Amemefin ewe Ngun
Ewe chiechioch ngeni ewe Ngun mi Fel ese tongeni sisiwin ina ew watten nifangen ngun Aramas mi Pin Non Fansoun Soponon ra pwapwaiti.
Nepoputan
Ekis fansoun a no, chon sani katon urumotun fonufan a fot won ewe 2023 an Fefin Ekemisin Urumot non Fonufan a emwen seni Australia me New Zealand. Ekkewe mi angoch chon urumot non fonufan ra tupuni nap seni 200 timen fonu seni ekis meinisin won fonufan ra pwomweni ar pochokun, angang weires, nipwakoch, me weweiti ussun urumot ar ra ekemis ngeni an fonufan ewe kutten nampa ew ren soccer.
Sia ingeno ren ekkewe chon mokutukut non chommong urumot me ekkoch pekin kaeo ngeni ion a tikeri ewe kinikinin urumot a kon tekia. Sia kapas usun ar nifangen nipwakoch a kawor me ren Kot. A pachenong ekkewe ra ani nifangen angoch non pekin poruk, gymnastic, koon, chunga, urumot, non pekin math, science, me pwan ekkoch. Emon me emon sokkun aramas a pwarano pomwen ekkewe nifang me ren Kot ekkewe ra murinono me unusochuno seni fansoun taman ar angang pekus, kaeo, me fori mokutukutun iteitan. Nifang a kawor me ren Kot a fori aramas repwe feioch.
Anganga Nifangen Ngun
An nenengeni mettoch me ren ewe kapas allim, Kot a efeiochu Noun semirit ren chommong nifangen ngun, a forir repwe aramas mi feioch non pekin ngun. Memper ren ewe Mwichefen chon apwonueta pwon mi pin ra angei ekkewe nifangen ewe Ngun, pachenong ewe nifangen kapasan pwarata ren Jises Kraist pwe ach Chon Amanau, ewe nifangen ewe Ngun mi Fel, ewe nifangen nuku ne achikara me chikareta, ewe nifangen tufichin apungu fiti mochenin Kot, ewe nifangen angei manaman, me ewe nifangen mirit me tipachem.1 Ewe Samon a tungor sipwe achocho me kutta ekkewe niffang ra kon murino, pwan nifangen ngun. A fang nifangen ngun an epwe afeiochu kich me aia ne afeiochu ekkoch.2
Niwin ngeni ach we kapas awewe usun chon urumot mi angangoch, mi auchea sipwe chechemeni pwe ew chok nifang esap wewen sipwe angangoch non. Amwararen nipwakoch mi chok pusin wor inamo ika, a fis seni watten tumunoch me weiresin kaeo me angang weires me achocho minne chon pomweni ra aochueno me ounusano ar angangoch ne tori ar watten kinikinin tipachem. Pwan mo ekkena niffang sia angei me suki fan chommong ra fiti ekkewe anuokusun kapas “kopwe apacha fengeni.”
Usun chok, Uwa fen kuna ew weiresin kaeo mi chiechi ngeni nifangen ngun. Angangen nifangen ngun apwan riri ngeni angang non pekin ngun. “Fan emwenien ewe Ngun mi Fel non manauomw epwe fiti angangen ngun. Ei angang mi fiti ennetin iotek me kakaeo pukefel. A pwan pachenon apwonueta ami pwon mi pin me an Kot annuk. … A pwan fiti nimenimoch ne angei ewe sakrament iteiten wiik.”3
Met ewe uwan anganga nifangen ngun? Ir mi pachenong memef seni ewe Ngun ewe a anisi kich sipwe kuna sokopaten mochen me pwar ngeni kich met sipwe fori me apasa—feiochun kinamwe me ourur. Nupwen sia rong me fori angangen memefin Ngun, ewe Ngun mi Fel epwe anapano ach tongeni me tufich an epwe nap seni met sia tongeni fori won winikapach. Ekkei auchean nifangen ngun repwe anisi kich non meinisin sokkun napanapen non manauach.4
Ewe chiechioch ngeni ewe Ngun mi Fel iei ew watten nifangan ngun Aramas mi Pin Non Fansoun Soponon ra pwapwaiti.
