Muun Ning
Mi wor Samach won Nang mi tong ewe epwe tumunuochu pwe sipwe angei meinisin efeioch me tufich minne ach pusin mochen me finata epwe mutata.
Chon Ewe Mwichefenin Jises Kraist ren Aramas mi Pin non Fansoun Soponon ra soun rong ei kapaseis, “Ifa ussun om mwichefefn a sokono seni ekkoch namanam? Me nein ponuen kewe kapas eis sia awora ina ewe unusochun ewe nongonongen Jises Kraist. Akauchean me nein ena annuk ina ewe ennetin pwe Samach won Nang a fokkun tongei meinisin Noun semirit iwe I a mochen kich meinisin sipwe nom non ew muun ning esemuch. Me pwan, I a mochen kich sipwe nom ren I me Noun we Jises Kraist, feinfeino. An kokkot a ngeni kich ekkewe afanafan me tufich ach sipwe fini met epwe ngeni kich ewe fetanin manauach me ewe manau sia finata.
I.
Seni minefon pwarata sia sinei pwe ewe omuchunon fetanin manauaen meinisin mi nom won fonufan esap ewe nafangawen ekiekin nang ren ekkewe mi pung me ekkewe riaffou fochofoch ren hell fan iten meinisin. An Kot murinon kokkot fan iten Noun semirit a pachenong ei ennetin afanafan seni nouch Chon Amanau, Jises Kraist: “Non imwen Semei mi chommong neni.”1
Ewe nongonongun ren ewe Mwichefenin Jises Kraist ren Aramas mi Pin non Fansoun Soponon mi niwinsefanito a afanafana pwe meinisin noun Kot semirit—fiti ekkewe rese pachenong mi kouk ar repwe eteneki me ikei—nesoponon repwe angei ew me nein kewe unungat muun ning, pwan mo ewe kukkunun minne a “nuno seni wewe meinisin.”2 Mwirin ew fansoun non minne ekkewe mi anneasonap ra riaffou ren ar kewe tipis, minne riaffou a amonereta ren met epwe tapweno mwirin, meinisin repwe manausefan me soposopono ngeni ewe Omuchunon Kapung an ewe Samon Jises Kraist. Ikana, ach Chon Amanau mi tong, ewe, sia kaeo ussun, “a eningano ewe Sam, me tumunu meinisin angangen poun,”3 epwe tinano meinisin noun Kot kewe semirit ngeni ew me nein ekkei muun ning anongonong ngeni ekkewe mochen ra pwarano seni met ra finata.
Pwan ew auchean annuk me mokutukutun ewe Mwichefen mi niwinsefanito ina ekkewe annuk me pwon mi pwano a kawor ngeni meinisin noun Kot semirit ewe tufich mi pin ren an emon epwe tongeni fich ngeni ewe tekian kinikinin ning non ewe muun celestial. Ena tekian neni sipwe tori—manau mi tekia non ewe muun selestial—ina met ewe a nom nukanapen ekiekin Ewe Mwichefenin Jises Kraist ren Aramas mi Pin non Fansoun Soponon.
Seni pwarata non ei fansoun, Aramas mi Pin non Fansoun Soponon a wor rer ei ew sokonon wewe usun an Kot kokkoten pwapwa fan iten Noun semirit. Ena kokkot a poputa ren ach manau ussun ngun me mwen ach sipwe uputiw, me a pwarano ewe popun me nonnomun ach sai mi kefinita non ei manau me ian sia mochen no ia mwirin.
II.
Sia sinei seni pwarata iei pwe “meinisin muu mi wor ar annuk”4 me ewe muun ning sipwe angei non ewe Omuchunon Kapung a finita seni ekkewe annuk sia fini ach sipwe opuru non ach sai iei. Fan ewe murinon kokkot, mi chommmong muu—chommong neni—pwe meinisin noun Kot semirit repwe muuni ew muun ning minne annukun non ra tongeni kinamwe ne “engino ngeni.”
Nupwen sia awewei nonomum me met mi auchea ngeni ekkewe unungat muu non ewe kokkot an ewe Sam, sia poputa ren ewe a kon tekia ina ewe nukanapen ekkewe annuk mi auchea me angangepin Kot a fen pwarano seni Ewe Mwichefenin Jises Kraist ren Aramas mi Pin non Fansoun Soponon. Non ewe ningen “selestial”5 mei wor unungat kinikin,6 ewe a tekia ina manau mi tekia non ewe muun selestial. Ikeia ewe ra nom ie “ekkewe ra fen angei an we unusoch, me an ning,” ina minne, “ir kot, pwan mo ekkewe at [me nengin] noun Kot”7 me ra “nonnom me mwen mesen Kot me noun Kraist feinfeino chok.”8 Seni pwarata, Kot a fen pwarano ekkewe annuk ese much, angangepin, me pwon mi pin sipwe nenengenochu ar repwe forata manau murinno ussun Kot ewe a namot ar repwe esinna ei auchean tufich. Iei ewe nukanapen ekiekin Ewe Mwichefenin Jises Kraist ren Aramas mi Pin non Fansoun Soponon pokiten ewe popun ei Mwichefen mi niwinsefanito ina an epwe amonata noun Kot kewe semirit ren amanau non ewe muun selestial me, akkaewin, ren manau mi tekia non kinikin tekia.
