝය.
16 එසේහෙයින්, ඔවුන් මෙම ලෝකයෙන් පිටත සිටින විට ඔවුන් විවාහ වීම හෝ විවාහ කරදීම හෝ නොවන්නේය; එහෙත් ස්වර්ගයෙහිදී දේවදූතයන් ලෙස පත්කරනු ලබන්නේය, එම දේවදූතයන්, තවත් දුරකට යාමට සුදුසු, තවද මහත් වූ, සහ සදාකාලික තේජස් බලයේ සිටින අයට, දේවසේවය කරන්නාවූ සේවකයන් වන්නෝය.
17 මක්නිසාද මෙම දේවදූතයන් මාගේ නීතිය අනුව පැවතියේ නැත; එසේහෙයින්, ඔවුන්ට වර්ධනය වීමට නොහැකි වන්නේය, එහෙත් වෙන්ව සහ තනිවම, උත්කර්ෂයෙන් තොරව, ඔවුන්ව ගලවාගත් තත්වයේම, සියලු සදාකාලයටම පවතින්නෝය; තවද මෙතැන් සිට දෙවිවරුන් නොවන්නෝය, එහෙත් සදාකාලයෙන් සදාකාලයට දෙවියන්වහන්සේගේ දේවදූතයෝ වන්නෝය.
18 තවද නැවතත්, සැබවක් මම නුඹලා හට පවසන්නෙමි, මනුෂ්‍යයෙක් භාර්යාවක් විවාහ කරගෙන, තවද ඇය සමඟ මෙලොව සහ සියලු සදාකාලය දක්වා ගිවිසුමක් ඇතිකරගන්නේද, එම ගිවිසුම මාගෙන් හෝ මාගේ නීතිය වන මාගේ වචනය මගින් නොවේ නම්, තවද මෙම බලය වෙතට මා විසින් ආලේපකර තවද පත්කරන ලද උන්වහන්සේ වන, එනම් පොරොන්දුවේ ශුද්ධාත්මයාණන්වහන්සේ මගින් මුද්‍රා කරනු නොලබන්නේද, එවිට එය ලෝකයෙන් පිටත ඔවුන් සිටින විට එය වලංගු හෝ බලාත්මක නොවන්නේය, මක්නිසාද ඔවුන් මා මගින්, හෝ මාගේ වචනය මගින් එක්කර නැතැයි, ස්වාමින්වහන්සේ පවසන සේක; ඔවුන් ලෝකයෙන් පිටත සිටින විට එය එහිදී ලබාගත නොහැක්කේය, මක්නිසාද දේවදූතයන් සහ දෙවිවරුන් එහි පත්කර ඇත්තේය, ඒ අයවළුන්ව පසුකරයාමට ඔවුන්ට නොහැකිය; එසේහෙයින්, ඔවුන්ට, මාගේ මහිමය උරුම කරගත නොහැකිය; මක්නිසාද මාගේ ගෘහය පිළිවෙලේ ගෘහයක් යැයි, ස්වාමින් වූ දෙවියන්වහන්සේ පවසන සේක.
19 තවද නැවතත්, සැබවක් මම නුඹලා හට පවසන්නෙමි, මාගේ නීතිය වන, තවද නව සහ සදාකාලික ගිවිසුම වන, මාගේ වචනය මගින් යම් මනුෂ්‍යයෙකු භාර්යාවක් විවාහ කරගන්නේද, තවද උන්වහන්සේ විසින් ආලේප කරන ලද, එමෙන්ම මෙම බලය සහ මෙම පූජකවරයේ යතුරු මා විසින් පත්කර ඇති, පොරොන්දුවේ ශුද්ධාත්මයාණන්වහන්සේ මගින් මුද්‍රා කරනු ලබන්නේද; තවද ඔවුන් හට මෙසේ පවසනු ලබන්නේය—නුඹලා පළමු නැවත නැගිටීමේදී පෙරට පැමිණෙන්නෝය; තවද එය පළමු නැවත නැගිටීමෙන් පසුව නම්, ඊලඟ නැවත නැගිටීමේදී එසේ වන්නේය; තවද සිංහාසන, රාජ්‍යයන්, රාජධානින්, සහ බලයන්, අධිපත්‍යයන්, සියලු උස්ථානයන්හි සහ ගැඹුරෙහිදී උරුමයන් ලබන්නෝය—එනම් ඔහු අහිංසක රුධිරය වැගිරවීමට මිනීමැරීම නොකරන බව, එවිට එය බැටළු පැටවාණන්ගේ ජීවන පොතෙහි ලියනු ලබන්නේය, තවද නුඹලා මාගේ ගිවිසුමෙහි පවතින්නෝ නම්, තවද අහිංසක රුධිරය වැගිරීමට මිනීමැරුම් නොකරන්නේ නම්, මාගේ සේවකයා විසින් ඔවුන් මත තබා ඇති සියලු දේවල්, යථා කාලයේදී, සහ සියලු සදාකාලයටම ඔවුන් හට ඒවා ඉටුවන්නේය; තවද ඔවුන් ලෝකයෙන් පිටත සිටියදී සම්පූර්ණයෙන්ම බලගැන්වෙන්නේය; තවද ඔවුන්ගේ හිස් මත මුද්‍රා කර ඇති ලෙස, ඔවුන්ගේ උත්කර්ෂය සහ සියලු දෙයෙහි මහිමය වෙතට, එහි පත්කර සිටින, දේවදූතයන්ව, සහ දෙවිවරුන්ව ඔවුන් පසුකර යන්නෝය, එම මහිමය සදාකාලයෙන් සදාකාලයට වංශයේ පූර්ණත්වය පැවතීම සඳහාද වන්නේය.
