Ew Ne Engon: Sukano ekkewe Asamwachon Nang

Seni Elter Neil L. Andersen

Seni ewe Mwichen Engon me Ruemon Aposel

Ekkewe asamachon nang ra sukuno non chommong napanapan. Epinukunuk non an ewe Samon fansoun; ekkewe feioch repwe fis fansoun meinisin.

Kukuto chok au ua nom non South America, Brother Roger Parra seni Venezuela a aprousa ngeniei ei mettoch a fis:

“Non 2019 Venezuela a tori osukosuk pokiten an tur fifi non unusen ewe neni non nimu ran.

“Osukosuk me fitikoko ra nemenem won ekkewe aan, me chommong siongawen aramas ese naf ener mwongo.

“Ekkoch ra poputa ne sonani mwongon pisinis, me atai mettoch mi nom mwer.

“Pokiten mi wor ew ai kukkun bakery, ua fokkun aureki usun am we pisnis. Ren am famini, aua finata ne fangeno meinisin ekkewe mwongo non am we peikeri ngeni aramas mi osupwang.

“Non unusen ew pwinin mi fokkun rochopwak a watte osukosuk a fis ekis meinisin. Ai we chok aurek fan iten tumunun punuwei me nei kewe achengicheng.

“Atun totan ewe man ua feino ngeni am we peikeri. Anoninenin, meinisin kewe pisnisin mongo mi kanoto rafen tano seni ekkewe chon sona, nge ua fokkun mairu, pwe am ewe peikeri mi chok unusono. Ese wor mettoch a tano. Ua tipetekison ne kinisou ngeni Semei won Nang.

“Ai tori neimw, ua ureni ai famini usun an Kot efeioch me eppet.

“Ir meinisin ra fokkun kinisou.

“Nei we mwannichi, Rogelio, a chok engon me ru ier, a apasa, ‘Papa! Ngang mi sinei pwata ach we sitowa a tumun. En me Mama oua soun monatiw ami ew ne engon.’”

Brother Parra a asopwano: “Ekkewe kapas an Malachi a tonong non ai ekiek. Iwe upwe apungu ewe chon anono mettoch fan asengesimi, iwe i esap atano foun iran ami we puun.’11 Am oua fotopukutiw me kinisou ngeni Semem won Nang ren An manaman.”¹

A Efitngeni ne Pwar Ngeniei Iei.

Mettoch meinisin me kich meinisin sia feito seni Kot. Kich chon kuno noun Kraist, sia fangafangoch ne aea fengen ngeni ekkewe mi nom unukuch.

Ren mettoch meinisin ewe Samon a ngeni kich, A tingorei kich sipwe eniwini ngeni I me An muu won fonufan ew na engonun ach tufich. A pwonei ngeni kich pwe nupwen sia wenechar non ach ew ne engon, I epwe sukano … ekkewe asamwachon nang, me ninau … ew feioch, ina esap naf nenian ren ami oupwe angei.² I a pwonei ngeni kich pwe I epwe tumunu kich seni mi ngau.³ Ekkei pwon ir mi ennet,⁴ewe Samon a affata, “Oupwe sotuni ei,”⁵ew kapas ese pwa me ekis non ekkewe pukefel nge nupwen sia eniwini an Malachi kapas.

Ekkewe asamachon nang ra sukuno non chommong napanapan. Ekkoch non pekin inis, nge chommong non pekin ngun. Ekkoch ra chok kisikis me ra mecheres ach sisap tepereni. Epinukunuk non an ewe Samon fansoun; ekkewe feioch repwe fis fansoun meinisin.

Sia netipechou ren ekkewe a weires an epwe wor rer ekkewe mettoch ra auchea ngeni manau. Ewe Mwichefen a keran awora 54 minion chana an epwe awora pekin aninis ngeni semirit me in mi apwangapwang non unusen fonufan.⁶ Nge ren ekkewe asor seni ach achikipin iteiten maram, nouch kewe pisop mi murino ra anisi ngoroun aramas iteiten wik ekkewe a nomot ngenir mwongon won ar chepen, uf won sokurur, me imw asen mokurer ren chok ekis fansoun. Ewe kapas allimen Jises Kraist wesewesen ina chok met ewe a atawei woungawen ei fonufan.⁷

Eu Nongonongen Nuku

Ewe Aposel Paul a fen apasa chok me mwan pwe ewe miritin aramas a weweiti ekkewe mettochun aramas nge a weires ne weweiti ekkewe mettochun Kot.⁸ Ewe fonufan a kapas usun eu-ne-engon ren pekin moni, nge ewe annuk mi pin ren eu-ne-engon a wesewesen ew noongonongun ach nuku. Ach wenechar non ach ew ne engon ina ew napanapen ach pwarano ach mochen anomu ewe Samon akkom non manauach, nap seni pwisin ach aurek me mochen. Ua pwon ngonuk pwe nupwen kopwe nuku non ewe Samon, ekkewe feioch seni nang repwe tapw.