An Kot kokkot, a foruta won ennet ese much, a auchea pwe manau mi tekia epwe tongeni ponueta ren chok nikitu ngeni ekkewe pwon mi pin ren ew apupunu ese much nefinen emon mwan me emon fefin non ewe tempel mi pin,9 minne opupunu epwe kawor ngeni meinisin ekkewe mi nikitu . Ina popun sia afanafana pwe “at ika nengin a ew auchean nikinikin nonomun emon me an popun ren manau me mwen ei fonufan, manau iei, me feinfeino.”10
Ew sokkonon auchean afanafan epwe anisi kich sipwe monneta ngeni manau tekia iei ewe non 1995 esinesin ngeni ewe famini.11 An esinesin a affata met ekkewe mi auchea epwe amonata kich ach sipwe nom ren Kot ewe Sam me Noun we, Jises Kraist. Ir ekkewe rese unusen weweiti an ewe Sam kokkot mi tong fan iten Noun kewe mi tufich repwe ekieki ei esinesin ngeni famini ese nap seni eu chok kapasen annuk foffor mi tongeni siwin. Sokonon, sia affata pwe ewe esinesin ngeni famini, a for me won nongonong ese tongeni siwin, a awewei ewe sokkun nefinen famini ikewe ewe auchean kinikinin ach marita esemuch a tongeni fis.
Ewe Apostel Paul a awewei ekkewe unungat kinikinin ning, a awewe ngenir ekkewe ningen akkar, maram, me fuu.12 I a eita ngeni ewe a kon tekia “selestial” me ewe oruan “terrestrial.”13 I ese eita ewe kinikin fan, nge ew pwarata ngeni Joseph Smith a kapacheta ngeni itan ewe: “telestial.”14 Pwan ew pwarata a pwan awewei nonnomun ekkewe aramas repwe fin ngeni ew me ew ekkewe muun ning. Ekkana rese fini “ne aponueta ewe annukun ew muun selestial”15 repwe angei pwan ew muun ning, kukkun seni ewe seletial nge ochu ngeni ekkewe annuk ra fen finata me tongeni kinamwe ne “engino ngeni.” Ena kapas engino ngeni, a soun nounou non ekkewe pukefel, wewen ew ennetin nenian.17 Awewe ren, ekkana non ewe muun terrestrial—a wewe ngeni ewe itefounon ekiek ussun nang—“ir ekkewe ra etiwa nonnomun ewe Nau, nge rese etiwa unusochun ewe Sam.”17 Ir “aramas och seni fonufan, ekkewe ra mesechun ren ewe nikotuputup”18 nge “rese pworacho non ewe kapasen pwarata ussun Jises.”19
Ewe pwanon anapanapen ekkana ra ewis ngeni ewe kisin me nein ekkewe muun ning, ewe telestial, ina “i ewe ese tongeni engino ngeni ew ningen terrestrial.”20 Ena a awewei ekkana rese etiwa ewe Chon Amanau me rese apwonueta koukun nang. Iei ewe muu ikewe ekkewe mi manauangaw ra nonnom ie, mwirin ra fen riaffou ren ar tipis. Ekkei mi awewetiw non pwarata ikenai pwe “ir ekkewe rese angei ewe kapas allimen Kraist, me ewe kapasen pwarata usun Jises. …
“Ekkei ir ekkewe mi chofona, me sou pwe, me chon nisou, me amomo inisir, me ion a sani an epwe forata mi mwaken.”21
An kapas ussun ekkewe unungat muun ning fiti an ewe nemesepwi, Preseten Russell M. Nelson a chok karan makkei: “Manauen won fonufan ew mwochomwochen fansoun anonou fengeni me manau ese much. Nge met ren auchean ei mochomochen fansoun! Nenengenochu ifa ussun an angang: Non fansoun ei manau iei kopwe fini menni annuk kopwe mochen anneasosichi—ekkana ren ewe muun selestial, ika ewe terrestrial, ika ewe telestial—iwe, ren ena, menni muun ning kopwe nom feinfeino. Ei kokkot mi amwarar! Ew kokkot a unusen afona om pungun finata.”22
III.