20 එවිට ඔවුන් දෙවිවරුන් වන්නෝය, මක්නිසාද ඔවුන්ට අවසානයක් නොවන්නේය; එසේහෙයින් ඔවුහු සදාකාලයෙන් සදාකාලයට සිටින්නෝය, මක්නිසාද ඔවුහු නොකඩවාම පවතින්නෝය; එවිට ඔවුහු සියල්ලන් අභිබවා යන්නෝය, මක්නිසාද සියලු දේවල් ඔවුන්ට යටත්වන නිසාය. එවිට ඔවුහු දෙවිවරුන් වන්නේ, මක්නිසාද ඔවුන්ට සියලු බලය තිබෙන නිසාය, තවද දේවදූතයන්ද ඔවුන්ට යටත්වන නිසාය.
21 සැබවක් සැබවක්, මම නුඹලා හට පවසන්නෙමි, නුඹලා මාගේ නීතියෙහි පවතින්නේ නම් මිස, නුඹලාට මෙම මහිමය ලබාගත නොහැක්කේය.
22 මක්නිසාද දොරටුව අවහිරය, තවද උත්කර්ෂයේ සහ ජීවිත වල පැවැත්මට මගපෙන්වන මාර්ගය පටුය, තවද එය සොයාගන්නේ ස්වල්ප දෙනෙක්ය, මක්නිසාද නුඹලා ලෝකය තුළ මා ලබාගන්නේ හෝ මා දැනගන්නේ හෝ නැති නිසාය.
23 එහෙත් නුඹලා ලෝකය තුළ මා ලබාගන්නේ නම්, එවිට නුඹලා මා දැනගන්නෝය, තවද නුඹලාගේ උත්කර්ෂය ලබාගන්නෝය; එනම් මා සිටින තැන නුඹලාත් සිටින්නෝය.
24 සදාකාලික ජීවිත නම් මෙයයි—එනම් ප්‍රඥාවන්ත සහ සත්‍ය වූ එකම දෙවියන්වහන්සේ, සහ උන්වහන්සේ විසින් එවන ලද යේසුස් ක්‍රිස්තුස්වහන්සේ ගැන දැනගැනීමය. ඒ තැනැත්තා මම වෙමි, එසේහෙයින්, නුඹලා මාගේ නීතිය ලබාගන්න.
25 දොරටුව පළල්ය, තවද මරණයන්ට මගපෙන්වන මාර්ගයද විශාලය; තවද එහි යන්නෝද බොහෝය, මක්නිසාද ඔවුන් මා ලබාගන්නේ, හෝ ඔවුන් මාගේ නීතියෙහි පවතින්නේ හෝ නැත.
26 සැබවක්, සැබවක්, මම නුඹලා හට පවසන්නෙමි, මාගේ වචනයට අනුව යම් මනුෂ්‍යයෙක් භාර්යාවක් විවාහ කරගන්නේද, තවද මාගේ නියම කිරීමට අනුව, ඔවුන්ව පොරොන්දුවේ ශුද්ධාත්මයාණන්වහන්සේ මගින් මුද්‍රා කරනු ලබා ඇත්තේද, තවද ඔහු හෝ ඇය නව සහ සදාකාලික ගිවිසුම තුළ යම් ආකාර පාපයක් හෝ වරදක්, සහ කවරාකාර අවමානයන් සිදුකරන්නේද, නමුත් ඔවුන් මිනීමැරීම් සිදුනොකොට එමගින් අහිංසක රුධිරය වගුරුවනු නොලබන්නේද, ඔවුහු තවදුරටත් පළමු නැවත නැගිටීමේදී පෙරට පැමිණ, තවද ඔවුන්ගේ උත්කර්ෂයට ඇතුළුවන්නෝය; එහෙත් ඔවුන් මාංශයෙන් යුතුව විනාශ වී, තවද මිදීමේ දවස තෙක් සාතන්ගේ පහරදීම් වලට බාරදෙනු ලබන්නේ යැයි, ස්වාමින් වූ දෙවියන්වහන්සේ පවසන සේක.