Ifan auchean ei niffang? Preseten Russell M. Nelson a ponuweni ei kapasais nupwen a apasa pwe “Non ekkewe ran epwe feito, esap tufich sipwe manau ren ngunuch ika esap wor emwen, nemenem, echip, nonnomochun ewe Ngun mi Fel fansoun meinisin.”5
Ifan usun ach sipwe etiwa me Asina ewe Amemefin ewe Ngun.
Atun ai we afanafan, uwa kuna pwe napengeni meinisin ra mochen sinei ifan usun repwe etiwa me asina ekkewe amemefin ewe Ngun mi Fel. Amemefin ewe Ngun ra tongeni monomon me feito non sakopaten napanap. Inamo, ika kich, sia feioch ren ekkewe kapasan nouch soufosun, nom me ikenai, ra ngeni kich auchean esisin ren ifan usun sipwe angei emwen seni ewe Ngun.
Mut ngeniei upwe ngeni kemi ruwanu nongonongun emwen epwe anisikemi ami oupwe etiwa me asina ekkewe memefin ewe Ngun.
Uta non Neni mi Pin
Ewe ewin kopwe utta non neni mi pin.6 Iwe chok ekiseno ua fiti sukkun ewe Tokyo Japan Tempel. Ponuen ekkewe auchean tingor ra titino ngeni ir mwe ruu media me VIP wasona a nununo auchear. Fite puku ra pachenong non ekkei pekin katon fetan non tempel. Wasona ra ingeiti ningan non ewe tempel, fiti atetenin me aning non anononun, erenian chon Sapan. Memefin tong nge pwan ewe mosonoson me napanapen osufonoch a etto seni kewe wasona nupwen angangepin ren kewe neuo ra awewei me non ruum ikewe epwe fis ie. Nge ewe a kon ku netip ekkewe amemefin ewe Ngun.
Non ew atun ren emon amwararen chon angangen kofemen a chok moch non ai ekiek. Mwirin ew fansoun iotek non mosonoson non ewe celestial rum, anonoun memef a ku netipan a mongunungununong non seningei, “Pwan mo ewe asapwan u ngaseri non ei rum mi sokono memefin.” Uwa asina pwe a sotuni ne anapanapa ewe memefin ewe Ngun mi Fel mi nom, minne, ewer, a nonom non neni mi pin. Ika ka anean kopwe mefi ewe Ngun, nom non ew neni ikewe ewe Ngun a mecheres epwe nonnom ie.
Ach tempel me imwach ir mi wesewesen pin me nein ekkei neni mi epinipinino. Non a fokkun mecheres ach sipwe etiwa me esinna ewe Ngun. Ekkoch neni mi pin a pachenong nenienmwich, nenien siminari me sukun, me Mwichefen nenien Uruon Mwichefen me nenien ekkewe chon chuto. Uta non neni mi pin.
Uta ren Aramas mi Pin
Oruwan, uta ren aramas mi pin. Upwe anapanapa ewe oruwan nongonongun emwen fiti pwan ew achechem.
Usap tongeni monuki ai fiti non ew chufengen a fis non ew itefounan nenien urumot. Fan chommong, ei nenien urumot a uruno ren chon katon ra amweira ar teamen urumot me ngaari chon ewe ew team. Nge non ei pwinin, ewe enienin a fokkun sokono. Ewe nenien urumot a ur ren ngeroun serafon aramas ra chufengen ne asufonu me achechema manauen ewe Soufos Joseph Smith. Ar sufon, noukukun; kinisou; me anononun iotek a ourana ewe nenien urumot ren ewe memefin ewe Ngun mi Fel. Ua tongeni kuna me won mesemeser. Iei ewe niffangen ewe Ngun mi Fel non mokutukut, a apungano ewe kapasen pwarata usun Joseph Smith me ewe Niwinsefanito.