Ewe Aposel Paul a aiti kich pwe an ewe Samon kewe afanafan me annuk ra kawor pwe meinisin sipwe tori “ewe ukukun manau an Kraist mi unusoch.”23 Ena angang a namot epwe nap seni chok ach angei tipachem. Ese mo nge naf ach sipwe chok sinei usun ewe kapas allim; sipwe anganga pwe sipwe siwinino ren. Non sokofesenin ekkoch afanafan, minne a aitikich ach sipwe sinei och mettoch, ewe kapas allimen Jises Kraist a okkuf ngenikich ach sipwe winiti och mettoch.
Seni ekkena afanafan sia apungano pwe ewe Omuchunon Kapung esap chok ew minen chekin ew ukukun kapachen foffor murinno me fofforungaw—met sia fen fori. A anongonong won amuchunon pungunon ach foffor me ekiek—met sia fen winiti Sia tufich ngeni manau esemuch seni ewe angangen ekkesiwin. Ussun nounoun me ikei, ei kapas mi chommong wewen a pwarata ew anononun ekkesiwinin fonufan me masowan. Ese naf ren an emon epwe chok fiti mokutukutun. Ekkewe annuk, me angangepin, me pwon mi pin ren an ewe kapas allim esap ew tettenin mettoch sipwe wanong non ach nenien isois non nang. Ewe kapas allimen Jises Kraist a ew kokkot a pwar ngeni kich ifa usun sipwe winiti met Semach won Nang a mochen sipwe winiti.24
IV.
Pokiten Jises Kraist me An ewe Achasefan, nupwen sia tur non ei manau, sia tongeni aier me fiti sefani ewe anen pwon ewe a emwen ngeni met Samach won Nang a mochen fan itach.
Ewe Puken Mormon a afanafana pwe “ei manau ina ewe fansoun ren [kich] ach sipwe amonata ach sipwe churi Kot.”25 Nge ena sossot mi kouk ngeni “ei manau” a kawor ew nonomun epinukunuk (mwaren ngeni ekkoch aramas) seni met ewe Samon a pwar ngeni Preseten Joseph F. Smith, iei a makketiw non Doctrine and Covenants kinikin 138. “Ua nengeni,” ewe soufos a makkei, “pwe ekkewe elter mi tuppon ren ei kinikinin fansoun, nupwen repwe no seni ei manau, repwe sopweno ar angang non afanafanen ewe kapas allimen aier me ngaseno, seni ewe asoren fangeno an Noun Kot ewe Anamon, nein ekkana ra nom non rochopwak me fan nemenien tipis non ewe fonufanen ekkewe ngunun mi mano.
“Ewe mi mano a aier epwe ngaseno, seni anneasochis ngeni angangepinin ewe imwen Kot,
“Iwe mwirin ar moni niwinin ar atai annuk, me ra nimenimoch, repwe angei ew niwin anongonong won ar angang, pun repwe angei angangen amanau”26
Pwan kapachetan, sia sinei pwe ewe engorou ier, ewe ngoroun ier a tapw mwirin ewe Oruen Niwinsefaniton ewe Chon Amanau, epwe ew fansoun ach sipwe fori ekkewe angangepin mi auchea ren ekkana rese mo angeir non ar fansoun manau.27
Mei chommong met sise sinei ussun ekkewe unungat watten fansoun non ewe kokkotun amanau me nefinar fengen: (1) ewe fonufan nenien ngun, (2) manau iei, me (3) ewe manau mwirin. Nge kich mi sinei ekkei ennet ese much: “Amanau ew aurek pusin an emon aramas, nge manau mi tekia an ew famini aurek.”28 Mi wor Samach won Nang mi tong ewe epwe tumunochu pwe sipwe angei meinisin efeioch me tufich minne ach pusin mochen me finata epwe mutata. Sia pwan sinei pwe I esap oumwesi emon an epwe tonong non ew riri ngeni emon esap pusin mochenin. Ekkewe efeiochun riri fengenin marar epwe chok fis fan iten meinisin ion mi aponueta ar kewe pwon mi pin nge esap ren echimw an epwe fori angangen riri fengeni marar won pwan emon ese nimenimoch ika ese mochen.
Pwi me fefinei achengicheng, Ua pwarata usun ennetin ekkei mettoch. Ua pwarata ussun ach Samon Jises Kraist, “ewe chon makkei me chon awesano ach nuku,”29 ewe menne an Achasefan, fan ewe kokot an Samach non Nang, a fori meinisin ana epwe tufich, non iten Jises Kraist, amen.