27 ශුද්ධාත්මයාණන්වහන්සේට විරුද්ධව කරන අවමානයන්ට, ලෝකය තුළදී හෝ ලෝකයෙන් පිටතදී කමාකරනු නොලබන්නේය, නුඹලා මාගේ නව සහ සදාකාලික ගිවිසුම ලබාගත් පසුව, නුඹලා මිනීමරා ඇත්නම් සහ එමගින් අහිංසක රුධිරය වගුරුවා ඇත්නම්, තවද මාගේ මරණයට එකඟ වී ඇත්තේ යැයි, ස්වාමින් වූ දෙවියන්වහන්සේ පවසන සේක; තවද මෙම නීතියෙහි ඔහු නොපවතින්නේද මාගේ මහිමයට කිසිවිටෙකත් ඇතුළත්විය නොහැක්කේය, එහෙත් විනාශයට පත්වන්නේ යැයි, ස්වාමින්වහන්සේ පවසන සේක.
28 මම නුඹගේ ස්වාමින් වූ දෙවියන්වහන්සේය, තවද මම නුඹ වෙතට, ලෝකයේ ආරම්භයට පෙර මා විසින් සහ මාගේ පියාණන්වහන්සේ විසින් නියම කළ ආකාරයට, මාගේ ශුද්ධ වූ පූජකවරයේ නීතිය ලබාදෙන්නෙමි.
29 ආබ්‍රහම් සියලු දේවල් ලැබුවේය, ඔහු එළිදරව් වීම් සහ ආඥාවන් මගින්, මාගේ වචනය මගින් කුමනාකාර දෙයක් ලබාගත්තේද, තවද ඔහුගේ උත්කර්ෂයට ඇතුල් වී, තවද ඔහුගේ සිංහාසනයේ වාඩි වී සිටින්නේ යැයි, ස්වාමින්වහන්සේ පවසන සේක.
30 ආබ්‍රහම් ඔහුගේ වංශය සම්බන්ධව, එමෙන්ම ඔහුගේ බීජයෙහි ඵලයන් ගැනද පොරොන්දු ලබාගත්තේය—නුඹලා ඔහුගේ ඉඟටියෙන් වන්නෝය, නාමිකව, මාගේ සේවක ජෝසෆ්—එය ඔවුන් ලෝකය තුළ සිටින තාක් දිගටම පවතිනු ඇත; තවද ආබ්‍රහම් සහ ඔහුගේ වංශය මෙන්, ඔවුන් ලෝකයෙන් පිටත පවතින්නෝය; ලෝකය තුළ සහ ලෝකයෙන් පිටත දෙකෙහිම තාරකා මෙන් අසංඛ්‍යාත්මකව ඔවුන් පැවතිය යුතු වන්නෝය; නැතහොත්, නුඹලාට මුහුදු වෙරලේ වැලි ගණන් කළ හැකි වුවද නුඹලාට ඔවුන්ව ගණන් කළ නොහැකි වන්නෝය.
31 මෙම පොරොන්දුව නුඹලාගේද වන්නේය, මක්නිසාද නුඹලා ආබ්‍රහම්ගේ නිසාත්, තවද ආබ්‍රහම් වෙතට පොරොන්දු තැබූ නිසාත්ය; තවද මෙම නීතිය මාගේ පියාණන්වහන්සේගේ ක්‍රියාවන්හි පැවැත්මය, එමගින් උන්වහන්සේ තමන්වහන්සේවම මහිමවත් කරගන්නා සේක.
32 එසේහෙයින්, නුඹලා ගොස්, තවද ආබ්‍රහම්ගේ කාර්යයන් කරන්න; නුඹලා මාගේ නීතියට ඇතුළත් වෙන්න තවද නුඹලාව ගලවනු ලබන්නේය.
33 එහෙත් නුඹලා මාගේ නීතියට ඇතුළත් නොවන්නේ නම්, මාගේ පියාණන්වහන්සේ ආබ්‍රහම් වෙතට දුන්, ඔහුගේ පොරොන්දුව නුඹලාට ලබාගැනීමට නොහැකි වන්නේය.
