Non Aanen Wiser
Ami ikenai ekkewe oua nikitu won aanen wisemi ami ewe pochokunen an ewe Chon Amanau Mwichefen mi niwinsefan.
Ua ennetin iotek ren aninisin ewe Ngun mi Fel nupwen ua pwari ai tong, mwar, me kinisou ren ekkewe memporun ewe Mwichefenin Jises Kraist ren Aramas mi Pin non Fansoun Soponon non unusen fonufan.
Ir ekkewe seni ewe Amuchunon Waken
Ewe ier 1947 a esisinata ewe 100 ierin achechemen ekkewe aewin Souneng mi Pin ar ra tonong non Salt Lake Valley. Chommong apwapwan achechem ra fis non ena ier, me ese nea napanapen kinisou a fis ngeni ekkewe mi nikitu chon kuno noun Jises Kraist ekkewe ra forata aan, kauta imw, fot ira non ewe fonupon, me forata neni.
Preseten J. Reuben Clark, aemonun chon aninis non ewe Aewin Presetensi, a atoura ewe kapasen kinisou ese tongeni monnukuno mine mi omokutu netipen ekkei chon akkom non ewe mwichenap non October 1947.
Non an porous, Preseten Clark a ekis kapas ren an esinna iten ekkewe souemwen mi itefouno ekkewe re emweni ewe sai ngeni notou, usun ren Brigham Young, Heber C. Kimball, Wilford Woodruff, Parley P. Pratt, me chommong ekkoch. Nge inamo, an aewin popun esap ren an epwe aporousa sefani met ekkei amwararen aramas ra awesi. Nge, i a anonga an kapas won ekkewe ir mi angang weires ekkewe iter rese pwano ika ese rekotitiw non uruon Mwichefen. Ewe aweweochun itenapen an porous pwe iei, “Ir ekkewe seni ewe Amuchunon Waken.”1
Preseten Clark a awewei tichikin nikinikir me ekkewe weires ra tori ekkewe chon sai ekkewe ra nom non ewe amuchunon waken mi ponupon non ew me ew ekkewe tettenin waken mi nakatam ra no epek ewe sonosonoch. A ingeiti ekkei mi pwaracho rese sinneno me ese wor achemer ekkewe, ran me ran, wik me wik, me maram me maram, ra ngaseranong ewe toputop a asita me ren ekkewe woken meinisin ar sano me mwer—me ekkewe ra okkufu ekkewe chommong weires ra weri fansoun ar we sai.
Preseten Clark a affata, “Ir ekkewe seni ewe amuchunon woken ra nikitu, pekus me apwangapwang, metek peche, fan ekkoch arap tipemwaramar, pochokununo ren ar nuku pwe Kot mi tonger, pwe ewe kapas allim mi niwinsefan mi ennet, me ewe Samon a emweni me ouroura ekkewe Nouwis me mwan.”2
A asopwano an porous ren ei murinon kapasen pesepes “Ngeni ekkei aramas mi tipetekison, mi nap ar nuku, nap non angang, nap non manau tupwen, nap non ar forata ach emwirimwir auchea, upwe tipetekison ne atoura ai tong, ai sufon, ai asamonur.”3
Ese Kisikis non Angang
Non 1990, Preseten Howard W. Hunter, atun an Presetenin ewe Mwichen Ekkewe Engon me Ruemon Aposel, a atou an porous usun ekkewe namoten aninis an ekkewe chommong chon Mwichefen ekkewe ra achocho me nikitu ne angang nge ra angei ekis chok ika ese fen wor ketiwer.
Preseten Hunter a awewei:
“A fen affateno usun ewe serafo me mi pwaracho Kaptin Moronai:
“‘Ika aramas meinisin ra fen, me usun, me repwe, usun chok Moronai, nengeni, ewe pochokunen nenien kiroch repwe chung feinfeino chok; ewer, ewe mokuran kiroch esap tongeni wor an pochokun non netipen noun aramas’ (Alma 48:17).
“Met ew sokkun kapas och fan iten emon mwan mi itefouno me unusen manaman. … Ru uwokisin mwirin porousen Ilaman me pwin kewe, ekkewe ra fori wiser ese kon pwan usun Moronai, mine sia anea:
“‘Iei nengeni, Ilaman me pwin kewe rese kisikis non ar angang ngeni ekkewe aramas nap seni Moronai’ (Alma 48:19).”