Jises Kraist a apasa pwe sipwe ngeni “Caesar ekkewe mettoch minne an Caesar; me ngeni Kot minne an Kot⁹Ewe Chon Amanau mi manausefan a eisini ekkewe Chon Nifai repwe makkei non nour rekot An kewe pwon mi pwa non Malachi.¹⁰ Non ach fansoun, ewe Samon a apung sefani ewe annukun nang usun eu-ne-engon, a apasa: “Iei nepoputan ewe eu-ne-engon an nei aramas. Iwe [repwe] monatiw eu ne engon seni unusan niwinir iteiten ier; iwe epwe iei ew annuk ngenir feinfeino chok.”¹¹

Ewe Samon a afatochu ne emweni ifa usun eu-ne-engon epwe kamou, a apasa, “Oupwe wato unusen ewe eu-ne-engon non ewe imwenipin,”¹²wewen wato eu-ne-engon ngeni An muu mi niwinsefanto, Ewe Mwichefenin Jises Kraist ren Aramas mi Pin non Fansoun Soponon.¹³ A emweni pwe aean ekkei ew ne engon mi pin epwe kokkotoch non iotek me ren eu mwichen ewe Aewin Presetensi, ewe Mwichen ekkewe Engon me Ruemon Aposel, ewe Chon Nemeni Mwichen Pisoprik, “me seni pwisin mongungui ngenir, ewe Samon a apasa.”¹⁴

An ewe Samon Pekin Mwoni mi Pin

Ekkei moni mi pin esap noun ekkewe souemwenin ewe Mwichefen. Ir neun ewe Samon. Noun chon angang ra tumunochu usun pinin nonomun wiser.

Preseten Gordaon B, Hinckley a achema porousen nekukunun: “Nupwen ngang emon kukkun at ua eisini semei we ew kapaseis … usun nounoun monien Mwichefen. A achema ngeniei pwe wisei me ren Kot pwe upwe monatiw ai ew ne engon me asor. Nupwen ua fori, [semei we apasa,] met uwa fangeno esap chiwen ai. A winiti an ewe Samon ngeni i minne ua epinano ngeni.” Seman we a apachata: “Met ekkewe nouwisin ewe Mwichefen ra for ngeni ese pwan wor wewen [ngonuk, Gordon]. Ir repwe ponuweni ngeni ewe Samon, i ewe epwe mochen repwe awewei pungun ar angang.”¹⁵

Sia mefi anononun chourekin ach sipwe “ponuweni ngeni ewe Samon.”

Om Umoumochun Asorun Ew Ne Engon me Ekkewe Asor

Seni ekkewe fangafangochun ew ne engon me asor oua fen epinano ngeni ewe Samon, non ewe ier a no nap seni ew pillionun mwonien US ra nounou ne efeiochu ngeni ekkewe mi osupwang.¹⁶

Non ach auchean wis ne uwei fetanei ewe kapas allim mi niwinsefanto non unusen ewe fonufan, a wor nap seni 71,000 misineri ra angang non 414 misin.¹⁷ Pokiten ar ew ne engon me asor, misineri, ese nifinifin nonnomun ar famini ren pekin moni, ra tufichin angangen misineri.

Tempel ra kauuta won unusen ewe fonufan ese mwo fifis me akkom Iei, 177 tempel ir mi suk, 59 iei ir mi kauta ika for sefan, me 79 ir mi nom non kokkot me anapanapa.¹⁸ Ami ew ne engon ra mutata ekkewe feiochun ewe tempel repwe fis non neni ewe Samon chok a tongeni kuna.

Mi wor nap seni 30,000 mwicheich ra nom non ngoroun imwen fan me ekkoch neni non 195 fonu me neni.¹⁹ Pokiten ami nikitun ew ne engon, ewe Mwichefen a foruta non neni mi towaw meni ami ousap tongeni nom nein Souneng mi tupwen meni ousap tongeni sisiner.

Ewe Mwichefen iei a emweni nimu nenien sukunen college. ²⁰ Ekkei ra anisi nap seni 145,000 chon sukun. Ipuku engon ngerou klass ra sukun iteiten wik non ach seminary me institue.²¹

Ekkei feioch me pwan ekkoch mi chommong ra feito non watten napanapan seni ekkewe serafo me chinnap seni sokopaten nonnomur ren pekin moni ekkewe ra monatiw ar wenecharen ew ne engon.