34 දෙවියන්වහන්සේ ආබ්‍රහම්ට ආඥා කළ අතර, සාරා හාගර්ව ආබ්‍රහම්ගේ භාර්යාව කොට දුන්නාය. තවද ඇය එය කළේ ඇයි? මක්නිසාද මෙය නීතිය වූයේය; තවද හාගර් වෙතින් බොහෝ ජනතාව පැනනැගුනේය. මෙය, එසේහෙයින්, අනෙක් දේවල් සමඟ, පොරොන්දු ඉටුකිරීමක් විය.
35 එසේහෙයින් ආබ්‍රහම්, හෙළාදැකීමකට පත්වූයේද? සැබවක් මම නුඹලා හට පවසන්නෙමි, නැත; මක්නිසාද ස්වාමින්වහන්සේ වන, මම, එය ආඥා කළෙමි.
36 ආබ්‍රහම් හට ඔහුගේ පුත්‍ර ඊසාක්ව ඔප්පු කිරීමට ආඥා කෙරිණ; එසේවුවද, එහි මෙසේ ලියා ඇත්තේය: නුඹ මිනී නොමැරිය යුතුය. කෙසේවෙතත්, ආබ්‍රහම්, ප්‍රතික්ෂේප නොකළේය, තවද එය ඔහුට ධර්මිෂ්ඨත්වය උදෙසා ගණන් ගැණින.
37 ආබ්‍රහම් උපභාර්යාවන් ලබාගත්තේය, තවද ඔවුහු ඔහුට දරුවන් දැරුවෝය; තවද එය ඔහු හට ධර්මිෂ්ඨත්වය උදෙසා ගණන් ගැණින, මක්නිසාද ඔවුන්ව ඔහු හට දෙන ලද්දේය, තවද ඔහු මාගේ නීතියෙහි පැවතියේය; එමෙන්ම ඊසාක් එසේම යාකොබ් ඔවුන්ට ආඥා කළ දේවල් හැර වෙනත් දේවල් ඔවුහු නොකළෝය; තවද ඔවුන්ට ආඥා කළ ආකාරයට මිස වෙනත් දේවල් ඔවුන් නොකළ හෙයින්, පොරොන්දු වලට අනුව, ඔවුන් ඔවුන්ගේ උත්කර්ෂයට ඇතුළු වූවෝය, තවද සිංහාසන මත අසුන් ගත්තෝය, තවද දේවදූතයන් නොව දෙවිවරුන් වන්නෝය.
38 දාවිත් එලෙසම බොහෝ භාර්යාවන් සහ උපභාර්යාවන් ලබාගත්තේය, තවද එසේම මාගේ සේවකයන් වූ සොලමොන් සහ මෝසෙස්, එසේම මැවීමේ ආරම්භයේ සිට මෙම කාලය දක්වා මාගේ වෙනත් බොහෝ සේවකයන්ද එසේ විය; තවද මා වෙතින් නොලද එම දේවල් වලදී හැර ඔවුහු පාප නොකළෝය.
39 දාවිත්ගේ භාර්යාවන් සහ උපභාර්යාවන් ඔහු හට දෙන ලද්දේ මා විසිනි, තවද ඒ මෙම බලයේ යතුරු තිබූ අනෙකුත් අනාගතවක්තෘවරුන් අතරින්, මාගේ සේවකයා වූ නාතන්ගේ හස්තය මගින්ය; තවද මෙම දේවලින් කිසිවකදී ඔහු උරියා සහ ඔහුගේ භාර්යාවගේ කාරණයේදී හැර, මට විරුද්ධව පාපයක් නොකරන ලද්දේය; තවද, එසේහෙයින් ඔහුගේ උත්කර්ෂය වෙතින් ඔහු වැටී, තවද ඔහුගේ කොටස ලබාගත්තේය; තවද ඔහු ලෝකයෙන් පිටත ඒවා උරුමකර නොගන්නේය, මක්නිසාද මම ඒවා වෙනත් අයෙකුට දෙන ලද්දේ යැයි, ස්වාමින්වහන්සේ පවසන සේක.
40 මම ස්වාමින් වූ නුඹගේ දෙවියන්වහන්සේය, තවද මාගේ සේවක ජෝසෆ් වන, නුඹ වෙතට මා විසින්, සියලු දේවල් නැවත පිහිටුවීමට පත්වීමක් ලබාදුන්නෙමි. නුඹට කැමති දේ ඉල්ලන්න, තවද මාගේ වචනයට අනුව එය නුඹ හට දෙනු ලබන්නේය.