Ewe Ngun ese tongeni ouku seni an epwe fiti ew chufengenin ekkewe aramas mi pin. Ika ka anean kopwe mefi ewe Ngun, nomw nein aramas ian epwe mecheres ewe Ngun epwe nomw ia. Ewe Chon Amanau apasa non ei ititin: “Pun ian ruemon ika unumon ra chufengen non itei, Ngang uwa nomw neir.”7 Ren serafo, ekieki ami chufengen ren aramas mi pin: mwicheich me klas, FSY me siminari, an wart me steik urumot—me mwichen konun wart. Fini kopwe fit nein aramas me no ngeni neni ian nimenimoch a nom ia. Kutta om pochokun non chommong aramas. Kutta chiechiach mi murinno. Kopwe chiechioch. Aninis fengen ian chok kan nom ia. Uta ren aramas mi pin.
Pwarata usun Ennet mi Pin
Aunungat, pwarata usun ennet mi pin non fansoun om tongeni. Ewe Ngun mi Fel fansoun meinisin a ngeni kich An mongungu nupwen sia pwarata ren pusin neuwach. Ewe Ngun a awora nonnopokun pwarata ngeni ewe chon kapas me chon rongorong.
Uwa chemeni atun uwa fiti ew 45-minits sein taxi non New York City. Ren ewe murinon aporous ussun ewe kapas allim me ewe chon uwei ewe taraku non ewe ukukun ua sa ngeni ewe airport, ua moni neminewe me amonata ai upwene tou seni ewe taxi. Mwirin uwa chemeni pwe usemo awora ew kapasen pwarata ren met uwa fen aporousa ngeni. Kauno, uwa apasa ngeni ew mecheresin, mochomochen kapasen pwarata, etiwa ewe Ngun, me aworato an epwe osuru chonun mesem me ruemon.
Nupwen ka kutta me angei ekis fansoun ne apasa om kapasen pwarata ngeni ekkoch, ka tongeni afisata fansoun kopwe asina ewe Ngun reom pusin.
Ausening ngeni ewe Ngun Mi Fel
Ewe saingon nongonong kopwe ausening och ngeni ewe Ngun mi Fel. A tongeni emweni kich fansoun meinisin nge a kapas non pwepwete, noukukun. Ewe soufos Elijah a kuna pwe mongungun ewe Samon ese nom non ewe asapwan, ewe chechin fonufan, ika ewe akkei nge ren “ew kukun mongungu.”8 Esap “ew ngingin pungun pach” nge fen “ew neukukunun mongungu mi unusoch pwetete, usun nge ita ew mongunungun” iwe nge a tongeni “pwereni non inis.”9
President Boyd-K. Packer apasa: “Ewe Ngun ese pupuchor ne kuta kich ika uchiki kich ren efoch choun pau. Nge a mongunungun. A attap non pwetete pwe ika sise ateneki sisap tongeni mefi.”10 Uwa fen asina pwe fan ekkoch An mongungu ese kon fatoch, are ngang mi ekis osukosukuno, emon atongeei a wisen niapeni fan itei. Fan chommong ewe mongungun ewe Ngun mi Fel a toriei seni punuwei we, Lesa. Sam me inn ika meinap mi tuppon ra tongeni angei mongungun emwen fan itemi
Ewe akurang, puchor, me anini fengen non ewe fonufan a tongeni akufu mosonoson nuwan memefin ewe Ngun mi Fel. Kutta ew neni mi mosonoson, ew neni mi pin ian kopwe tongeni kuna me angei emwen seni ewe Ngun.
Ekkoch Kapasen Aurour
Nupwen ka apiru ekkei nongonong ne etiwa me asina ewe Ngun, ekieki kewe kapasen aurour me emwen.11
Apungano ami memefin ewe ngun. Ren awewe, memef seni ewe Ngun a wenengeni ekkewe pukefel me afanafan an nouch soufos mi manau.
Kopwe tumunochu pwe ekkewe memef ka angei a nono ngeni wisom. Tiwenon chok ika ka kokko me ren pungun wis, memef seni ewe Ngun esap kawor ngonuk om kopwe fonou me apungu ekkoch.
Mettochun Ngun ese tongeni epwe oumwesimwes. Ka tongeni anganga ew mokutokut me ew neni epwe wor ketiwen ewe Ngun, me ka tongeni omonata inisum, nge kese tongeni kapas ifa ussun ika inet epwe wor mwasangasang . Kopwe tipepos me nuku pwe kopwe angei met a auchea ngonuk nupwen ewe fansoun epwe pung.