Ewe manamanen ngun ren ewe annukun eu-ne-engon ese nonno ngeni ewe ukukun moni a kawor, pun ekkewe mi pisekisek me ekkewe mi woungaw ra annuk me ren ewe Samon pwe repwe awora eu ne engonun ar mwonitonong.²² Ewe manaman a feito seni ach wanong ach epinukunuk non ewe Samon.²³

Ewe kapachetan pisekisek an ewe Samon a fis seni ami fangafangochun ew ne engon a apochokuna ekkewe aninis an ewe Mwichefen, a awora tufichin anapano an ewe Samon angang pekinon ekkewe mettoch sise mo fen kuna. Mettoch meinisin mi fat ngeni ewe Samon, me non fansoun, sipwe kuna An popun mi pin repwe pwonuta.²⁴

Ekkewe Feioch ra Feitto non Chommong Nikinikin

Ekkewe feiochun ew-ne-engon ra fis non chommong nikinikin. Non 1998 ua fiti Elter Henry B. Erying ngeni ew watten mwichen Mwichefen non ewe kinikin Utah iei a iteni Silicon Slopes, ew nenien angangoch ne foruta mettoch non technology. A ew fansoun marita non pisekisek, me Elter Eyring a fonou ekkewe Souneng usun ar anonno fengeni met mi wor rer ngeni ekkoch me ar mochen pwan ekkoch. Upwe chemeni fansoun meinisin an we pwon pwe nupwen repwe monatiw ar wenecharen ew ne engon, ar mochen pwan ekkoch pisek epwe kisitiw. Non chok ru ier, ewe pekin monien technology a turutiw. Chommong ra tou senir ar angang, me company ra weires non ei fansoun ekesiwinin pekin moni. Ekkewe ir mi tapweno mwirin ewe ourour an Preseten Eyring ra feioch.

An we pwon a achema ngeniei usun pwan ew porous. Ua churi 12 ier Charlotte Hlimi arap ngeni Carcassonne, France, non 1990 nupwen ai we ua emon presetenin misin. Ewe faminien Hlimis ir ew famini mi tupwen ra nom non ew apartment fiti wanimon semirit. Mi wor echo nour sasingin ewe Chon Amanau me ewe Soufos won ewe etiip. Non ewe interfiu ren an ewe efeiochun petriark, ua eisini Charlotte ika mi monatiw ew wenecharen ew ne engon. A ponuweni, “Ewer, Preseten Andersen. Inei we a fen aitiei pwe mi wor feioch non pekin inis me feioch non pekin ngun ekkewe ra feito seni ach monatiw ach ew-ne-engon. Inei we a aitiei pwe ika sia soun monatiw ach ew-ne-engon, esap pwan wor mettoch sipwe mochen. Iwe Preseten Andersen, ese wor mettoch sia mochen.”

Non an ngeniei mumutan ai upwe aporousa porousen, Charlotte, iei a 45 ier me a riri non ewe tempel, a apasa: “Ai kapasen pwarata usun ew-ne-engon a fokkun ennet non ena fansoun, me a pochokununo iei. Ua unusen kinisou ren ei annuk. Ren ai manaueni ua soposopono ne feiochuni chommong.”²⁵

Non eu ran emon me emon kich sipwe awesano ach ei sai won fonufan. Rue me nimu ier a no, fitu chok ran me mwen inen punuwei we, Martha Williams, epwe mano ren cancer, a angei echo kukkun chek non ewe mail. A mwitir eisini punuwei, Kathy, ren noun we puken chek an epwe monatiw an ew-ne-engon. Ren an inan we a fokkun apwangapwang a weires ngeni an epwe mak, Kathy a eis ika mi tongeni epwe makkei ewe chek fan itan. Inan we a ponuweni, “Apw, Kathy. Ua mochen upwe pusin fori.” Iwe mwirin a apasa non pwetete, “Uwa mochen upwe pung me mwen ewe Samon.” Eu me nein ekkewe omuchunon mettoch Kathy a fori fan iten inan we a ngeni noun we pisop an ewe fuuton ew-ne-engon.

An Kot Auchean Angang

Pwi me fefinei achengicheng, Ewe Mwichefenin Jises Kraist ren Aramas mi Pin non Fansoun Soponon a “tou seni monomon,”²⁶a wato feioch amwarar won fonufan. Epwe wor ekkewe repwe pesei kich me ekkewe resap. Ua fen ekiek ekkewe kapas an ewe mi mirit Gamaliel, ewe, fansoun an rong ekkewe manaman an ekkewe Aposel Peter, me John, a fonou ewe mwichen opungupung non Jerusalem.