41 තවද නුඹ කාමමිථ්‍යාචාරයට සම්බන්ධව ඇසූ ලෙස, සැබවක්, සැබවක්, මම නුඹ හට පවසන්නෙමි, මනුෂ්‍යයෙකු භාර්යාවක්ව නව සහ සදාකාලික ගිවිසුම තුළ ලබාගත්තේ නම්, තවද ඇය තවත් මනුෂ්‍යයෙකු සමඟ සිටී නම්, තවද මම ඇයව මාගේ ශුද්ධ වූ ආලේපයකින් [වෙන කෙනෙකු සඳහා] පත්කර නොමැති නිසා, ඇය කාමමිථ්‍යාචාරය කර ඇත්තේය තවද විනාශ කරනු ලැබිය යුතු වන්නේය.
42 ඇය නව සහ සදාකාලික ගිවිසුමෙහි නොමැත්තේ නම්, තවද ඇය වෙනත් මනුෂ්‍යයෙකු සමඟ සිටී නම්, ඇය කාමමිථ්‍යාචාරය කර ඇත.
43 තවද ඇයගේ ස්වාමිපුරුෂයා වෙනත් කාන්තාවක් සමඟ සිටී නම්, තවද ඔහු පොරොන්දුවක් යටතේ නම්, ඔහු ඔහුගේ පොරොන්දුව බිඳ දමා තවද කාමමිථ්‍යාචාරය කර ඇත්තේය.
44 තවද ඇය කාමමිථ්‍යාචාරය කර නොමැති නම්, එහෙත් අහිංසකව තවද ඇයගේ පොරොන්දුව කඩ නොකර ඇත්නම්, තවද ඇය ඒ බව දන්නේ නම්, තවද මාගේ සේවක ජෝසෆ්, මම එය නුඹ හට එළිදරව් කරන්නෙමි, එවිට මාගේ ශුද්ධ වූ පූජකවරයේ බලයෙන් ඇයව රැගෙන, තවද කාමමිථ්‍යාචාරය නොකළ එහෙත් ඇදහිලිවන්තව සිටි ඔහුට ඇයව දීමට නුඹට බලය ඇත්තේය; මක්නිසාද බොහෝ දේ මත ඔහුව පාලකයෙකු කරනු ලබන්නේය.
45 මක්නිසාද මම නුඹ මත පූජකවර බලයේ යතුරු පිරිනමා ඇත්තෙමි, එමගින් මම සියලු දේවල් නැවත පිහිටුවා, තවද නුඹ වෙතට සියලු දේවල් නියමිත කාලයේදී දැනගන්නට සලස්වන්නෙමි.
46 තවද සැබවක්, සැබවක්, මම නුඹ හට පවසන්නෙමි, එනම් කවරාකාර දෙයක් නුඹ පෙළොවෙහි මුද්‍රා කරන්නේද එය ස්වර්ගයේද මුද්‍රා කරනු ලැබෙන්නේය; තවද කවරාකාර දෙයක් නුඹ මාගේ නාමයෙන් සහ මාගේ වචනයෙන් පොළොවේ බඳිනු ලබන්නේද, එය සදාකාලිකව ස්වර්ගයන්හිද බඳිනු ලබන්නේ යැයි, ස්වාමින්වහන්සේ පවසන සේක; තවද කවරාකාර පාපයකට නුඹට පොළොවෙහි කමා කරන්නේද, එය සදාකාලිකව ස්වර්ගයන්හිදීද කමා කරනු ලබන්නේය; තවද කවරාකාර පාපයන් නුඹ පොළොවේ රඳවාගන්නේද එය ස්වර්ගයෙහිද රඳවාගනු ලබන්නේය.
47 තවද නැවතත්, සැබවක් මම පවසන්නෙමි, කවර අයෙකුට නුඹ ආශිර්වාද කරන්නේද මමද ආශිර්වාද කරන්නෙමි, තවද කවර අයෙකුට නුඹ ශාප කරන්නේද මමද ශාප කරන්නෙමි යැයි, ස්වාමින්වහන්සේ පවසන සේක; මක්නිසාද ස්වාමින්වහන්සේ වන, මම, නුඹගේ දෙවියන්වහන්සේ වෙමි.
48 තවද නැවතත්, මාගේ සේවක ජෝසෆ්, සැබවක් මම නුඹ හට පවසන්නෙමි, එනම් කවරාකාර දෙයක් නුඹ පොළොවේ දෙනු ලබන්නේද, තවද මාගේ වචනයට අනුව සහ මාගේ නීතියට අනුව, කවරෙකුව වුවද නුඹ පොළොවේදී දෙනු ලබන්නේද, එය ශාපයකින් නොව ආශිර්වාද මගින්, තවද මාගේ බලය සමඟින් බැහැදකිනු ලබන්නේ යැයි, ස්වාමින්වහන්සේ පවසන සේක, තවද එය පොළොවේ සහ ස්වර්ගයෙහි හෙළාදැකීමෙන් තොර වන්නේය.