Preseten Hunter a sopweno, “Non ekkoch kapas, inamo ika Ilaman ese kon pwano ika fateno usun Moronai, i mi pwan uren angangoch; ina, i mi pwan aninisoch me namot usun Moronai.”4
Preseten Hunter mwirin a fonou kich meinisin pwe sisap kisikis non ach angang. A apasa, “Ika oua mefi pwe mi nap met oua fori non ei ier ika ekkewe ier repwe feito esap eitefoukemino, oupwe epinukunuk. Napengeni ekkewe aramas murino ra fen manau rese pwan itefouno. Angang me marita, non tupwen me mosonoson.”5
Non Aanen Wiser
Ua men kinisou ren minion chon Mwichefen ekkewe ikenai ra feito ren ewe Chon Amanau6 me nikitu won ewe aanen pwon non ekkewe amuchunon woken tettenin woken ikenai—me ekkewe ennetin rese kis non ar angang. Ami pochokunen nuku non Samach won Nang me ewe Samon Jises Kraist me manauemi mi mecheres me pin ra peseiei ai upwe emon mwan me chon kuno mi murino.
Ngang ua tongekemi. Ngang ua ingeiti kemi. Ua kinisou ngenikemi. Me ua mwareiti kemi.
Ew kapas mi nom non ewe Puken Mormon me ren Samuel ewe Chon Leiman a mennapei ai memef fan itemi.
“Nengeni pwe ewe watten kinikinir ra nom non aanen wiiser, iwe ra fetanoch me mwen Kot, iwe ra achocho ne aneasochisi an kewe annuk me an kewe kukkun annuk. …
“Ewer, ua apasa ngenikemi, pwe ewe watten kinikinin me neir ra fori ei, iwe ra achocho ren nikitu ese apwangapwang pwe repwe tongeni uwei nussun pwir kewe ngeni ewe enletin mwirit.”7
Ua nuku ewe kapas “non aanen wiser” a anapanapa pungochun pwich me fefinach kewe ra kuta me momot unukun aramas ra anamon non fan me non sokopaten neni. Ra soun achocho ne “oururu ekkewe ra mochen ourur,”8 me nukun ar osuku an emon epwe mwareitir.
Ewe kapas “non aanen wiser” a anapanapa pupunu me semirit ekkewe ir mi anisi emon chiener, sam ika in, ika semirit mi angang non ew wisen emwen non an ewe Samon we Mwichefen mi niwinsefan. Ar nukuchar, mosonoson, me napengeni ar aninis ese sinnino a atufichi feiochun chommong aramas me famini non napanap epwe chok unusen pwano non fansoun esemuch.
Ewe kapas “non aanen wiser” a anapanapa aramas ekkewe, mi kun seni Kot, non tekison ra niwinsefan ngeni I,9 aier seni ar tipis, me kutta ewe enimenimen me echikaren manamanen an ewe Chon Amanau Achasefan. Feito ren Kraist10 ren ach niwin ngeni ewe aanen pwon seni anefetanin tipis ngeni “ekkewe aan mi annuk senikich”11 mi auchea non pekin ngun me unusen tupwen. Nupwen ra nikitu ne feino ren nuku me rese apwangapwang, ra aueta ewe nongonongen ew watten angang non pwisin manauer,12 “ngeni tappin aramas meinisin me ngeni fansoun esemuch.”13
Ewe kapas “non aanen wiser” a anapanapa aramas tupwen ekkewe ra mochen repwe chu ngeni ewe Chon Amanau non ekkewe pwon mi pin me angangepin An kapas allim—nge meni mi annuk senir ar repwe fori ren ekkoch mettoch rese wesen tufich ngeni. Ua pwon pwe ami riaffou epwe ngaseno me ami aneasochis me nikitu ne fang ami mochen ngeni Kot epwe wor niwinin “non pwisin fansoun an ewe Samon.”14 “Kechiw epwe soposopono non ew pwinin, nge pwapwa epwe war nesossor.“15
Ewe kapas “non aanen wiser” a anapanapa ekkewe chon chiaku me chon awewe kapas non fonufan ekkewe ra angang ngeni ewe Samon ren ar anisi chiechier me memper ar repwe ausening unusochun ewe kapas allim non pwisin [ar] kapas, me non fosun fonuer.”16 Mongungur, ar pwomweni kapas, me toropwe mi chiaku ra atoura ennet esemuch, inamo ekkoch chok kich sia sinei iter ika apasa ach kinisou. Seni ewe niffangen kapas ra fen feioch ren, chon chiaku me chon awewe kapas ra achocho ne angang, rese aapangaw, me, napengeni, ra monomonono ne anisi aramas ar repwe angei ewe niffangen nuku ren ar aneani me rongorong ewe kapasen Kot.17
Ewe kapas “non aanen wiser” a anapanapa pupunu mwan me fefin mi nikitu ekkewe ra afona ar pwon ne achommongano me ourano ewe fonufan, me ekkewe ra feioch ren ewe pochokun me engino ne aunap ngeni nour semirit non mwichen sakrament. Non ei fonufan mi napeno osukosukan a uren fitikoko me teteningawen met mi auchea, ekkei aramas mi pwaracho rese rong ngeni ekkewe mwongungun fonufan mi ngoneiti kiringaw; ra afona pinin me auchean manau non an Samach won Nang kokkoten pwapwa fan iten Noun semirit.