“Oupwe nikitano [ekkei mwan]: ika … met ra fori a popu seni aramas, epwe chok morono:

“Nge ika mi feito seni Kot, iwe ousap tongeni aukuretiw. Eni oupwe chok fiu ngeni Kot.”²⁷

En mi ngang kich kinikinin an Kot angang won fonufan. Esap namotongaw nge epwe soposopono won fonufan, ne amonnata aanen an ewe Chon Amanau niwinsefan. Preseten Russell M. Nelson a affata: “Non ekkan ran repwe feito, sipwe kuna ewe wachimukenpwanon an ewe Chon Amanau manaman minne ewe fonufan epwe kerankuna. Nefinen iei me ewe fansoun I epwe niwinsefanito … I epwe awora tufich ese nea, feioch, me manaman won ekkewe mi nikitu.”²⁸

Iei ai pwarata. Jises i ewe Kraist. Iei An angang mi pin. I epwe niwin sefan. Non iten Jises Kraist, amen.

Esinesin

1. Pusin porous seni Roger Parra, Aug. 4, 2023.

2. Malachi 3:10

3. Nengeni Malachi 3:11. Elter Jeffrey R. Holland a apasa: “Non manauei, ren awewe, ua fen kuna an Kot pwon a pwonuta pwe I epwe apungu ewe chon anano mettoch fan [asengesi]’ [Malachi 3:11]. Pwe feiochun eppet seni ngau a fen ninitiw woi me atongei kewe pekinon ekkoch tuifchin komoch upwe etiwa non ew nikinik mi tufich ngeni. Nge ua nuku pwe eppet seni nang a fen fis, mwaren ekis, pokiten am tiniken, emon me emon me ussun ew famini, ne moni eu-ne-engon” (“Like a Watered Garden,” Liahona, Jan. 2002, 38).

4. “Ewe Samon epwene sukano ekkewe asamwachon nang anongonong won met mi auchea ngeni kich, me esap anongonong won ach mochenia. Ika sia monatiw eu-ne-engon ach sipwe pisekisekino, sia fori ren ewe popun mi muan. … Ewe feioch ngeni ewe chon fangeno … meni esap soun fis non ewe napanapen moni ika feiochun mettoch” (Afanafan an Gordon B. Hinckley [1997], 657).

5. Malachi 3:103 Nifai 24:10

6. Nengeni “The Church of Jesus Christ Is Helping Alleviate Global Malnutrition,” Aug. 11, 2023, newsroom.ChurchofJesusChrist.org; pwan nengeni “How the Church of Jesus Christ and UNICEF Are Keeping Mothers and Children Healthy and Safe,” Aug. 17, 2023, newsroom.ChurchofJesusChrist.org.

7. Iwe ewe Samon a eita ngeni noun kewe aramas Zion, pokiten ra chok tipeni ew me aani ew ekiek, me ra nom non pung; me ese wor osupwang neir (Moses 7:18

8. Nengeni 1 Corinth 2:14 Ewe mokutun aramas ese soun fich ngeni ewe miritin Kot. Non fansoun Malachi, chommong ra towaweno seni ewe Samon. Ewe Samon a sio ngeni Noun aramas pwon, “Niwinsefanito rei o upwe pwan niwiniti kemi.” Met a tapweto mwirin ei pweteten tingor a ew anonnonun auchean kapaseis ngeni emon me emon kich: “Met am aupwe fori pwe am aupwe niwinsefan ngonuk?” (Malachi 3:7). Ika non ekkoch kapas, “Met ngang upwe siwini? Ifa usun upwe arap Ngonuk?” Ewe Samon a ponuweni ren an afanafana auchean ew-ne-engon, esap chok ew annukun moni, nge ew napanap kich mi tongeni kamwoch ne akunu mochenin netipach ngeni I.