49 මක්නිසාද මම ස්වාමින් වූ නුඹගේ දෙවියන්වහන්සේ වෙමි, තවද මම නුඹ සමඟ පොළොවේ කෙළවර දක්වා වුවත්, තවද සියලු සදාකාලය දක්වා වුවත් සිටින්නෙමි; මක්නිසාද සැබවක් මම නුඹගේ උත්කර්ෂය නුඹ වෙතට මුද්‍රා කරන්නෙමි, තවද මාගේ පියාණන්වහන්සේගේ රාජ්‍යයේ, ආබ්‍රහම් වූ නුඹගේ පියා සමඟ, නුඹ උදෙසා සිංහාසනයක් සූදානම් කරන්නෙමි.
50 බලන්න, මම නුඹගේ කැපකිරීම් දැක ඇත්තෙමි, තවද මම නුඹගේ සියලු පාපයන්ට සමාව දෙන්නෙමි; මම නුඹ හට පැවසූ දේවලට මම නුඹගේ කීකරුකමේ කැපකිරීම් දැක ඇත්තෙමි. එසේහෙයින්, යන්න, තවද ආබ්‍රහම් ඔහුගේ පුත්‍ර වූ ඊසාක්ව ඔප්පුකිරීම මම පිළිගත්තාක් මෙන්, මම නුඹගේ පලායාමේ මාර්ගය සාදන්නෙමි.
51 සැබවක්, මම නුඹ හට පවසන්නෙමි: මා විසින් නුඹ හට දෙන ලද්දාවූ, මාගේ සේවිකාව වන, නුඹගේ භාර්යාව වන, එමා ස්මිත් හට මම ආඥාවක් දෙන්නෙමි, එනම් ඇයට දීමට මම නුඹට ආඥා කරන ලද එය, ඇය භුක්ති නොවිඳිය සහ ලබානොගත යුතුය; මක්නිසාද මම එය කරන ලද්දේ, මම ආබ්‍රහම්ට කරන ලද්දාක් මෙන්, ගිවිසුම සහ පරිත්‍යාගය මගින්, නුඹලාගේ හස්තයෙන් ඔප්පුකිරීමක් මට අවශ්‍ය යැයි පෙන්වමින් නුඹලා සියල්ලන්ව අත්හදා බලන පිණිසය යැයි, ස්වාමින්වහන්සේ පවසන සේක.
52 තවද මාගේ සේවිකාව වන, එමා ස්මිත් හට, මාගේ සේවක ජෝසෆ් හට දෙනු ලැබූ එම සියලු දේ ලබාගැනීමට සලස්වන්න, තවද මා ඉදිරියේ ගුණවත් සහ පවිත්‍ර අයටත් ඒවා ලබාගැනීමට සලස්වන්න; තවද පාරිශුද්ධ නොමැති අය, තවද ඔවුන් පාරිශුද්ධ යැයි පැවසූ අය, විනාශයට පත්වන්නෝය යැයි, ස්වාමින් වූ දෙවියන්වහන්සේ පවසන සේක.
53 මක්නිසාද මම නුඹගේ ස්වාමින් වූ දෙවියන්වහන්සේ වෙමි, තවද නුඹලා මාගේ හඬට කීකරු වන්නෝය; තවද මම මාගේ සේවක ජෝසෆ්, ඔහු බොහෝ දේවල් මත පාලකයෙකු වන පිණිස ඔහුට එය ලබාදෙන්නෙමි; මක්නිසාද ඔහු දේවල් කිහිපයක් මත ඇදහිලිවන්ත වී ඇත්තේය, තවද මෙතැන් සිට මම ඔහුව සවිමත් කරන්නෙමි.
54 තවද මම මාගේ සේවිකාව වන, එමා ස්මිත් හට, තවද වෙන කිසිවෙකුට නොව, මාගේ සේවක ජෝසෆ් වෙතට බැඳී සහ ඇලී සිටීමට ආඥා කරන්නෙමි. එහෙත් ඇය මෙම ආඥාවේ නොපවතින්නේ නම් ඇයව විනාශ කරනු ලැබිය යුතු වන්නේ යැයි, ස්වාමින්වහන්සේ පවසන සේක; මක්නිසාද මම නුඹගේ ස්වාමින් වූ දෙවියන්වහන්සේ වෙමි, තවද ඇය මාගේ මෙම ආඥාවේ නොපවතින්නේ නම් ඇයව විනාශ කරනු ලබන්නේය.