Chommong pean pupunu ra pwan nuku non Kot nupwen mochenin netiper mi tupwen rese pwonuta usun ika nupwen ra mochen me aneanei. Ra “ewitiwiti ewe Samon”18 me rese echimwa pwe I epwe apwonueta koukun ar fansoun non ei manau. “Pun seni nepoputan ewe fonufan mwan rese mwo rong ika esinna me ren ewe sening, ese pwan wor mas ese mwo kuna, me nukun chok Kot mettoch mi napanap i a fen amonnata fan iter.19
Ewe kapas “non aanen wiser” a anapanapa ngoroun me ngoroun souemwenin nursery me sensen primary ekkewe ra tongei me osukuna ekkewe semirit non ewe Mwichefen iteiten Ranin Sabbath.
Ekieki feinfeinon mwirimwirin ewe angang a fis me ren ekkei chon kuno mi nikitu—me ekkewe amwararen feioch a pwon ngeni ekkewe ra iamwir ngeni semirit.
“Iwe [Jises] a angei emon semirit, me a watiw nukanaper: me nupwen a ekieta non poun, a apasa ngenir,
“Ion mi etiwa emon me nein ekkei kukkun semirit non itei, a pwan etiwaei: me ion mi etiwa ei, ese chok etiwa ei nga a pwan etiwa ewe emon a tinieito.”20
Ewe kapas “non aanen wiser” a anapanapa semirit mi achocho ne tumunochu semer me iner chinnap, emon in ese naf an mour ren an chachari emon semirit mi nuokus nupwen a mamas usun emon “naion ren titin” imwan we,21 chon Mwichefen ekkewe ra mwitirito me nomotam ar repwe etetenatiw me isonano sea, me ekkewe ra etiwa famini, chiechier ar repwe feito me kuna, feito me aninis, me feito me nonnom.22
Ua fen anapanapa ekkoch chok awewen chon kuno mi apwonueta ar pwon mi pin me nikitu noun Jises Kraist usun chok ami ekkewe oua soposopono “non aanen wisemi.” Minion pwan ekkoch awewe usun aramas mi pin non fansoun soponon ra fang “unusen ngunur”23 ngeni Kot ra pwa non imw mi ionapei Kraist me non kinikinin Mwichefen non unusen fonufan.
Oua tong me angang, ausening me kaeo, tumun me echipa, me aiti me pwarata usun manamanen ewe Ngun mi Fel. Oua echikipin me iotek fan chommong, me pochokununo me pochokununo non tipetekison, me nukuchareno me nukuchareno non ewe nuku usun Kraist, “tori [ngunumi] a ureno ren pwapwa me kinamwe, ewer pwan mwo tori ewe enimenimen me enimenimochunon [netipemi], minne enimenimochuno a fis pokiten [ami] fangeta netiper ngeni Kot.”24
Pwon me Kapasen Pwarata
Ir ekkewe seni ewe amuchunon woken, ir ekkewe rese kisikis non ar angang, me ami ikenai ekkewe oua nikitu won aanen wisemi ami ewe pochokunen an ewe Chon Amanau Mwichefen mi niwinsefan. Me usun ewe Samon a fen pwonei, “meinisin mottun king me muu, nemenem me manaman, repwe pwano me kawor ngeni won meinisin ekkewe ra fen engino fan iten ewe kapas allimin Jises Kraist.”25
Ua pwapwa ne pwarata pwe Samach non Nang me Noun we Achengicheng ir mi manau, me Ar kewe pwon mi ennet, non ewe it mi pin ewe Samon Jises Kraist, amen.