Pusin aia om tipachem. Fan ekkoch sia mochen ewe Ngun epwe emweni kich non mettoch meinisin. Nge, fan ekkoch ewe Samon a mochen sipwe aia ach tipachem me ren Kot me foffor non napanap minne mi nikitu ngeni ach weweoch. Preseten Dallin H. Oaks a aitikich:
“Ew mochen epwe emwen meren ewe Samon ina ew pochokun, nge a auchea epwe chiechifengen ren ew wewe pun Semach won Nang a nikit ngeni kich chommong mettoch sipwe pwisin finata ren pusin ach mochen … Aramas ra sotuni ne omokutu meinisin pekin finata ngeni ewe Samon me tungor fan iten pwarata non meinisin finier repwe mwitir kuna mettoch non minne ir ra iotek fan iten emwen nge rese angei. …
“Sipwe kaeo ekkewe mettoch non ach ekiek. … Mwirin sipwe iotek ren emwen me mokutukut won. Ika sise angei emwen, sipwe ne pusin mokutukut won ach pusin memef”12
Asopwano fiti ew Tingor
Non soponon, Aramas mi Pin mon Fansoun Soponon repwe angei feiochun ar aponueta ekkewe annuk. Ikamo, a nomono fan iten emon me emon kich ach sipwe kutta ne omokutu ach nifangen ngun iwe mwirin tingor me kaeo kopwe esina amemefin ewe Ngun. Ruwanu nongonongun emwen an epwe anisi kich non ei auchean fori mettoch non pekin ngun ir:
-
Uta non neni mi pin.
-
Utta ren aramas mi pin.
-
Pwarata usun ennet mi pin.
-
Ausening ngeni ewe Ngun mi Fel.
Ami tongeni ne etiwa me asina mongungun ewe Ngun a marita ekis me ekis. “Fetan ngeni sipwe mecheres ne asina ewe kapasen ewe Ngun a usun ach kaeo ew fosun ekis. Ina ew foffor mi fifis ewe a namot epwe wor achocho, me engino.”13
Niwinsefan ngeni ian sia poputa me ia, ouse mochen chechemeni pwe Aramas Mi Pin Non Fansoun Soponon ami mi feioch. Ekieki ei neni ussun ngang mi fen sinei ei Raninifen ranin echikepin a fis ie, iwe chok ekiseno ua anapanapa ngeni ei. Emon kukkun semirit, a utta won efoch nenien mot ese wor nenien ach sipwe aunakicheno won, a chok ekis pwa me asen ewe nenien afanafan. Saman we a utta unukun, an epwe awora kapasen pesepes me anisi ren pweteten mongunungun ngeni seningan nupwen a pwapwa ne apasa, “Ngang emon noun Kot.”
Ewe kapasan pwarata mwirin a tapweto seni emon sarafo nipich ewe a poputa ne nuokus chech nouwan: “Ua anean amo a wor emon epwe mongunungununong non seningei usun ena.” Iwe i a mwitir mefi mokutokutun memef me pwarata, “Mi wor emon a mongungu non seningei usun ren—ewe Ngun mi Fel!”
Ua awesano ren ew kapasen tingor akaewin ren meinisin sarafo! Chommong neimi ouwa poputani ami ran ren ami utta me mwen ew kinas. Nesor, ei wik, ei ier, iteitan, kouno nupwen ka atonok pusin non ewe kinas. Ekieki ngonuk, ika nouomong ne apasa ika ke mochen, “Ionee, nengeni ei! Ngang mi murino! Ngang Emon Noun Kot! I a sinei ei! I a tongei ei! Ngang mi feioch—feioch ren ewe Ngun mi Fel i chiechiei fansoun meinsin!”
Uwa apachata ai kapasen pwarata ngeni kemi, Aramas Mi Pin Non Fansoun Soponon mi feioch usun Kot ewe Sam, Jises Kraist, me ewe Ngun mi Fel, ewe a pwarata Usur. Non iten Jises Kraist, amen.