55 එහෙත් ඇය මෙම ආඥාවේ නොපවතින්නේ නම්, එවිට මාගේ සේවක ජෝසෆ් ඇය උදෙසා, ඔහු පැවසූ ආකාරයට වුවත්, සියළු දේවල් කරනු ලැබිය යුතු වන්නේය; තවද මම ඔහුට ආශිර්වාද කොට තවද වැඩි වර්ධනය කොට තවද මෙම ලෝකය තුල සිය-ගුණයක්, පියවරුන් සහ මව්වරුන්ද, සහෝදරයන් සහ සහෝදරියන්ද, නිවාස සහ ඉඩම්ද, භාර්යාවන් සහ දරුවන්ද, තවද සදාකාලික ලෝකයන් තුළ සදාකාලික ජීවිත වල ඔටුණුද ඔහුට ලබාදෙන්නෙමි.
56 තවද නැවතත්, සැබවක් මම පවසන්නෙමි, මාගේ සේවිකාවට මාගේ සේවක ජෝසෆ් හට ඔහුගේ වැරදි වලට සමාව දෙන්නට සලස්වන්න; තවද එහිදී ඇය මා හට විරුද්ධව වැරදි කර ඇත්නම්, එවිට ඇයට ඇයගේ වැරදි වලට සමාව ලැබෙනු ඇත; තවද ස්වාමින් වූ නුඹගේ දෙවියන්වහන්සේ වන මම ඇයට ආශිර්වාද කරන්නෙමි, තවද ඇයට වැඩි වර්ධනය කොට දෙන්නෙමි, තවද ඇයගේ හදවත ප්‍රීති ප්‍රමෝද කරන්නෙමි.
57 තවද නැවතත්, මම පවසන්නෙමි, සතුරෙකු පැමිණ තවද ඔහුව විනාශ නොකරන පිණිස, මාගේ සේවක ජෝසෆ් ඔහුගේ දේපළ ඔහුගේ හස්තයෙන් පිටතට නොදෙත්වා; මක්නිසාද සාතන් විනාශ කිරීමට සොයන්නේය; මක්නිසාද මම නුඹගේ ස්වාමින් වූ දෙවියන්වහන්සේ වෙමි, තවද ඔහු මාගේ සේවකයාය; තවද බලන්න, තවද බලව, නුඹගේ පියා වූ ආබ්‍රහම් සමඟ සිටියාක් මෙන්, ඔහුගේ උත්කර්ෂය සහ මහිමය වෙතට වුවත්, මම ඔහු සමඟ සිටින්නෙමි.
58 දැන්, පූජකවරයේ නීතිය සම්බන්ධව, එහි බොහෝ දේවල් ඒ සම්බන්ධව ඇත්තේය.
59 සැබවක්, අරොන් මෙන්, මාගේම හඬින්, තවද මා එවන ලද්දාවූ උන්වහන්සේගේ හඬින්, යම් මනුෂ්‍යයෙකුව මාගේ පියාණන්වහන්සේ කැඳවනු ලැබුවේ නම්, තවද මෙම පූජකවරයේ බලයේ යතුරු සමඟ මම ඔහුව බලයෙන් සරසවා ඇත්තෙමි, ඔහු මාගේ නාමයෙන්, තවද මාගේ නීතිය සහ මාගේ වචනය අනුව, ඕනෑම දෙයක් කරන්නේද, ඔහු පාපයක් නොකරන්නේය, තවද මම ඔහුව සාධාරණීකරණය කරන්නෙමි.
60 එසේහෙයින්, කිසිවෙකුටවත්, මාගේ සේවක ජෝසෆ්ව විවේචනය නොකරන්නට සලස්වන්න; මක්නිසාද මම ඔහුව සාධාරණීකරණය කරන්නෙමි; මක්නිසාද ඔහු ඔහුගේ වැරදි සඳහා ඔහුගේ හස්තයෙන් මට අවශ්‍ය වන කැපකිරීම් කරන්නේය යැයි, ස්වාමින් වූ නුඹගේ දෙවියන්වහන්සේ පවසන සේක.
61 තවද නැවතත්, පූජකවරයේ නීතියට අනුකූලව—කිසියම් මනුෂ්‍යයෙකු කන්‍යාවක් සරණ පාවාගෙන, තවද තව කෙනෙකු සරණ පාවාගැනීමට කැමති වී, තවද පළමුවැන්නිය ඇයගේ කැමැත්ත දී, තවද ඔහු දෙවනියා සරණ පාවාගන්නේ නම්, තවද ඔවුන් කන්‍යාවියන්ව, තවද වෙනයම් මනුෂ්‍යයෙකුට පොරොන්දු වී නොමැති නම්, එවිට ඔහු සාධාරණීය වන්නේය; ඔහු කාමමිථ්‍යාචාරය නොකරන්නේය මක්නිසාද ඔවුන්ව ඔහු හට දී ඇත්තේය; මක්නිසාද වෙන කෙනෙකුට නොව ඔවුන්ව ඔහුට අයත් නිසා ඔහුට කාමමිථ්‍යාචාරය කළ නොහැකිය.