   Sia fori ei non pwisin ach famini. Inen Kathy we a fiti ewe Mwichefen non an ier 22. Martha me Bernard William a fiti fan ren ew mochomochen fansoun, nge mwirin ar mwokut ngeni pwan ew fonu ra ekis apwangapwangeno. Bernard a angei wisan non pekin sounfiu an epwe nom towaweno, me Martha a mwokut ngeni imwan Tampa, Florida, ikewe a etiwa ew fangafangochun tingor an epwe nom ren an aunt me uncle, ekkewe ir mi ungeni ewe Mwichefen. Nupwen an nonnom non ennetin napanapen mi tekisoson, a pwopwo ren noun we anamon me ese fiti fan, Martha Williams a finata pwe epwene poputa tinano noun chekin eu-ne-engon ngeni ewe pisop. Mwirinon non manauan, nupwen ra eisini pwata, a apasa pwe a chechemeni och mettoh ekkewe misineri ra aiti usun eu-ne-engon me an Kot efeioch: “A wewewesen auchea ngeni kem an Kot kewe efeioch non manauem, iwe ua poputa ne tinano noum chekin eu-ne-engon ngeni ewe pisop.” Martha me Bernard Williams ra niwin ngeni ewe Mwichefen. Ar watten feioch—wonu tappin aramas ra fen feioch pokiten an finata ne moni an eu-ne-engon nupwen ese wor ren mettoch nge nuku chok non Kot me epinukunuk non An kewe pwon.

9. Matthew 22:21

10. Nengeni 3 Nifai 24

11. Doctrine and Covenants 119:3–4. “Eu-ne-engon ina ewe aninisin eu-ne-engon niwinin emon ngeni an Kot Mwichefen (nengeni Doctrine and Covenants 119:3–4; interest mi wewen niwinin emon). Meinisin memper mi wor monitonong seni angang repwe monatiw ar eu ne engon” (General Handbook: Serving in The Church of Jesus Christ of Latter-day Saints, 34.3.1, Gospel Library).

12. Malachi 3:10

13. “Sia monatiw eu-ne-engon, usun ewe Chon Amanau a aiti kich, ren ach wato eu-ne-engon non ewe imwen isois [(Malachi 3:10; 3 Nifai 24:10]. Sia fori ei ren ach monatiw ach asoren eu-ne-engon ngeni nouch pisop ika presetenin pranch. Sise monatiw ach asoren eu-ne-engon ren ach sipwe aninis ngeni ekkewe mwicheichen aramas sia sani ra awora aninis ngeni ekkewe mi osupwang. Ekkewe aninnis sipwe fori ngeni pekin aninis ra feito seni pwisin nouch moni, esap seni ewe asoren ew ne engon sia annuk ach sipwe moni ngeni ewe imwen isois an ewe Samon” (Dallin H. Oaks, “Tithing,” EnsignMay 1994, 33).

14. Doctrine and Covenants 120:1.

15. Gordon B. Hinckley, “Rise to a Larger Vision of the Work,” Ensign, May 1990, 96.

16. Nengeni “Ewe 2022 Repot won Ifa usun ewe Mwichefenin Jises Kraist A Tumunu Ekkewe mi Osupwang, ,” Mar. 22, 2023, newsroom.ChurchofJesusChrist.org.

17. Angei seni email seni Kinikinin Misineri non Sept. 14, 2023.

18. Nengeni “Tetenin Tempel,” ChurchofJesusChrist.org/temples/list.

19. Angei seni email seni Rekotun Chon mwichefen me Mwokutun mwichefen non July 28, 2023.

20. Ei mi pachenong Brigham Young University, Brigham Young University–Idaho, Brigham Young University–Hawaii, Ensign College, and BYU–Pathway Worldwide.

21. Angei seni email seni Seminaries me Institutes non July 28, 2023.

22. Nengeni General Handbook, 34.3.1

23. Preseten Dallin H. Oaks a aporousa ei porous usun epinukunuk non ewe Samon: “Inei we mi mano punuwan a anisi noun kewe unumon semiriti won niwinin mi [kukkun]. … Ua eisini inei we pwata a monatiw watten eu-ne-engon seni niwinin we. Use tongeni monukano an we awewei: ‘Dallin, meni mi wor ekkoch aramas ra tongeni tufich nge rese monatiw ar eu-ne-engon, nge kich sise tongeni. Ewe Samon a finata an epwe angei semom we me nikitieino ai upwe tumunu kemi. Use tongeni fori ena me nukun ekkewe feioch seni ewe Samon, me ua angei ekkana efeioch ren ai monatiw ew wenecharen asoren eu ne engon’” (“Tithing,” 33).

24. “Pwe seni ai tumunoch, inamo ewe riaffou minne epwe feitiw womi, pwe ewe mwichefen epwe uta won an nap seni meinisin man me aramas fan ewe muun selestial” (Doctrine and Covenants 78:14).

25. Seni pusin porous seni Charlotte Hlimi Martin, Aug. 30, 2023.

26. Doctrine and Covenants 1:30

27. Foffor 5:38–39

28. Russell M. Nelson, “Overcome the World and Find RestLiahonaNov. 2022, 95.