62 තවද මෙම නීතිය මගින් ඔහුට කන්‍යාවියන් දසදෙනෙක් ලබාදුන්නත්, ඔහු කාමමිථ්‍යාචාරය නොකරන්නේය, මක්නිසාද ඔවුන්ව ඔහුට අයිති වන්නේය, තවද ඔවුන්ව ඔහු හට දී ඇත්තේය; එසේහෙයින් ඔහුව සාධාරණීකරණය වී ඇත්තේය.
63 එහෙත් දසදෙනාගෙන් එක් කන්‍යාවියක් හෝ, යමෙක්, ඇයව සරණ පාවාගැනීමෙන් පසුව, වෙනත් මනුෂ්‍යයෙකු සමඟ සිටියේ නම්, ඇය කාමමිථ්‍යාචාරය කර ඇත, තවද විනාශ කරනු ලබන්නේය; මක්නිසාද ඔවුන්ව ඔහුට දී ඇත්තේ, මාගේ ආඥාවට අනුව, වැඩි වර්ධනය වී තවද පොළොව පූර්ණ කිරීමටත්, තවද ලෝකයේ පටන්ගැන්මටත් පෙර මාගේ පියාණන්වහන්සේ දුන් එම පොරොන්දුව සම්පූර්ණ කරන පිණිසත්ය, තවද සදාකාලික ලෝකයන් තුළ ඔවුන්ගේ උත්කර්ෂය උදෙසාය, එනම් ඔවුන් මනුෂ්‍යය ප්‍රාණයන් දරන පිණිසය; මක්නිසාද ඒ කරණකොටගෙන මාගේ පියාණන්වහන්සේගේ ක්‍රියාව නොකඩවාම පැවත, උන්වහන්සේ මහිමවත් වන පිණිසය.
64 තවද නැවතත්, සැබවක්, සැබවක්, මම නුඹලා හට පවසන්නෙමි, මෙම බලයේ යතුරු දරන කිසියම් මනුෂ්‍යයෙකුට භාර්යාවක් සිටී නම්, තවද මෙම දේවල් සම්බන්ධව, ඔහු ඇයට මාගේ පූජකවරයේ නීති උගන්වන්නේ නම්, එවිට ඇය විශ්වාස කරමින් තවද ඔහුට කැමැත්ත ලබාදිය යුතු වන්නේය, නැතහොත් ඇයව විනාශ කරනු ලබන්නේ යැයි, ස්වාමින් වූ නුඹගේ දෙවියන්වහන්සේ පවසන සේක; මක්නිසාද මම ඇයව විනාශ කරන්නෙමි; මක්නිසාද මම මාගේ නීතිය ලබාගනිමින් එහි පවතින එම සියල්ලන් මත මාගේ නාමය මහිමවත් කරන්නෙමි.
65 එසේහෙයින්, එය මා තුළ නීතිය වන්නේය, ඇය මෙම නීතිය ලබානොගන්නේ නම්, ඔහුගේ ස්වාමින් වූ දෙවියන්වහන්සේ වන මම, ඔහුට දෙන සියල්ලම ඔහු ලබාගන්නා පිණිස, ඔහුට ලබාදෙන්නෙමි, මක්නිසාද ඇය මාගේ වචනයට අනුව විශ්වාස නොකරමින් තවද ඔහුට කැමැත්ත ලබාදුන්නේ නැත; තවද එවිට ඇය වරදකරුවකු වන්නීය; තවද හාගර් භාර්යාවක් කොට ගැනීමට මා ආබ්‍රහම්ට ආඥා කළ විට, නීතියට අනුව ඇය ආබ්‍රහම් වෙතට කැමැත්ත ලබාදුන්, සාරාගේ නීතිය වෙතින් ඔහු නිදහස් වන්නේය.
66 තවද දැන්, මෙම නීතියට අනුව, සැබවක්, සැබවක්, මම නුඹ හට පවසන්නෙමි, මම මෙයින් පසුව, නුඹට තවත් එළිදරව් කරන්නෙමි; එසේහෙයින්, මෙය වර්තමානය උදෙසා ප්‍රමාණවත්ය. බලන්න, මම ඇල්ෆා සහ ඔමේගා වෙමි. ආමෙන්.